অনড়হিঁয়ৗ সারদা প্রসাদ কিস্কু দিসৗতে
মহাদেব হাঁসদা
অনড়হিঁয়ৗ সারদা প্রসাদ কিস্কু দ কানায় সানতাড়ি সাঁওহেৎ রেন মিৎ সরেস ডিগডিগৗ ইপিল। নুয়ৗ জানাম দ ১৯২৯ সাল রেয়াঃ ২ ফেব্রুয়ারী, পছিম বাংলা রেয়াঃ পুরুলিয়া জেলারে মেনাঃ দাঁড়িকাডোবা আতো, মিৎ রেঁগেচ্ ঘারঞ্জ রে হোয় লেনা। অনা বিদৗল নওয়া দ বিহার সুবৗ রেয়াঃ মানভূম জেলা লেকাতে লেখাঃ কান তাঁহেনা।
আচ্ বাবা আঃ ঞুতুম দ চরণ কিস্কু আর আচ্ আয়ো আঃ দ ধনমনি কিস্কু তাঁহেকানা। অনা বিদৗল আতোরে ইস্কুল বাং তঁহেকানা। অলঃপাড়হাঃ হড় হঁ বাংকো তাঁহেকানা। উনিদ সোর আতো জোরোবাড়ি শিশু প্রাথমিক বিরদৗগাড় রেকো ভুরতি লেদেয়া। অনা তায়ম ৬ কিমি সাঁগিঞ বড়গেড়িয়া উচ্চ-প্রাথমিক বিরদৗগাড়রে সেন-হেচ্ তে পাড়হাও লেনা বার সেরমা। অনাকাতে বাঁকুড়া জেলা রেয়াঃ রানীবাঁধ মিডিল ইংলিশ স্কুলরে ভুরতি লেদেয়া। অনডে দ পেড়া অড়াঃ খনে সেন হিজুঃ কান তাঁহেঃ। গিদ্রৗ খনগে উনিদ আডি লাসের হাতাং আন পৗ ঠুওয়ায় তাঁহেকানা। অনডে পাড়হাঃ অক্তে মেরিট স্কলারশিপ এ ঞাম লেদা। অনা টাকা তেগে পাড়হাঃ দ হোয় লেন তায়া। অনা তায়ম খাতড়া হাই ইংলিশ ইস্কুল খন ১৯৪৮ সালরে ফার্স্ট ডিভিজ্ন তে মেট্রিক বিডৗও এ পাশ লেৎ তাঁহেনা। চেতান সেচ্ পাড়হাঃ লৗগিৎ বিষ্ণুপুর রামানন্দ কলেজ রে আই.এস.সি. রেয় ভুরতি লেনা। মেনখান রেঁগেচ্ জালাতে তালা হররে পাড়হাঃ দ বৗগি হোয় লেন তায়া।
উন দ এনেগে দিসম ফুরগৗল গৎ আকানা। অৗত এ ঞাম কেৎ খান উনিদ বান্দোয়ান রে হিন্দি ট্রেনিং এ হাতাও কেদা আর জামতোড়িয়া জুনিয়র বেসিক স্কুলরে চেচেৎ ইচ্ লেকাতে কৗমিরে বাহাল এনা।
মেনখান রাজনীতি রেয় সেলেৎ এন হতেতে ১৯৬২ সালরে অনা কৗমি দ আড়াঃ গিডি হোয়েন তায়া। অনা তায়ম আরহঁ নাওয়া কারতে সিংরাইডি প্রাথমিক বিরদৗগাড়রে চেচেৎ ইচ্ লেকাতেয় বাহাল এনা। বড়দিহি প্রাথমিক বিরদৗগাড়রে কৗমি অক্তে উনিদ “আদর্শ শিক্ষক” লেকাতে রাষ্ট্রপতি শিরপায় আমেট লেদা ১৯৭৩ সালরে।
