আযোদিয়ৗ বুরু চট্ রে ঠুড়গৗ প্রকল্প

আযোদিয়ৗ বুরু চট্ রে ঠুড়গৗ প্রকল্প

কিস্কিন্ধ্যা মুরমু

আযোদিয়ৗ বুরু ! আজম লেখানগে ঝালকাও রাকাব-আ মেৎ মনেরে হৗরিয়ৗড় দারে নৗড়ি ঝারনা গাডা বির পাকাড়। সান্তাড় হপনাঃ জানাম তরা খনগে সৗগৗয় জড়াও মেনাঃআ। রড় সেরেঞ গাঃগাবান মেনাঃ আ --" আযোদিয়ৗ বুরুরেদ তিরয়ো বানাম সাডে কান ,ইঞৗ জিউয়ী লঃ লেকা বানাম সাডে কান ; বুরুরে  সারজম সাকাম চিঠি পিয়োঞ অলামা ,ইঞা জিউয়ী লঃ লেকা আলম বানামা। " --- ( সহরায় সেরেঞ ) " আযোদিয়ৗ সেন্দরাদ বৗইসাখ বঙ্গা কুনৗমিরে , লে জুরি লেহঃ জুরি আলম চালা-আ ,পাসেৎ জুরিম ঞুরু তিঞ কুল-বানা মচারে , হৗলি বয়েস রেগে জুরিম রৗডি কৗঞারে। পিয়ো  চেড়েয় পিয়োয় রেদ বহঃ সিঁন্দুর আরুবমে , কুহু চেড়েয় কুহুয় রেদ কয়ঃ হরিঞমে।" --- (সহরায় সেরেঞ )   

খদা  মেসা মেনাঃ অনতর জিউয়ী মনেরে সুতৗন টৗন্ডি ,গল বুনুম্ ,সিতৗ ডৗডি, মারাঃ বুরু ,ধিরি চাটানি ,আয়মা সেনতে লিগিন্ ঝারনা গাডা। মেৎ তেম ঞেলা বির বুরু দারে  হৗরিয়ৗড়, লুতুর তেম আজমা নানা হুনৗর চেঁড়ে চিপুরুৎ কওয়াঃ রাঃ আড়াং । জিউয়েৎ জিউয়ীরে ঞেল জং লেকান সাচারহে ।      

     

আযোদিয়ৗ বুরু দ আদিবৗসি সানতাড় কঃআঃ মিৎ ঞুম হালাং ঠাঁও। নঁডে মেনাঃ আকাদা যতকতে ৮৫ গটাং আতো টোলা বৗসতি। ৮৫ গটাং আতো টোলা রে যতগে আযোদিয়ৗ বুরুরে মেনাঃ ঝারনা গাডা দাঃ ঞু জম কাতে নিরৗয় কো খানডৗউয়েৎ কানা। ঝারনা গাডা ক মুদরে বামনী,ঠুড়গৗ,বান্দু,কাঁঠালজোল। আযোদিয়ৗ হড়ম কড়াম তালাতে লিগি আঁড়গ আকানা। নওয়া ক খনগে 'বামনী ঝারনা গাডা' দ আৎ সৗরি আকানা ২০০৭ সালরে। অজে দ, নওয়া বামনী ঝারনা গাডা এসেৎ কাতেগে বেনাও তেয়ার রাকাব আকানা - - - " পুরুলিয়ৗ পাম্পড স্টোরেজ প্রোজেক্ট " (পি পি এস্ পি )। ২০০৮ সাল খন লেতাড় ৯০০ মেগাওয়াট বিজলি বৗতি জুলুঃ দাড়ে বেনাও কানায়।   প্রোজেক্ট তেয়ার রাকাবরে বামনী ঝারনা গাডা সুমুং দ বাং আৎ সৗরি আকানা ,বাং বাং কাতে রেহঁ পে' লাখ লৗটু লৗটু দারে নৗড়ি মাঃ উজৗড় আকানা। তুরুই গটাং বুরু সাঁওতে আয়মা লেকান জিবৗ আর মৗনমী ফুরগৗল মনেতে বাঁনচাও তাঁহেন বির বুরু ঠাঁও ।

