সিঁগি মাহা রেনাঃ সাকাম ‘চেরেচ্ আড়াং’ লেখা- ৪১

“আবোওয়াঃ কাথা” ওয়েব পেজ রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com   ।

 

তেহেঞা আখড়ারে যাঁহায় কো সেলেদ্‌ আকান- রিলৗমালা মুরমু, বিজয় কিস্কু, ᱥᱩᱵᱩᱫᱤᱭᱟ. ᱢᱩᱨᱢᱩ,  ᱜᱳᱯᱮᱥᱣᱚᱨ ᱢᱟ.ᱱᱰᱤ, ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ,  ᱥᱨᱤᱠᱟᱱᱛᱚ ᱥᱚᱨᱮᱱ, সাকম সরেন, কিস্কিন্ধ্যা  মুরমু , রামলাল টুডু, দুগাই টুডু, সুচাঁদ হাঁসদা, সেঁগেল মারমার, বাড়তাঙ সরেন, সনাতন টুডু,  বিভূতি ভূষন সরেন, সীতেন মান্ডি, গাতে টুওয়ৗর, তপন হেম্ব্রম, দুলৗড় বিটি ।

  

রিলৗমালা মুরুমু, ক্লাস- IV
জেলা - পুরুলিয়া

বিজয় কিস্কু , ক্লাস -VI

জেলা - পুরুলিয়া

১।।

ᱜᱤᱫᱽᱨᱟᱹ ᱵᱟᱹᱣᱞᱤ

 ᱥᱩᱵᱩᱫᱤᱭᱟᱹ ᱢᱩᱨᱢᱩ

᱑)

ᱥᱤᱧ ᱵᱤᱨ
ᱢᱟᱱ ᱵᱤᱨ
ᱵᱤᱨ ᱵᱤᱨ
ᱛᱷᱤᱨ ᱛᱷᱤᱨ ᱿

᱒)

ᱜᱮᱞᱮ ᱢᱟᱛᱠᱚᱢ
ᱵᱟᱦᱟ ᱥᱟᱨᱡᱚᱢ
ᱠᱟᱥᱚ  ᱠᱟᱥᱠᱚᱢ
ᱫᱚᱦᱚ ᱯᱟᱨᱠᱚᱢ ᱿

᱓)

ᱞᱩᱛᱤ ᱛᱮᱨᱚᱢ
ᱮᱸᱜᱟ  ᱢᱮᱨᱚᱢ
ᱢᱟᱞᱟ ᱯᱚᱛᱟᱢ
ᱩᱠᱩᱨ ᱠᱚᱛᱟᱢ ᱿

᱔)

ᱵᱟᱸᱫᱤ ᱠᱚ ᱜᱩᱰᱟᱹᱣ
ᱪᱮᱸᱬᱮ ᱠᱚ ᱩᱰᱟᱹᱜ
ᱫᱷᱤᱨᱤ ᱠᱚ ᱢᱩᱰᱟᱹᱜ
ᱦᱚᱲᱦᱚᱸ ᱠᱚ ᱡᱩᱫᱟᱹᱜ ᱿

᱿====== ᱪ* ᱛ *ᱪ ===== ᱿

 ২।।

ᱵᱤᱨ ᱵᱩᱨᱩ 

ᱜᱳᱯᱮᱥᱣᱚᱨ ᱢᱟ.ᱱᱰᱤ

 

ᱫᱟᱨᱮ,ᱱᱟ.ᱲᱤ ᱦᱟ.ᱲᱭᱟ.ᱨ
ᱩᱢᱩᱞ ᱟ.ᱰᱤ ᱡᱤᱭᱟ.ᱲ ᱾

 

ᱵᱟᱦᱟ,ᱡᱚ ᱯᱮᱨᱮᱡ
ᱪᱮᱬᱮ ᱡᱚᱢ ᱥᱟᱨᱮᱡ ᱾

 

