জাল এস. টি.সার্টিফিকেট রেনাঃ রেহেদ্ তাড়াও
জাহের আয়ো মুরমু
মিৎ দারে রেনাঃ জ-বাহা আডি আলগা তেগে ঞেলঃ আ মেনখান অনা দারে
রেনাঃ রেহেদ্ দ বাং ঞেল ঞামঃ আ। তবে অনাহঁ পাঁজা লেখান দ ঞামঃআ আর বাডায়ঃ আ অনা রেহেদ্
তিনৗ সাঁগিঞ তে আটেৎ আকানা। মেনখান অনা দারে রেনাঃ মুড়ুৎ রেহেৎ গে অর তপাঃ লেখান আর
অনা তায়ম তেদ জ-বাহা বাং ঞেলঃ গঃ আ। আর তায়মতে অনা দারেহঁ গুজুঃ আ। তবে নোওয়াহঁ বাডায় দহ লেক্ কানা মারে দারে রেনাঃ
রেহেৎ অর তপাঃ দ আডি আঝাট গেয়া।
অনকাগে নিৎ পছিম বাংলা ঞুতুমান মিৎ দারেরে জাল এস. টি. সার্টিফিকেট
আর ফেক এস. টি. সার্টিফিকেট রেনাঃ জ-বাহা আডি ঢের তেৎগে ঞেলঃ কানা। আর অনা জ রেনাঃ
জাং হঁ বছর বছর হাঁডে নাঁডে আডি ঢের পারচা কানা। মাড়াং তেদ নোওয়াক জ ঞেলতে অকয় হঁ চেৎ
বাং কো মেন বাডায়েৎ তাঁহে কানা। মেনখান নিৎ আদিবাসী হড় কো নোওয়াকো জ ঞেলতে গুজুঃ লেকাকো
আয়কৗউ এদা। পাসেৎ আরহঁ দিন দিনতে ঢের ইদি- উন্দ……উন্দ…….উন্দ…..। অকয় বায় মেন আকাৎ লেকা “ বুজ খান বুজ মে, আর বাংখান
লহমঃ মে”।
নিৎ দারে ডৗর করে মেনেৎ আয়মা জেলা করেগে হড়, সান্তাড়, মাহ্লে,
মুঁডা, বেদিয়া,খেড়িয়া, শবর এমান লেকান আদিবাসী বাং কান রেহঁ কো জাল এস.টি.সার্টিফিকেট
উদুঃ কাতে আদিবাসী লেকাতে চৗকরি বাগান রেকো বলও আকানা আরহঁক বলন কান গেয়া। নেশ ঝতখন
হাহাড়াঃ গে চিতৗর ঞেল আকানা যখন কলেজ করে ভরতি রেনাঃ তালিকা অডক এনা। অনা তায়ম পি.এস.সি.
লেকান বিনিড অর্জ রেমা ঞুতুম লিস্ট গে বাংকো এম লেদা মেনখান নোওয়াহঁ আদিবাসী কো বুজতে
মিৎ কৗটিচ্ হঁ অসুবিধা বাং হোয় আকান তাকোওয়া। মিৎ কাথাতে লৗই লেখান লৗইয়ঃ গঃআ তেহেঞ
আদিবাসী ইদিকাতে চেৎ চালাঃ কানা…..একালতে ইরিচ্ চিকিচ্ কুঁইডি কটেচ্ ? সে বাং
? আর উন খনগে আদিবাসী কদ বহঃ হাসো ঞাম আকাদ্
কোওয়া। খাস আকোওয়াঃ জুড়ুরে তেহেঞ অ-আদবাসীকো বুরুজ বুরুজ কো সাঁগে চালাঃ কানা।
নিৎ অনাতে আদিবাসী সংগঠন কো নোওয়া লৗইতে লাড়াওনা রেকো সামিল
গৎ আকানা আর সানাম আদিবাসী কো জুমিৎ কাতেকো রড় দারামেদা জাল এস. টি. সার্টিফিকেট বাং
চালাঃ আ, আর ফেক এস. টি. সার্টিফিকেট বাং চালাঃ আ। সাঁও সাঁওতে নোওয়া জাল এস. টি. সার্টিফিকেট
