(পোয়লো হৗটিঞ)
“জেগেৎ, গিদ্রৗকো এঁগাত্-তোওয়া নুনুওয়াকো হাপ্তা” দিসৗকাতে |
| -ডাঃ সুরেন্দ্রনাথ মান্ডি |
জানাম তরা খন তুরুই চাঁদো উমের হৗবিচ্ রেন গিদ্রৗ কদ ‘তওয়া নুনু গিদ্রৗ’ কো মেতাওয়া কোওয়া। নিয়ৗ উমের রেদ এঁগাত্ তওতা রেগে সানাম লেকান জমাঃ ঞুওয়াঃ কো ঞামা,এটাঃ জমাঃ ঞুওয়াঃ জম-ঞু রেনাঃদ লৗগ্তি বৗনু আনাং, জুদিও নাহাঃ দ ডাকতর সে পুষ্টি বিঞ্জানী,গিদ্রৗ কোওয়াঃ মড়ে চাঁদো উমের খনগে হাজাম দাড়েয়াঃ লেকান কম্ কম্ কাতেৎ জমাঃঞুওয়াঃ এম্ রেনাঃ ক পরামেশ এদা, আর অনাতেগেতুরুই চাঁদো উমের রে “গিদ্রৗ আইঠৗ” রেনাঃ চল্ দ হেচ্ আগুঃ কানা। মেনখান নাহাঃ রেন মিৎ বার আধুনিক গিদ্রৗ এগাঁত কোওয়াঃ নুনুওয়াকো ইদিকাতে ভুল ধারনা মেনাঃ আকাৎ তাকোওয়া; আর বাংখান মেনগানঃ আ – গিদ্রৗ নুনুওয়াকোরেনাঃ মর্ম গে বাংকো বাডায়া। আর নোওয়াক অজ্ তেগে ধৗরতি জাকাত রে, ১৯৯২ সালরে ১ খন ৭ আগস্ট দ ‘জেগেৎ, গিদ্রৗ নুনুওয়াকো হাপ্তা’ লেকাতে ছৗটয়ৗর আকানা আর জাও সেরমা গে আয়মা লেকানা কৗমিহরা হাতাওয়ঃআ, এনতে সানাম এঁগাত্ কো গিদ্রৗ নুনুওয়াকো রেনাঃ মর্ম কো বাডায় দাড়েয়াঃমা।
গিদ্রৗ নুনুওয়াকো রেনাঃ হামাল ( গুরুত্ব) তেৎ -
নে এ বসমতারে উয়ুঃ আকান গিদ্রৗওয়াঃ সানাম ধৗরতি পুরিদ আয়িচ্ এগাঁত্ গে। জমাঃ ঞুওয়াঃ, জিরৗও, আরাম সানাম লৗগিৎগে বেলে বেলতেঞ গিদ্রৗ জাঁহায় চেতানে তেহাঁড়ঃ আ, উনি দ আচ্ আয়োগে। আয়ো-তওয়া চেপেচ্ দারায়তেগে গিদ্রৗ আয়ো তায়ে উরুমেয়া।
গিদ্রৗ নুনুওয়াকোতে আয়ো তেকোওয়া উব্গৗরানাঃদ নোওয়া কানা জে ১) গিদ্রৗ নুনুওয়াকোতে দিনৗম হিলোঃ পেরাই ৪৫০ খন ৫০০ ক্যালোরি হড়ম খন খরচাঃআ। নোওয়া খৗতির হামাল-হড়ম তাঁহেন অক্তে রেনাঃ বৗড়তি ওজন রাওয়ালঃ আ। ২) গিদ্রৗ উয়ুগঃ অক্তে এগাঁত্-কুখি (জরায়ু) খন মায়াম লিঁগিঃআ। গিদ্রৗ নুনুওয়ায় খৗতির এঁগাত্-হড়ম খন অক্সিটোসিন হরমোন সারসাঃআ, জাঁহাদ ফুলৗওয়াকান এঁগাত্ কুখি আরহঁ স্বাভাবিক রূপতে লগন রুওয়ৗড় অচয় রেয় সহদা। ৩) গিদ্রৗ নুনুওয়াকোতে এঁগাত্ কোওয়াঃ ব্রেস্ট ক্যান্সার হোয়োঃ রেনা ঝুঁকি কমঃ আ; অষ্টিওপরোসিস, মেনমা হড়ম-জাং খয়ঃ রেনাঃ বতর কমঃ আ।
এঁগাত্-কুখি খন গিদ্রৗ উয়ুগঃ মিৎ ঘন্টা তায়ম খনগে গিদ্রৗ নুনুওয়াকো লেক্ কানা। নোওয়াতে এঁগাত্ আর গিদ্রৗওয়াঃ হড়ম’ হড়ম’ জপটেৎ মানেগে অন্তর-জিউয়ি জপটেদঃআ, নাপায় সৗগৗই তেয়ারঃ তৗকিনা (বন্ডিং)। পোয়লো পোয়লো দ গিদ্রৗ এঁগাত্ তওয়া বায় নুনু দাড়েয়াঃ রেহঁ, সে এঁগাৎ তওয়া বাং সারসাও হদঃ রেহঁ তায়ম তেদ সারসাঃ গেয়া। পোয়লো পোয়লো দ পুঁড তওয়া বাদাল তে সাসাং সাসাং গাড়্ধ তওয়া ‘কলষ্ট্রাম’ কম মাছা মিৎ বার মাহা সারসাঃআ, জাঁহা ঞুয় তেদ গিদ্রৗওয়াঃ হড়ম’রে অৗডিগে উব্গৗরঃআ, এনতে নোওয়ারে আয়মা আয়মা ‘ইমিউলো গ্লোবিঊলিন’তাঁহেনা, খৗতির গিদ্রৗওয়াঃ হড়ম’রে আজার টেকাও দারাম দাড়ে তেয়ারঃআ।
বালে বেলতেঞ গিদ্রৗ সারাদিনগে তওয়ায় চেপেচ্ লৗগিদ্ঃআ। রাঃ লেখানগে, মেনমা রেঁগেচ্ লেখানগে (আন্দাজ ৩ ঘন্টা ছাডা ছাডা) নুনুওয়ায় হোয়োঃআ। সাধারনত বারয়া কড়াম তওয়া (Breast) খন ২০-৪০ মিনিট অক্তে হৗবিচ্ তওয়ায় চেপেজা, মেন্দ মিমিৎ কড়াম-তওয়া খন কম্ রেয়াঃ ১০মিনিট গিদ্রৗ তওয়ায় চেপেজা। মিমিৎ কড়াম তওয়া খন কম্ রেয়াঃ ১০ মিনিট মিৎ ধাওতে নুনুসে তওয়া চেপেচ্ অচওয়ায় তায়ম আনাঃ, দসার কড়াম তওয়া খন নুনু পেরেচ্ অচ ওয়ায় হোয়োঃআ। ১০মিনিট গান লাহারেগে নুনু চেপেচ্ চেপেচ্তে গিদ্রৗয় জৗপিৎ লেখান, জাঁগা লাতার রে আর বাংখান লুতুর রে গুত্লু কাতেৎ এভেনে হোয়োঃআ।
(নিয়ৗ তায়ম দসার হৗটিঞরে)
.webp)