ᱥᱟᱦᱟᱱ,ᱯᱟᱞᱦᱟ ᱨᱚᱦᱚᱲ
ᱡᱩᱞ ᱞᱟ.ᱜᱤᱫ ᱜᱚᱦᱚᱲ᱾

 

ᱤᱥᱤ,ᱥᱮᱱᱮᱨ ᱥᱳᱡᱟ
ᱵᱤᱨ ᱢᱮᱱᱟᱜ ᱢᱳᱡᱟ ᱾

 

ᱜᱟᱸᱰᱚ,ᱥᱤᱞᱯᱤᱧ ᱯᱟᱴᱟ
ᱯᱟᱲᱟᱜ ᱞᱟ.ᱜᱤᱫ ᱢᱳᱴᱟ ᱾

 

ᱫᱟᱨᱮ ᱱᱟ.ᱲᱤ ᱨᱚᱦᱚᱭ
ᱫᱤᱥᱳᱢ ᱦᱟ.ᱲᱭᱟ.ᱨ ᱫᱚᱦᱚᱭ ᱾

 

ᱚᱠᱥᱤᱡᱮᱱ ᱮ ᱮᱢᱚᱜ
ᱡᱤᱣᱤ ᱡᱤᱭᱟ.ᱲ ᱧᱟᱢᱚᱜ ᱾

 

ᱡᱤᱵᱽ ᱡᱤᱣᱟ.ᱞᱤ ᱵᱟᱥᱟ
ᱵᱤᱨ ᱵᱩᱨᱩ ᱟᱥᱟ ᱾

 

᱿====== ᱪ* ᱛ *ᱪ =====

৩।।

ᱡᱮᱜᱮᱫ ᱥᱟᱪᱟᱨᱦᱮᱫ ᱢᱟᱦᱟ ᱫᱤᱥᱟ. ᱠᱟᱛᱮ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

 

 ᱮ ᱵᱤᱴᱤ ᱫᱩᱞᱟᱹᱲ ᱵᱤᱴᱤ
ᱫᱮᱞᱟ ᱦᱤᱡᱩᱜ ᱢᱮ᱾
ᱯᱚᱦᱟ ᱫᱟᱨᱮᱧ ᱟᱹᱜᱩ ᱟᱠᱟᱫ
ᱨᱚᱦᱚᱭ ᱛᱟᱞᱟᱝ ᱢᱮ ᱿

 

ᱮ ᱵᱤᱴᱤ ᱫᱩᱞᱟᱹᱲ ᱵᱤᱴᱤ
ᱡᱷᱟᱨᱤ ᱞᱚᱴᱟ ᱛᱮ ᱾
ᱫᱟᱜ ᱵᱤᱴᱤ ᱟᱹᱜᱩ ᱠᱟᱛᱮ
ᱫᱩᱞ ᱵᱟᱧᱪᱟᱣ ᱢᱮ ᱿

 

ᱱᱤᱛᱮᱢ ᱫᱩᱞ ᱵᱟᱧᱪᱟᱣ ᱞᱮᱠᱷᱟᱱ
ᱦᱟᱯᱮᱱ ᱡᱚ ᱵᱟᱦᱟᱜ ᱾
ᱦᱟᱹᱨᱭᱟᱹᱲ ᱜᱮ ᱟᱛᱳ ᱫᱤᱥᱚᱢ
ᱟᱹᱰᱤ ᱢᱚᱪᱛᱮ ᱥᱚᱵᱷᱟᱜ ᱿

 

ᱵᱟᱝ ᱡᱚᱴᱟᱣᱟ ᱨᱳᱠ ᱟᱡᱟᱨ
ᱱᱟᱯᱟᱭ ᱨᱮᱵᱚᱱ ᱛᱟᱸᱦᱮᱱ ᱾
ᱫᱩᱞᱟᱹᱲ ᱵᱤᱴᱤᱛᱤᱧ ᱞᱮᱠᱟ
ᱥᱟᱱᱟᱢ ᱠᱚᱵᱚᱱ ᱢᱮᱱ ᱿

 