ইস্কুল রে পাড়হা বিদৗল খন সানতাড়ি পৗরসি চেতান উনিয়াঃ দুলৗড় দ বরকেত লেন তাঁহেনা। নরসিং হেম্ব্রম আঃ “নাহা সেরেঞ” আর মারাং অনড়হিঁয়ৗ সাধু রামচাঁদ মুরমু আঃ “সারি ধরম সেরেঞ পুঁথি” রেয়াঃ সেরেঞ দ আয়াঃ অন্তররে আডি মারাং ঠাঁও এ আমেট লেদা। উনিয়াঃ সেরেঞ আর অনড়হেঁ রেয়াঃ ভাব, কাথা কুঁদৗও, আর ছন্দ গাবান ঞেল কাতে আচকাগে আচ্হঁ সেরেঞ অ-অলে এহপ্ এনা। নংকা কাতেগে বল এনায় সানতালি সাঁওহেৎ আখড়ারে।
অনড়হিঁয়ৗ সারদা প্রসাদ কিস্কু-আঃ জিয়ন লৗড়হৗই দ আডি মারাং আ। জৗতি, সমাজ, পৗরসি আর সাঁওহেঁৎ তরাও রাকাপ লৗগিৎ তামুর চাবা হৗবিচ্ উনিদ আয়াঃ কলম সাপ্ উরিচ্ কাতেয় তাঁহেকানা। নংকা কাতে ১৯৯৬ সালরেয়াঃ ১৮ মার্চ অনড়হিঁয়ৗ দ নওয়া ধুড়ি ধৗরতি খন বিদৗয়ে হাতাও আকাদা।
সারদা প্রসাদ কিস্কু আঃ পৗহিল উতৗর অল দ উছৗন লেনা- আগস্ট ১৯৫০ সাল রেয়াঃ “হড় সম্বাদ” পত্রিকারে। অনড়হেঁ রেয়াঃ ঞুতুম দ “অলঃ”। অনা তায়ম গালমারাও, খেরওয়াল আড়াং, পছিম বাংলা, সুসৗর ডাহার, তেতরে, জিরহিরি, সিলি এমান আয়মা সাঁওহেৎ সাকাম রে উনিয়াঃ সেরেঞ, অনড়হেঁ,অনল, কৗহনি,গিদ্রৗ বৗউলি এমান মিৎ লেতাড় ছাপা সদর আকানা। আয়াঃ ঞুতুম তেমা হেঁগে; ‘টটকো মলং’ আর’ পাতাং সুরৗই’- নওয়াকিন বাহ্না ঞুতুম তেহঁ উনিয়াঃ অল কো উছৗন আকানা।
তেহেঞ হৗবিচ্ উনিয়াঃ উছৗন আকান পুঁথি কো দ হোয়োঃ কানা- ১. ভুরকৗ ইপিল (১৯৫৩), ২. কুহুবৗউ (১৯৬০),৩. গাম-গাঁদার (১৯৬৭), ৪. লাহাঃ হররে (১৯৮৫), ৫. সলম্ লটম (১৯৮৮), ৬. জুডৗসি অনল মালা (১৯৯৪), ৭. বিদাঃ বেড়া (১৯৯৭), ৮. সঙ্গীতিকা (১৯৯৮) আর ৯. চিঠি সাকাম (২০১৯) । বিন ছাপা আঃ হঁ আয়মা গে মেনাঃ আকাদা। তেহেঞ দ উনিয়াঃ গুতু গালাং সেরেঞ বাখরা তে মিৎ বার কাথা বোন তজবিজ লেগে।
সাঁওহেৎ রেয়াঃ বিচরৗতে অনড়হিঁয়ৗ সারদা প্রসাদ কিস্কু- আঃ সেরেঞ কো দ মড়ে থকরে হৗটিঞ গানঃআ। জেলেকা- ১) সিরজন ভাবনা, ২) ইসোর ভাবনা, ৩) দুলাড় ভাবনা, ৪) সমাজ ভাবনা আর ৫) এসকার ভাবনা। নিত হৗবিচ্ ৩৫০ গটেন খনহঁ জৗসতি সেরেঞ দ পুঁথি আর পত্রিকা তালাতে উছৗন আকান তায়া।
অনড়হিঁয়ৗ সারদা প্রসাদ কিস্কু আঃ সাঁওহেৎ লৗইতে তজবিজ আর খঁদরঁদ রেয়াঃ সেটের আকানা। সরকারী কুরুমুটুতে উনিয়াঃ সানাম অল-বেল ছাপা সদর লৗগতি কানা। তবেয়ানিচ্ সানতাড়ি সাঁওহেৎ রে উনিয়াঃ এনেম জথাৎ মৗন এ ঞামা।
.webp)
.webp)
