(হুডিঞ কাহনি)
আমদ হুদিশৗম তিস ?
প্রফেসার শশী কান্ত মুরমু
রায়পুর কলেজ গডারে তিহিঞ অৗডিমারাং মিটিং মেনাঃআ । অঁডে নিয়ৗবার গৗখুড়ান গৗখুড়ান মন্ত্রীকক হিজুঃ কানাঃ । সিমরাঃ ভোর খনগে সনাতন সরেন এস্ত বেস্তরে মেনায়া । ঞতুমান রাজঅৗরি দলরেন অঞ্চল সভাপতি কানায় , কম কাথা ? ঘৗড়ি ঘৗড়ি তি-রেনাঃ ঘড়িসেন কয়ঃকাতে ,হান্ডে নান্ডেয় ফোন এদা। চেতান মহল খনক মেন আকাদেয়া, নিয়ৗবারদ মিটিংরে হাজার খানেক হড় ইদিগে হুয়ুঃআ । সামাংরেগে বিধান সভা ইলেক্শন হিজুঃ কানা।
সনাতনাঃহঁ কুরুমুটুরেনাঃ খৗমতি বায় দহ আকাদা । মঁড়ে গটাং বাস রিজার্ভ কাতে রেডি দহও আকাদায়। পঞ্চায়েৎ অফিস খন ১০ বাজারে আড়াগাক । লাহারেগে অড়াঃ অড়াঃ সেন কাতে কৗউডিয় চুপুৎ হটঃ আকাৎকোওআ , মিটিংরে চালাঃ লৗগিত ।
বেড়া ৯ টা রেগেয় সেটের এনা , পঞ্চায়েৎ অফিস সুর গডারে । অৗডি যৗস্তি সান্তাড়ক হেচ্ আকানা । কড়া হপনদ পৗঞ্চিক ডেঁঙ্গা আকাদা আর তিরলৗ কদঃ হৗড়য়ৗর পৗড়লৗক শৗড়ি । মিৎটেন এনেচ্ দল হঁয় ইদিয়েৎ কোওয়া। মিছিলরে এনেচ্ এনেচ্ তেক চালাঃআ । যৗস্তি হড় ঞেলতে সনাতন অৗডিগেয় কুশিয়েনা । মনে মনেতেয় লান্দা জং আনা । নিয়ৗবার জিলৗ পরিষদরেনাঃ টিকিটদ কনফার্ম ।
মেনখান অক্ত হুয় এন রেহঁ গৗডি বাক আড়াঃ এদা, চেৎ বেপার ? সনাতন সুরসেন এ চালাও এনা । মিৎটেন পার্টি মেম্বার এ কুলি কেদেয়া - চেৎ খবর বৗরু, গৗডি বাংপে আড়াঃ এৎদ ? বৗরুয় মেন কেদা - গমকে, ভগন হাড়াম অৗউরিয় হিজুঃআ। হড়ক মেন এদা উনিগে আলেরেন গুরু হড় । মুল মৗদৗড়িয়ৗহঁ কানায় । উনি বায় হেচ লেনখান গৗডি আড়াঃ বাং গান আ ।
আচ্ছা মুশকিল ত ! নতে ১০ টা গান বাজা কানা , ১২ টা খন মিছিল এতহবঃআ । ভগন হাড়াম চেৎ এ চেকায়েদা ? কৗটিচ্ বুরধিহঁ বৗনুঃ তায়া। নতে আরহঃ মাঝি হড়, হঁ। মনে মনেতে বেড়েগেয় অৗড়িশ এনা সনাতন সরেন । হলা ঞিদৗ গেত আয়াঃ অড়াঃ চালাও কাতে মঁড়েশায় টাকা এম কাতেৎ লগনঞঃ সেটের ইঞ মেতা দিয়ৗ । তবে কি আরহঁ যৗস্তি কৗউডিয় খজঃ কানা। মনে মনে তেয় চিন্তৗ কেদা।
