মহাদেব হাঁসদা
তেহেঞ দ ৯ জুন হুলগৗরিয়ৗ বিরসা মুন্ডা আঃ গুর মাহা। ১৯০০ সাল
রেয়াঃ তেহেঞা নোওয়া দিনরে রাঁচি জেহল রে উনিয়াঃ জিউয়ি বৗতি দ ইড়িজ্ লেন তাঁহেনা। ব্রিটিশ
সরকার এ লৗই সাডে লেদা- বিরসা আঃ দ কলেরা হোয় লেনা। মেনখান দিশম রেন ঢের তেৎ হড় গেকো
মেনা- উনিদ বিষ এম কাতেৎ গচ্ হোয় আকানা।
বিরসা মুন্ডা দ তাঁহেকানায়- ভারত গ রেন মিৎ বীরবান্টা হপন,
মুন্ডা উল্গুলৗন রেন আয়ুরিচ্, সমাজ সুসৗরিয়ৗ- ধৗরতি আবা। উনি ঞুতুম তে তাঁহেয়েনা
ইঞাঃ সায় সায় গুনমানাও সারহাও আর অত্ জাপাঃ গড্ জোহার।
বিরসা আঃ জানাম দ হোয় লেনা ১৮৭৫ সাল রেয়াঃ ১৫ নভেম্বর, রাঁচি
জেলা রেয়াঃ তামার থানা রে মেনাঃ উলি হাতো রে। হারা লেনায় চালকাদো আতোরে। আচ্ বাবা
আঃ ঞুতুম দ সুগনা মুন্ডা আর আয়ো আঃ দ কৗরমি মুন্ডা। রেঁগেচ্ হপন হতেচ্তে বিরসা দ
ঘানে মামা অড়া আয়ু ভাতু আতোরে ঘানে কৗকি গ ঠেন খটংগা আতোরে দিনে খেমাও আকাদা। মিৎ অকতে
দ আচ্ দাদা ঠেন কুঁদরি বড় তুলি আতোরে হঁয় তাঁহেকানা। নকা হাঁডে নাডে তাঁহে তাঁহেতে
মুন্ডা গিদরৗ কো সাঁও গাতে কাতে মেরম গুপি গুপি তে তিরয় অরং অরং তে বিরসা দয় হারালেনা।
গিদরৗ জখেচ্ বিরসা
দ বুরজু লোওয়ার প্রাইমারী ইস্কুল রেকো ভুরতি লেদেয়া। অনা কাতে চাইবাসা, জার্মান ইস্কুলরে।
মিশন রেয়াঃ নিয়ম লেকাতে উনিদ ঈশায় ধরম হাতাও হুয় লেন তায়া। গিদরৗ খনগে উনিদ আডি লাসের
হাতাং আনিচ্ পৗঠুওয়ৗয় তাঁহেকানা। আডি উসৗরা গে উনিদ বুজ্ তিয়ঃ লেদায়- দিসম রেন রাজ
রাপাজ, জমিদার, মহাজন, ঠিকৗদার, আড়কাঠি নোকোদ অকয়হঁ বেশ হড় দক বাং কানা, নোকো দ দুষমন
কানাকো। নোকোওয়া রডচ্, কচ্লন, নাহাচার আর সিঁয়ৗজৗরি হতেতে মুন্ডা কদ আকোওয়াঃ অত্
হাসা কো রেচ্ অচঃ কানা।
মিৎ দিন চাইবাসা মিশন
রেয়াঃ গির্জারে কয়জং (প্রার্থনা) জখেচ্ অঁডেনিচ্ ফাদার নট্রট এ মেন লেদা- ‘মুন্ডা সরদার দ জতগে ঠক্, জোচ্চোর কানাকো’। বিরসা
দ অনা কাথা বায় সাহাও দাড়েয়াদা। রড় রুওয়ৗড় কেদায় – ‘বাং আ। ঠক দ কানা কো সাহেব কো,
