সিঁগি মাহা রেনাঃ সাকাম ‘চেরেচ্ আড়াং’ লেখা- ৬৭

“আবোওয়াঃ কাথা” ডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com । 

 

তেহেঞাঃ আখড়ারে যাঁহায় কো সেলেদ্‌ আকান- রিলৗমালা মুরমু,  ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ, ᱥᱩᱵᱩᱫᱤᱭᱟᱹᱢᱩᱨᱢᱩ, ᱯᱩᱨᱱᱚ ᱪᱚᱱᱫᱨᱚ ᱠᱤᱥᱠᱩ, ᱠᱤᱥᱠᱤᱱ ᱫ ᱷ ᱟ   ᱢ ᱩᱨᱢ ᱩ, ᱜᱳᱯᱮᱥᱣᱚᱨ ᱢᱟ.ᱱᱰᱤ,  গাতে টুওয়ৗর, সুচাঁদ হাঁসদা, রামলাল টুডু, বাড়তাঙ সরেন, দুগাই টুডু, সনাতন টুডু, সমর লাল টুডু,  সীতেন মান্ডি, নিকোলাস  মারাণ্ডি।

 

রিলৗমালা মুরুমু, ক্লাস- IV
জেলা - পুরুলিয়া

১।।

ᱴᱮᱱᱴᱮ ᱚᱡᱷᱟ

 ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 

ᱵᱤᱨ ᱵᱤᱨ ᱜᱚᱴᱟ ᱵᱤᱨ
             ᱫᱟᱬᱟᱱᱟᱭ ᱴᱮᱱᱴᱮ,
 ᱡᱷᱟᱵᱟᱼ ᱠᱩᱰᱤ ᱜᱚᱜ ᱛᱮᱜᱮ
               ᱡᱮᱨᱮ ᱡᱮᱨᱮ ᱡᱮᱱᱴᱮ ᱾

 

 ᱫᱤᱥᱟᱹ ᱛᱟᱭᱻ  ᱵᱮᱱᱟᱜ ᱟᱭ
               ᱥᱟᱹᱢᱩ ᱞᱮᱠᱟ ᱚᱡᱷᱟ ᱡᱟᱱ,
 ᱚᱪᱚᱜᱟᱭᱼ  ᱥᱟᱦᱟᱭᱟᱭ
               ᱨᱩᱭᱟᱹᱼ ᱦᱟᱹᱥᱳᱻ ᱨᱚᱸᱡᱷᱟᱻ ᱵᱟᱱ ᱾

 

 ᱟᱹᱛᱷᱟᱹᱲᱤᱭᱟᱹᱼᱼ ᱚᱛᱮᱹ ᱞᱟᱭ
                   ᱵᱟᱰᱟᱭ ᱢᱟ ᱵᱟᱹᱱᱩᱜᱼ ᱟᱱ,
 ᱩᱛᱤ ᱥᱩᱛᱤ ᱦᱟᱱᱟ ᱱᱟᱣᱟ
                      ᱛᱟᱲᱟᱣ ᱟᱭ ᱢᱩᱛᱷᱟ ᱨᱟᱱ ᱾

 

ᱜᱮᱨᱟᱝ ᱟᱭ ᱜᱚᱢ ᱵᱩᱰᱷᱤ
                       ᱦᱟᱹᱥᱳ ᱠᱟᱱ ᱜᱳᱱᱴᱷᱮ,
 ᱦᱟᱥᱳ ᱛᱷᱤᱨ ᱱᱟᱥᱮ ᱵᱟᱝ
                          ᱮᱜᱮᱨᱮᱭ ᱴᱮᱱᱴᱮ ᱾

 

ᱨᱟᱹᱜᱤ ᱢᱟᱨᱟ ᱡᱷᱟᱸ ᱡᱟᱴᱤᱭᱟᱹ
                         ᱮᱲᱮ ᱥᱩᱸᱲᱩᱡ ᱴᱮᱱᱴᱮ,
 ᱵᱮᱥᱮ ᱫᱚ ᱵᱟᱝ ᱠᱟᱛᱮ
                           ᱰᱟᱹᱱ ᱠᱟᱫᱮᱭ ᱮᱱᱛᱮ ᱾
 

======-- ᱛ --======

 ২।।

ᱥᱤᱨᱤᱡᱽ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱵᱟᱦᱟ ᱡᱷᱟᱨᱱᱟ ᱞᱤᱸᱜᱤᱱ ᱫᱟᱜ
ᱨᱩᱭ ᱞᱮᱠᱟ ᱨᱟᱶᱟᱜ ᱾

