হার্ড ইম্যুনিটি’ ইদিকাতে মিৎ বার কাথা
- ডাঃ সুরেন্দ্রনাথ মান্ডি
কোভিড-১৯ আওহাল রে আয়মা হড় কোওয়াঃ মনে-মেৎ-লুতুররে নাওয়া মিৎ সাবাদ্ তারকঃ কানা,অনাদ ‘হার্ড ইম্যুনিটি’। ইম্যুনিটি রেনাঃ মেনেৎ দবোন বাডায় গেয়া- হড়মরে আজার টেকাও দারাম দাড়ে। মেনখান ‘হার্ড ইম্যুনিটি’ দ চেৎ ? হড়ম রে অৗডি তাকৎ আজার টেকাও দারাম দাড়ে ? ঠিক অনা দ বাং জৗনিচ্ আর বাংখান অনকান ঞঃ আঃগে। বাংলা তেদ ক মেতাঃ কানা ‘গোষ্ঠী প্রতিরোধ খমতা’। সান্তাড়ি তেদবন মেনদাড়েয়াঃ – ‘সাঁগে হড়াঃ হড়মরে জাব্দা সাঁহিচ্ যাঁহান আজার –টেকাও দারাম দাড়ে’।
নিৎ অক্তে ধৗরতি পুরিরে কোভিড টেকাও দারাম সেৎ পুরাপুরি তিকিছা বেসঃ লৗগিৎতে নিরিখ যাঁহান রান মুরগৗন দ অৗওরি তেয়ার সৗতঃআ। খান,ডাক্তর/গৗহিরৗকিলৗন সে দিশম/ পনৎ চাচালাওক কোভিড টেকাও দারাম লৗগিৎতেদ হড়ম রে ইম্যুনিটি বাড়হাও চেতান বৗড়তিক বাত্লাও এদা; আর মু-মচা মাস্কতে এসেৎ , সাঁগিঞ সাঁগিঞ তাঁহেন , ঘানে ঘানে সাবন দাঃতে তি অৗরুবঃ এমান এমান কমা হেঁগে। আর নে-হালেদ ‘হার্ড ইম্যুনিটি’চেতান জোরক এমাঃকানা। আর অনা মিৎ অজ্ তেহঁ জৗনিচ্ আবো দিশম /পনৎরে লক্ আর আনলক্ রেনাঃ খেলন্ড আবো চুনিয়ৗ-মুনিয়ৗ হড় কদ বন ঞেলেদা। আবো কোওয়াঃ সানাম সেচ্তে ভৗলৗই লৗগিৎতে দিশম /পনৎ লক্ আর আনলক্ রেনাঃ লৗগ্তিদ মেনাঃ গেয়া, মেনখান……। ভারত দিশম লেকান সাগাল সাগাল মৗনমি কোওয়া দিশমরে ‘হার্ড ইম্যুনিটি’ হোয় অচয় রেয়াঃদ তিনৗঃ গান যথাতা? কোভিড পিড্গৗওঅঃ কান নিয়ৗ অক্তরে অৗডি বৗড়তি খুতি বাং হোয়োঃআ থ ‘অনা’ তে ? গৗহিরৗকিলৗন কওয়াঃমেন তেয়াঃদ “আবো ভারত লেকান দিশমরে ‘হার্ড ইম্যুনিটি’ হোয় অচয়রে শায়কাড়া ৩০-৪০ হিঁস মৗনমি কোভিড আজারতে তাঁড়্গম অচঃ হোয়ো লেক কানা”। খান, নংকাতেমা আয়মা হড় বন দায়নাসঃ দ। সাধারনত নংকাগে আয়উমৗন দ যে ‘করোনা ভাইরাস তে আয়মা হড় তাঁড়্গম অচ তায়ম, সারেচ্ কোওয়া হড়ম রে ওনকো করোনা ভাইরাস কোওয়া দাড়ে বিরুধ্ রে জাব্দা সাঁহিচ্ কোভিড টেকাও দারাম দাড়ে তেয়ার অচয় হোয়োঃআ। নংকানা পান্থাদ-জারাল জারাল সিতুং আর বাংখান কাঠলা-রেয়াড়রে যাঁহায় ঠেলাও অডক কায় লেকাদ বাং! Survival of the fittest কাথা বাং হিজুঃকানা!