জমিদার কো, মহাজন কো। ওনকো গে মুন্ডা কো এড়েয়েৎ কোওয়া’। - নংকান কাথা রড় হতেতে বিরসা
দ ইস্কুল খন কো অডক কাদে তাঁহেনা।
নুই বিরসা গে হারা কাতে মিৎদিন উলগুলৗনে হহ লেদা। মেন লেদায়
– “খাজনা বাবো এমা”। ডোমবারি বুরু খন এহব্ কাতে বৗসিয়ৗ, সিসৗয়, কোলে, বিরৗ, বৗনু,
লোহার, দাগার, তোরপা,কারা, খুঁটি, মুরমু, তামার, বুনডু, সোনাহাতু, জোড়হাট, জালোমাই,
বেলনিয়া, বৗলিহাতু, জলসার- গটা গার্জাও আতে লৗই লেদা-“আবোওয়া দিশুম রে আবোওয়াঃ রাজ
সেটের জানা, মহারানি রাজ টুটু জানা”।
জত সেচ্ আড়াং রাঁওয়াও এনা- উলগুলৗন! উলগুলৗন! ধৗরতি আবা বিরসা
মুনডা জিৎকৗর। ব্রিটিশ সরকার বিরুধরে লৗড়হৗই সৗরদিয়েনা। ১৮৯৯ সাল রেয়াঃ ২৪ ডিসেম্বর,
সাহেব কোওয়াঃ মারাং দিন রেয়াঃ পৗহিল ঞিদৗ বিরসা মুন্ডা রেন ফৗদ্ – চক্রধরপুর, খুঁটি,
কারা, তোরপা, তামার আর বৗসিয়ৗ থানা কো জারপা কেদা। আয়মা হড়কো গচ্ এনা। অনাতায়ম ৬ জানুয়ারি,
১৯০০ হিলঃ ওনকো দ ‘বুরজু’ আর ৮ জানুয়ারি দ ‘রাঁচি’ কো জারপা কেদা। ঘাটামার লৗড়হৗই।
মিৎ সেচ্ বাঁদুক কামান রেয়াঃ গুলি আর মিৎ সেচ্ কৗপি, তারোয়াড়ে, আঃসার আতেঃ লৗড়হৗই।
বিরসা সাবে লৗগিৎ সরকার ৫০০ টাকা শিরপৗয় লৗই সাডে কেদা। খান
৩ ফেব্রুয়ারি ঞিদৗ সেন তরা বিররে বিরসা দ পুলিশ ঠেনে সাব অচয়েনা। উনি সাঁওতে উলগুলৗন
রেকো সেলেদ্ লেন আরহঁ ৫৮১ হড় কো বুঁদি অচোয়েনা। ওনকো চেতানরে পুলিশ আডি বৗড়িচ্ নাহাচার
কো চালাও কেদা। রাঁচি জেহল রে বিরসা দ মেড়হেৎ শিকড়ি তে তল কাতেৎ কো দহ লেদেয়া। এনতেরেহঁ
অকয় গে আকোওয়াঃ বহঃ বাংকো তুঁবুৎ আকাদা।
তেহেঞ দ বিরসা মুন্ডা বৗনুঃ আকাদেয়া। দিশম দ ফুরগৗল আকানা।
মেনখান বিরসা আঃ কুকমু দঃবাং সৗরি আকানা। নিৎহঁ আদিবাসী কো আপনার অত্ হাসা কো রেচ্
অচঃ কানা। ওনকো চেতান রে রডচ্, কচলন আর নাহাচার দ মেনাঃ গেয়া। বির-বুরু, অত্-হাসা
আর দাঃ রেয়াঃ আইদৗরি লৗগিৎ নিৎহঁ আদিবাসী কোওয়াঃ হুলসৗই আড়াং তাকেরঃ কানা অত্ আর সেরমারে।
.webp)
