আবোওয়াঃ ডিজিটাল ডেস্ক- দাঁশায়
বঁগা, চেতান রিমিল রেনাঃ নাসেনাঃ ঝিপির ঝিপির হড় ভিড়কৗও দাঃ বেগর নেশাঃ শিলদৗ পাতা
অৗডি নাপায় রম্ঝম্ পারমেনা। পারমেন বার সেরমা করোনা আওহালতে হৗপিদ্ তাঁহেলেনতে ঞেঞেলিয়ৗ
কোওয়াঃ ভিড় ঞেল জং লেকাগে তাঁহেকানা। ৬-৭ অক্টোবর বার মাহা রেনাঃ পাতা তেহেঞ ৮ অক্টোবর
সেতাঃ বেড়া সেন পাতা মুচৗদ্ ঞেল এনা। কুমুট্ পাহটা খন বাডায় ঞাম আকানা যাঁহান অনকান
বে-বৗড়িচ্ অঘটন কদ বাং হোয় আকানা।
ঝাড়গ্রাম জিলৗ শিলদৗ জাপাঃ অড়গোদা সোররে পাটাবিঁধৗ
পাতা হোয়োঃ আ। শিলদৗ খনাঃ উত্তর নাখা রাইপুর হরতে তাড়াম আর বাংখান অটো টোটোতে সেন লেনখানগে
ঞেল ঞামঃ আ বিলৗৎ বিলৗৎ টাঁডিরে শিলদৗ পাতা। হড় হপনাঃ আর আর পাতা খন নোওয়া পাতা দ যুদৗ
গেয়া। পছিম বাংলা রেনাঃ জিলৗ করে খন মা হেঁগে ঝাড়খন্ড, বিহার,উড়িষ্যা, আসাম খন হঁ অৗডি
সেদায় খনগে আয়মা সাঁগে হড় কো হিজুঃ আ। নেশহঁ অনা রেনাঃ উকু্লান বাং হোয় আকানা।
পাটাবিঁধৗ মানেগে কিরিঞ আখরিঞ রেনাঃ মিৎ মারাং
ঠাঁও। নঁডে হাটাঃ জনঃ খন এহব কাতেৎ মেড়হেৎ রেনাঃ নানাহুনৗর সামানম্ সাঁওতে ত্রিয়-বানাম,
তুমদৗ-টামাক,আঃসার, কৗপি নঁতে লুগ্ড়িচ্ লাপো দকানরে ধুতি, শৗড়ি,পাঞ্চি পাড়হার, থারে
থারে পুঁথি-পতব দকান, ঞেল জং লেকা ঞু-জম হোটেল এমান আখরিঞ দকান ক তাঁহেকানা।
নঁতে পশ্চিমবঙ্গ আদিবাসী কল্যান সমিতি, অল ইন্ডিয়া
সান্তালি রাইটার্স অ্যাসোসিয়েশন, ভারত জাকাত মাঝি পারগানা মহল, আদিবাসী প্রেস-ক্লাব
অফ্ বেঙ্গল এমান সংগঠন করেনাঃ মঞ্চ হঁ তাঁহেকানা। নোওয়া মঞ্চ করে খন গে আকোওয়াঃ সংগঠন
রেনাঃ সাঁদেশ দিসম হড় ঠেন কো সেটের এৎ তাঁহেকানা। শিলদৗ পাতা মুচৗদ্ কাতেৎহঁ বাং মুচৗদ্
আকান লেকা তেতাংতে আয়মা ঞেঞেলিয়ৗ কো রুয়ৗড় চালাও এনা আপান আপিন অড়াঃতে।
.webp)
.webp)