ᱫᱟᱨᱮ ᱫᱮᱵᱚᱱ ᱫᱚᱦᱚᱭᱟ
ᱡᱤᱣᱤ ᱵᱚᱱ ᱵᱟᱧᱪᱟᱣᱟ ᱾
ᱢᱤᱫᱴᱟᱝ ᱫᱟᱨᱮ ᱢᱤᱫᱴᱟᱝ ᱡᱤᱣᱤ
ᱠᱤᱨᱭᱟᱹ ᱵᱚᱱ ᱦᱟᱛᱟᱣᱟ ᱿

 

᱿====== ᱪ* ᱛ *ᱪ =====

৪।।

ᱥᱟᱱᱛᱟᱲᱤ ᱪᱤᱠᱤ ᱟᱲᱟᱝ- (᱑᱐)

ᱥᱨᱤᱠᱟᱱᱛᱚ ᱥᱚᱨᱮᱱ

ᱫᱷᱟ.ᱨᱛᱤ ᱨᱮ ᱟᱭᱢᱟ ᱞᱮᱠᱟᱱ ᱪᱮᱲᱮ ᱢᱮᱱᱟᱜ ᱠᱚᱣᱟ᱾ ᱱᱩᱠᱩ ᱫᱚ ᱵᱷᱳᱨ ᱠᱷᱚᱱ ᱠᱚ ᱮᱵᱷᱮᱱᱚᱜ ᱻᱟ ᱾ ᱥᱮᱛᱟᱜ ᱠᱷᱚᱱ ᱜᱮ ᱡᱚᱢᱟᱜ ᱠᱚ ᱯᱟᱸᱡᱟᱭᱟ ᱾ ᱢᱟᱨᱟᱜ ᱪᱮᱲᱮ ᱫᱚ ᱟᱵᱳ ᱫᱤᱥᱚᱢ ᱨᱮᱱ ᱡᱟ.ᱛᱤᱭᱟ.ᱨᱤ ᱪᱮᱲᱮ᱾  ᱪᱮᱲᱮ ᱠᱚ ᱢᱩᱫᱨᱮ ᱠᱟᱺᱦᱩ  ᱫᱚᱠᱚ ᱥᱮᱭᱟᱱ ᱜᱮᱭᱟ᱾ ᱱᱩᱠᱩ ᱫᱚ ᱠᱟ-ᱠᱟ ᱠᱟᱛᱮ ᱠᱚ ᱨᱟᱜ ᱻᱟ᱾ ᱪᱟᱢᱪᱤᱠᱟ. ᱟᱨ ᱵᱟ.ᱫᱩᱬ ᱱᱩᱠᱩ ᱫᱚ ᱛᱟᱞᱮ ᱫᱟᱨᱮ ᱨᱮ ᱠᱚ ᱛᱟᱸᱦᱮᱱᱟ᱾ ᱥᱤᱧ ᱵᱮᱲᱟ ᱢᱚᱡᱛᱮ ᱵᱟᱝ ᱠᱚ ᱧᱮᱞ-ᱧᱟᱢᱟ ᱾ ᱠᱚᱠᱚᱨ ᱦᱚ ᱥᱤᱧ ᱫᱚ ᱵᱷᱟᱜᱮ ᱵᱟᱝ ᱠᱚ ᱧᱮᱞ-ᱧᱟᱢ ᱟ᱾ ᱱᱩᱠᱩ ᱫᱚ ᱧᱤᱫᱟ. ᱵᱮᱲᱟ ᱥᱮᱸᱫᱨᱟ ᱠᱚ ᱳᱰᱳᱠᱚᱜ ᱻᱟ᱾ ᱜᱳᱰᱳ-ᱪᱩᱴᱤᱭᱟ. ᱮᱢᱟᱱ ᱟ.ᱰᱤ ᱞᱚᱜᱚᱱ ᱠᱚ ᱥᱟᱵ ᱫᱟᱲᱮ ᱟᱠᱚᱣᱟ᱾

