হেঁদে রিমিল

 (হুডিঞ মাছা কৗহ্‌নি)

হেঁদে রিমিল

আকাশ মুরমু

হেঁ  বাবা ! মেনদাঞ রুয়ৗড়ঃ তিঞ বিলোমঃ আ। ও ! বিটি,মেনদাঞ তাঁহে...কাথা বাং মুচৗদ মাড়াং রেগে ফোন গেদেনতে ছিস ছাস কাতে মথন মান্ডিয় মেন কেদা, নেতার রেন গিদৗর চেদেম মেতা কোওয়া মিৎ ঘন্টা রেনাঃ টিউশন মড়ে ঘন্টা ক লাগাওয়া, চেৎ চং ক চিকৗয়া? লৗই দহ লৗগ কানা কেচাঃ ধিরিআতোরেন। 

 

অনা আতোরেন কিঁষাড় হড়কো মুদরে মান্ডি বাখোলেম সাব লেখান দ মিৎ ঞুতুমতে মথন মান্ডি গেকো উরুমেয়া । আপাতাঃ হাসা সম্পত্তি দ আচগেয় ঞেলা , সাদের বকঞ মানো মা গিদৗর পিদৗর আতেৎ কলকাতা বাজাররেয় সার্জেন ডাক্তরঃ কানা , বাহা সহরায় বাখান বায় হিজুঃ আ। নতে মথন হ মিৎ কড়া মিৎকুড়ি আতেৎ মান্ডি কিঁষাড় ঞুতুম দয় হামেট দহ আকাদ গেয়া। সাদের কড়া সুরাই দ অলঃ  ক মুচৗদ কাতে সরকারাঃ চৗকরি ঞাম লৗগিদে কুরুমুটুয়েদা,সাদের হপনরা পিয়ো দ সুর বাজার বাগান বেড়া কলেজররে পৈল সের্মারেয় অলঃ কানতে, বাজার মেস রেগেয় তাঁহেন রেঁহ নিত দ অড়াঃ রেগে মেনায়া।

 

 মাজান বেড়া পারম কাতে বেড়ায় হাঁসুরেনা ,পায়াং  পুয়ুং ঞুত হিজুঃ কানা,পিয়ো মৗই দ বায় সেটেরলেনা নিতহো,এঙ্গাত মনে বাং আপনারলেনতেয় মেন কেদা,মাসে গো ফোন লাগাও আয়মে? ফোন কেৎতে সুইচ অফে মেন কেদা ,আপাৎ মনে হঁ খিজলৗও এনা। ধৗরতি ঞুতাৎ ইদিঃ কানা ! পাঁজা ক পাঁজা কেদেয়া বাকো ঞাম লেদেয়া। ,উরুম ক মুদরে অকয় দক মেন কেদা বালে ঞেল আকাদেয়া অকয় দক মেন কেদা টিউশন গে বায় হেজ আকানা ।

 

কাথা পাশনাওয়েনা,মান্ডি বাখোল রেক গটা কেদা পুলিস রেবোন খবরা ,উন অক্তগে মেসেজে লৗইয়ৗদ কোওয়া বাংমা পিয়ো মৗইয়ৗ মোবাইল দ চৗলু আকানা। ফোন কেৎতেয় মেন কেদা ,"বাবা ইঞ দ ইকৗ কৗঞ মে! আডি মারাং ইঞ কৗই আকাদা "ফোন গেদ্‌ এনা। আরহঁ ক ফোন কেদা বায় সাব লেদা, ফোন লেতাড় গেকো তাঁহেয়েনা বায় সাব লেদা ,মেসেজ বলয়েনা,"বাবা!দাড়েঃ খান ইকৗ কাঞ মে! আডি মারাং ইঞ কৗই আকাদা ! ছৗতিক অড়াঃরে  অড়াঃ ইঞ ঞাম জং আকানা। আঁজম কাতে বিন রিমিল খন ঠের ঞুরৗৎ ক লেকা ক আইকৗও কেদা ,এঙ্গাৎ দ সাহেৎ বেগর জতয় আড়াঃ গিডি কাদা , হুনৗং অন্তর মনেয় রড়েদ তায়া "চেৎ তে বৗঞ পুরুন লেদ মেতেটি, তেহেঞ  নংকান সাসেতেম এমাদিঞা?

 

আপাতাঃ অন্তররে চেদ্‌  চালাঃ কানা বাহরে চেহরাতেগেয় দানাং দহ কেদা। দসার হিলোঃক লেবেদ কেদা ছাতিক   বাখোল, বল তরাগে সামাংরেকো ঞাম কেদেয়া পিয়ো মৗই, মলং রেনাঃ ডিগডিগ হরাসি সিঁদুর, তিরেনাঃ সাকম চুড়ি ,সাজাও কাতে রেহঁ বায় সাজাও লেনা ছাটকা খৗতির। রুয়ৗড় ইদি কাথা রেহঁ বায় রেবেন লেনা,কাথা রাপাচাঃরে এঙ্গাৎ আপাৎ সৗগৗই জৗয়যুগ লৗগিদ্‌ মিছৗয়েনা,মায়াং হৗটিঞ বয়হা সৗগৗই বকল বডে দাঃ খন হঁ অজরায়েনা ,যাঁহালেকাকো সেন লেনা অনকাগেকো রুয়ৗড় হেচ্‌ এনা।