(হুডিঞ মাছা কৗহ্নি)
সুসৗরিয়ৗ দ অকয় ?
 |
প্রফেসার শশী কান্ত মুরমু
|
তেহেঞদ ৩০শা জুন , হুল মাহা । ঞিদৗ আয়উমৗন ৮ টা গান সাডে কানা । সমায় হাড়াম হুল মাহা মানাও আখড়া খন-এ রুয়ৗড় কানা । সারজমডি সিধু কানু উইহৗর গাঁওতা নেসহঁ , অৗডি জাঁক-জমক সালাঃ হুল মাহাক সাপড়াও লেদা । তাড়াম তাড়ামতে সমায় হাড়াম অৗডি ভাব্না রেয় পাড়াও এনা । অৗডিগে বিলোম গৎ আকানায় । অড়াঃ তিয়োঃতে ৯ টা সাডে আ । বাবু আচ্গ তিনৗচয় রৗগিআ । সেটের তরাগেয় মেনা গোটা জিয়নগে আমদ সাঁওতা গাঁওতায়মে । অড়াঃ সেন কয়ঃ রেনাঃ আমাংদ অক্তগে বৗনুঃ তামা । গোটা জীয়নরে চেৎ এম খাটুওয়া কেদা ? মিৎ টেন গে গিদরৗ, উনিহঁ বাং এম হড় দাড়েয়াদেয়া । হৗনি ফালনা ঞেলে মে । উনিরেন বানার গিদরৗগে সরকারী চৗকরি কিন ঞাম কেদা । উকুর উনিত সাঁওতা লৗগিৎ আমলেকা বায় ঞির বাড়ায়া ? মেন এদাঞ নুনৗযে সাঁওতা লৗগিৎ এম দন বাড়া কেদা , চেৎ এম ঞাম কেদা ?
সৗরিগে সমায় হাড়াম চেৎগে বায় ঞাম আকাদা । রেঁগেজ হড় রেঁগেচ্ রেগেয় তাঁহেয়েনা । মেনখান চেৎ এ চেকায়া ? নওয়া সাঁওতা, জৗতি, ধরম লৗগিৎ মনে দমেয় রাগ, তায়া । রডচ কচলন আর শাসেৎতে পেরেচ আকান সান্তাড় বয়হাক লৗগিত মনে জিউয়ি ছাট্পাটা তায়া । সমায় হাড়াম নিতঃ হঁয় দিশৗয় গেয়া এনহিলো আঃ কাথা । ২০০২ সাল সান্তাড়ী পৗর্শি ইরৗল থক্রে সেলেদ অচঃ লৗগিৎ , চৗকুলিয়ৗরে রেল জাঙ্গে দারাম কৗমিহরা সাব আকানা । হৗড়য়ৗর ঝান্ডা গঃ কাতে , যতখন লাহারে রেল লাইনরে গিতিচ লেনায় সমায় কিস্কু । আয়মা হড় সঁগে আচহঁ পুলিশক সাব ইদি লেদেয়া । দালরেনাঃ চিনহৗ নিতহঁ দেয়ারে মেনাঃ গেয়া । এন্তেরেহঁ সমায় বায় তায়ম আকানা সাঁওতা কৗমিরে । নিতঃ হাড়াম উমের রেহঁ যাঁহারেগে সান্তাড়াঃ হক অৗইদৗর লৗগিৎ লৗড়হৗই হুয়ুঃআ , সমায় হাড়াম যতখন লাহারেয় দৗড় সুরঃ আ ।
মেনখান তেহেঞদ হুলমাহা রেনাঃ আখড়া ঞেল্ কাতে মনেরে অৗডি দুখ এ আটকার কেদা । আর মনে মনে তেয় মেন জং কানা- নাহাঃরেন যুয়ৗন কড়া কুড়িক হুল মাহারে সিধু কানু আঃ লৗড়হৗই রেনাঃ কাথা খন, ছাপল এনেচ্ আর অর্কেস্ট্রারগে , জৗস্তিকঃ কুশিয়াঃ কানা । যাঁহা সাঁওতারেন যুয়ৗনক নাপায় ডাহার বাংক উপরুম দাড়েয়াঃআ , অনা সাঁওতা দ চেকাতে উত্নৗঃআ ? আর মারাং পেড়াদ অকয় ? উন্কু রাজ অৗরিরেন নেতা ? যাঁহায়কদ নওয়া সান্তাড় সাঁওতা , জৗতি ধরম হাসা ভাষা সাঁওহেৎ বাঞ্চাও আর হারাবুরু লৗগিৎ তিসগে বাংক লাহাও আকানা , উনকু ? আর উনকু যুদিকঃ লাহা কোঃআ , এন্তেখান কি আবো সাঁওতা নুনৗ লিচৗড়রে তাঁহেকঃআ ? হায়রে সান্তাড় ! হুদিশৗম তিস ? সুসৗরিয়াদ আমগে । আমাঃ নাপায় উইহৗর ভাবনা আর গড়ঃ বেগর , সান্তাড় সাঁওতাদ সুসৗরায় অকয় ?
.webp)