ᱠᱩᱲᱤᱫ ᱟ.ᱰᱤ ᱪᱚᱴ- ᱪᱚᱴ ᱛᱮᱠᱚ ᱩᱰᱟ.ᱜ- ᱟ᱾ ᱜᱤᱫᱤ ᱫᱚ ᱱᱩᱠᱩ ᱠᱷᱚᱱ ᱟᱨᱦᱚ ᱪᱚᱴᱽ ᱛᱮᱠᱚ ᱩᱰᱟ.ᱜ ᱻᱟ᱾ ᱱᱩᱠᱩ ᱫᱚ ᱵᱷᱟᱜᱟᱲ ᱡᱮᱞ ᱠᱚ ᱡᱚᱢ ᱻᱟ᱾ ᱠᱩᱭᱞᱤ ᱦᱚ ᱠᱟᱺᱦᱩ ᱞᱮᱠᱟ ᱠᱚ ᱦᱮᱸᱫᱮ ᱜᱮᱭᱟ᱾ ᱯᱷᱟ.ᱜᱩᱱ -ᱪᱟ.ᱛ ᱟ.ᱰᱤ ᱢᱚᱡ ᱠᱚ ᱠᱩᱦᱩᱭᱟ᱾ ᱜᱷᱮᱶᱨᱟ ᱫᱚ ᱚᱲᱟᱜ ᱥᱟᱛᱮ ᱠᱚᱨᱮ ᱠᱚ ᱛᱟᱸᱦᱮᱱᱟ᱾ ᱯᱟᱶᱨᱟ ᱫᱚ ᱥᱟᱛᱮ ᱠᱚᱨᱮ, ᱫᱟᱨᱮ ᱠᱚᱨᱮ ᱠᱚ ᱛᱟᱸᱦᱮᱱᱟ᱾ ᱱᱩᱠᱩ ᱫᱚ ᱟ.ᱰᱤ ᱥᱩᱠᱷᱟ.ᱞᱤᱭᱟ. ᱪᱮᱲᱮ᱾ ᱡᱷᱚᱛᱚ ᱚᱲᱟᱜ ᱠᱚᱨᱮ ᱫᱚ ᱵᱟᱝ ᱠᱚ ᱛᱟᱸᱦᱮ ᱞᱟ.ᱜᱤᱫᱚᱻᱟ᱾ ᱱᱩᱠᱩᱭᱟᱜ ᱵᱟᱠ- ᱵᱟ.ᱠᱩᱨ ᱟ.ᱰᱤ ᱨᱟ.ᱥᱠᱟ. ᱨᱮᱱᱟᱜ ᱟᱲᱟᱝ᱾

᱿====== ᱪ* ᱛ *ᱪ =====

৫।।

রহয় আবো দারে

সাকম সরেন 

 

দেলা জত হারেফারে 
রহয় আবো দারে, 
দাঃ দুল জতন জোগাও 
জত কতে দেবো বাঞ্চাও। 

 

সেরমা সেতোং হেমাল উমুল 
হয়দ হিঁসিদ্ রেয়াড় হয়, 
লাফাঙ্ ডৗর্ রে চেঁড়ে চেরবের 
আঁজম জঙগে মনেয় কয়। 

 

দারে রেগে মেনাঃ আনাঙ্ 
বাঞ্চাও তাঁহেন রেয়াঃ দাড়ে, 
দেসে রহয়াবো দারে পহা 
ডি -ডিহৗ বাড়গে সিমৗকরে। 

 

দে দেলা জুগুৎ কাতে 
কিরয়ৗ দেবো হাতাও,
হৗলি হৗরয়ৗড় দারে নৗড়িতে 
আতো ডিহৗবো সাজাও। 

᱿====== ᱪ* ᱛ *ᱪ =====

 ৬।।

পাপাঃ 

কিস্কিন্ধ্যা মুরমু

  