হরসেন কয়ঃ কাতেৎ গে ঞেল ঞাম কেদেয়ায় ভগন হাড়াম । বৗই বৗইতে ধুতি আর পৗগড়ি হরঃ কাতেয় হিজু কানা । সনাতন লাহা গৎ কাতেৎ এ বেজার আড়াংতেয় কুলি কেদেয়া - চেৎ বেপার নুনৗঃ এম বিলোম কেদা ? চল চল লগন মাছাঃ গৗডিরে দেজমে , আম খৗতির তেগেলে বিলোম এনা ।
ভগন হাড়াম সনাতন সরেন সেন আর হঁয় সুর এনা। মেৎ সেন কয়ঃ কাতে কড়াম সোজহে কাতেৎ এ মেন কেদা - সনাতন গমকে আলম হিড়িঞ আ , ইঞদ আতো মাঝি বাবাহঁ কানাঞ । সানাম আতোহড় আর সাঁওতা সামটাও রেনাঃ আঁগিভারদ ইঞ চেতানগে লাদেও আকানা। অৗডিদিন ঞুঁতৗৎ রেম দহ আকাৎ লেয়া। মিৎটেন তুমদৗ , টামাক আর হাড়য়ৗর পাড়লৗক শৗড়ি এম কাতেৎ , আপনার কুশিতেম এনেচ আকাৎ লেয়া । মেনখান আদ বাং ! ইঞমা বাং গেঞ সেন, আর ইঞরেন তালা ফৗকড়াহঁ বে-লাকচার এনেচ্ সেরেঞ , লৗগিৎ অনা পার্টি মিটিংরে বাঞ সেনচ আকুওআঃ ।
সনাতন সরেন বেড়েম্ভা উতৗর এনায়। উন মারাং ঞুতুমান রাজঅৗরি দলরেন অঞ্চল সভাপতি কানায়। এলাকারে নুনৗ দাপট তায়।আর মিৎটেন মুরুখ সান্তাড় নংকান কাথায় মেন দাড়েয়াদা ? , নওয়াদ কুকমু তেঁহ তিস বায় ভৗবিৎ লেনা । ভগন হাড়াম আরহঁয় মেনকেদা - আরে আলেত রেগেচ মূরুখ মৗনমি বার পে গটেন টাকা লৗগিত মিছিল করেলে চালাআ। মেনখান আমত শিখনৗত হড় , কৗটিচ বাম উইহৗর লেদাঃ আমাং জৗতি ধরম আঃ মান মহৎ ?
সনাতন সরেন আয়াং গরব বহঃ বৗই বৗইতেয় তুঁবুৎ কেদা । সানাম হড়ক থির আকানা । ভগন হাড়াম উনকু সেন কয়ঃ কাতেৎএ লৗই কেদা - এহো খেরওয়াল, আবোদ বঁঙ্গা হপন কানাবন। আবোওয়াঃ লৗয় লাকচারদ অৗডিগে সরেশা । আবোওয়াঃ রু রাহাঃ আঁজমতে অনা সরগ পুরি খন বঁঙ্গা বুরুক আড়গু হিজুঃআ নওয়া ধার্তীপুরিতে । আর অনা বঁঙ্গা সাপাপ্ সাডে জড়াও তুমদা – টামাক - সাঁকওয়াপে ইদিয়েদা পার্টি মিটিং মিছিলরে ? আপনার উরু এরা এনেচ এৎ কোওয়াপে এটাঃ হড় সামাংরে। ছিঃ সান্তাড় ছিঃ। হিড়িঞ কেদাপে আবোরেন মারে পুরুধুল কোওয়াঃ কাথা- কুড়ি রেগে জৗতি দৗইনৗ , কুড়ি রেগে ধরম , কুড়ি রেগে সাঁওতারেনাঃ মৗন মহৎ দ । আর আপে ,বার পয়সা খৗতির নুকু রাজ অৗরিরেন হড়াঃ কাথাতে, সাঁওতা রেনাঃ সানাম মৗন মহৎপে লেব্দা গিডি কাঃ কানা উনকু এটাঃ হড় সামাংরে। হায়রে সান্তাড় - আমদ হুদিশৗম তিস ?
.webp)
