সিঁগি মাহা রেনাঃ সাকাম ‘চেরেচ্ আড়াং’ লেখা- ১২৫

 

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান- ᱥᱩᱵᱩᱫᱤᱭᱟ. ᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ, ᱱᱰᱤ, ᱨᱟ ᱢᱯᱚᱫᱚ ᱠᱤᱥᱠᱩ,  ᱠ ᱤ ᱥ ᱠ ᱤ ᱱ ᱫ ᱷ ᱟ  ᱢ ᱩ ᱨ ᱢ ᱩ,, ᱜᱟᱛᱮ ᱴᱩᱣᱟ.ᱨবাড়তাং  সরেন, সুচাঁদ  হাঁসদা, দুর্গাচরণ মুরমু, দুগাই টুডু,   সিতেন মান্ডি।

  

১।।

ᱟᱡᱳᱫᱤᱭᱟᱹ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱟᱡᱳᱫᱤᱭᱟᱹ ᱟᱜᱟᱡ ᱵᱤᱨ
ᱥᱚᱥᱱᱚᱜ ᱛᱮᱦᱛᱧᱮ ᱤᱨ ।

ᱢᱟᱨᱟᱝ ᱵᱩᱨᱩ ᱫᱷᱟᱢ
ᱦᱳᱭᱳᱜ ᱦᱟᱢ ᱜᱟᱢ ।

ᱴᱷᱩᱸᱬᱜᱟ ᱠᱟᱱᱴᱷᱟᱲ ᱵᱟᱸᱫᱩ
ᱩᱫᱩᱜ   ᱟᱵᱚᱠᱚ  ᱡᱟᱫᱩ ।

ᱥᱚᱥᱱᱚᱜ ᱫᱟᱞᱟᱭ ᱫᱟᱞᱟᱭᱚᱜ
ᱟᱹᱫᱤᱢᱠᱚ ᱦᱟᱞᱟᱭ ᱦᱟᱞᱟᱣᱚᱜ।

ᱚᱠᱚᱭᱮ  ᱵᱟᱧᱪᱟᱣ ᱵᱚᱱ
ᱵᱟᱹᱭᱨᱤ ᱥᱚᱥᱱᱚᱜ  ᱠᱷᱚᱱ ???

=========== ᱞ ᱧ ========

২।।

ᱜᱟᱹᱲᱤ ᱟᱥᱮᱱ

ᱜᱳᱯᱮᱥᱣᱚᱨ ᱢᱟᱹᱱᱰᱤ

  
ᱥᱟᱠᱨᱟᱛ ᱨᱮ ᱚᱲᱟᱜ ᱚᱲᱟᱜ
ᱜᱟᱹᱲᱤ ᱟᱥᱮᱱ ᱠᱚ,
ᱵᱚᱛᱚᱨ ᱡᱟᱞᱟ ᱤᱧ ᱟᱭᱳ 
ᱠᱷᱚᱭᱮ ᱮᱢᱟᱫ ᱠᱚ ᱾

 
ᱜᱟᱹᱲᱤ ᱮᱱᱮᱪ ᱥᱮᱨᱮᱧ ᱛᱟᱞᱟ
ᱞᱟᱹᱭ ᱮᱫᱟ ᱠᱚ,
ᱠᱷᱚᱠᱚᱭ ᱵᱟᱝ ᱮᱢᱚᱜ ᱨᱮ
ᱧᱤᱫᱟᱹ ᱵᱟᱥᱟᱜ ᱟᱠᱚ ᱾

 
ᱠᱚᱪᱟ ᱨᱮᱱ ᱠᱩᱠᱲᱩ ᱥᱟᱺᱰᱤ
ᱜᱚᱡ ᱠᱚᱣᱟ ᱠᱚ,
ᱥᱤᱵᱤᱞ ᱥᱚᱲᱚᱢ ᱚᱛᱩ ᱫᱟᱠᱟ
ᱠᱟᱛᱮ ᱡᱚᱢ ᱟᱠᱚ ᱾

=========== ᱞ ᱧ ========

৩।। 

ᱜᱤᱫᱨᱟᱹ ᱵᱟᱣᱞᱤ

ᱨᱟᱢᱯᱚᱫᱚ  ᱠᱤᱥᱠᱩ

  

