সিঁগি মাহা রেনাঃ সাকাম ‘চেরেচ্ আড়াং’ লেখা- ১৫১

 

“আবোওয়াঃ কাথা” গে উছৗনঃডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড় গে উছানঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান-  ᱥᱩᱵᱩᱫᱤᱭᱟ. ᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ, ᱱᱰᱤ, ᱠᱤᱥᱠᱤᱱᱫᱷᱟ ᱢᱩᱨᱢᱩ, ᱥᱟᱹᱜᱩᱱ  ᱥᱤᱠᱟᱹᱨᱤᱭᱟᱹ, ᱯᱩᱨᱱᱚ ᱪᱚᱱᱫᱨᱚ ᱠᱤᱥᱠᱩ, বাড়তাং সরেন, সমরলাল টুডু, সিতেন মান্ডি,  সনৎ কুমার হাঁসদা, সুচাঁদ হাঁসদা, দুগাই টুডু, দুলৗড় বিটি।

  

১।। 

ᱫᱟᱜ ᱫᱤᱱ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱟᱥᱟᱲ   ᱥᱟᱱ
ᱠᱷᱮᱛ ᱵᱟᱹᱫᱮᱹ ᱵᱟᱱ ।

ᱡᱷᱤᱯᱤᱨ  ᱡᱟᱹᱲᱤ
ᱫᱟᱜ ᱵᱟᱭ ᱟᱹᱡᱟᱹᱲᱤ ।

ᱵᱟᱹᱫ  ᱠᱷᱮᱛ
ᱯᱮᱨᱮᱡ ᱪᱷᱮᱞᱮᱠ ᱪᱷᱮᱞᱮᱠ ।

ᱥᱮᱨᱢᱟ   ᱨᱤᱢᱤᱞ
ᱦᱚᱭᱛᱮ ᱯᱤᱨᱤᱞ ᱯᱤᱨᱤᱞ ।

ᱚᱴᱟᱝ  ᱟᱫᱚᱜ
ᱫᱟᱜ ᱨᱤᱢᱤᱞᱮ ᱥᱟᱫᱚᱜ ।

ᱜᱩᱨᱞᱟᱹᱣ  ᱦᱤᱡᱩᱜ
ᱨᱤᱢᱤᱞ ᱵᱩᱡᱩᱜ ᱵᱩᱡᱩᱜ ।

ᱟᱥᱟᱲ  ᱥᱟᱱ
ᱫᱟᱜ ᱡᱚᱨᱚᱜ ᱠᱟᱱ ।

ᱥᱟᱸᱜᱮ  ᱨᱤᱢᱤᱞ
ᱵᱟᱱᱩᱜ ᱨᱤᱞ ᱠᱤᱪᱤᱞ ।

ᱵᱟᱹᱫᱽᱼᱵᱟᱹᱭᱦᱟᱹᱲᱮ  ᱪᱟᱯᱮ
ᱫᱟᱜᱼᱡᱤᱭᱟᱹᱞᱤ  ᱦᱟᱯᱮ ᱦᱟᱯᱮ ।

ᱠᱩᱞᱦᱤ  ᱰᱟᱦᱟᱨ
ᱞᱚᱥᱚᱫᱽ  ᱠᱚᱜᱡᱮ  ᱡᱟᱦᱟᱨ ।

==== )(====

২।।

ᱪᱟᱥ

ᱜᱳᱯᱮᱥᱣᱚᱨ ᱢᱟ.ᱱᱰᱤ

  

ᱟᱥᱟᱲ ᱥᱟᱱ ᱵᱚᱸᱜᱟ ᱠᱟᱱ

ᱵᱟ.ᱫᱽ,ᱵᱟ.ᱭᱦᱟ.ᱲ ᱯᱮᱨᱮᱡ ᱟᱠᱟᱱ ᱾

 

ᱤᱧ ᱵᱟᱵᱟᱭ ᱥᱤᱭᱳᱜ ᱠᱟᱱ ᱾

ᱠᱟᱫᱟᱢ ᱵᱟ.ᱭᱦᱟ.ᱲ ᱞᱚᱥᱚᱫ ᱠᱟᱱ ᱾

 