    হপন চুনু হপন চুনু 
      আমদ চেৎ জম ,
      আমদ চেৎ জম ,
 ইঞ দ জিল পাপাঃ জম।

 

 হপন কুনু হপন কুনু 
      আমদ চেৎ চিকৗ ,
       আমদ চেৎ চিকৗ ,
 ইঞ দ রাঃ লাঁনদা বাড়ায় ।

 

 হপন বুনু হপন বুনু 
      আমদ চেৎ জম ,
       আমদ চেৎ জম ,
 ইঞ দ  তওয়া কাকাঃ জম ।

 

 হপন মুনু হপন মুনু 
       আমদ চেৎ জম ,
       আমদ চেৎ জম ,
ইঞ দ জিল পাপাঃ জম ।।

 

᱿====== ᱪ* ᱛ *ᱪ =====

       ৭।।

হপনটি

রামলাল টুডু

 

 আলেরেন   হপনটি

 কৗমিয়ায় সিটিপিটি
 বহঃ পেরেচ তায় সি ।
              লাঁদাতায় হিটিহিটি
              উব্ তায় পিটিপিটি
               কচেরে তায় হরাসি ।।

 

 হবররে পুথিতায়
 থুলিরেদ গুটিতায়
  খেলোডে গাতেক সালাঃ ।
               সোড়ে জম ইসকুল
                বায় পৗচঃ বিলকুল
                 দিনৗম দিনৗমে চালাঃ ।।

 

 হরগায় জামা জুতৗ
 বহঃরেদ পোঁড় ফিতৗ
  জাঁগারে আলতা আরাঃ ।
               পাউডার অজগায়
               শ - সুনুম খজঃআয়
                বাংখান দয় রা - রাঃ ।।

᱿====== ᱪ* ᱛ *ᱪ =====

৮।।

চিঞচির

দুগাই টুডু

 

লল সিতুং চিঞচির চেঁড়ে
          একাল অৗফির বাড়াঃ
বৗইহৗড় তালা মালা করে
         ঞুহুম ঞুত্‌রে ডেরা।

 

জমকো সেঁদরা তোবাঃ জমা
            জিউয়ি বিতৗও এতে,
কিচিড় মিচিড়  উডৗঃ আনা
           জড়গে হানতে নাতে।

 

বুসু বুসু কৗটিচ্‌ কৗটিচ্‌
       ঞেলতে মঁজগে পৗরি ,
অনে আদ হপন অক্‌ত
      তাঁহেন অত্‌রে সৗরি।

 

তুকৗ কাতেদ্‌  বেলেয় গেদ
       রহড় খেত্‌কো রেগে,
ডেরেদ্‌ চেঁড়ে পারচাঃ কানা
       ওহায় নেনকা তেগে।

 

᱿====== ᱪ* ᱛ *ᱪ =====

৯।।

আড়ে

সুচাঁদ  হাঁসদা

 

হপন বাবুয় রুওয়ৗঃ কানা ,
হিনৗ নিয়ৗয়  বকাঃ ৷
ডৗন জুগিনকো জমে কানা ,
লৗই কেত জান সখা  ৷

 

রান মুরগৗন বৗগি কাতে ,
পাঁজাকো ধুরৗও এন দাঁড়ে ৷
মুল বুলৗন বৗগি কাতে ,
এটাঃ  রেকো  আড়ে  ৷

 
মুল বুলৗন খন দাঃ উডুকঃ ,
হপন বাবুয়  লাঁগাঃ ৷
জান সখাকিন ঝাড় লাঁগায়েন ,
লৗই কেত ডাকতার লাগাঃ  ৷

᱿====== ᱪ* ᱛ *ᱪ =====

১০।।

মিদ্ ডরজন বৗউলী

সেঁগেলমারমার

 

১)  কুকু পতাম কু
চিদ পতাম এম জম
মেনাগ্ তিঞৗ পাঁউরুটি
আর আলুর দম।

 