                     (᱑ )

 

ᱢᱮᱱᱟᱭ  ᱛᱟᱞᱮ   ᱯᱩᱥᱤ

ᱧᱩᱛᱩᱢ    ᱛᱟᱭ   ᱫᱚ ᱞᱩᱥᱤ

ᱡᱤᱞ ᱦᱟᱠᱩ  ᱞᱮ  ᱩᱛᱩ  ᱞᱮᱠᱷᱟᱱ

ᱟᱰᱤ  ᱜᱮᱪᱚᱭ  ᱠᱩᱥᱤᱜ ᱿

 

 

                  (᱒)

 

ᱟᱞᱮ ᱦᱚᱯᱚᱱ  ᱠᱩᱱᱩ

ᱨᱟᱜᱟᱭ  ᱠᱷᱩᱱᱩᱜ  ᱠᱷᱩᱱᱩᱜ

ᱪᱷᱚᱞᱟ  ᱟᱛᱟ ᱡᱚᱢ ᱥᱟᱱᱟᱭᱮ

ᱰᱟᱴᱟ  ᱜᱮᱛᱟᱭ  ᱵᱟᱱᱩᱜ ᱿

=========== ᱞ ᱧ ========

৪।।

ᱠᱟᱛᱷᱟ  ᱟᱡᱽᱚᱢ ᱢᱮ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

 
ᱡᱟᱦᱟ ᱢᱮᱛᱟᱢ ᱟᱪᱩ ᱢᱮᱭᱟ ᱫᱚ
ᱥᱟᱱᱟᱢ ᱛᱮᱜᱮ  ᱟᱢ ,
ᱩᱥᱟᱨᱟ ᱠᱟᱛᱮ ᱟᱡᱽᱚᱢ ᱢᱮᱫᱚ
ᱟᱞᱚᱢ ᱟᱹᱲᱤᱭᱟᱢ  ᱾

  
ᱠᱟᱛᱷᱟ ᱡᱟᱦᱟᱭ ᱵᱟᱭ ᱟᱡᱽᱚᱢ
ᱵᱟᱝᱜᱮ ᱠᱚ ᱠᱩᱥᱤ ᱟᱭᱟ ,
ᱠᱟᱛᱷᱟ ᱟᱡᱽᱚᱢ ᱡᱟᱦᱟᱭ ᱩᱱᱤ
ᱥᱟᱱᱟᱢ ᱫᱮᱞᱟ ᱟᱭᱟ  ᱾

  
ᱢᱟᱨᱟᱝ ᱠᱚᱫᱚᱨᱮ ᱢᱟᱨᱟᱝ ᱞᱮᱠᱟᱜᱮ
ᱦᱩᱰᱚᱧ ᱟᱠᱚ ᱞᱮᱠᱟ ,
ᱥᱟᱱᱟᱢ ᱥᱟᱣ ᱛᱟᱦᱮᱱ ᱵᱷᱟᱞᱤᱜᱮ
ᱱᱟᱯᱟᱭ ᱢᱤᱫ ᱞᱮᱠᱟ  ᱾

  
ᱟᱪᱩ ᱜᱚᱫᱢᱮ ᱡᱟᱦᱟ ᱛᱤᱱᱨᱮ
ᱟᱞᱚᱢ ᱟᱲᱤ ᱟᱢ,
ᱵᱟᱢ ᱟᱡᱽᱚᱢ ᱢᱮᱛᱟᱢ ᱫᱚᱨᱮ
ᱪᱤᱠᱟᱛᱮ ᱠᱩᱥᱤᱭᱟᱢ  ᱾

=========== ᱞ ᱧ ========

৫।।

ᱡᱮᱞ ᱯᱤᱴᱷᱟ.

