(অনল)
আযোদিয়ৗ বুরু এলেখারে হৗতিয়াঃ তান্ডব আর মানওয়া জিয়ন
সৗগুন শিকৗরিয়ৗ
( পোইলো হৗটিঞ )
আযোদিয়ৗ বুরু এলেখা লৗই লেখান মেনগান-আ পুরুব নাখা বলরামপুর ব্লক পছিম নাখা ঝালদা উত্তর নাখা আড়শা আর দখিন নাখা বাগমুন্ডি ব্লকতে তালা কাতে মেনাঃ আকাদা। আড়েপাশেরে দলমাবুরু লেকান আডিগান বুরু তিগু মেনাঃ আকাদা। আযোদিয়ৗ বুরু চটরে আনুমানিক ৮৫ গটাং আতু টোলা লেকা মেনাঃ আকাদা। মানওয়া কওয়াঃ জিয়ন বিরিত লেকাতে চাষবাস ,জিবৗ পালাও(পশুপালন ),আর বিরবুরু রেনাঃ শাহান সাকাম কিরিঞ আখরিঞ কাতে দিনপাত খেমাওঅঃ কানা। লৗগিমান জরুরি প্রাথমিক চিকিৎসা লৗগিৎ বাগমুন্ডি স্বাস্থ্য কেন্দ্ররে সেনঃ হুয়ুঃ তাকওয়া। ঞিদৗঞুতৗ বুরু হর ডাহারতে বতর সুতুঃ কাতেগে হিজুঃ সেনঃ লাগাও কওয়া। সরকারাঃ রাজমাচি বনদল আকানা , বিরবুরু রেনাঃ হর ডাহার নিতঃ অৗডিগানগে পি.সি. সি ঢালাই আকাদা। আযোদিয়ৗ বুরু রেনাঃ উকুচুকু ঠাঁও নিতঃ আশকায়তে হিরি কাতেম রুয়ৗড়া।
তাহলে " বতর " দ চেৎ রেনাঃ ??
হেঁ ,বতর মেনাঃ আকাদা। অনাদ হৗতিয়াঃ। আযোদিয়ৗ বুরু এলেখা মত দ বাং লৗই গানঃআ , পছিমবাংলা পনত রেনাঃ উত্তরবঙ্গ, দখিনবঙ্গ সাঁওতে ঝাড়খন্ড পনত গটা গে যে লেকা হৗতিয়াঃ তান্ডবতে মানওয়া জিয়ন তচনচঃ কানা অনা দ খবর কাগজ সেন কয়ঃ লেখানগে অৗইকৗউ ঞামঃ-আ। সেদায় উতৗর খনগে আযোদিয়ৗ বুরু চট আতো টোলারে হৗতিয়াঃ হামলাতে অড়াঃ দুয়ৗর ,রহয় খেৎ বৗদ সাঁওতে মানওয়া জিয়ন হ দায়নাস আকানা।
হৗতিয়াঃ তান্ডব দ নিৎ খনা দ বাং কানা, আযোদিয়ৗ বুরুরেন মৗনমি সেদায় খনাংগে কো সাহাও আগুয়েদা। আতো টোলা হড় কো লৗইয়ৗ ---পৗহিল দ সেরমারে মিৎ বার ধাওগে হিরি কো হিজুঃ কান তাঁহেনা ,নেতার দ বারমৗসিয়ৗ আকানা। তি'রেক হিজুঃআ অহম লৗই কেয়া। সেরমা ভোরগে গাদেল সে মিৎ বার হৗতি হানতে নাতে বাড়ায় কানা। অনাতে আযোদিয়ৗ বুরু চটরেন মৗনমি হপন বতর সাতলাঃ জিয়ন খানডাঃ কান তাকওয়া। তিনৗঃ হড় কো সামাং দাপরাম আকানা , তিনৗঃ হড় কো দৗড় বানচাও আকানা অনা দ তলাস লেখান আয়মা হড়গেক লৗই দাড়েয়াঃআ। পি.সি.সি ঢালাই হর ডাহার বেনাও আকানা দিনৗম সৗঁঘারিয়ৗঃ গৗডি মটর দৗড়াঃ কানায় বুরুহর তালাতে , বুরুরে যাঁহা নিরলৗ নিঝুম থিরলৗ সাচারহে তাঁহেন লৗকতি অনা দ বিঘিনঃ কানা । নিতঃ বুরু চটরে লাতাররে বিরবুরু ঞেঞেল সৗঁঘারিয়ৗ তাঁহেন লৗগিৎ লজ -রিসট-কটেজ -হোটেল বেনাও রাকাব আকানা। সিঞ দ যাঁহা লেকা রেহ ঞিদৗ বেড়া দ রিসট কটেজ চৗরিয়ৗ ধারে মারশাল কো জেরেৎ কাঃ কানা। যাঁহাতেদ মারশাল আহলা বিরবুরু আড়ে মারশালঃ কানা। বির জিয়ৗলি ঠেন নওয়া ডিগ্ ডিগ্ মারশাল আহলা দ অসৗগুন গেয়া। আকওয়াঃ তাঁহেন জিয়নরে বাধক হুয় তিগুন কানা। জিয়ৗলি যাতার কাতার কো দৗড়াঃ কানা। লৗই গানঃআ নিতঃ আযোদিয়ৗ বুরুরে জিব জিয়ৗলি ক লৗগিৎ সৗনতি রেনাঃ আডিগে অভাব সিরজৗও রাকাব আকানা।