ᱫᱟᱜ ᱛᱮᱭ ᱞᱚᱦᱚᱫ ᱟᱠᱟᱱ

ᱞᱚᱥᱚᱫ ᱛᱮᱭ ᱯᱮᱨᱮᱡ ᱟᱠᱟᱱ ᱾

 

ᱪᱟᱥ ᱠᱟ.ᱢᱤ ᱛᱚᱨᱟᱣ ᱟᱠᱟᱱ

ᱨᱟ.ᱥᱠᱟ. ᱛᱮᱭ ᱪᱟᱯᱮ ᱟᱠᱟᱱ ᱾

 

ᱟᱲᱮ ᱞᱟᱜ ᱯᱩᱨᱟ.ᱣ ᱯᱟᱞᱮ

ᱦᱩᱲᱩ ᱜᱟ.ᱪᱷᱤ ᱨᱚᱦᱚᱭ ᱟᱞᱮ ᱾

 

ᱫᱟᱜ ᱡᱟ.ᱲᱤ ᱜᱩᱸᱜᱩᱜ ᱟᱞᱮ

ᱠᱟ.ᱢᱤ ᱞᱮᱛᱟᱲ ᱫᱚᱦᱚᱭ ᱛᱟᱞᱮ ᱾

 

ᱦᱩᱲᱩ ᱦᱮᱲᱮ ᱟᱨᱡᱟᱣ ᱟᱞᱮ

ᱥᱮᱨᱢᱟ ᱯᱩᱨᱟ.ᱣ ᱡᱚᱢ ᱯᱟᱞᱮ ᱾

==== )(====

৩।।

ᱧᱩᱛᱩᱢ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

  

ᱰᱟᱹᱴᱷᱩ,ᱵᱩᱰᱜᱟᱹ,ᱨᱩᱴᱷᱩ,ᱪᱩᱰᱜᱟᱹ

    ᱞᱚᱫᱚᱢ ,ᱞᱚᱫᱷᱟ,ᱴᱩᱨᱟᱹ  ,

ᱦᱚᱦ ᱟᱞᱮᱠᱚ ᱰᱟᱹᱲᱩ ,ᱜᱩᱲᱠᱷᱟᱹ

        ᱞᱚᱫᱷᱭᱟ,ᱟᱨ ᱜᱩᱨᱟᱹ  ᱾

 

ᱠᱤᱛᱟᱹ , ᱠᱟᱹᱯᱨᱟᱹ , ᱥᱩᱨᱩᱡᱽᱢᱩᱱᱤ

    ᱟᱨᱦᱚᱸ ᱥᱟᱸᱡᱤ ᱰᱷᱟᱸᱜᱤ ,

ᱪᱷᱤᱛᱟᱹ ᱠᱩᱭᱞᱤ ᱠᱟᱯᱩᱨᱢᱩᱱᱤ

    ᱟᱨᱦᱚᱸ ᱨᱟᱱᱤ ᱨᱟᱸᱜᱤ  ᱾

 

ᱜᱩᱰᱩ,ᱪᱩᱴᱤᱭᱟᱹ ,ᱦᱟᱸᱲᱩ ᱦᱟᱰᱜᱟᱨ

     ᱦᱚᱦᱚᱭᱟ ᱨᱟᱜᱤ ᱠᱟᱛᱮ  ,

ᱡᱤᱨᱟᱹ,ᱢᱚᱥᱞᱟ ᱧᱩᱛᱩᱢ ᱵᱳᱣᱦᱟᱨ

           ᱢᱮᱱᱜᱮ ᱡᱚᱛ ᱠᱚᱛᱮ   ᱾

 

ᱧᱩᱛᱩᱢ ᱛᱮᱜᱮ ᱡᱚᱛ ᱦᱚᱲᱜᱮ

    ᱩᱨᱩᱢ ᱢᱮᱱᱟᱜ ᱛᱟᱵ,

ᱥᱟᱱᱟᱢ ᱨᱮᱱᱟᱜ ᱵᱩᱴᱟᱹ ᱞᱮᱠᱟᱜᱮ

    ᱦᱚᱦ ᱢᱮᱛᱟᱜ  ᱟᱵ  ᱾

==== )(====

৪।।

ᱟᱞᱚᱢ  ᱦᱤᱲᱤᱧᱟ

ᱥᱟᱹᱜᱩᱱ  ᱥᱤᱠᱟᱹᱨᱤᱭᱟᱹ

  