ᱜᱟᱛᱮ ᱴᱩᱣᱟ.ᱨ

 
ᱵᱟᱵᱟᱭ ᱟᱜᱩᱭ ᱡᱮᱞ ᱟᱨ ᱦᱚᱞᱚᱝ
          ᱟᱭᱳᱭ ᱵᱮᱱᱟᱣ ᱯᱟᱛᱲᱟ
ᱛᱮᱦᱮᱧ ᱫᱚᱞᱮ ᱡᱮᱞ ᱯᱤᱴᱷᱟ.ᱭᱟ
           ᱵᱩᱡᱷᱽ ᱟᱠᱟᱫᱟᱭ ᱯᱮᱛᱲᱟ ᱾

 
ᱡᱟᱸᱦᱟ ᱠᱷᱚᱱ ᱦᱤᱡᱩᱜ ᱟᱛᱟᱝ ᱫᱟᱨᱟᱢ
             ᱯᱮᱛᱲᱟ ᱪᱩᱯᱤᱭ ᱯᱷᱮᱴᱮ
ᱞᱟᱴᱤᱪ ᱞᱟᱰᱟᱨ ᱛᱟᱵᱮᱨ ᱵᱟᱲᱟᱭ
             ᱟᱞᱞᱟᱫᱚᱜ- ᱟᱭ ᱢᱚᱴᱷᱮ ᱾

 
ᱡᱮᱞ ᱩᱛᱩ ᱫᱚ ᱠᱷᱟᱴᱟᱨ ᱠᱷᱩᱴᱩᱨ
             ᱦᱚᱯᱚᱱ ᱢᱟ.ᱭᱮ ᱞᱟ.ᱭ
ᱡᱟᱝ ᱡᱟᱝ ᱫᱚ ᱯᱮᱛᱲᱟ ᱞᱟᱜᱤᱫ
             ᱵᱷᱮᱜᱟᱨᱟᱭ ᱦᱟᱺᱭ ᱯᱷᱟᱺᱭ ᱾

 
ᱡᱮᱞ ᱯᱤᱴᱷᱟ.ᱨᱮ ᱠᱷᱟ.ᱞᱤᱭ ᱯᱟᱸᱡᱟᱭ
           ᱡᱮᱞ ᱫᱚ ᱵᱷᱟᱞᱟ ᱩᱠᱩᱨ
ᱜᱚᱲᱚᱢ ᱦᱟᱲᱟᱢ ᱯᱷᱚᱜᱽᱲᱟ ᱜᱮᱭᱟᱭ
           ᱴᱷᱤᱠ ᱜᱮᱛᱟᱭᱟ ᱞᱩᱛᱩᱨ ᱾

 
ᱡᱮᱞ ᱩᱛᱩ ᱡᱮᱞ ᱞᱮᱴᱳ ᱠᱷᱚᱱ
            ᱯᱤᱴᱷᱟᱹ ᱡᱩᱫᱟ. ᱥᱤᱵᱤᱞ
ᱜᱚᱲᱚᱢ ᱦᱟᱲᱟᱢ ᱯᱷᱟᱠᱩᱜ ᱢᱚᱪᱟ
            ᱠᱩᱥᱤᱭᱟᱜ ᱟᱭ ᱤᱛᱤᱞ ᱾

 
ᱯᱟᱛᱲᱟ ᱯᱤᱴᱷᱟᱹ ᱡᱮᱞ ᱯᱤᱴᱷᱟᱹ
            ᱢᱤᱫ ᱠᱟᱨᱟᱦᱤ ᱯᱮᱨᱮᱡ
ᱵᱟᱥᱠᱮᱜ ᱨᱮᱦᱚᱸ ᱡᱟᱸᱦᱟ ᱛᱤᱥ
             ᱵᱟᱝ ᱛᱟᱸᱦᱮᱱᱟ ᱥᱟᱨᱮᱡ ᱾

