Parent's Day

 নে হালেগে পারমেন ‘জেগেত্‌ জানামদাতা মাহা’ দিসৗকাতে অল আকান-

(হুডিঞ কৗহ্‌নি)

 Parent's Day

বাড়তাং সরেন

  

সেরমা  ফ্লাট রেনাঃ ‍বেলকুনিরে দূড়ুপ কাতেঃ আডি  উসুঃ মনেতে সিগরেট ঞুঁ ঞুঁয় ধুরৗও আকানা। পার্কস্ট্রিট রেনাঃ নওয়া মড়ে তলা ফ্লাটরেয়াঃ বেলকুনি খন কোলকাতা রেনাঃ আয়মা আয়মা টঠাগে ঞেল ঞামঃ আ। উসুল উসুল বিল্ডিং, হাওড়া ব্রিজ, বিদ্যাসাগর সেতু  আর হঁ আয়মা লেকানাঃ বিল্ডিং। হড়মোরে পিছৗড়ী লাদে কাতেঃ গে থড়া মজ এ বুজ এদা সেরমা। হলা ঞিদৗ খন নাশে নাশে রুওয়ৗ রাবাং লেকায় আটকারেদা। হলা ঞিদৗ রেগে মনেয় উরিচ আকাদা যে, তেহেঞ দ অফিস বায় সেনঃআ। অনাতে তেহেঞ দ সেরমা আটেৎ খন থড়া বিলম আতেগেয় বেরেৎ আকানা।  আকিনরেন গেল বার সেরমা উমেররেন বাবু, বীরসাওয়াঃ কুকলীতেগে হড়মোরে রুওয়ৗ রাবাং বৗড়তিয়েন লেকায় আটকারেদা।

 

হেনান  জৗপিৎ খন বেরেৎ তরা দাকায় অড়াঃখন সেরমায় আঁজম কেদা, দুলৗড়ী দ বীরসায় মেতায়কানা -- আমি জানি না, ওই যে তোর বাবা উঠেছে, ওকেই জিজ্ঞেস কর। তোর বাবাই তোকে ভালো বলতে পারবে। 

বীরসা দ আচ্‌ আপাত ঠেন সেন কাতেঃ আডি উশৗরাতেয় কুলী কেদেয়া -- বাবা, বাবা, বলোনা,  ' Parents' Day ' টা কি  ?  আমার বন্ধুরা মেসেজ করেছে, বলোনা বাবা, ওই কথার মানে কি ? 

 

অনা কাথা আঁজম তরা সেরমাওয়াঃ কোড়াম ধাক্‌ মারাওয়েন তায়া। আয়াঃ  মেৎ সামাংরে আচ আয়ো বাবা তৗকিনাঃ মেৎ  মুঠৗনে ঞেল ঞাম কেদা। ঠেঙ্গা তিরুপ তিরুপতে বাড়গে করে ডাংরা মেরমকিন লাগা বাড়ায়েৎ কওয়া। কোড়াম তালা সুইতে গুতু কেদে লেকায় আয়কৗওকেদা সেরমা। উন অক্তে চেৎ এ তেলা রুওয়ৗড়া, বায় বুজ তিয়োঃ লেদা সেরমা। আটেৎ খন বেরেৎ বেরেৎতে খৗলিয় মেনকেদা -- বাবু, তুমি এখন স্টাডি রুমে যাও। আমি ব্রাস করে আসছি। তোমার স্টাডি কমপ্লিট হলে আমি তোমাকে সব বুঝিয়ে বলবো। বীরসা দ আচ বাবাওয়াঃ কাথা আঁজম কাতেঃ স্টাডি রুমতেয় চালাওএনা।

 

বেলকুনিরে চা ঞুঁ ঞুঁতে মিৎ মনেতে সেরমা অনা হাওড়া ব্রিজ সেচ এ কয়ঃ আকাদা। হানে তিস ১৯৪৩ সাল খন বেগর থাম্বা আতে গাঙ্গা গাডা চেতানে তিলজু আকাদা। উন খন হাওড়া আর কোলকাতা  বারয়া জোড়া নাগারে তল মিৎ আকাৎ কিনৗ। আর পালেন নংকাগে তাঁহেনা যুগেযুগ।  

 

হাওড়া ব্রিজ পারম কাতেঃ তিরেচয় সেটেরেনা সেরমা পুরুলিয়া মান বাজার খন মিৎ গেল এয়ায় মাইল সাঁঙ্গিঞ সিরিষগুঠু আতোরে। হুডিঞ হুডিঞ মিৎ ডুংরি আড়ে আতো সিরিষগুঠু। মিৎ বার হড় বাদে আতোরেন সানাম হড়গে চাষবাস কৗমি। সেরমারেন এগাঁত আপাত ডুংরি লাতার গেল মড়ে বিঘৗ ক্ষেত হাসারে চাষ কাতেঃ ঘারঞ্জকিন চালাওয়েৎ কান তাঁহেনা। মিৎ কড়া আর মিৎ কুড়ি। হুডিঞবাবু সেরমা দ মড়ে কিলৗস খনগে কমলপুর আদিবাসী হোস্টেলরেকিন ভর্তি লেদেয়া। অলঃ আকিলরে আডি নাপায়। অনাতে আংরপ লুগড়িচ,বই খাতা  অকাটাঃরেগে আনাট দ বাংকিন বুজ তিয়োঃ  অচো আকাদেয়া। অঁডে মুচৗৎ কাতেঃ বিশ্বভারতী বির্দাগাড়রেকিন ভর্তি লেদেয়া সেরমা দ। দাঃ, জৗপুৎ সৗরদি সিতুং লল সাহাও কাতেঃ সেরমা বাবুকিন পাড়হাও অচোলেদেয়া জৗটু আর মুঙ্গলী। পাশ কাতেগেঃ সেরমা আসানসোলরে চৗকরীয় জয়েনকেদা  B.D.O অফিসরে। রৗস্কৗ আর রৗস্কৗতে চুরুবুরুলেনা জৗটু আর মুঙ্গলী তৗকিনাঃ ঘারঞ্জ।