রেনাঃ রেহেদ্ পাঁজা রেহঁকো ছুটৗও আকানা।
আর অনকাগে নোওয়া রেনাঃ মিৎ রেহেদ্ কাথায় খাস বাঁকুড়ারে ঞেল
ঞাম এনা মেন্তে বাডায় আকানা। অনারে বাডায় আকানা বাংমা মেলেরা গ্রাম পঞ্চায়েত প্রধান
লেঁগা তিরেনাঃ কৗমি কাতেৎ কমলপুর আতো রিনীচ্ বিলাস আহির ঞুতুমান মিৎ হড় এস.টি.আর সান্তাড়
গাঁতাত রেন কানায় মেন্তে ঠাম ঠাম আয়াঃ প্যাড রে অল কাতে পারমেন ১২ অক্টোবর হিৎ হিলোঃ
কাস্ট সার্টিফিকেট এ এম আকাওদেয়া। হড়-হপনাঃ গেল বার গটাং পৗরিশ রে অকারেগে আহির পৗরিশ
দ বৗনুঃ আকাদা মেন্তে হড়-হপন কো রড় দারাম আকাদা। বাডায় আকানা নোওয়া ঘটন ইদিকাতে আদিবাসী
সুসৗর গাঁওতা পাহ্টা খন উনি গ্রাম পঞ্চায়েত প্রধান বিরুধ্রে আইনি বন্দেজ হাতাও রেনাঃ
কৗড্রৗই হঁশিয়ৗরি এম কাতে খাতড়া এস.ডি.ও আর বাঁকুড়া জেলা ডি.এম. সাহেব হঁ বাডায় অচ
হুয় আকানা মেন্তে বাডায় আকানা। নোওয়াহঁ বাডায় আকানা উনকিন বানা হড়াঃ কৗড্রৗই শাসেৎ
ঞাম রেনাঃ হঁ দাবীকো দহ আকাদা। নোওয়া ঘটন রেনাঃ সৗবুদ্ ঞাম কাতে আদিবাসী কো বৗড়তি
অক্সিজেন কো ঞাম কেদা নোওয়াদ মেন গানঃ গেয়া। আর অনা তেগে নিৎ তামাম আদিবাসী সংগঠন কো
নোওয়া লৗইতে কৗড্রৗই রড়র কো ধুরৗও আকানা।
তবে একেন বাঁকুড়া সুমুং রেদ বাং নংকান ঘটন কাথায় আয়মা জেলা
করেগে নিৎ চালাঃ কানা মেন্তেহঁ আয়মা সংগঠন গে অভিযোগ কো রাকাব্ আকাদা। বাডায় আকানা
কাথায় বানার চব্বিশ পরগনা, নদীয়া, মালদা, মুর্শিদাবাদ খন আডি বৗড়তি জাল এস.টি.সার্টিফিকেট
ইস্যু কানাঃ মেন্তে মিৎ বার আদিবাসী সংগঠন তি-কো উদুঃ আকাদা।
নোওয়া জাল এস.টি.সার্টিফিকেট রেনাঃ রেহেদ্ তাড়াও রে আদিবাসী
সংগঠন কো যেলেকা লাড়াওনাকো এহব আকাদা অনকাগে সানাম হড়াঃগে জাল এস.টি.সার্টিফিকেট বিরুধরে
লাহাঃ হিজু রেনাঃ লৗক্তি মেনাঃ আ মেন্তেহঁ আয়মা গৗখুড়িয়ৗ কোগেকো মেন এদা। পুরুধুল
কোকো মেমেন কানা- চাহেম চাকরি কান, চাহেম নুকরি কান, চাহেম রাজনীতিঃ কান চাহে আর যাঁহানেম
চিকৗকান? উইহৗর দহ কাঃমে এস.টি. দ আমাঃ সংবিধান রেনাঃ অৗইদৗর কানা। ঞাম আকাদ্ দাও
আলোম পুচুজা, বাংখান তায়ম দারাম আমরেন প-পংড়াকো ইকৗ বাকো এমামা। তবে সাবধান দিসৗ দহ লেক্কানা নোওয়া
রেনাঃ রেহেৎ তাড়াও কৗমিদ উনৗ বাং আল্গাহা……।
.webp)