=========== ᱞ ᱧ ========

৬।।

জৗতিয়ৗরি চির

বাড়তাং সরেন

 
জৗতিয়ৗরি চির রেনাঃ পে-পে গটাং রং
লাতার রেদ হৗরিয়ৗড়, চেতান গিরু রং ।
তালা রেদ পুঁডগে, অন্ডে মেনাঃ চাকা,
বারগে পুন লীল কাডেচ, চাক্ রে বাচো বেকা ।
গিরু রং চিনহৗ কানা, দাড়ে - দিল দাড়ে
নওয়া কাথা দিশৗয় বন সানামকো বাড়ে।

পুঁড রংদ তেতেৎ কান, নিরৗই সুক আর সৗরি
'সৗরি' তেগে লাহাঃকানা গোটা ধৗরতী  পুরী ।
 হৗরিয়ৗড় দ আরজাও, ফসল হাসা দাড়ে
আবো দিশম চাষকৗমি নওয়ারে সৗরি দাড়ে ।
চাকা কানা জীয়নরে লাহান্তি  রেনাঃ তেতেৎ
 নওয়া কাথা জিউয়ী তালা সানামগেবন রেবেৎ ।

 
জৗতিয়ৗরী চির দ দিসম রেনাঃ গরব
দিশমরেনাঃ মানত উরুম সানাম গে সাহব ।
জৗতিয়ৗরি চির দ উডৗও হিপিড় হিপিড়
অনা রেগে রৗস্কৗ, মনে লিকির লিকির ।
পেয়া রং চির তেগে মিদুন রেহেৎ রহয়
অনা রেনাং  মৗন দ সানাম তেবো দহয় ।

=========== ᱞ ᱧ ========

৭।।

মাঘ

সুচাঁদ  হাঁসদা

 
নাওয়া সেরমা রে আবো জত ,
তাঁহেন মাবন বুগি ৷
বৗড়িজাঃক হিড়িঞ কাতে ,
দিসৗবন দহয় ভৗগি ৷

 
হড় হপনাঃ নাওয়া সেরমা ,
পৈল চাঁদো মাঘ ৷
সেঁড়া কাঃ পে মৗই বাবুকো ,
রাবাংতে  আলপে রাগ ৷

 
নোওয়া চাঁদোদয় রিতিচ রেয়াড় ,
সিতুং  এ  ঘেঁট চাঁদো ৷
মৗই বাবুকো নিন উডিচ গে ,
নিয়ৗবেড়া সেঁড়া কাঃ পে আদো ৷

=========== ᱞ ᱧ ========

৮।।

মারাং সাকরাৎ পরব

দুর্গাচরণ মুরমু

 
রুডৗ সাকরাৎ পারোম লেখান
সেটের” রাবাং পুস বঙ্গা, 
হোড়ো খেতরে তপা দহো
আগুয়ে ক খারায় বঙ্গা।

 
আতো অড়াঃ গিদরৗ কদো
বুডহি কুবৗ বেনাও লৗগিৎ,
তালে খিজুর মুরুৎ ডার
জগাড় আকো সাকরাৎ লৗগিৎ।

 
পুস বঙ্গা মুচৗৎ মাহা
হুয়ুঃ মারাং সাকরাৎ পরব,
নাওয়া নাওয়া আংগব পিন্টুন
হরোক বুঝৗঃ রৗস্কৗ গরব।

 
পুস সাকরাৎ দিন হিলোঃ
আংগা তরা ভোর বেড়া,
বুডহি কুবৗ রাপাগে ক
গিদরৗ হাড়াম দাড়ে সেড়া।

 
নৗই ঘাটরে জুরুপ জুরুব
সুনুম অজঃ কাতে তুপুন ,
সৗগুন সাকরাৎ লটা দাঃ
অড়া:রে তিরপি আডি সৗগুন  ।

 
লল লল  সুনুম অওয়ার
গুড় পিঠৗ রবোজ রবোজ,
সাংখা সরহা দুল আচুর
খাপরা পিঠৗ সবোচ সবোচ।

