(বাডায়
আকানা নেশদ কোভিড-১৯ খৗতির চাকোলতাড়ি ছাতা পরব বাং হোয়োঃ কানা। মেনখান অনা রেয়াঃ নাগাম
বাডায় জং লেকাতে নোওয়া লেখাদ সদর এনা)।
চাকোলতাড়ি ছাতা পরব
 |
-মহাদেব হাঁসদা
চাকোলতাড়ি ছাতা
পরব দ হড়-হপনাঃ লেগ্চাররে, আডি মারাং ঠাঁও এ আমেট আকাদা। কাথারেগে মেনাঃ আ- কড়া হপন
হোয় কাতে জাঁহায় আজোদিয়ৗ সেঁদরা বায় সেন আকানা, উনিদ এঁগাৎ কুখিরেগে মেনায়া। অনকাগে,
কুড়ি হপন হোয় কাতে জাঁহায় চাকোলতাড়ি ছাতা বায় ঞেল আকাদা, উনিহঁ এঁগাৎ কুখিরেগে মেনায়া।
নোওয়া পরব লৗইতে নংকাগে আয়মা সেরেঞ, বিনতি,কৗহ্নি হড়াঃ মচা মচারে চারচা হেচ্ আকানা।
চাকোলতাড়ি ছাতা
পরব দ পুরুলিয়া জেলারে জাও সেরমা ভাদর বঁগা মুচৗৎ হিলোঃ হোয়োঃ আ। একেন পুরুলিয়া দ বাং
; পছিম বাংলা, ঝাড়খন্ড, বিহার, ওড়িসা খন হাজার হাজার ঞেঞেলিয়ৗ ছাতা টানডিতে কো সেটেরঃ
আ। মিৎ ঞিদৗ জুদৗ জুদৗ আখড়ারে দাঁসায়, সহরায়, গলওয়ার, মাতোওয়ার, ডান্টা, রিঞ্জৗ, লাঁগড়ে,
দুরুমজা এমান এনেচ্ সেরেঞ হোয়োঃ আ। তালারেকান,
তায়মরেকান- জাঁহায় জাঁহায় ঠেন কুশি এনেচ্ এ সাপ্ দাড়েয়াঃ। একেন ইনৗদ বাং, অকয়দ তিরিয়ো
বানাম কাতে, অকয়দ তি-তি সাপাপ্ কাতে বেড়হায়তে ঞঁহড় ঞঁহড় কো সেরেঞ অৗচুরা। মিত কাথাতে
চাকোলতাড়ি ছাতা দ রৗস্কৗ রেয়া মিৎ ঝারনা।
 |
| মাড়াং সেরমা রেনাঃ ছাতা রাকাপ্ চিতৗর |
ছাতা পরব দ পুরুলিয়া জেলা রেয়াঃ আয়মা ঠেন গে হোয় হিজুঃ কানা। জেলেকা বান্দোয়ান রেয়া দল-বাদল ছাতা পরব, বলরামপুর ছাতা পরব , সরবড়ি ছাতা পরব, বঁগাবাড়ি ছাতা পরব, মালথোর ছাতা পরব ,মানবাজার জাপাঃ শুশুনিয়া ছাতা পরব আরহঁ এমান। অনাকদ দিন দিনতে মৗজুল ইদিঃ কানা। মেনখান চাকোলতাড়ি ছাতা রেয়াঃ ঞুতুমদ চাবা কাতেহঁ বাং চাবাঃ কানা।
ছাতা টানডিরে
এনেচ-সেরেঞ মা হেঁগে ; তিরিয়ো-বানাম,লিপুর-পায়গন, কলসা, ঢাক-টামাক, সাকওয়া, তুমদৗ,ঝাঁই-করতাল-সেকেচ্
কিরিঞতে ঞামঃআ। একেন ইনৗদ বাং লিলিবিছি সিলি-চাঁওরিচ্, আরসি-নৗকিচ্-সুলৗক্, মালা-মাদোলি,
পাংখা , থারে থার পুঁথি দকান, পাঞ্চি-পাড়হাট দকান সাজাও আকান।
চাকোলতাড়ি ছাতাদ
তিস আর চেৎ লেকারে এতহব্ লেনা, অনা লায়তে আডি লেকান কাথা আঁজমঃ আ। পাঁচেত্ রাজ রেন
মিৎ পুরুধুল গম্কে সোমেশ্বর লাল সিংহ দেও আঃ কাথা খন বাডায়ঃ আ- মিৎ ধাও পাঁচেৎ রাজ
লৗড়হৗইতে সেন লেনা। আয়মা দিন উনিয়াঃ খঁজ তলাস বাং ঞাম; কান তাঁহেনা। প্রজা কো আডি ভাবনাতে
দিন কো খেমাওয়েৎ তাঁহেনা। আদ আচ্কাগে মিৎদিন রাজদ লৗড়হৗই খন জিৎকৗর খনে রুওয়ৗড় এনা।
অনা রৗস্কৗতেগে নোওয়া ছাতা পরব রেয়াঃ এতহব দ।
অকয় দকো মেনা
পাঁচেত্ রাজা গাড় কাশীপুর সোর ‘ছাতামাডা’ ডৗহিরে নোওয়া পরব দ এতহব লেন তাঁহেনা। তায়মতে
রাজ রেন পপঁগড়া গে ছাতা পরব রেয়াঃ ঠাঁওদ বদল কাতে চাকোলতাড়ি (চাকোলতোড়) তেকো অৗগুওয়াকাদা।
চেদাসে চাকোলতাড়ি হঁ পাঁচেত্ রাজাঃ গে জমিদারী তাঁহেকানা।
আরহঁ আদম হড় দকো
মেনা- সেদায় মানভূম,বরাভূম,সিংভূম,ধলভূম, মলভূম এমান টঠারেন কিঁসৗড় জমিদার,তরফদার,সরদার
কোগে নোওয়া পরব দ কো এতহব লেৎ তাঁহেনা। খেত্-বৗইদ রেয়াঃ হোড়ো রহয় খন রাকাপ্ কাতে
রাজা-প্রজা মিৎ ঠেন কো ঞেপেল ঞাপামা অনাগে কানা নোওয়া ছাতা পরব রেয়াঃ জসদ। অনা বিদৗল
চাকোলতোড় বেড়হায়তে আয়মা ভূমিজ রাজা কো তাঁহেকানা মেন্তে বাড়ায়ঃ আ। ওনকোওয়া সৗহিজুহিতেগে
নোওয়া পরব দ হোয়োঃ কান তাঁহেনা।
(মুচৗৎ তেৎ দ দসার হৗটিঞরে)
.webp)