         

চৗকরী ঞাম পে সেরমা তায়ম গে বাপলা। বাপলা মিৎ চাঁদো তায়ম খনগে দুলৗড়ী দ সেরমা সাঁও আসানসোল তেয় সেন এনা। সেরমা ইদি বায় খজঃ কান তাঁহেনা। মেনখান কিঁসৗড় অড়াঃরেন বৗহু সিরিসঘুটু আতোরে তাঁহেন বায় রেবেনলেনা। কিমিনতেৎ আঃ হমঞ্জ গরঞ্জ ঞেলতে সেরমা এগাঁত মুঙ্গলী হঁয় মেন কেদা  --হেঁয়া বাবু, তিনৗঃ হাপ্তা হাপ্তাম হায়রনঃ আ হিজুঃ সেনঃতে। অঁডেগে বৗহু হঁ ইদি তরায়েম। ছুটি বেন ঞাম লেখান হিজুঃ আবেন। অনা তায়ম খন দুলৗড়ী দ সেরমা সাঁওগেয় তাঁহেয়েনা আসানসোলরে। ছুটি এমান করে সেরমা সিরিসঘুটু আতোয় সেনঃরেহঁ দুলৗড়ী দ সেনঃ বায় রেবেনা। আতো সেনঃ কাথায় আঁজম লেখানগে রুওয়ৗ হাসোরেয় ঢেঁসা দুলৗড়ী। বাবু হুয় তায়ম পে ধাও গান সিরিসঘুটু আতোয় সেন আকানা দুলৗড়ী। আতো অড়াঃ সেন কাতেঃ হানহারতেৎ আঃ সেওয়া যতনে ঞাম আকাদা। মেনখান দুলৗড়ী  দ হানহার হঁঞহার তৗকিন বায় যতন লেগা আকাৎকিনৗ নাশে হঁ।

 

কোলকাতারে পোস্টিং তায়ম পার্কস্ট্রিট সুররে মারাংমাছা ফ্লাটে হাতাওকেদা সেরমা। আয়াঃ হুদিশ দ, আয়োবাবা তৗকিন হঁয় আগুকিনৗ কোলকাতারে। চেদাঃসে, আয়ো বাবা তৗকিনাঃ দায়া দুলৗড় আর যতনতে  তেহেঞ আচ নুন মারাংএ হারাবুরু আকানা, নুন মারাং অফিসারে তেয়ার আকানা। অলঃ আর চৗকরী খৗতির বারহে বারহে রেগেয় তাঁহেয়াকানা। চাঁদো পিছে কৗউডিয় ভেজা আকাদা, মেনখান সেওয়া যতন কাতেঃ সৗরি সুক দ তিস হঁ বায় এম দাড়েয়াকাৎ কিনৗ।  মিৎ বার ধাও আয়ো বাবা কোলকাতা আগুয় রেনাঃ কাথায় রাকাপ লেদা। মেনখান, দুলৗড়ী অনারে বায় রেবেন লেনা। আচ দ ধিরি দলান, পালক পারকমরে সুক আর সুকরে মেনায়া, আর আচরেন আয়োবাবা নিত হঁ লল সিতুং বৗইদ্‌-বৗইহৗড়রেকিন কৗমিয়া ! সিরিসঘুটু রুকুড় ধিরিতে পেরেচ বাড়গেরে গৗই মেরমকিন লাগা বাড়ায়েৎ কওয়া ! সেরমা আডি মারাং এ কৗই আকাৎ লেকায় আটকার কেদা। কোড়াম তালারে অকয় চ সবঃ এ লেকায় বুজ কেদা। ভাবনাতে রুওয়ৗ ফারনাও এন লেকায় আটকার কেদা। বৗই বৗইতেয় তিঙ্গুয়েনা সেরমা। তায়ম সেচ এ কয়ঃকেদা। তি রেচং বীরসা হেচ কাতেঃ আচ তায়মরেয় তিঙ্গু আকানা। কয়ঃ রাকাপ কাতেঃ বীরসায় মেন কেদা -- বাবা, তুমি রাঃ করছো ?  তোমার চোখে জল ! তুমি কাঁদছো ! 

       

সেরমা দ ইঙ্গুৎ কাতেঃ বীরসায় হবর রাকাপ কেদেয়া আডি দুলৗড় আতে ;  রাঃ মেৎহা আতেয় মেন কেদা -- বাবু,  তেহেঞ তিকিন আচুর দ সিরিসঘুটু আতো গড়মবাবা - গড়ম বুডি তাকোঠেন বোন সেনঃ আ।  আর অঁডেগে Parents' Day রেনাঃ কাথা দঞ লৗই আমা।   " সৗরিগে বাবা ? কি মজা, কি মজা !"-- নওয়া মেন কাতেঃ আডি রৗস্কৗতে আচ্‌ বাবায় , হৗড়ুপ কেদেয়া বীরসা।  সাঁঙ্গিঞরে তিঙ্গু আকান দুলৗড়ীয়াঃ মেৎহারে হঁ রৗস্কৗ ঝালকাও রাকাপ্‌ এনা।