ᱮᱲᱮ ᱠᱟᱛᱷᱟ ᱟᱞᱚᱢ ᱞᱟᱹᱭᱭᱟ

ᱚᱠᱚᱭ ᱥᱟᱸᱣᱛᱮ ᱟᱞᱚᱢ ᱞᱟᱹᱲᱦᱟᱹᱭᱭᱟ,

                      ᱟᱞᱚᱢ ᱮᱜᱮᱨ ᱠᱚᱣᱭᱟ

                      ᱟᱞᱚᱢ ᱦᱟᱞᱵᱟᱛᱚᱜ-ᱟ   ᱾

  

ᱥᱤᱛᱩᱝᱨᱮ ᱟᱞᱚᱢ ᱫᱟᱹᱲ ᱵᱟᱲᱟᱭᱟ

ᱚᱞᱚᱜ ᱚᱠᱚᱛ ᱟᱞᱚᱢ ᱠᱷᱤᱞᱳᱰᱟ ,

                  ᱥᱟᱨᱟᱫᱤᱱ ᱟᱞᱚᱢ ᱠᱷᱤᱞᱳᱰᱟ

             ᱱᱟᱯᱟᱭ ᱠᱟᱢᱤ ᱟᱞᱚᱢ ᱵᱤᱞᱳᱰᱟ᱾

 

==== )(====

৫।।

ᱥᱤᱢ ᱮᱸᱜᱟ ᱟᱨ ᱥᱤᱢ ᱥᱟᱸᱹᱰᱤ

ᱯᱩᱨᱱᱚ ᱪᱚᱸᱫᱨᱚ ᱠᱤᱥᱠᱩ

  

ᱥᱤᱢᱮᱸᱜᱟ_ ᱵᱟᱝ ᱫᱚ ᱵᱚᱛᱚᱨ ᱛᱮ

ᱵᱟᱝ ᱫᱚ ᱨᱟᱸᱥᱠᱟᱸᱛᱮ

ᱵᱷᱳᱨ ᱠᱷᱚᱱᱮᱢ ᱠᱩᱠᱲᱩ ᱭᱟ

ᱡᱟᱯᱤᱫ ᱮᱢ ᱵᱷᱟ ᱜᱚᱲ ᱟ᱾

 

ᱥᱤᱢ ᱥᱟᱸᱰᱤᱼᱵᱟᱝᱫᱚ ᱨᱮᱸᱜᱮᱡ ᱛᱮ

ᱵᱟᱝᱫᱚ ᱛᱮᱛᱟᱝ ᱛᱮ

ᱥᱮᱛᱟᱜ ᱠᱷᱚᱱᱮᱢ ᱯᱷᱟᱫ ᱯᱷᱟ ᱫᱟᱜ

ᱨᱟᱪᱟ ᱨᱮ ᱜᱮᱢ ᱦᱟᱫ ᱦᱟ ᱫᱟ᱾

 

ᱥᱤᱢᱮᱸᱜᱟᱼᱟᱢᱫᱚ COCK

ᱵᱟᱝ ᱟᱸᱛᱟᱸᱧᱟ Talk

ᱟᱰᱤ ᱜᱮᱢ Fake

ᱧᱮᱞᱚᱜ ᱟᱢ Black.

 

ᱥᱤᱢ ᱥᱟᱸᱰᱤᱼᱟᱢᱫᱚ Hen

ᱵᱩ ᱨᱥᱤ ᱵᱮᱞ ᱮᱢ ᱛᱮᱱ

ᱵᱟᱱᱳᱜ ᱛᱟᱢᱟ Brain

ᱠᱟᱴᱟ ᱨᱤᱧ ᱛᱚᱞ ᱟᱢ Chain.