পি পি এস পি ,অরাসরাগে পে'য়া প্রকল্প বেনাও রাকাব রেনাঃ কাথা ঠাড় গটা আকানা ,অনা ক মুদরে মিৎ টাং হুয়ুঃ কানা - - " ঠুড়গৗ পাম্প স্টোরেজ প্রকল্প " (টি পি এস্ পি )। ঠুড়গৗ ঝারনা গাডা লিগিন দাঃ বেওহার কাতেগে বেনাও রাকাব-আ নওয়া প্রকল্প। বেনাও লেনখান উনুমঃ আ বির বুরু, ডুবুচ্-আ বির গাজাড়। উনুম আদঃ বির বুরু মুদ রে  মিৎটাং হুয়ুঃ কানা 'মারাং বুরু ' ঞুতুমান বির। মাঃ উজৗড় /ডুবুজঃ-আ ২৯৪ হেক্টর  অৎ  হাসা রেনাং আয় উমৗন  পে লাখ  দারে। ঠুড়গৗ ঝারনা গাডা  দাঃ ঞু জম কাতে বানচাও মেনাঃ কওয়া অৗডি লেকান জিব জিয়ৗলি। সুর সুপুর বির গাজাড়রে ডেরাডৗড়ি কাতে তাঁহেনা ক পালপাল হৗতি। জিউয়ি নিরৗয় খানডাঃ কান তাকোওয়া বারেলহর , রাঙ্গা, টৗড়পৗনিয়ৗ ,তেলিয়ভাসা লেকা অৗতু অড়াঃ গিরৗবৗসি মৗনমি ।     

  

 West Bengal State Electricity Distribution Company Limited .(WBSEDCL) আঁগিভারে এমা আকাদেয়াJapan International Cooperation Agency (JICA). Electric Power Development Co. Ltd (J-Power).পছিমবাংলা রেনাং পুরুলিয়ৗ জিলৗরে নাপায় কেটেচ্ তে বেনাও রাকাব খৗতির ২১৯২২.৯০ কোটি টাকায় এমঃ হেঁ হুমৗন আকাদায়। ১০০০ মেগাওয়াট বিজলি বৗতি জুলুঃ দাড়ে (বিদুৎ) তেয়ারঃ -আ যসে দহ আকাদা ।    

পি পি এস পি বেনাও এনা 'আয়ো দেয়া' আযোদিয়ৗরে উন খন নেতঃ ধৗবিচ্ তে অনকানাঃ উৎনৗউ দ মেৎরে বাং পাড়াও আকানা । যাঁহালেকা বেনাও রাকাব খৗতির ঞেল উরুম বির বুরু দারে নৗড়ি উজৗড় এনা অনা দ তিস হঁ বাং রুওয়ৗড়া । নালহা তুমৗলঃ আপাসুলঃ লৗগিৎ অনকা লেকা সান্তাড় হড় ক দাও বাক ঞাম আকাদা। অকা ঘৗড়ি চাষতে আরজাও ধন ,বাংখান মেরম ভিডি গৗই ডাংরৗ ,বাংখান বির রেনাং রহড় সাহান কিরিঞ-অৗখরিঞ কাতে দিন কদ লেঞ পারম চালাঃ কানা । যাঁহারে বিজলি বৗতি জুলুঃ দাড়ে উবজনঃ কানা অনা আযোদিয়ৗ আতু টলা করে নিৎ হঁ আদম কদ ঞুৎরে মেনাঃ কওয়া। বিন কৗউডিতে বৗতি ক জেরেৎ দাড়েয়া কেয়া। মেনখান অনকাদ বাং হুয়ুঃ কানা। লেঙ্গা তিতে প্রকল্প তেয়ার রাকাব খৗতির যাঁহা লেকা চালাও আকানা অনকা দ জজম তিতে বাক ঞাম রুওয়ৗড় আকাদা। ঠুড়গৗ প্রকল্প বেনাও ফেড়াৎ খনগে আযোদিয়ৗ বুরু চটরেন হন-হপন কদ উনাং রৗস্কৗ রেদ বৗনুঃ কওয়া । রদনঃ রেনাং চিতৗর ফুটৗও রাকাব আকানা অড়াঃ ভিৎ কাঁৎরে - - - "অযোধ্যা পাহাড়ের প্রাকৃতিক পরিবেশ ধ্বংস করা চলবে না।"  আর হঁ "আমার তোমার সবার দাবি, ঠুরগৗ, বাঁন্দু, কাঁঠালজল প্রকল্পে লাগাও চাবি ।"