২) তালা বাবু তিরয়োয় অরঙ
সাজ বাবুয় গল
বাগদুড়ুচ্ টেয়ঙ এ রুয়ৗ
চুটয়ৗ মাত ঢল।

 

৩) এ বাবু মারাঙ বাবু
আলম চালাগ আ চেঁড়ে টুটি
অলগ্ আকিল খনদ
বাঙ মারাঙ আ জিলকুটি।

 

৪) মায়ন কাথা রড়মে
আলে বিটিয় রাগ্
থিরলৗয় খান এমামালে
সিম কুটি পাগ্।

 

৫) মামা অড়াগ্ চালাগ্ আঞ
তওয়া দাকা জম
লিপুর পায়গম হরগ্ আঞ
সাডে রমঝম।

 

৬) দেলা দেলা চাঁদো মামা
আলে অড়াগ্ তে
সনাবাবু জৗপিদ্ কায় মে
চগ্ চেরেজ্ তে।

 

 ৭) ভটে বাবু রটে আতেদ্
বাঁড়শি কোওয়ায় বিঞ
গডা করেয় দাঁড়াবাড়ায়া
তিকিন তারাসিঞ।

 

৮) কুটুর কুটুরকুটুর
ভেলে মুটুরমুটুর
অকয়য়াপে ধুরৗও আকান
সিম সাঁডি পুটুর।

 

৯) ঝারনা ঝারনা ঝারনা
দাগ্ তাম আডি ফারনা
তোপোগ্ গেচ সানাঞ
এঁগাঞ গেচয় মানাঞ।

 

১০). তরহদ্ তরহদ্
চেদাম তুদ্ আ আলাঙ
বৗইদ বৗইহৗড় করে
চেদ্ কোচম হালাঙ।

 

১১) বাপুয় জম্ আ দাল রুটি
ইঞদ পাপাগ্ কুটি
লেভড়া চাটগ্ পুসি মাত
গের এনায় লুটি।

 

১২). উপিয়া উপি
চেদাম বুঁডুর চুপি
চালাগ কানাঞ ইঞ 
হানতে মাগাড় গুপি।

 

᱿====== ᱪ* ᱛ *ᱪ =====

১১।।

জোহার চাঁদোবঙ্গা

বাড়তাং সরেন

  

অড়াঃরেগে মেনাঃলেয়া
               গিদরৗ আলে সানাম 
 অলঃপাড়হাও বৗগি কাতে
                 অরং তিরয়ো বানাম।

 

গড়ম হাড়াম সাঁওতে রিকৗয়
                  নানা হুনৗর সেরেঞ।
ঘানে ঘানে আয়ো বাবায়
             রুহেৎ কেরেঞ কেরেঞ।

 

ইতুন আসড়া বন্ধ গেয়া
              চেকাম হামেট আকিল,
গাতে গাতে খিলডু এনেচ
                চেকাম হুয়ুঃ তাঁসিল ? 

 

হিড়িঞ আলে এলখা লেখা
                    দিশম রেয়াঃ নাগাম,
অলঃ বেগর নাশাঃ তালে
              গিদরৗ কওয়াঃ আগাম।

 

জোহার জোহার চাঁদো বঙ্গা
                আজার সাহায় মেসে
নওয়া ধারতী রিলেমালা
                 আর হঁ তেয়ার মেসে।

 

সেতাঃ সিঁগৗড় নেহরালে
                    যাওগে চাঁদো বঙ্গা
নাপায় নাপায় তেয়ার মেসে
                    নওয়া জিয়ন ঢঙ্গা।

               

রৗস্কৗ লান্দা সেনঃআলে
                আরহঁ ইতুন আসড়া
মনে জিউয়ী অসারালে
                 বাং তাঁহেনা সাকড়া।

᱿====== ᱪ* ᱛ *ᱪ =====

১২।।

গড়ম হাড়ামাঃ পারকম

সনাতন টুডু

 

আলে হাড়ামাঃ মেনাঃ তায়া
মিৎটাং মারে পারকম,
চেদ্‌ কাট্‌ কান বাং বুঝৗও আ
তেরেল তারব মাত্‌কম।