==== )(====

৬।। 

গড়ম হাড়াম কাথা

বাড়তাং সরেন

 

এড়ে কাথা এড়ে ডাহার

                   বাবোন পাঁজায় সৗরি

এড়ে ডাহার আলগা গেয়া

                      কেটেচ গেয়া 'সৗরি' ।

 

'সৗরি' ডাহার পেরেচ গেয়া 

                    আয়মা এটকে টঁড়ে

সৗরি কাথা লৗলৗই তরা

                    ওটাং পেটেচ  হেড়ে।

 

সৗরি ডাহার পাঁজায় রেদ 

                আডি লেকান হারকেত

ঘানে ঘানে জিয়ন রেদ 

                  হারন জ্বালা বরকেত ।

 

সৗরি খৗতির হুল গৗরিয়ৗ

                  জিউয়ী দকো আলায়

তিলকৗ বীরসা সিধুকানু 

                লৗড়হৗই দকো লাহায় ।

 

মায়াম জরঃ জিউয়ী চালাঃ 

                     লান্দা আতেয় আতাং 

বৗজৗল কাথায় সৗরি লৗগিৎ

                         তিরয়ো রাহায় অটাং ।

 

সৗরি কাথা লৗলৗই রেদ 

                   ঞামাম মৗনমী দুলৗড়

দিশম খন দ অটাং সাহাঃ 

                      আড়িসান রাহা রৗড় ।

 

বৗড়িচ ডাহার পাঁজায় তরা

                     ঞামাম  'এড়ে রৗস্কৗ'

সৗরি সৗগুন পাঁজায় রেদ 

                     ঞামাম 'সৗরি রৗস্কৗ' ।

 

সৗরি সৗগুন কৗমি তাঁহেন 

                   সাঁওতা তালা যায়যুগ

অল তাঁহেনা সোনা বারাং

                   ঞুতুম আমাঃ যায়যুগ ।

 

নওয়া কাথা লৗই লেদায়ে 

                      আলে গড়ম হাড়াম

সৗরি লৗগিৎ যাঁহা সেটের 

                    লান্দা আতেম দারাম ।

==== )(====

৭।।

দারে  লাতার

সমরলাল টুডু

 

আতু    রিনিজ    সানাম    গিদরৗ

                উল্    বিলি   হালাং,

হড়মোরে  ঝাগঃ এতাং এতাং

      তিকিন সিতুং এলাং  ।

 

দারে  লাতার  জাতার  কাতার

           লড়ে  নৗই  চড়ে,

তাঁহা  রেতাং  নানা  তারনা

          জজ  উল্  সড়ে  ।

 

হাদার  হয়তে  দারে  ডৗরদ

       ইঁগুদঃ  লেকা  ঞেঁলঃ,

চেটরে  গিদৗর  ঞিঁর্  সেনকাতে

         দারে  ডৗররেকো ঝিলঃ ।

 

দারে  ডৗররে  হৗড়ুব্  কাতে

      গিদরৗ  কড়াম পুটুরঃ

অনা  ঞেঁলতে  উল্  দারেদ

     লাঁদা  লাঁদাতেয়  ছুরঃ ।

 

চেটরে  গিদৗর  লেটের  পেটের

     ডৗর  সাবকাতেয়  ফাঁদায়,

দারে  লাতার  ঞুঁরু  কাতেদ্

        উল্  বেলেদয়  লাঁদায় ।

 

বিলিৎ  বালাৎ  বিজলি  সাঁওতে

        আঁড়গো  হিজুঃ  জৗড়ি,

সেরমা  দাঃতে  অদর্  থপর্

        গিদরৗ  লহৎ  গাঁড়ি  ।

 

সেবেল  সড়ম্  লব্  লালোচতে

       গিদরৗ  লবর  চবর্,

হুডুর্  বিজলি  দেয়া  কাতেদ্

       উল্  বেলেকো  হবর্  ।

 

এবাবু  গিদরৗ  উলদো  জমপে

       আলোপে  জমা  কুয়ু,

বাখাচ্ দনদনতে   লহমঃ আপে

         উনি  বাঁড়িয়া  তুয়ু  ।

==== )(====

৮।।

মানোওয়া

সীতেন মাণ্ডি

 

পাড়হাঃ সেঁড়ায় মে

বুরধি আরজাও মে

পৗতিয়াও দহয় মে

আম চেতান রে।

 

আয়ো বাবা সুতুঃ

মায়াম হৗটিঞ বয়হা

হড় কাথাতে আম দ

আলম হিড়িঞ তিশ হঁ।

 

যাঁহায় কোওয়াঃ দুলৗড়

চাচো ডিডি ডাহার

তাড়াম হরে সাফায়

দিশৗয় মেশে অহায়।

 

মায়াম ডুম্বুঃ খনাঃ

হড় ম জিউয়ি আমাঃ

ধুড়ি ধৗরতিম লেবেদ্

আয়ো তোওয়াম জেঁবেদ্।

 

