(হুডিঞ কৗহ্নি)
সেলফি
নিকোলাস মারানডি
কোরোনা মহামারি অকতে রেয়াঃ কাথা কানা। দিসম রে যখন লকডাউনতে ইসকুল কলেজ কো বনদয়েন খান , অনলাইনতে পাড়হাও এহোপ গৎ আকানা। অনকা লেকারে সুরেশ হঁ গ গ বাবাঠেন মোবাইল এ আবদার কেদা। এনকাথায় , " ইঞ রেন' গাতে কো দ অনলাইন তে কো পাড়হাওঃ কানা । আর ইঞ খান দো বাং ? ঞেলবেন ইঞ দো অলঃ পাড়হাওঃ তেঞ তায়মঃ কানা। মোবাইল বাংখান পাড়হাওঃ গেঞ বৗগি উতৗরা ।"
গিদরৗওয়াঃ নংকান্ কাথা আঁজোম কাতে আয়মা হড়গে উনি গিদরৗ পাহটা কো রড় বাড়া কেৎ খান গ গ বাবা দো বাধ্য কাতে , টাকা পয়সা জগাড় কাতে মিৎ দৗমি ইসমাট ফোন কিন কিরিঞ আদেয়া। সুরেশ দ অনা ফোন ঞাম কাতে আডি তেঃএ রৗসকৗ য়েনা। আর আচ্ রেন গাতে কো ঠেনগে মোবাইল চালাও আর অনলাইন পাড়হাও হঁয় এহোপ কেদা ।
অনা তায়ম সুরেশ দ দিনৗমগে মোবাইল রে ব্যাস্তোয় ঞেলেনা। ঘানে দয় ফোটোঃআ আর ওকা দো ভিডিওয় বেনাওআ আর গ গ বাবা সাঁওতে আতোরেন অনকান হড়ে উদুঃ বাড়া আকোওয়া। আর অনকা বাড়ায়তে আচ্ দো অডি রৗসকৗয় আইকৗওআ। যাঁহা আখড়া রেগে উনি দো ফোটো হাতাও আর বিডিও তুলৗও দম ঞেলতে গেয়া।
অনা কো ঞেল কাতে গ গ বাবা দো কিন মেনা ," বাবু , মোবাইল রেয়াঃ আথৗউড়ি বেওহার খন থড়া সনতর রে তাঁহেন মে, আর বাংখান জিউয়ি হঁ নাসাও দাড়েয়াঃআ ! " তবে সুরেশ দ আচ্ গ - বাবাওয়াঃ কাথায় লুতুরা দা সে বাং ওকো বাডায়, এনতে মোবাইল ঞাম কাতে গে অনারেয় উনুম আঁগেন আকান তাঁহেনা ।
নিয়ৗ বারাঃ বোরসো চাঁদো গোটা ডুবৗ দাঃতে চাপে আকানা। মিৎ হাপতা খন হড় বাহরে বাকো অডোক দাড়ে আকাও দা । আঁজমেনা গঁনধোর গাডা হঁ বান দাঃতে পেরেচ চেহেল-চেপেল আকানা। আর বোগেতে বতরগে হাদ-হাদ আতুঃ কানা। অনা ঞেল লৗগিৎ আতো কড়া সাঁওতে, সুরেশ হঁ গাডা ঢিপ রেকো সেটেরেনা। আর ঞেলাকো সৗ রিগে গাডা বাঁধ রৗপুৎ কাতে দাঃ দো হাদ-হাদ আতুঃ কানা। সুরেশ দো উসৗরা অনা ঞেল কাতে, লোভ বায় সামড়াও দাড়েয়াঃ তে গাডা ধৗধনি রে চালাও কাতে সেলফি তুলৗও লৗগিৎএ চালাও এনা। আচ্ রেন গাতেকো মানা-মানা কাদে গেয়া যে , " আলম চালাঃআ ,গাডা দাঃ বতরগে ঞেলঃ কানা ।" ঘোটনা হোয়োঃ রেয়াঃ সে চেঃ এম মেনা , সুরেশ দ গাডা ঢিপরে চালাও কাতে , আতুঃ কান দাঃ সেচ দেয়া কাতে সেলফিয় হাতাওয়েৎ তাঁহেনা , আর উন সময়গে অঁডে তেঁগো আকানাঃ হাসা দো বৗই-বৗইতে ধৗসুড় ঞুরুঃ কান তাঁহেনা। সুরেশ দো ঞেলকাতে বতরতে , তি খোন মোবাইল দো পুসকুচ্ ঞুরেন তায়া আতুঃ দাঃরে। ঞেল কাতে সুরেশ বায় সামড়াও দাড়েয়াদা আর দামান মোবাইল দাঃরে আতুঃ ঞেলতে আচ্ হঁ দাঃ রেয়ে দন খাদলেঃ কান তাঁহেনা, আর উন-সময়গে বোগে দ আচ্ রেন গাতেকো সাপ্ দারাম কেদেতে। আর বাংখান আচ্ হঁ বান দাদঃ রেয়ে মেসা কঃআ।
.webp)