আডি পুরুধুল গেক লৗলৗই কানা - - - পৗহিল যাঁহালেকা বিরবুরু দারে নৗড়ি বিরগাজাড় তাঁহে কানা অনা দ বৗইতে প্রাকৃতিক লেকাতে আধি চাবাঃ কানা। পৗহিল যেলেকা জিব জিয়ৗলি কওয়াঃ জমাঃ তেয়ার তাঁহে কানা অনা দ নিতঃ চাবা আকান লেকাগে। হৗতি দক কুসিয়াঃ-আ ,লৗবিদ তাসাৎ , আড়াঃ সাকাম (তৃণভোজী) , দারে বাকলাঃ ,মাৎ , জ-বিলি , কায়রা কাঁধি আডিগে কুসিতাক। পৗহিল বিদৗল নওয়া ক বিরবুরুরে ঞামঃ কান তাঁহে রেঁহ নিতঃ চাবাঃ কান হররে ..... ।
অনাতে জৗনিচ্ জিয়ৗলি ক মুদরে হৗতি দ মৗনমিয়ৗ আতো অড়াঃ তে ঞির বল কাতে জমাঃ কো পাঁজায়েদা। আতো অড়াঃ সুর সুপুরতে হিজুঃ কানতে আতো গাঁওলা মৗনমি হ হুলৗ পার্টি( হৗতি লাগা হড় ) আতে সিঞ কান ঞিদৗ কান ফটকা (আতসবাজি) অটেজ কাতে কো লাগা ডিগলৗউ এদ কওয়া। ফটকা অটেজ তেদ হাতি যাঁহা তিনাঃ বাক দৗড় কানা অনাখনাঃ বৗড়তি কো অৗড়িসঃ কানা । নংকান হালৎরে অড়াঃ কো ধাসাও এদা ,হর ডাহারতে তাড়াম হড় কো তাড়গম এদ কওয়া ,মৗনমি চেতান উতৗহুলি রৗগি তৗপিস তে খুতি কানা 'মৗনমি জিয়ন '।
খুতি আয়উমৗন কাতে মৗনমি থির বাক তাঁহেন কানা ,উনকু হৗতি দমন যাঁগে দারাম লৗগিৎ আয়মা লেকান পনথা কো বাছাও গটায়েদা। নওয়াতেদ বানার হড়াঃগে আর হঁ বৗড়তি খুতিঃ রেনাঃ সম্ভাবনা তাঁহেন কানা। হৗতিয়াঃ হালত সাঁওতে আযোদিয়ৗ বুরুচট সে লাতার আড়েপাসেরেন মৗনমিয়ৗঃ জিয়ন আডি দুক মুহিমরে মেনাঃ আকাদা। লৗই তরা গানঃআ সুর দিনগে বাগমুন্ডি ব্লক টঠারে মেনাঃ ভূইঘোরা আতো রেন মিৎ পুরুধুল ঞুতুম তোতিয়া হাঁসদা (৬৫)দ পারমেন জুলাই চাঁনদো হৗতি ঠেন হিবড়াওয়েনতে জিওয়ি চালাওয়েন তায়া। অনকাগে ,আযোদিয়ৗ বুরু চটরেনগে শঙ্কু সরেন ঞুতুমান মিৎ জৗজিলমান কড়া হৗতি লেবেৎ তেয় সরগপুরি আকানা। আযোদিয়ৗ অঞ্চলরে মেনাঃ বাঁসাড়ে আতো তেনিচ্ তাঁহেকানা। নওয়া ঘটন দ জুন চাঁনদো ২০২১-রে হুয়লেনা। নংকাগে সেদায় খন তিনৗঃ মৗনমিয়াঃ জিয়ন দায়নাশ আকানা অনা রেনাঃ লেখা দ বৗনুঃ আকাদা। মেনখান সেদায় খনগে আযোদিয়ৗ বুরু চটরেন হড়াঃ সে আড়েপাসে আতো রেন মৗনমিয়ৗঃ দল ছুডৗর হৗতি ,গাদেল হৗতিয়া সামাং দাপরাম ,খয়খুতি , বতর সাতলাঃ দ মারাং সমস্যাগে কানা। ঞেল লেখান নিত আযোদিয়ৗ বুরু সুমুং দ বাং উত্তরবঙ্গ রেহ নংকাগে হৗতিয়া উৎপাত লেতাড় আকানা সেরমা ভোরগে। দখিনবঙ্গ রেহ লৗইমে উনাং সুক শান্তি দ বৗনুঃ আকাদা। বিরবুরু বাদ কাতে হঁ মেলানরে জমাঃ পাঁজা হেচ্ কাতে চাষ আবাদ জ-বিলি , হুড়ু, গহম, জনডরা সানাম খুতি কাঃ কানা। সাঁওতে মৗনমি জিওয়ি হঁ কো খুতি তারায়েদা। মৗনমি ঠেন খন দেবাসেবা ঞামেৎ তেগে পালেন "হৗতি ঠৗকুর"ক ঞুম হালাং গদা রড় গালমারাওরে ।
রুয়ৗড় গদ লেনগে বুরুচট রেনাঃ কাথারে ,আযোদিয়ৗ হিলটপ খন এতহপ কাতে দখিন নাখা তেলিয়াবাসা খন খয়রাবেড়া ,বাংখান তেলিয়াবাসা খন খামার চালাঃ হর ডাহার দ এটা সেরমা খনাঃ নিয়ৗ সেরমা দ অৗডি যাশতিগে লুকুদ বতর অৗয়কৗঃ কানা চেদাঃ সে যখন তখন নওয়া হরতে হড় মৗনমি ইচাগ ,ঝালদা চালাঃ সুরুঃ কান তাকওয়া বুরুচটতে চালাও হিজুঃ।
( অনল তঁগে আ )
.webp)
.webp)