 

দূড়ুব্‌রে সুক্‌ মেনাঃ আ
গিতিজ্‌ রেমা আরহঁ,
খাট-পালংক বায় কুসিয়াঃ
পারকম ছৗড়িজ্‌ চেদ্‌হঁ।

 

গরজ দুলৗড় পারকম সাঁও
বেনাও হিলঃ খনাঃ,
তেহেঞ ধৗবিচ্‌ জিয়ৗড় আকান
আরকো জিনিস খনাঃ।

 

নিজেরাঃ বেনাও নিজেরাঃ জিনিস
আরকো খনাঃ সরেশ,
গড়ম হাড়ামাঃ মারে পারকম
অনাতেগে তো সরেশ।

᱿====== ᱪ* ᱛ *ᱪ =====

১৩।।

মারাং বিটি 

বিভূতি ভূষণ সরেন 

 

রেঁগেচ্ নাচার অড়াঃ রেন 
       মেনায় মারাং বিটি, 
ঘারঞ্জ রেনাঃ সানাম লেকান 
       কৗমিই রিটি পিটি। 

 

জৗপিদ্ খন ' সেতাঃ ' তরা 
        বেরেৎ আয় উসৗরা, 
সেতাঃ রেনাঃ সানাম কৗমি 
        লগন তেয় সুসৗরা। 

 

' বৗসয়ৗম ' বেড়া তুপু কাতেঃ 
         বিটি স্কুলে চালাঃ, 
আতু রেন আয়মা মেনাকঃ 
         দৗই-দাদা সালাঃ। 

 

স্কুল খন রুওয়ৗড় তায়ম 
      সেনঃ আড়াঃ সিত, 
' সিঁগৗড় ' তরা হেচ্ কাতেঃ 
       জগায় রাচা ভিত। 

 

সড়তা-পেড়তা গিতিচ্ জখাচ্ 
           হিনৗ-নিয়ৗ ভৗবিত্, 
' ঞিদৗ বেড়া ' কিদুপ তায়ম 
          আয়ু সঁগেয় জৗপিদ্। 

 

᱿====== ᱪ* ᱛ *ᱪ =====

১৪।।

যুগ

সীতেন মাণ্ডি

আলে বাবু যুগ
হাড়াম লেকায় খুগ
সেতাঃ তরা বেরেৎ কাতে
বিস্কুট ডাব্বাগে সুগ।।

 

মেতায়ালে দৗতানি
বায় রেবেন আথৗড়ি
জোর কাতেলে ব্রাশ কায়
মেৎ মচা লে সাফা কায়।।

 

এমায়ালে লল তওয়া
আড়িয়ৗয় হানা নওয়া
চামচ্ তে তওয়ায় ঞুয়
হৗটিঞ রেদ কুঞ কুঞ।।

 

অল পাড়হাও এ সেঁড়ায়া
মারাং হড়ে হুয়ুঃ আ 
অনাতেগেত পতব আতে
পাড়হাঃ এ দুড়ুব আ।।

 

মিৎ বার পে মেনায়
অ অত্‌ অং হঁ মেনায়
শ্লেটরে হিজিবিজি অলায়
 যুগ বাবু অলঃ এ সেঁড়ায়।।

 

᱿====== ᱪ* ᱛ *ᱪ =====

 ১৫।।

বাঁডঃ পুশি রায়বার

 গাতে টুওয়ৗর

 

বাঁডঃ পুশি সাব আকাদায়
            অড়াঃ জড়াও কারবার
বার টলারেন গোডো কগে
           সাব আকাদেক রায়বার ।

 

সেতাঃ সেতাঃ বেরেৎ কাতে
                        ধুতিঃ লম থম
রৗসকৗ তেগেয় ছুর আকানা
           হিড়িঞ আকাদায় জম ।

 

চালাঃ লৗগিৎ রায়বার কৗমি
               সাঁওতে হিরি নৗইহার
আরসিরে রুপে ঞেলঃ
                মচ্ এ পেটের আর ।

 

আনাক রেমা ধুতি বানুঃ
                 গড়ম বুঢিয় পাঁজায়
অনা ঞেলতে বাঁডঃ পুশি
                আরহঁ আঁটে লাঁদায় ।

 

চালাঃ কৗনৗঞ নৗইহৗর
                সাঁওতে রায়বার কৗমি
ধুতি চাতম বাং তাঁহেনা
                 নওয়া কি আর দৗমি ?

