আবোওয়াঃ ডিজিটাল ডেস্ক- তেহেঞ ১৬ জুন ভারত জাকাত মাঝি পারগানা মহল পাহ্টা খন গোয়ালতোড় থানারেন আইসি জয়দেব মন্ডল বিরুধরে মিৎ রাঁগাওনা জমেলায় রেনাঃ চিতৗর ঞেল এনা। ঞেল আকানা তেহেঞা দাঃ-জৗড়ি তালারেহঁ মিৎ মারাং মিছিল। আর মিছিল তালা খনগে উনি আইসি লৗইতে হুঁসিয়ৗরী কাথা হঁ আঁজম আকানা।
বাডায় আকানা পারমেন ১২ জুন হিলোঃ অনা থানারেন গে বাবলু সরেন ঞুতুমান মিৎ হড় আপনারাঃ মিৎ অভিযোগ লৗইতে গোয়ালতোড় থানায় হেচ্ লেনা। উন অক্তে থানারে দৗয়িত্ লেকাতে তাঁহেকান মানতান আইসি জয়দেব মন্ডল, বাবলু সরেনাঃ অভিযোগ হাতাও মাড়াং গে হিনৗ-নিয়ৗ মেনকাতে দাল-তল আর নাহাচার এ চালাও আকাদা মেনতে মহল পাহ্টা খন অভিযোগ রাকাপ্ আকানা। বাবলু সরেন চেতান যাঁহা নাহাচার চালাও আকানা অনা বিরুধ রেগে বাংমা তেহেঞাঃ রাঁগাওনা জমেলায়। তেহেঞ বাবলু সরেন চেতান নাহাচার হোয় আকানা গাপাদিন আরহঁ অকয় চেতান নাহাচার হোয়োঃ আ অনারেনাঃ চেৎ গ্যারেন্টি মেনাঃআ? অনাতেগে বাংমা তেহেঞা রাঁগাওনা জমেলায়।
বাবলু সরেন চেতান যাঁহা লেকা নাহাচার চালাও হুয় আকানা অনাদ সেদায় ব্রিটিশ যুগরেন নাহাচৗরিয়ৗ মহেশলাল দারোগা সাঁও হঁ আপিসার জয়দেব মন্ডল কো তুলুজ্ আকাদেয়া অনা রাঁগাওনা জমেলায়রে। মহলাঃ অভিযোগ যাঁহারে হড়াঃ দুক্-আপদ রে পুলিশাঃ পুরিসেবা এম রেনাঃ কাথা অঁডে তেহেঞ সাধারন হড় দাল কো জম এদা। তবে চেৎ থানারে ব্রিটিশ শাসন চালাঃ কানা মেনতেহঁ মহল কুকলিয় রাকাপ্ আকাদা। সাধারন হড় চেতান নংকান নাহাচার বায় সাহাও আ মেনতেহঁ মহল কড্রায় রড় দারাম আকাদা। অনা সাঁওতে গোয়ালতোড় থানা খন আইসি জয়দেব মন্ডল লাগা অচঃ রেনাঃ দাবী হঁ মহল এ দহ আকাদা মেনতেহঁ বাডায় আকানা।
.webp)