ᱥᱮᱨᱢᱟ ᱡᱟᱹᱲᱤ ᱧᱩᱨᱩᱜ ᱫᱟᱜ
ᱵᱟᱹᱫ ᱵᱟᱹᱭᱦᱟᱹᱲ ᱥᱟᱶᱟᱜ ᱾

ᱚᱞᱚᱜ ᱯᱟᱲᱦᱟᱣ ᱱᱟᱯᱟᱭ ᱵᱮᱣᱦᱟᱨ
ᱡᱤᱭᱚᱱ ᱛᱟᱢᱮ ᱥᱟᱜᱩᱱ ᱾

ᱦᱤᱨᱤᱪ ᱯᱟᱹᱥᱤᱨ ᱦᱮᱸᱛᱮᱞ ᱜᱮᱸᱡᱮᱞ
ᱡᱤᱭᱚᱱ ᱜᱮᱪᱚᱭ ᱩᱨᱜᱟᱹᱱ ᱾

ᱥᱮᱨᱢᱟ ᱯᱩᱨᱤ ᱥᱟᱺᱜᱤᱧ ᱨᱮᱦᱚᱸ
ᱧᱮᱞ ᱫᱚ ᱧᱟᱢᱚᱜ ᱜᱮᱭᱟ ᱾

ᱨᱮᱜᱮᱪ ᱠᱚᱥᱴᱚ ᱡᱤᱭᱚᱱ ᱨᱮᱦᱚᱸ
ᱥᱩᱠ ᱫᱚ ᱫᱟᱨᱟᱭ ᱜᱮᱭᱟ ᱾

======-- ᱛ --======

 ৩।।

ᱦᱟᱦᱟᱲᱟᱜ

ᱯᱩᱨᱱᱚ ᱪᱚᱱᱫᱨᱚ ᱠᱤᱥᱠᱩ

 

ᱡᱷᱟᱨᱜᱩᱢ ᱵᱟᱱᱟ
ᱵᱟᱣ ᱧᱮᱞᱚᱜ ᱠᱟᱱ
ᱟ ᱟᱡᱟᱨ ᱵᱮᱡᱟᱨ ᱟᱠᱟᱱᱟ
ᱵᱤᱨ ᱵᱩᱨᱩ ᱥᱟᱸᱜᱷᱟᱨ ᱢᱟᱱᱟ

 

ᱛᱳᱭᱳ ᱰᱟᱠᱛᱟᱨ
ᱯᱟᱴᱤᱭᱮ ᱞᱟᱜᱟᱛᱟᱨ
ᱵᱷᱤᱴᱟᱢᱤᱱ ᱛᱷᱟᱢᱟᱠᱷᱩᱨ
ᱟᱨ ᱦᱚ ᱵᱚᱦᱚᱜ ᱜᱩᱨᱜᱩᱨᱜ

 

ᱦᱟᱲᱩ ᱫᱚ ᱛᱤ ᱛᱩᱱᱩᱢ
ᱧᱮᱞᱟ ᱯᱚᱴᱟᱢ ᱨᱮᱫ ᱥᱩᱱᱩᱢ
ᱟᱜᱩᱭᱟ ᱵᱟᱵᱞᱟ ᱡᱟᱱᱩᱢ
ᱯᱟᱴᱤᱭᱮ ᱠᱟᱱ ᱛᱩᱱᱩᱢ ᱩᱱᱩᱢ

 

ᱥᱤᱢ ᱥᱟᱸᱰᱤ ᱜᱟᱰᱤ ᱜᱟᱰᱤ
ᱟᱜᱩᱭᱟ ᱯᱟᱸᱣᱨᱟ ᱦᱟᱸᱰᱤ
ᱥᱟᱱᱟᱢ ᱡᱤᱭᱟᱹᱞᱤ ᱠᱚ ᱧᱩ ᱥᱟᱹᱰᱤ
ᱚᱠᱚᱭ ᱦᱚ ᱵᱟᱠᱳ ᱦᱟᱰᱤ

 

======-- ᱛ --======

 ৪।।

ᱚᱲᱟᱜ  ᱫᱩᱳᱭᱟᱹᱨ

ᱠᱤᱥᱠᱤᱱᱫᱷᱟ  ᱢᱩᱨᱢᱩ

  

