‘হুল’ দ তঁগেগে তাঁহেন মা
ডঃ জলধর কর্মকার
ঞেল্ ঞেল্তে তেহেঞ সেটেরেনা ৩০শা জুন হুল মাহা। ভারত দিশম রেয়াঃ বাংলা, বিহার, উড়িষ্যা, আসাম, ঝাড়খন্ড, বেগরহঁ বাংলাদেশ, অস্ট্রেলিয়া আর এটাঃ যাঁহা যাঁহা দিশম করে হড় হপন কো মেনাঃকো অনাকরে অৗডি মানত্ সালাঃ বীর-বান্টা সিধু-কানু সাঁও্তে এটাঃ এটাঃ হুল গৗরিয়ৗহঁক দিশৗ কোওয়া আর চাল আকো কানা বাহামালা। তেহেঞ কিরিয়ৗকো হাতাওয়া সিধু-কানু তিকিনৗঃ উনুদুঃ হরতে সানাম লেকানা চেপেচ্, রডচ্,শাসেৎ সিঁয়াজৗরি বিরুধ্রে তেঁগো কেটেজঃ লৗগিৎ।
হুল দ মিৎ ধাওদ বাং হোয় আকানা অৗডি ধাও। অনাকো মোদ্রে দিশৗ দহয় লেকা লৗড়হৗই দ তাঁহে কানা-
১) বাবা তিলকৗ আঃ লৗড়হৗই (১৭৭৫-৮৫)।
২) সিধু-কানু আঃ অৗয়ুরতে ১৮৫৫-৫৬ সন রেয়াঃ হুল।
৩) সান্তাড় পরগনা টঠারে ভগীরথ মাঝি আর তান পারগানা আঃ অৗয়ুরতে আঁদোড় (১৮৭৪)।
৪) ১৯৩২ সন্ রেয়াঃ ১৪ নভেম্বর উতর বঙ্গরেয়াঃ মালদা আর দিনাজপুররে জিতু সরেন আর সামু আঃ উমুল তে কিষাঁড়-সামন্ত কো বিরুধ রে লৗড়হৗই।
তবে দিশম রেয়াঃ নাগামরে সনা আখরতে গার দহকাঃ লেকান হুল দ ১৮৫৫-৫৬ সন্ রেয়াঃ লৗড়হৗইগে।
‘হুল’ দ মিৎ হুডিঞ হুডিঞ কাথা। মেনখান নিৎহঁ যদি লুতুর বন আঁতেন, আঁজমাবন সান্তাড় পরগনা সাঁওতে বীরভূম,বর্ধমান সাঁওতে এটাঃ এটাঃ সান্তাড় টঠারে ৩০শা জুন হিলোঃ নিৎহঁ হড় হপনাঃ কড়াম মায়াম হেডেচ্ রাকাপ্ আঃ হুল ঞুতুম তে ।
তেহেঞ দিশৗ দহয় লেগ্ কানা – হুল মানেদ হোয় এনা- সানাম লেকানাঃ শাসেৎ-সিঁয়ৗজৗরি আর বে-বৗড়িচ্ বিরুধ্রে রেঁগেচ্-অড়েচ্ মৗনমিয়াঃ তিঁগু কেটেজঃ রেয়াঃ লৗড়হৗই ;যাঁহারেয়াঃ সিরজন্ দ তেহেঞ খন ১৬৫ সেরমা মাড়াং এহপ্ লেনা পৗকুড় জিলৗ রেয়াঃ ভগ্নাডি আতো খন। তেহেঞহঁ আবো তালারে অনা হুল কিরৗ হাতাও কাতে লৗড়হৗই লৗগিৎ ডাহাররে আঁড়গঃ লাগাও বোনা। তবেয়ানাঃ তেহেঞা ৩০শা জুন মাহাদ যথাৎ মৗন-এ ঞামা। আর বাংখান হুলমাহাদ আবোঠেন হুল পরব কান গেয়া।
• তেহেঞ হড় হপনাঃ জুড়ু এড়ে কাতে এস. টি. রিজারভেশন বাখ্রা সরকারী সুযোগ ক হাতাও এদা অ-আদিবাসীক। মানতান সুপ্রিম কোর্টহঁয় মেন লৗগিদঃ কানা এস.সি./এস. টি. কোওয়াঃ রিজারভেশনদ মৌলিক অধিকার বাং কানা।
• ১৯২৭ সন্ রেয়াঃ ‘বন আইন’ সংশোধন ঞুতুম কাতে বির-বুরু ধাস্না করে কো গিরৗবৗসিয়াকান হড় হপনাঃ জায়গা জুমি রেচ্ হাতাও রেয়াঃ কো কুরুমুটুয়েদা।
• সানাম লেকানাঃ চৗক্রি-বৗক্রি রেয়াঃ সিলপিঞ বন্দ কাতে নাল্হা-তুমৗল হড় হপন ‘পরিযায়ী শ্রমিক’ ঞুতুম তে ছৗটিয়ৗর চেপেচ্,রডচ্ নিৎহঁ পৗহিল লেকাগে।
• বীরভুম সাঁওতে এটাঃ এটাঃ জিলৗরে আদিবাসী তিরলৗ চেতান নাহাচার নিৎহঁ চালাঃকানা।
• নে-হালেগে সিধু-কানু রেন বংশধর রামেশ্বর মুরমু চিকৗতেগে বায় গচ্অচয়েন অকয় ঠেন ?
আরহঁ আয়মা কুক্লি রেয়াঃ জবাব হাতাও লৗগিৎ হুল দ তঁগেগে তাঁহেন মা।
.webp)
