(হুডিঞ কৗহনি)
O.T.
দুর্গাচরণ মুরমু
চাষ কৗমি হুড়ু রহয় ক সৗৎ বাড়া কাতেৎ বাধাড় দ হলুদকানালী রেন কুড়মী সাঁওতে টাটানগর বাজার কৗমিয় হেজ আকানা। মাড়াং তেহঁ আডি ধাওগে টাটানগর বাজার কৗমি দয় হেজ আকানা;অনাতে হিন্দী তেহঁ আডি মঞ্জগেয় রড় দাড়েয়াঃআ,নাসেহঁ রড়তে এটকেটঁড়ে বাং হুয়ুঃ তায়া। নিয়ৗধাও দ সোনারী এয়ার পোর্ট সুর পাটপুর রে ভাড়া অড়াঃএ ঞাম আকাদা। অডেঁ আডিগান ভাড়া অড়াঃ মেনাঃআ মিৎটান মৗলিক আঃগে, আচ দ কুডবী ক সাঁওতে মেনায় রেহঁ,সুর-সুপুর রুম করে আয়মা সান্তাড় হড় মেনাঃ কোওয়া। অকয় কদো ওড়িশা মারাঃ ফৗড়ি খন আর আদোম কদো পুরুলিয়া- বাঁকুড়া করে খন ক হেজ আকানা কৗমি আসুলঃ লৗগিৎ; জতো কগে রাজমিস্ত্রী সাঁওতে বিল্ডিং বেনাও আপান-আপিন সাইড রেক কৗমিয়া।
সেতাঃরে দাকা উতু ইসিন বাসাং জম-ঞু কাতেৎ ন-বাজে তে কৗমি সাইড সেটের কাতে কৗমি ক ধুরৗঃআ। সিগাঁড় মড়ে টাড়াং হৗবিচ কৗমি লাগাও কোওয়া, তবে আনিচ হাজরী পে-শায় মড়ে গেল টাকা ঞামঃআ। আর সিগাঁড় মড়ে টাড়াং পারোম লেনখান উনদো ওটি(ওভার টাইম) হিসাব তে কৗমি দ সাবো:আ-উনদো ঘন্টারে পে-ইসি কাতে।
নডেঁ পে চান্দো লেকা বাধাড় তাহেয়েনায় মেনখান ভাড়া অড়াঃরেন মৗলিক দ,মিৎ দিন হঁ বায় ঞেল লেদেয়া,অড়াঃ ভাড়া পয়সা মা ম্যানেজার গেক এমায়া।
আচকা গে মিৎদিন আয়ুব বেড়া ভাড়া অড়াঃরেন মৗলিক পুন-চাকা গৗডিতে পে-পুন হড় আতেয় সেটেরেনা। এনেগে জতো ক কৗমি খন ক রুয়ৗড় আকানা। জতো ভাড়াটিয়ৗ ক হহ গুটিয়ৗও কাতে ;বুগি-বৗড়িচ কাম-কাজ করেনাঃ কাথা কয় থুতি রপড়েনা। আর এ মেতাৎ কোওয়া মঞ্জতে তাঁহেন পে,জাহায় জাহানা: অসুবিধা সে এটকেটঁড়ে হুয় লেনখান ইঞপে বাড়ায় হচোঞা--ইঞা ফোন নম্বর দহ কাঃপে!
আরহঁ অড়াঃ মৗলিক-এ মেন কেদা ইঞাং মিৎটান কৗমি তাহেকানা গাপা সেন, আয়ুপ ঞুহুম আরে টাড়াং করে;কৗমি দ হুয়ুঃ কানা --ট্রেন মাল গৗডিতে মিৎ লেকানাঃ মেট্যাল হিজুঃআ,জাহা দ টাটানগর জংশন বলঃ মাড়াং মিৎ জায়গারে অনা মাল গৗডি মিৎ ঘৗড়িচ তিঙ্গুনা, উন জখান মাল আনলোড হুয়ুঃ আ। মাল গৗডি ড্রাইভার ইঞ মেন দহ আকাদেয়া,,,,ঠানিৎ জায়গারেয় মাল গৗডিয় তিঙ্গুয়া।
পুন-মড়ে হড় ভাড়াটিয়ৗ দকো ফুসুর-ফাসার গৎ কেদা,,,,,,জৗনিচ এ কুমড়ু হচো বন লৗগিৎ! মাল গৗডি খন মাল…..!