 ᱪᱮᱲᱮ ᱪᱤᱯᱩᱨᱩᱫ ᱫᱟᱨᱮ ᱱᱟᱹᱲᱤᱨᱮ  ,
 ᱛᱟᱸᱦᱮᱱ ᱫᱚᱠᱚ ᱥᱤᱧ ᱧᱤᱫᱟᱹ ;
 ᱛᱳᱭᱳ ᱪᱮᱢᱮᱧ ᱚᱛ ᱵᱷᱽᱩᱜᱨᱮ ,
 ᱛᱟᱸᱦᱮᱱ ᱫᱚᱠᱚ  ᱦᱩᱫᱟᱹ ᱦᱩᱫᱟᱹ ।

 

 ᱦᱟᱠᱳ ᱨᱚᱠᱚᱪ ᱫᱟᱜ ᱛᱟᱞᱟᱨᱮ ,
 ᱛᱟᱸᱦᱮᱱ  ᱥᱤᱛᱩᱝ  ᱨᱟᱵᱟᱝ  ;
 ᱦᱚᱨᱚ ᱠᱟᱴᱠᱚᱢ ᱞᱚᱥᱚᱫ ᱨᱮᱜᱮ ,
 ᱫᱟᱸᱲᱟᱱ ᱫᱚᱠᱚ ᱨᱟᱵᱟᱝ ᱠᱟᱵᱟᱝ  ।

 

 ᱵᱤᱧ  ᱞᱮᱸᱰᱮᱛ  ᱦᱟᱥᱟ ᱵᱷᱽᱩᱜᱨᱮ  ,
 ᱛᱟᱸᱦᱮᱱ  ᱫᱤᱱᱟᱸᱢ  ᱫᱤᱱ  ;
 ᱜᱩᱰᱩ   ᱪᱩᱴᱤᱭᱟᱹ  ᱜᱮᱞᱮᱡᱟᱨᱮ ,
 ᱱᱤᱥᱩᱱ  ᱧᱤᱫᱟᱹ  ᱛᱤᱠᱤᱱ  ।

 
 ᱢᱟᱱᱢᱤ ᱠᱚᱫᱚ ᱵᱮᱱᱟᱳ ᱚᱲᱟᱜᱨᱮ ,
 ᱛᱟᱸᱦᱮᱱ ᱡᱤᱨᱟᱹᱳ ᱡᱟᱹᱯᱤᱫ ;
 ᱵᱤᱨ ᱡᱤᱭᱟᱹᱞᱤ  ᱵᱤᱨ ᱛᱟᱞᱟᱨᱮ ,
 ᱛᱟᱸᱦᱮᱱ ᱟᱲᱟᱜ ᱜᱤᱰᱤ ᱱᱟᱯᱤᱫ ।

 

======-- ᱛ --======

৫।।

ᱟ.ᱥᱩᱞ ᱪᱮᱬᱮ

ᱜᱳᱯᱮᱥᱣᱚᱨ ᱢᱟ.ᱱᱰᱤ

  

ᱟᱢ ᱫᱚ ᱪᱮᱬᱮ 
ᱠᱷᱟᱧᱪᱟ ᱵᱷᱤᱛᱟ.ᱨ
ᱟ.ᱥᱩᱞ ᱥᱟᱫᱮᱨ ᱪᱮᱬᱮ,
ᱡᱚᱢᱟᱜ ᱧᱩᱭᱟᱜ ᱠᱷᱟᱧᱪᱟ ᱵᱷᱤᱛᱟ.ᱨ
ᱟ.ᱜᱩ ᱥᱩᱨᱟᱢ ᱟᱲᱮ ।

 
ᱤᱧ ᱫᱚ ᱡᱩᱫᱤ
ᱛᱟ'ᱦᱮ ᱠᱚ'ᱜ ᱟ.ᱧ
ᱟᱢ ᱞᱮᱠᱟᱱ ᱯᱷᱟ.ᱠᱲᱟ.ᱜ ᱪᱮᱬᱮ,
ᱠᱷᱟᱧᱪᱟ ᱠᱷᱚᱱ ᱛᱤᱱ ᱨᱮᱪᱚ
ᱩᱰᱟ.ᱣ ᱫᱟ.ᱲ ᱮᱲᱮ ।

 

