আবোওয়াঃ ওয়েব পেজ : খুদ কলকাতা তালারে ঞুতুমান যাদবপুর ইউনিভার্সিটি রেহঁ সান্তাড়ি হৗটিঞ খুলৗও এনা মেন্তে ডগর বাডায় আকানা। নোওয়াহঁ বাডায় আকানা বাংমা নোওয়া মাড়াং কলকাতারে অকারেহঁ সান্তাড়িতে অলঃপাড়হাও রেনাঃ দাও বাং তাঁহে কানা। তবে নিয়ৗবার খনদ যাদবপুর ইউনিভার্সিটি রেহঁ পৗঠুওয়ৗকো সান্তাড়ি পৗরশিতে অলঃপাড়হাও রেনাঃ দাও কো ঞামা মেন্তেগে বাডায় আকানা। যাদবপুর ইউনিভার্সিটি সান্তাড়ি হৗটিঞ চৗলু কাতে মিৎ নাগাম পৗউড়ি হাতাও কেদায় মেনতে আয়মা হড় গেকো লৗই সদর এদা।
নোওয়া যাদবপুর ইউনিভার্সিটি রে সান্তাড়ি হৗটিঞ চালুয় লৗগিৎ
অল ইন্ডিয়া সান্তালি রাইটার্স অ্যাসোসিয়েশন (ওয়েষ্ট বেঙ্গল ব্রাঞ্চ) পাহ্টা খন পারমেন
১৩/০৯/২০১৮ হিৎ হিলোঃ ইউনিভার্সিটি রেন ভাইস চ্যান্সেলর ঠেন অল-বেল তালাতে দাবী সাকাম
চাল হোয় লেনা মেন্তে বাডায় আকানা। আর অনা দাবী দকিন চাল লেদা রাইটার্স অ্যাসোসিয়েশন
রেন সভাপতি মানতান টি.সি. বাস্কে আর জেনারেল সেক্রেটারী মানতান দ্বিজপদ হাঁসদা গম্কে।
অনালেকাতে মানতান হাঁসদা গম্কে লৗই সদর আকাদায় জে- ‘সানাম সান্তাড় হড়-হপন ঠেন তেহেঞ
আডি মারাং গরব আর রৗস্কৗ রেনাঃ কাথা কানা বাংমা কলকাতা রেনাঃ যাদবপুর লেকান ইউনিভার্সিটি
রেহঁ সান্তাড়ি হৗটিঞ চৗলুয়েনা’। রাইটার্স অ্যাসোসিয়েশন রেন সভাপতি মানতান টি.সি. বাস্কে
গম্কে আবোরেন খবরিয়ৗয় বাডায় অচ আকাদেয়া জে- ‘যাদবপুর ইউনিভার্সিটি রে সান্তাড়ি হৗটিঞ
চালুয়েন খৗতির হড়-হপনাঃ যেলেকা গরব অনকা গে আবোরেন সুর-সাঁগিঞ রেন পৗঠুওয়ৗকো মিৎ ঞুতুমান
ইউনিভার্সিটি খন সান্তাড়ি পৗরশি তেকো পাড়হাও দাড়েয়াঃআ নোওয়া খন রৗস্কৗ আর চেৎ তাঁহে
দাড়েয়াঃআ, নোওয়াদ মিৎ কাথাতে লৗই গানোঃআ সান্তাড়ি পৗরশি রেনাঃ জিৎকৗর, হড়-হপনাঃ জিৎকৗর,
অনলিয়ৗ গাওতাহাঃ হঁ জিৎকৗর কানা। মানতান বাস্কে গম্কে আরহঁয় লৗই তরা আকাদা বাংমা পৗঠুওয়ৗকো
তায়ম দারাম নঁডে খনগে খঁদরঁদ হঁক দাড়েয়াঃ মা অনাহঁ দাবী দহ হোয় আকানা।
অনাবেগর ইউনিভার্সিটি রেনগে পৗঠুওয়ৗ সংগঠন কঁহ সান্তাড়ি হৗটিঞ
চৗলু লৗগিৎ দাবীকো দহ আগুওয়াকাদা মেন্তে বাডায় আকানা।
নুন দিন বিদ্যাসাগর, বর্ধমান, বাঁকুড়া, পুরুলিয়া এমান ইউনিভারসিটি
করেগে সান্তাড়িতে অলঃপাড়হাও রেনাঃ দাও তাঁহেলনা। বাডায় আকানা যাদবপুর ইউনিভার্সিটি
চালাওয়েন সেরমা খনগে সান্তাড়ি হৗটিঞ চৗলু রেনাঃ সাপ্ড়াও চালাঃ কান তাঁহেকানা। অনালেকাতে
ইউনিভার্সিটি রেন উপাচার্য পনৎ সেচেদ্ দপ্তর রে অল তালাতে বাডায় অচ লেৎ কোওয়ায়।
ঞেল আকানা যাদবপুর ইউনিভার্সিটিরে আয়মা সান্তাড়ি পৗঠুওয়ৗ নানাহুনৗর
সাতাম লৗইতে পাড়হা লৗগিৎ কো হিজুঃ আ। মেনখান অকয়গে সান্তাড়ি সাতাম লৗইতেদ বাংকো পাড়হা
কান তাঁহে কানা। আর অনাগে ইউনিভার্সিটি হঁ মিৎটাং অকালেকা কমিউনিকেশন গ্যাপ তাঁহেন
কান তাঁহেলেকায় মনে জং কান তাঁহেকানা। নোওয়া সান্তাড়ি হৗটিঞ নিৎ চৗলু কাতেৎ অনা গ্যাপ
পুরুন এনা মেন্তেয় মনেয়েদা। হড় সাঁও এটা হড়াঃ যাঁহা ফারাক সিরজৗ কান তাঁহে কানা অনা
লেকাতে নোওয়া সান্তাড়ি পৗরশি মিৎটাং ব্রিজ লেকায় কৗমিয়ৗ অনা লৗইতে আর সন্দেহঁ রেনাঃ
চেৎহঁ বৗনু আ। মিৎ টাং পৗরশি রেনাঃ হৗটিঞ চৗলু মানে মিৎটাং কোর্স চৗলু সুমুং দ বাং
, অনা পৗরশি রেন পৗঠুওয়ৗ সোররে সেটেরঃ খন এহব কাতে অনা পৗরশি রেনাঃ রানাকাব্ আর লাহান্তি
সাব দহয় আর পৗরশি রেনাঃ নানাহুনৗর দিক সাব রাকাব্। অনালেকাতে নোওয়া হৗটিঞ চৗলুয়েন
খৗতির অনা ইউনিভার্সিটি রেন সান্তাড়ি পৗঠুওয়ৗকো কঁহ আকোওয়া জিৎকৗর লেকাতেকো ঞেল এদা
মেন্তে বাডায় আকানা।
তবে ইউনিভার্সিটি পাহ্টা খন নিৎহঁ আওরি ঠিকৗ বুটৗ আ তিনাঃ
প্রফেসর আর তিনাঃ গটাং সিট তাঁহেনা ? নোওয়া লৗইতে গাপাল মারাও ঠাঁও রেগে মেনাঃ আকাদা।
দারায় কান হাপ্তা করেগে নোওয়া লৗইতে যাদবপুর ইউনিভার্সিটি রেন চাচালাও কো পৗঠুওয়াঃকো
সাঁওতে দুড়ুপ পানতে দাড়েয়াঃআ মেন্তে বা্ডায় আকানা।
.webp)