আমেরিকা, ইংল্যান্ড লেকান লাহাওয়াকান দিশম রেয়াঃ ‘স্বাস্থ্য ব্যবস্থা’ যাঁহারে ছিরিছুন্টিয়াকাদাক সার্স-কোভ২/ করোনা ভাইরাস, অঁডে ভারত লেকান ১৪০ কোটি মৗনমি কোওয়াঃ দিসমরে যুদি ওনকো ভাইরাসতে তাঁড়গম অচওয়াকান রুগি কোওয়াঃ লেখা বাড়হাআ, তাহলে খান হেড়ান বতরানাঃ বাং কানা? অনাতে আয়মা হড় কোওয়াঃ মেন তেয়াঃদ –কোভিড বিরুধ লৗড়হৗইরে ‘হার্ড ইম্যুনিটি’’ তত্বদ আবো দিশম লৗগিৎ সুঠিক পান্থাদ বাং কানা। চেদাঃসে কোভিড আজারান রুগি কোওয়াঃ চাপ্ সাম্ভাড়াও লেকান সাৎ সাপ্ড়াও,মেনমা লৗগ্তিয়ান পুরিকাঠামো আবো দিশম রেয়াঃ আয়মা পনৎ রেগে বানুঃ আকাদা , খৗতির আয়মা রুগি বাংবোন বাঞ্চাও দাড়েয়াকোওয়া,যুদিও চং কোভিড সুমুং আজারান রুগি কোওয়াঃ গুজুঃ হার দ কম গেয়া,শায়কাড়া৬০-৬৫ হিঁস লেকা। বতর দ অনাকো – মরবিডিটি গে ,মেতামে ডায়াবেটিস, হার্ট-লাংস- কিডনি আজারান কোঠেন কোভিড হোয়োঃ রেগে । ‘হার্ড ইম্যুনিটি’ হেঁ বাতাও কদ ক মেনেদা,গোষ্ঠীক আতেৎ কোভিড টেকাও দারাম দাড়ে হোয় অচয়রে অক্ত বাড়তি লাগাঃরেহঁ নিয়ৗ অক্তরেদ ‘হার্ড ইম্যুনিটি’ রেনাঃ পান্থাগে সুঠিকা। ওনকোওয়াঃ মেন তেয়াঃদ, যাঁহারে মিৎ লাখ মৗনমি ভিৎরিরে ইংল্যান্ড, স্পেন, ইতালি, আমেরিকা আর জার্মানিরে গুজুঃ হার অতমতায়ম ৬৩-১৩,৬০-৬,৫৭-১৯,৩৬-৩ আর ২৭-৩২ অঁডে ভারত দিশমরে লাখ হড় ভিৎরিরে গুজুঃহারদ ১ সুমুং। মেনখান ১৪০ কোটি মৗনমি ভারত দিসমরে ‘হার্ড ইম্যুনিটি’ তেয়ার অচয়রে যুদি শায়কাড়া ৩০ হিঁস গে কোভিড রেবোন তাঁড়গম অচঃ, এন্তেরেহঁ দিসমরে নংকান রুগি কোওয়া লেখাদ কম রেয়াঃ ৪০/৪১ কোটি লেকা হোয় দাড়েয়াঃআ। পুরিস্থিতি উনদ চুপুৎ বাহ্রেতে অডংঅঃআ।
যাঁহাদ যাঁহায়েন গে,মেনমা দিশম তাবোদ লকঃ আর আন লকঃ, যাঁহা তিন দিন হৗবিচ্ কোভিড টেকা:/ কবজ্ রান-মুরগৗন বাং ঞামঃ কান, সে ‘হার্ড ইম্যুনিটি’ বাং তেয়ারঃ কান উন দিন হৗবিচ্ মাস্ক হরঃ ঘানে ঘানে সাবন দাঃতে তি অৗরুবঃ সাঁগিঞ সাঁগিঞ তাঁহেন রেনাঃ বিধি মানাও সাঁও সাঁওতে এটাঃ বিধি কহঁ বাতাও হোয় আবোন গেয়া।
.webp)