ᱵᱩᱨᱩ ᱪᱚᱴ ᱨᱤᱧ
ᱢᱟᱰᱨᱟᱣ  ᱠᱚᱜ-ᱟ
ᱵᱤᱨ ᱵᱩᱨᱩᱧ ᱫᱟᱬᱟ ᱠᱮᱭᱟ,
ᱤᱧ ᱠᱷᱩᱥᱤ ᱡᱚᱢ ᱧᱩ 
ᱡᱳᱜᱟᱲ ᱡᱚᱝ ᱠᱮᱭᱟ ।

 

======-- ᱛ --======

 ৬।।

হপন মৗয়াঃ আড়াঃ সিৎ

গাতে টুওয়ৗর

 

হপন মৗই এ চালাও লেনা
          চাতম আড়াঃ সিৎ
চাতম আড়াঃ মেতাদেয়ায়
          আলম সিদিঞ নিৎ ।

 

সেতাঃ তিকিন চেলেহঁ বানুঃক
        ইঞিঞ কয়ঃ ভাগাঃ
তারাসিঞ খন ইঞিঞ জৗপিৎ
         সিসিৎ আলম লাহাঃ ।

 

হপন মৗই চেৎ এ লৗই
       সিৎ তরায়ায় মুনগৗ
মুনগৗ হঁতয় এগের কেদে
       বাম ঞেলিঞা ঠুঁড়গৗ ।

 

হপন মৗই ভাবিত কেদায়
           আড়াঃ দ বায় সিৎ
হাকো কাটকম রকচ হালাং
           অনতে মনেয় বিৎ ।

 

রকচ হালাং আঁড়গো লেনায়
            জঁক'ক জেঁবেৎ কেদে
রেঁড়েৎ হাকোয় পৗটি কেদে
          কাটকমায় ডাটম আদে ।

 

হপন মৗই হৗঁয়-ফৗয়
      দাঃ খনদয় রাকাব
টুমকি হঁ গিডি কাতে
       দৗড়কেৎ আকাব সাকাব ।

 

বায় সাব'ক হাকো কাটকম
                বায় সিদা আড়াঃ
এখেন তি হুরলৗ কাতে
          সেটের এনায় অড়াঃ ।

 

======-- ᱛ --======

৭।।

মারসাল

সুচাঁদ হাঁসদা

 

কিরিঞ আয়ালে আলে বুডি ,
খানচা আনাঃ ডুলুং গাডি ,
পারম কাতে ইসকুল গানাডি ,
পাড়হাঃ আয় হাপেন জেলেঞরে আডি ৷

 

বায় দাড়ান বায় গাতেঃ ,
কৗমিহঁয় সেঁড়ায়েত সেতে পেতে  ,
জৗমৗই কায়ালে বিটি দ হাপেন ,
বি এ ,এম এ পাস কাতে ৷

 

দূলৗড় মিরু বিটি হালে ,
আপিসরে হাপেনে চাকরি তালে ,
হবরে পেরেজ কলে বালে ,
জৗমৗই অড়াঃ এ মারসাল তালে ৷

 

======-- ᱛ --======

৮।।

ঘানে ঘানে

রামলাল টুডু

 

 কাড়াঙ কাড়াঙ ঞুত       ঞুড়ু ঞুড়ু বৗতি
 সুয়ুড়  সুয়ুড়  হয়             ধুক্  ধুক্  ছৗতি
                  রাবাঙ কান্ কান্ ।

 

 কাটাব্ কাটাব্ মিহুঁ     চোড়োঃ চোড়োঃ তোড়
 জেঁগেদ্ জেঁগেদ্ বাহা      ধব্   ধব্   পোঁড়
                   তেরম ভান্ ভান্ ।

 

 মুরৗই মুরৗই হোড়ো         টেপে টেপে গৗডি
 হামাল হামাল কৗমি        জাম জাম মৗডি
                   কৗমিক ঢান্ ঢান্ ।

 

 উসুল উসুল দারে         পেড়া পেড়া হিরি
 সাগাল সাগাল হড়         রক্  র-ক  ধিরি
                   তাড়াম দান্ দান্ ।

 

 দোঁগোয় দোঁগোয় ধুঁয়ৗ        পেড়ে পেড়ে মেৎ
 মাটায় মাটায় কয়ঃ             র-গ  ব-গ  রেৎ
                  ধৗউ ধৗউ সেঁগেল ।

 

 ঞালাঃ ঞালাঃ হর          সি-ক স-ক তল
 দুঁগুর দুঁগুর ঝিলৗঃ           সুচ্  সুচ্  গল
                  ঘানে ঘানে ঞেপেল ।

