(হুডিঞ কৗহনি)
ভূতবঙ্গা
--বাড়তাঙ সরেন
তেহেঞ দ হপন সাঁও আতোরেন অকয় পৗঠুয়ৗগে পাড়হাঃ বাংকো হেচ আকানা। মদন মাচেৎ গমকেয়াঃ পিন্ডৗরে অঙ্করেনাঃ এটকেটঁড়েঁ সালা সামটাও অক্তেগে ঘানে ঘানে অনা ভুতৗহা গাজাড় রেনাঃ কাথায় দিশৗয়েদা হপন। তেহেঞ মা আবার আম্বাশ ঞিদৗ। সিঙ্গৗড় তরা হিজুঃ অক্তে গে আডি চামাল চুমুল বুজুঃকান তাঁহেনা। নিতং মা আরহঁ ঞিদৗ আকান। এটাঃ এটাঃ হিলোঃ দ মঙ্গল, ছটন আর ভঁদড় তাকোকো তাঁহেন তে অনকা বতর বাং বুজুঃ আ। মেনখান তেহেঞ দ মিৎ হড়হঁ বাংকো হেচ আকানা। হপন এসকারে হেচ আকান খৗতির মাচেৎ গমকে দ উশৗরাতে হপনে ছুটি কাদেয়া।
মদন মাচেৎ আঃ অড়াঃখন হপন তাকোওয়াঃ শশঘুঠু আতো দ বার মাইল সৗঙ্গিঞরে।
শশঘুঠু আর সুতৗমবাঁদি আতো তালারে একেন ডৗহি। হররেনাঃ তালা মালারে তালে আর খিজুর রেনাঃ মিৎটাং গাজাড় মেনাঃ আ। সুতৗমবাঁদি আতোরেন দিকু গুজুঃ তায়ম গচমৗড়ি শ্মশানতে ইদিয় অক্তে অনা তালে গাজাড়ঠেন মচারেকো সেঙ্গেল আকোওয়া। হড়কো মেনা, বাংমা অঁডেদ ভূত এমানকো হেনাঃ কওয়া। ঞুঁত ঞিদৗ অঁডে দ ভূতকো দাঁড়ানা। অনাতে অনা তালে খিজুর গাজাড় দকো মেতাঃআ 'ভূতৗহা গাজাড় '।
লেঁগা দৗবিরে পুঁথিরেনাঃ ব্যাগ আর জজম তিরে হেরিকেন সাপ কাতেয় তাড়াম ইদিয়েদা হপন। কাড়াং কাড়াং ঞুঁৎ। রাবাংদিন। এনেগে ঞিদৗ আরে টাড়াং পারম আকানা। তাড়াম হররে অকয়হঁ বাংকো ঞেল লেনা। সৗঙ্গিঞ হররে চেৎগে বাং ঞেলঃকানা। হেরিকেন রেনাঃ আহালাতে নাশে নাশে তাড়ামহর দ ঞেলঃকানা। বতর বতরতেয় তাড়াম ইদিয়েদা হপন। মন দ ধুকুড় ধুকুড়, জাঙ্গা লুকুর লুকুর ! তাড়াম তাড়ামতে অনা ভুতৗহা গাজাড়ঠেনে তাড়াম তিয়োঃ কেদা।
হপন দ ডাহার জজম নাখারে হেনাঃ ভুতৗহা গাজাড় সেচ দ বতরতে বাংগেয় কয়ঃ এদা,পাসেচ চেলেচয় ঞেল ঞামে ! আচকাগে, অনা ভুতৗহা গাজাড় পারম তেবাঃ অক্তেগে গাজাড় ধারেরে হপন দ চেলেচয় ঞেল ঞামকেদেয়া। আডি উসুল, পুঁডগে বুরুৎ বুরুৎ, অনা গাজাড় খনে ওডোং হিজুঃকানা ! হপন দ বতরতে রিয়োঃ রিয়োঃ দৗদৗড়ে এহপকেদা। নাশেনাঃ দৗড় লাহা কাতেঃ গে হপন দ তালা ডাহাররেয় ভিদৗড় এনা। গুজুঃলেকা বতর বল আদেয়া মনেরে। আর দ বায় দৗড় দাড়েয়াঃ কানা ! গেল মড়ে সেরমা উমের রেন হপনাঃ মনেরে মিৎ 'হুদিশ' হেচ এনা - বেগর ঞেলতেঞ দৗড় লেখান মনেরে ভুতরেনাঃ বতর বলঃ আ, বতর তেগেঞ গুজুঃ আ। আচ্ছা, ঠিক সাঁহিচ ইঞ ঞেললায় গেসে। মনে মুরুক কাতেঃ, হেরিকেন কেটেচ্ তে সাপ্ কাতে বৗই বৗইতেয় তিঙ্গুয়েনা হপন। দিল দাড়েয়াতে গাজাড় সেচ লাহা ঞঃকাতে অন্তেয় কয়ঃকেদা।
ঞেল কেদেয়ায়, মিৎ মারাং গৗই। হপনে ঞেল ঠৗওকৗ কেদেয়া। নায়কে করেন কুমড়ু গৗই দ গাজাড়রে হারা আকান হৗরিয়ৗড় ঘাঁস রৗচুঃ রৗচুঃ এ আতিঞ জংকানা।
.webp)