রিণ বাম সধ্ দাড়েঃ

আম তে আলম এড়েঃ

উইহৗর দহয় মে নোওয়া

আম দ কানাম মানোওয়া।

==== )(====

৯।।

আতু তালে

সনৎ কুমার হাঁসদাঃ

                       হি-হি খক
                       ঝক - মক।
                 তিনৗঃ কেনে - কতে।
                        সাড় বাহা
                      ঞেলঃ আহা।
                   সিতুং  আহলাতে ।।


                        দারে নৗড়ি,
                       দাঃ এ জৗড়ি।
                    চৗষি  ক - ক  চাষ।
                          ডুলু ডুং
                         বৗরু ডাং
               আপান আপিন আশ।।


                           নৗই দাঃ,
                           গাডা দাঃ!
                      ডয়লাং  চালাঃ।
                          মনে তাকিন,
                          জড়াঃ আকিন!
                      দরয়া  সালাঃ।।


                            গৗই কাডা,
                            মেরম ভেডা।
                        গুপি   ক- ক   সুতুঃ
                             রড় লাঁদা,
                           জিউয়ৗ আদাঃ!
                        আলেয়াঃ  আতু।।

==== )(====

১০।। 

হপন বিটিয় উসৗত আকান

সুচাঁদ হাঁসদা

 

চেদাঃ চাঁদো সারা বেড়া ,

দাঃ এত রডঃ রডঃ ৷

হপন বিটিয় রাঃ এত তালে ,

খৗলিয় গড গডঃ ৷

 

বাং গানঃ তায় খেল উতু ,

বাং গানঃ তায় দাড়ান ৷

বিটি তালেয় উসৗত আকান ,

বাং আতায়া মাজান ৷

 

দু - দাঃ আপে দিসমতে ,

আম দ চালাঃ মে ৷

হপন বিটিয় উসৗত আকান ,

বুসৗঃ সিমে জমে ৷

==== )(====

১১।। 

মধূসুদন মারান্ডি

দুগাই টুডু

  

লৗইকো কাথায় তাঁহে কানে

   মিৎটাং রুসিকৗ হড়গে,

এনেচ্‌, সেরেঞ আখড়া সাঁওতে

     জিউয়েৎ জনম ভোরগে।

 

মধূসুদন মারান্ডি মেন তেদ

    আজাঃ ঞুতুম কানগে,

মেদিনীপুর মিশন সালা দয়

    জোড়াও বাড়া আনগে।

 

সনৎ সাঁওতা পৗলগে পরব

    আচগে আদ সোররে,

বোগে বোগে সেরেঞ উনরে

    মঁজগে রাহা থোররে।

 

মনে উনরে খুশি তেদয়

    রৗস্কৗ চাপে কেদায়,

আয়মা অকচ্‌ সেরেঞ কোদ

   হানে অল লেদায়।

 

আমেরিকান ব্যাপটিস্ট মিশন ভালা

      নাপায় কৗমি কেদায়,

‘মেদিনীপুর সেরেঞ পুঁথি’ গেথ

     ছাপা উছৗন লেদায়।

 

অনা রেহঁ সেরেঞ তায়দ

    অৗডি সেলেৎ লেনা,

নোওয়া কাথা বেবাক তেদ

     আয়মা গেকো মেনা।

 

লাকচার জিউয়ি খৗতির উনি

    এনেম দহ আনায়,

অনে উনখন নেতার হঁচ

    দিসৗ রেগে মেনায়।

==== )(====

১২।।

ঝিপির জৗড়ি

দুলৗড় বিটি

 

ঝিপির ঝিপির দাঃএ জৗড়ি

      আষান-শান বঁগা,

নৗই-গাডা পারমঃ লৗগিৎ

      বেনাও আকো ঢঁগা।

 

 

লিপির লিপির লুমৗং শৗড়ি

   হয়তে অটাং অদঃ,

ঝিপির ঝিপির দাঃতে সৗরি

    মাসে গটা লহদঃ।

 

 

হিপিড় হিপিড় হয়তে মাসে

    সারদিঃ ঝিপির জৗড়ি,

বাহরে চালাঃ সারা ঘৗড়িচ্‌

      মৗই গেচয় অৗড়ি।

            

==== ) মুচৗৎ (====