 

======-- ᱛ --======

৯।।

রাচা

বাড়তাঙ সরেন

  

আলে বাখোল সামাংরেদ 
                       আডি মারাং রাচা 
মাডের মাডের বেড়হায় তেগে
                       আডি অসার বাছা।

 

সেতাঃ তরা বেরেৎ কাতে
              ইঞদঞ ঞির বাড়ায়া
ইঞ আয়ো দ অকা যখেচ
                    তিকি হুড়ুয় তাসেয়া।

 

শুকরী ভিডি রাচারেদ
                একাল ভাচাং ভুচুং
মেরম দকো উয়ুং বাড়ায়
                আডি গায়াং গুয়ুং।

        

পেড়াকো কো হিজুঃরেমা
                রাচারে বিল পারকম
সিতুং হিলঃ তাসেয়ালে
               হালাং আগু মাতকম।

 

গাতেকো কো সেটের রেদ
              বল কোলে গাতেঃ আ
গাতে তেলে লাঙ্গাঃ রেদ
               রাচারেলে জিরৗ আ।

 

দাঁশাঁয়বঙ্গা দাঁশায় কড়া
                   এনেচ রাচা তালা
গিদরৗকো দ কেঁড়েচ দঁড়েচ
                 হায়রে রৗস্কৗ জালা।

 

আয়ুপ তরা সেদায় বিদৗল
                      গড়মে গাম কুদুম
ঝঁড়ে ঝুনকৗ বাজুন আতে
                 আর হঁ আয়মা ঞুতুম।

 

রাচারেগে বিন্তি কাথা
                 আঁজম লেনা সেদায়
সরেন ইপিল ভুরকৗ ইপিল
                  সানাম গেবো বাডায়।

 

রাচা কানা খেলোড গোডা
                রাচা এনেচ আখড়া
রাচা কানা রিলৗমালা
                পৗহিল ইতুন আসড়া।

 

======-- ᱛ --======

 ১০।।

আদিবাসী

দুগাই টুডু

 

লৗই আকো বাবুরাম মুরমু
    অনে আমগে কানেম,
দুধসিমর আতো ভাগলপুর রে
    হানেম জানাম লেনেম।

 

হড়’কো তালা ঞুতুম আকাৎ
     দোসিমা-গে আতো,
আড়ে পাশে আতো হড়গে
     একাল বাডায় যতো।

 

আপাৎ ঞুতুম সুজান মুরমু
      মেনা ভালা হড়কো,
এম. এ. পাশ লেদায় উনরে
      সানাম এতে রড়কো।

 

অলঃ রেদ বাবুলাল মুরমু
      ‘আদিবাসী’ সাবাদ,
বাহনা তেগে সমাজ তালা
     উরুম গোটা জাকাদ।

 

তায়ম তেদ সাপড়েৎ লেনায়
      অ্না ‘হড়সম্বাদ’
অঁনড়হে কৗহনি অনল কাতে
      লাহা কেদায় সাঁওহেদ্‌।

 

নাওয়া অনলিয়ৗ অলঃ রেদ
      উদ্‌গৗও বাড়া আনাম,
পাথাম বাবদ করে উনগে
      আয়মা হুদিস লেদাম।

 

‘কয়ঃ হররে’, দিসম ভোক্তা
     গনং পতব মেনগে,
‘আখড়ারে ঝম্‌ ঝম্‌’ ‘সোরোস সেরেঞ’
      বেজায় দিসৗ লেনগে।

 

‘সান্থালী সাহিত্য ইতিহাস’
      বাডায় গেকো অনা,
‘সান্তালি অনল’ ঞেল কাতে
     ভাগেকো মেতাঃ কানা।

 

‘নাহাঃ সান্থালি অনল’ গেচো
      মঁজগে পাড়হাও রেদ,
‘সান্থালি ভেনতা কাথা’ কোদ
    ‘ধরম সেরেঞ’ আদ।

 

অল বেলরে মনে মুরুক
     আডি তাঁহে লেনাম,
বানুম রেহঁ এনেম খাতির
     উইহৗর তাঁহে য়েনাম।

======-- ᱛ --======

১১।।

বুডহি

সনাতন টুডু

 

বানুঃ কতায় তায়ম মাড়াং
ইরৗলগে উমেরান বুডহি,
হানতে নাতে ধিরিয় পাঁজায়
পারম অকতো কুলহি।