অড়া: মালিক-এ আজোম ঞাম কেদা। আর এ মেনগৎ কেদা—হোয় ! কুমড়ু গে।
তবে বতর রেনাঃ কোন কারণ বৗনুঃআ,,,চেদা: সে পুলিশ প্রশাসন জতঞ বাড়ায় হচো আকাদ কোওয়া। আপেয়া আঃ দ চেৎহঁ অসুবিধৗ বাং হুয়ূঃআ। মাল আনলোডিং অক্তে যুদি পুলিশ ক ঞাম পেয়া,,এনখান ইঞাং ঞুতুম পে লৗই আকোওয়া পুলিশ,,,আদো চেৎহঁ বাংকো চিকৗপেয়া।
মিৎ ঘৗড়িচ রেনাঃ কৗমি কানা,মনে কাঃপে ওটি কৗমি পে কৗমিয়েদা দরমা হঁ অনা হিসৗব তেগিঞ -এমাপেয়া বৗড়তি গে।
দশার হিলোঃ অনা ভাড়া অড়া:রেন জতো হড়গে কৗমি খন ক রুয়ৗড় আকানা। আয়ুপ এয়ায় টাড়াং অক্তে মিৎটান লরি হেজ এনা;অনারে দেজ কাতে পে-গেল জনা হড় মাল আনলোড লৗগিৎ ক মহডায়েনা-ঠানিৎ আকাৎ জায়গারে।
মিৎ ঘৗড়িচ তায়ম অনা মাল গৗডি সেটেরেনা লাইট অফ কাতে তিঙ্গুয়েনা-বাধাড় তাকো দ সাপড়াও গেক্ তাহেকানা-ধামা সাব কাতে টপা-টপ মাল আনলোডিং ক ধুরৗও এনা-আর মিৎ ঘৗড়িচ খানগে অনা লরি দকো পেরেচ কেয়া।
অনকান তাকরে আচকাগে পুলিশ ক হেজ তিয়োঃ এনা। বতরতে সানাম হড়াঃ কড়াম থারথারাও এনা-নাররী রহড় উতৗরেন তাকোওয়া- জতকো চামাল টুমুল গৎএনা-পুলিশ হুংকার আতে বার-পে হড় কেটেজ সাঁহিচ সাব কাতে মলংরে পিস্তল ক জপঃ আকাৎ কোওয়া -বতরতে রড়হঁ রড় বন্ধয়েন তাকোওয়া -জাহায় জাহাঠেনে তিঙ্গুলেনা সেয় দুড়ুব লেনা -অডেঁগেয় থির তাহেয়েনা।
পুলিশ পিস্তল জপঃ কাতে গেক্ কুলিকেৎ কোওয়া-"অকয়া সুপারিশ তে নংকা কুমড়ু দপে ধুরৗও আকানা?"
মিৎ হড় মালিক আঃ ঞুতুমে লৗই কেৎ খানগে; পুলিশ বিরামপোট আদা-বৗদি আকোওয়া গৗডি রেক্ দেজ্এনা-পুলিশ গৗডিরেন ড্রাইভার গৗডি আডি তৗপিসে চৗলুকেদা -পুলিশ গৗডি নুনৗঃ তৗপিসতে চালাও এনা জৗনিচ সাঁগিঞ রোড বাঁকরে নংকালেকা আচুরেনা গৗডি পাল্টিয়েন লেকাগে ঞেল এনা………।