ঠুড়গৗ প্রকল্প বেনাও রে লৗয় আকানা চেতান আর লাতার বারয়া মিৎকাতে দাঃ তল দহয় ঠাঁও ১২.৬৬কিলোমিটার আর চেতান তল গাডা রেগে অৎভিতিরে "পাওয়ার হাউস"বেনাঃআ।ঠুড়গৗ ঝারনা গাডা রেগে ৩২মিটার জেলেঞ 'রক-ফিল ' দাঃ তলগঃআ। চেতান উতৗর দাঃ তল জমিদার এলেখা দ ৮.২৯km2হুয়ুঃ আন । নাওয়া দ নিৎ মেনাঃ ঠুড়গৗ গাডা বৗড়তি হঁ হুয় দাড়েয়া-আ। চেতান আর লাতার বানারেগে ৬৪মি.উসুল হুয়ুঃ আন ।    চেতান তল গাডা খন পাওয়ার হাউসরে দাঃ বারয়া ৬১৮মিটার জেলেঞ হেড্রেস টানেল আর বারয়া ২২৪মিটার জেলেঞ আর হঁ ৯ মিটার গাঁডে মেড়হেৎ সাঁওতে ' 'পেন স্টক ' তালাতে দাঃ লিগিনা। পাওয়ার হাউসরে বারয়া' টেরেস টানেল' তালাতে লাতার তল গাডারে দাঃ আড়াঃ গিডি কাঃ-আ। অনাদ ৭মিটার আর ১০ মিটার হুয়ু আ । বুলেট লেকা ঞেলতে পাওয়ার হাউস দ ১৬০মিটার জেলেঞ ,২৫ মিটার অসার ,৫৫মিটার উসুল বেনাঃআ। বারয়া ভেরিয়েবল স্পিড ,বারয়া ফিক্সড স্পিড পাম্প ,টারবাইন ভাটিকাল সাফ্ট রিভারসিবল পাম্প টারবাইন ইউনিট সাঁওতে জড়াও তাঁহেনা ।     

ঠুড়গৗ গাডা দাঃ তল এসেৎ আ বৗড়তিয়া দ চেতান তল গাডারে পাম্প রাকাব আ। যাঁহা তিরেম মনে উনগে বেওহার গানঃমা। কারবৗরিয়া ক বাড়ায় হচ আকাদা বাংমা দিনৗম মড়ে ঘন্টাতে ১০০০ মেগাওয়াট (বিদুৎ) জুলুঃ বিজলি বৗতি দাড়েয় বেনাও কেয়া ।         

আদ উয়হৗর কাতে ঞেলমা নুনৗং গান ঠাঁও এ এসেৎ এদা বুরু টঠা রেনাং। আদ অডেরেন জিব-জিয়ৗলি দারে অৎ রেক তাঁহে কান অকা ক চালা আ ? নংকাগে ডেরা তাঁহেন ঠাঁও জমাঃ ক চাবাঃ কান খৗতির সেরমাগে হৗতি কদ আতো অড়াঃ সেনক হিজুঃ কানা ,খৗরৗয় মুরৗয় হুড়ু ক জম এদা , সামাংরে ঞামেৎ  হড় কহঁ লেবেৎ তাড়গম হচো কানা। প্রকল্প  বেনাও রাকাবরে আয়মা দারে মাঃআ , আয়মা উনুম ডুবুচঃ আ। বিররেন হড় হপনাঃ চাষ আবাদ অৎ হাসা চালাঃআ। ঠুড়গৗ প্রকল্প হুয় লেনখান - - -হরিণ,সূর্যমুখি,হৗতি,কুলৗয়,তুয়ু,রুডৗ,বির ডাংরী,বির কাডা ,বির শুকরী,বানা,বডা বিঞ,চেমেঞ,খিকড়ি,হৗড়ু ,গৗড়ি,তরহৎ ,অজগর বিঞ , অৗডি লেকান বিঞ কিদিঞ ,ঞুতুম বাং বাড়ায় আয়মা লেকান পিপিড়জাং ।       

 চেঁড়ে ক মুদরে- মারাঃ, কুড়িৎ, পাঝাড়, মিরু, ভরলিং, বির সিম, চিতরী, কয়েল , আসকাল, জিহু, বুলবুলি ,ফুচি, পাতটিপি, গুতরু, মাছরাঙ্গা, বারমেসা, পতাম, হুহৗড়, কিসনি, কৗহু, ঢিপচু, বুড়ি মাসকাল, হুকের, গাডা চাঁঙ্চির, বুড়ি উড়িৎ, এরে, কাঠঠোকরা, কগ্ , কৗরিকুরি , অড়ে কুইলি, আর হঁ আয়মা লেকান চেঁড়ে চিপুরুৎ।       

      

উজৗড়ঃআ জ-বিলি দারে নৗড়ি -- তেরেল, তারপ, বৗরু, সিঁজ্, জাম, কাঁড়য়ের, কুড়িৎ রামা, জজ, পাকাড়ে , লওয়া, পড, লামাঃ, কুজরী, বির কুন্দুরী, ঘি কারলা, মধু মোম, আমড়া, বিরজু, আয়মা লেকান জ বিলি দারে নৗড়ি ।        