 

আডি মেজাজতে হরেয় পারমঃ
রৗগি অকয় চেতান ?
হড় ঞেলতে মেতা কোওয়ায়
ঞিরপে এমাপেয়াঞ বাংখান।

 

বুডহি ঞেলতে কড়া গিদরৗ কো
চেরেজ্‌ মাগালেয়া,
তাড়াম অকতো বুডহি আজাঃ
ঠেঁগায় দেখাও তায়া।

 

ভাংকাড়া মুরুখ পৗপি ঝতো
মরন হোয়ো তাপে,
জমেদ্‌ আপে মুধুন খুঁন্টি
খেয়াল বৗনুঃ তাপে।

 

শসনঃ এনা সাঁওতা তেহেঞ
বাং শসনঃ লেন মনে,
উমেরান হড়াঃ জায়গা বৗনু
দালান কঠা তাঁহেন।

 

======-- ᱛ --======

১২।।

আলে  আতো

সমরলাল টুডু

 

পুরুব   পছিম   আলে   আতো
দেনে    বানার   অড়াঃ   জোতো
বাহা   মালা    গালাং    গোতো
নাপায়   আডি  সরেস    গেতো  ।

 

উসুল   পিঁডৗ   জেড়ের   পতাও
তরহৎ   দেয়া   রাচা   ভাতাও,
রেঁগেজ   তেতাং  অকতয়  বিতৗও
বোওয়াঃ   রুঁডৗ  ঞুঁতুমে  হাতাও  ।

 

সোনা   বারাগ্   কাঁতদ   আরাঃ
কেঁহড়   কেঁহড়   বুরু   মারাঃ,
সরগ্   রেনাঃ    রৗসকৗ  ছারাঃ
দুনিয়ৗ   দিশোম   ঞুঁতুম  হারাঃ  ।

 

বুরু   গাজাড়   নিচোল   ঝারনা
তাঁহা   রেতা    নানা    তারনা
সেরেঞ   দুরাং   বৗনুঃ   করনা
হিজুঃ   সেনঃ    বায়    বারনা ।

 

কুলহি   তালে   জাঁবড়ু    দেয়া
হৗথি  লেকান   হড়ে   লেঁজেদেয়া
জিনতি   পিপড়ি   বায়  বাদেয়া
বিজলি   লেকাম   ঞেঁল্  আদেয়া ।

 

হরঃ   বাঁদে   শায়া   শৗড়ি
বির্   বুরু    দারে   নৗড়ি
গুঁগু   লাটা   আলাক্  জৗড়ি
তল্   আগুয়ায়  সেরমা জৗড়ি ।

 

সরেস   আতো   সরগ্   পুরি
হাড়াম   বুড়হি  পারোওয়া জুরি,
জিয়ৗড়   মেনাঃ  সেরোওয়া আরি
মেনাঃ   তালে   ধরম   সারি  ।

 

======-- ᱛ --======

 ১৩।।

পাতনি

সীতেন মাণ্ডি

 

পাতনি পাতনি শাশাং পাতনি
    বাহা রেম আবঃ আ
ফুটেল বাহা লেকা আম হঁ
আডি চেহেরাম ঞেলঃআ।

 

হানা বাহা নাওয়া বাহা
  উডৗও বাড়ায়াম
বাহা চেতান পিড়ি পিড়ি
যত বাহাম সভায়া।

 

আম ঞেলতে বাহায় লান্দায়
  গায়ুচ্ আমায় দেলা
বাহা রেনাঃমনে সানা
মেটাও তায়াম অনা।

 

নানা হুনৗর বাহা লেকা
আম দম ঞেলঃআ
বাহা রাসা সন্ধাড় স তে
মনে জিউয়িম মহক আ।

 

বাহা রাসাম চেপেজ জমা
       আম একলা গে
আলে পাতনি হৗটিঞ আয়মে
আমাঃরুপ ,বাহা রাসা এমায় মে।

======-- ᱛ --======

১৪।।

আলে বৗবু

নিকোলাস  মারাণ্ডি

আলে বৗবু
আলে বৗবু
জেল  উতুয় জমা 
ঠৗবু  ঠৗবু।
জমা দিড়িদাং 
কাতে আদ
লাচ্ তায়ে রুয়ৗ
ডুবু ডুবু।

ঁঁঁঁঁ=মুচৗৎ=ঁঁঁঁঁ