মাঝি রামদাস টুডু ‘রেসকা’
 |
| -মহাদেব হাঁসদা |
১৮৫৪ সাল রেয়াঃ ২ অক্টোবর সিংভূম জেলা রেয়াঃ ঘাটশিলা সোর কাড়ুয়াকাটা আতোরে উনি দ ধৗরতি রেয়াঃ পৗহিল মারশাল এ ঞেল্লেৎ তাঁহেনা। আপাত ঞুতুম দ কানা সীতারাম টুডু আর এঁগাত দ মঞ্জদরি টুডু। গিদৗর খনগে রামদাস দ আডি লাসের হাতাং-আন এ তাঁহেকানা। নরসিং গড় স্কুল খন আডি মঁজতে এম.ই.(M.E.) বিডৗও এ পাশ লেৎ তাঁহেনা। মেনখান আচ্কাগে আচ্ বাবায় বোঁগায়েন খান অলঃ পাড়হাঃ দ বৗগি হোয়েন তায়া।
রামদাস টুডু আচ্ বাবা দ আতোরেন মাঝিয় তাঁহেকানা। অনালেকারে আচ্ হঁ মাঝিয় হোয় এনা। খান জতহড় উনি দ মাঝি রামদাস কো ঞুম কেদেয়া। তায়ম তে উনি দ দামপাড়া দিসম রেন পারগানা হঁয় বাছাও লেন তাঁহেনা। গিদ্রৗ বিদৗল খন গে উনি দ হড় হপনাঃ অৗরিচৗলি, বোঁগা বুরু, বিনতি বাঁখেড়, লেগ্চার, এনেচ্, সেরেঞ, এমান আডি ভাগেয় সেঁড়ালেৎ তাঁহেনা। অনাকো তুমৗল তাসাং কাতে উনিদ মিৎ দামান পুথিয় অল সদর কেদা। ঞূতুম দ –“খেরওয়াল বংশা ধরম পুথি”। আয় উমৗন ১৮৯৪ সালরে কোলকাতা রেয়াঃ বেদান্ত প্রেস খন অনা দ ছাপা সদর লেনা। অনা পুথি দ ৬৮ সা (Page) রেয়াঃ তাঁহে কানা।
রামদাস টুডু দ ধলভূম গড় রাজ স্টেট রেন দেওয়ান হঁয় হোয়লেন তাঁহেনা। প্রজা কো ঠেন খন খাজনা আদায় আর রাজ-আঃ অত-হাসা রেয়াঃ হিসৗব উনি দয় ঞেলেৎ তাঁহেনা। ১৯৪৭ সাল রেয়াঃ ২২ সেপ্টেম্বর অনডেগে জাতীয় অধ্যাপক সুনীতি কুমার চ্যাটার্জী সাঁও ওপোরোম হোয় লেন তায়া। উনিয়াঃ নেঁহর লেকাতে রাজ স্টেট রেন ম্যানেজার বঙ্কিম চন্দ্র চক্রবর্তী দ ১৯৫১ সাল রেয়াঃ ১৪ জুন মাঝি রামদাস টুডু ‘রেসকা’-আঃ –“খেরওয়াল বংশা ধরম পুথি” রেয়াঃ দসার রাদায় ছাপা সদর লেদা। অনারে দ ২৬৪ সা (Page) মেনাঃ আকাদা।
নওয়া পুথিরে দ ধৗরতি সিরজন, মৗনমি সিরজন, জৗতি পৗরিস হৗটিঞ,বোঁগা বুরু-আঃ কাথা, বিনতি বাঁখেড়, সেরেঞ এমান মেনাঃ আকাদা। অনা সাঁওতে ছৗটিয়ৗর, বাপ্লা, ভাঁডান রেয়াঃ অৗরিচৗলি কো আডি মঁজতে অল সদর আকানা। নওয়া পুথিরে বার কাথা দয় অল আকাদা আচার্য সুনীতি কুমার চ্যাটার্জী।
–“খেরওয়াল বংশা ধরম পুথি” দ সানতালি সাঁওহেৎ রেয়াঃ মিৎ দামান ধন কানা। অনা বিদৗল অড়াঃ দুওয়ৗর বৗগি কাতে আতো আতো দাঁড়া কাতে মাঝি রামদাস টুডু দ নওয়া পুথি রেয়াঃ সাঁদেস (তথ্য) এ তুমৗল লেৎ তাঁহেনা। উনিয়াঃ নওয়া অসাম্ভেড় এনেম হতেতে ১৯৫১ সালরে কোলকাতা বিশ্ববিদ্যালয় খন উনি দ ডি.লিট. (D.Litt.) মৗন এম হোয় লেনা।
তেহেঞ, উনিয়াঃ ১৬৭ আঃ জানাম মাহারে উনি লৗগিৎ তাঁহেয়েনা অন্তর রেয়াঃ গুণমানাও সারহাও আর জহার।
.webp)
.webp)