 
হাকো কাটকম জিল পিঠৗ
মটা কুটি পাতড়া পিঠৗ,
জেডের জেডের জজম সানা
খৗজৗড়ী আর ডুবুঃ পিঠৗ।

 
কাঁসাই কুয়ৗরী নৗই ঘাটরে
লাগাঃ এনেচ সেরেঞ  মেলা,
হড়কো চালাঃ দমেল দমেল
ঞেঞেল তিনৗঃ লেকান  খেলা।

=========== ᱞ ᱧ ========

৯।।

সুবল চন্দ্র হাঁসদা

দুগাই টুডু

 
সুবল চন্দ্র হাঁসদা গেথ
      খেলোড বাডোহি হানে,
আরহঁ উনিদ তাঁহে কানায়
      গায়নাহৗরি ঘানে।

 
আপাত তায়দ শ্যামচরণ হাঁসদা
     এগাঁত দ গুরুবারি,
সানাম কোগে বাডায় কাথায়
     একাল তেদ সৗরি।

 
জানাম আতো কুড়চিবনী
    শিলদা সোরগে ভালা,
বিনপুর থানা সেদায় মেদিনীপুর
    নাহাঃ ঝাড়গ্রাম জেলা।

 
ভীমপুর হাইস্কুল রেগে অনে
     হানেয় ভুরতি লেনা,
রেঁগেচ্‌ নাচার জালা তেগে
     পাড়হাঃ বৗগি আনা।

 
সাহাড়ী আতো যাত্রাপাটী দ
   আচ্‌গে বল লেনে,
গায়ান মারশাল ডাহার ঝালাক
   উনরে ঞেল আনে।

 
প্রাইমারি ইস্কুল রেদ অনে
    মাচেদ্‌ কৗমিলেদ্‌ গেদ,
তায়ম তেদ জৗনুম ঘুটুরে
    গিরৗবাস বাসলেন আদ।

 
পাইলু ডাঙ্গা যাত্রা দল ভালা
      আদয় বেনাও কেদায়,
‘চাম্পাগাড়’ ‘খেরওয়ালগাড়’ ‘সেঁদরা’
      মঁজগে উদুঃ লেদায়।

 
‘খালাঃ লৗ্ডু’ গায়ান পতব
    ছাপা সদর তায়া,
পছিম বাংলা আর ঝাড়খন্ড করে
   উদেল আকান গেয়া।

 
নেতার হঁচো হান্ডে নাডে
   আঁজম বাডাঃ অনা,
উনখন গেচো হড়কো অৗডি
   উইহৗর ইদিয়ে কানা।

=========== ᱞ ᱧ ========

১০।। 

কৗরিগল

সীতেন মাণ্ডি

 
আয়ো বাবা দলৗড়
গতম খন হঁ হেড়েম
আয়ো বাবা উমুল
দারে উমুল খন হঁ জিয়ৗড়।

 
যাঁহা তিনাঃদিন কিন তাহেন
হানা নাওয়া কিন মেমেন
তগজ্ ডাটা কষ্ট কাতে
জগাও যতন আমরে।

 
বাবা রূহেদ্ আয়ো এগের
আমাঃ অৗখির হরে সঝে
নিত যদি বাম বুঝৗও আ
পরেম দিশৗয়া অনা কাথা।

 
অকয় রেন আয়ো বাবা
অকয় চেৎ ক এমায়
অনা ক ঞেল কাতে
আম দ আলম দুকঃ।

 
আমাঃ বুগি আমাঃ বেশ
বুঝাও আকিন ভৗগি
মিৎটান গে কুকমু তাকিন
মারাং হড়েম হুয়ুঃ অৗডি।

 
যাঁহায়ে বেনাও বায় রৗপুদ্
রহয় দারেয়ে যতন হারায়
চট চাঁদো দায়াতে সিরজন
গ বাবা গে কৗরিগল।

======== মুচৗৎ========