 

গড়ম বুঢিয় আঁজম তিয়োগ্
                বাঁডঃ পুশিয়াঃ কাথা
সাঁওতে আরহঁয় সঁগেয়েকান
               মাঝি কয়িজ সেতা ।

 

পারকম লাতার আরসি টেঁডার
                     চেৎ দ তুরুতুকৗ
গড়ম বুঢিয় দিসৗ কেদা
                  বাং ঞামঃ আইকৗ ।

 

গড়ম বুঢি ফের কৗঠিতে
                 উদুঃ আদে গুনু
তওয়া দাকা জমমে দেলা
              ইতৗৎ আকাৎ কুনু ।

 
হানহার হঞহার কয়ঃ দারাম
             বাম ইদিয়া লৗডু
এমাদেক বাঁডঃ পুশি
               লল লল ডৗডু ।

  

᱿====== ᱪ* ᱛ *ᱪ =====

 

  ১৬।।

আলে বৗবু জবে লৗডু

তপন হেম্ব্রম,

    

আলে অড়াঃ ঘারঞ্জ তালা
     সাদের রিনিচ গুলু,
     সেতাঃ সিঙ্গৗড় সারা ঘৗড়িচ
     থৗরি বৗটি চামচ কতেয় রুয়।

 

     কেড়েব কেড়েব দন অৗচুরঃ
     বাড়গে কুডৗম সাতে,
     দাকা দাঃ  মৗন্ডি জম এ হিড়িঞ
    দাঃ ঞুকতে ডেবে ডেবে ।

     

     লাচ্ রেঁঙ্গেচ রেৎ পাখা
    মেলাং চেটাং খৗজৗড়ি লৗডু,
    বুরধি জ্ঞান লাসের হাতাং
    আচ্ আচতেয় লৗয়ঃ ইঞদ পাতলু ।

 

    কৗমি কৗসনি লৗটুক জাঁহা
    আচ্ অনাগে করাও বুঝৗও য়ে -
    মানা বাচক বাংগেয় আঁজম
    মাসে চিকৗ কাতে এম সাহায়ে ।

 

     রৗগি অৗড়ি অৗডিয় জৗরি
     জেদ কগে বাং কমঃ,
     বাবা বাছা লুলু পুতু
     বায় সামটাঃ উন জহঃ ।

 

    ভালে জখান অৗডিগে নাপায়
    রাচব রাচব ভৗজি হৗকু,
    মচা পেরেচ্ রড় লাঁন্দায়
    আলে বৗবু জবে লৗডু ।

᱿====== ᱪ* ᱛ *ᱪ =====

১৭।।

কুদ্‌ সকড়া

      দুলৗড় বিটি

 

কুদ্‌ সকড়া কুদ্‌ দারেরে
থপে থপে কুদ্‌,
গুডুয় রুকুয় চুট্‌য়ৗয় হালাং
চুঁদে চুকুয় কুদ্‌।

 

তিকিন বেড়া নিচল তরারে
হাঁড়ুক হিলৗও ডৗর,
চুরে মারে গৗড়িকো হিজুঃ
রেপেচ্‌ আতেকো হৗর।

 

গিদৗর মাথ কুদ্‌ সকড়া
একাল বাকো চালাঃ,
দিশৗ পয়সা আদঃ তাকো
হাঁড়ু গৗড়ি বতর জালা।

 

**** মুচৗৎ ****