বির বুরু খন ঞামঃ কান বেওহার তেনাঃ। যাঁহা দ জিউয়ী খানডাও রে লৗগিমান এনেম মেনাঃ আকাদা। অনা কদ হুয়ুঃ কানা .....সারজম সাকাম, তেরেল সাকাম, রহড় সাহান, চিরু তাসাৎ, সাবাই তাসাৎ, মাৎ, সাকাম-দৗতৗনি, কৌরল ,গুনগু সাকাম, উৎ পুটকৗ, ধূড়ৗ, খাড়াং, অড়াঃ বেনাও সেনের বাতা, নাহেল ইসি, কাঁড়বা ,গিতিচ্ দুড়ুবঃ পারকম, কিতৗ খিজুর ,হাও আর হঁ আডি লেকান ।  রান রেহেৎ সিন্দেৎ লেকান দারে নৗড়ি ক-আমলকী,বহড়া, হরিতকি, সিউলি কালমেঘ, ছোট পৗড়, বড়ো পৗড়, পৌনা পৗড়, স্বেতমূল, অনন্ত মূল, মরন জিওয়ন, নীলকন্ঠ, রহিন, রহিন জ, কুড়চি জ, পজ্, বানা হাটাঃ, বাঁওলা দা , বির আলু, বির পেঁয়াজ, তওয়া লৗউ, পঁগৗদ রেহেৎ, এতকা রেহেৎ, কুড়িৎ রামা রেহেৎ, কেঁওয়াৎ রেহেৎ, অসয়, বাড়ে, স্বেত পলাস, মূরগা দারে, সস্ বাঁদা, সাহড়া বাঁদা, কুড়িৎ রামা বাঁদা , নুড়ুচ্ বাঁদা, হুটের বাঁদা, বঙগা সারজম বাঁদা, বাড়ে বাঁদা, মাতকম বাঁদা, লওয়া বাঁদা, ইচাঃ বাঁদা, চুরচুদারে, এটকেচ্, কুড়ল আড়াঃ , মাঠা সুরৗ আড়াঃ, বিরহতি জ, মটমটি আড়াঃ, অড়সা আড়াঃ নংকাগে আডি লেকান রেহেৎ সিন্দেৎ ক।

 আযোদিয়ৗ বুরু চটরে ৮৫ গটাং আতো টোলা মুদরে উনুম ডুবুজঃআ নংকা আতু ক- ১ .সিলিংদা ২ .ভূদৗ ৩ .কেনুটৗড় ৪ .পাটটৗঁড়  ৫ .উসুল ডুংরি ৬ .সালডি ৭ .তেলিয়াভাসা ৮ .কুর পাহাড়  ৯ .বাড়ে লহর ১০ .ছাতনি ১১ . বাঘমুন্ডি।  নওয়া ক আতো ক মুদরে সানাম কগে বির বুরু চেতান জিউয়ী নিরৗয় লাদে মেনাঃ তাকওয়া ।

আযোদিয়ৗ বুরু টঠারেন বিরৗদৗলি ক হালৎ তেঁহেঞ দেয়া ভিৎ রে টেডার এনতে  আঁদোড় হরগেক বাছাও মনসুবৗ কেদা। চেদাঃ গেবাং এম আঁদোড়া? ফুরগৗল লেকাকাতে বানচাঃ লৗগিৎ খন লৗড়হৗয় লাগাও মেগেয়া। মচা রেনাং চুপুৎ দাকা রেচ লেম খান আম চেৎ এম চিকৗয়া ???  নংকা কাতেগে তেঁহেঞ "আযোদিয়ৗ বুরু চট্ রে ঠুড়গৗ প্রকল্প " আঁদোড়িয়া ক হতেতে বির বুরু উজৗড় সাচারহে বানচাও খৗতিরতে কলকাতা হাইর্কোট ঠেন আচার বিচৗর ক কয় আকানা। ২রা জুলাই,২০১৮ । নিতঃ লেকা বেনাও তেয়ার রাকাব কৗমি হরা হাপে থুকুম হাতাড়ে মেতা আকাৎ কওয়া। তবে কেন্দ্র আর রাজ্য যাঁহা লেকান হালত রেগে নওয়া বেনাও রাকবমা রিকৗ আকাদাকিন।    

আয়মা লেকানা কাথাগে লৗয়তেনাঃ দ মেনাঃ আকাৎ গেয়া তবে নিতঃ আযোদিয়ৗ বুরু হন হপন ক ,সাচারহে দুলৗড়িয়ৗ ,বির বুরু দুলৗড়িয়ৗ , দারে নৗড়ি খঁনদরঁনদিয়ৗ ,বির-বুরু সৗঁঘৗরিয়ৗ কঠেন আযোদিয়ৗয় রদন কানা ...."অযোধ্যা পাহাড়ের প্রাকৃতিক পরিবেশ ধ্বংস করা চলবে না ।""আমার তোমার সবার দাবি , ঠুরগৗ, বান্দু, কাঁঠালজল প্রকল্পে লাগাও চাবি"  ।    " জঙ্গলেই আমাদের মাতা পিতা     একে ধ্বংস করে অনাথ করিবেন না ।"

( আযোদিয়ৗ চট আতু অড়াঃ কাঁৎ রে নোওয়া কো অল মেনাঃ কাথা  )