রড়াম সে বাম রড়া
(সাতাম- রঘুনাথ মুরমুওয়াঃ জানাম মাহা লৗইতে)
জাহের আয়ো মুরমু ঃ হলা ৫ মে, আডি মৗন মানত্ সালাঃ গুরু গোমকে পন্ডিত রঘুনাথ মুরমুওয়াঃ জানাম মাহা মানাও এনা। বেঙ্গল, বিহার, ঝাড়খন্ড, আসাম আর উড়িষ্যা সাঁওতে পড়শি দিশম বাংলাদেশ রেহঁ পন্ডিত রঘুনাথ মুরমুওয়াঃ জানাম মাহা মানাও রেনাঃ খবর ঞাম আকানা। তবে বেঙ্গল রেগে আডি আয়মা জায়গারে নোওয়া কোভিড তালারেহঁ গুরু গোমকে দিসৗতে হুডিঞ-মারাং আখড়া তালাতে উনিয়াঃ জানাম মাহাকো মানাও কেদা।
গুরু গোমকে পন্ডিত রঘুনাথ মুরমু দ সানতাড়ি পৗরসি রেনাঃ অল আখর
এ সিরজৗও লেদা। ঞুম আৎ তাঁহেনায় “অলচিকি”। উইহৗর দ তাঁহেকান তায়া হাপেন নোওয়া অলচিকি
তালাতেগে বেঙ্গল, বিহার, ঝাড়খন্ড,আসাম আর উড়িষ্যা সে তামাম সানতাড় হড় কো মিৎ সুতৗম
তেকো তপলঃআ। তেহেঞ উনিয়াঃ কুক্মু আডি গান গে পুরৗও আকান তায়া। বিশ্ব দরবার রেহঁ উনিয়াঃ
ঞুতুম মানত্ এ ঞাম আকাদা। অনালেকাতে উনিদ সানতাড় জৗতি ঠেন আডিগে গুণমানাও আনিচ্ কানায়।
আর অনাতেগে উন দিন হোয়েন রেঁহ নিৎহঁ উনিয়াঃ জানাম মাহা সেরমা কে সেরমা ভৗরি ভরম আতে
কো মানাওয়েৎ তায়া। মেনখান নেশগে পছিম বাংলা সরকার গুরু গমকেয়াঃ জানাম মাহা দারায় কান
২৬ মে (বুদ্ধ পূর্ণিমা/বৗইশৗখ কুনৗমি) হিলঃ মানাও আর সরকারি ছুটি মেনতে লৗই সাডে আকাদায়।
অনাতে আয়মা হড় নিৎ আঁদাগঃ কানাকো অকাটাঃ মাহা কো মানাও আ। এনখান নঁতে আডিদিন খন মানাও
আগু আকাৎ ৫ মে নোওয়া মাহা চিকৗতেকো হিড়িঞা? গুরু গমকে আয়াঃ অলঃ জীয়নরে আর চৗকরি জীয়নরে
৫ মে গে অল আগুওয়াকাদায়। অনাবেগর গুরু গমকেয়াঃ জানাম মাহা সানাম ক্যালেন্ডার সে গুরু
গোমকেয়াঃ সানাম ফটো লাতাররে জানাম মাহা ০৫/০৫/১৯০৫ অল মেনাঃ আকাদা। আয়মা অড়াঃ রেনাঃ
কাঁথরে নিৎহঁ ঝাক্ ঝাকঃ কানা। উনিয়াঃ পুঁথি সাঁওতে আয়মা পুঁথিরে, নানাহুনৗর বিনিড
রেনাঃ কুক্লি তেলারে গুরু গোমকেয়াঃ জানাম মাহা ৫ মে অলঃ গঃ কানা। SSC, PSC, NET, SET লেকান হাপড়া হাপড়া বিনিড রেহঁ
৫ মে গে অলঃ কানা। ইসকুল, কলেজ রেনাঃ সিলেবাস রেহঁ গুরু গমকেয়াঃ জানাম মাহা ৫ মে অল
মেনাঃ আ। ভারত দিশম রেনাঃ আয়মা বিশ্ববিদ্য্যালয়রে গুরু গোমকেয়াঃ অনল পুঁথি পাড়হাও চালাঃ
কানা। অনা করেহঁ গুরু গোমকেয়াঃ জানাম মাহা ৫ মে খদা কাতেৎ মেনাঃ আ। ভারত দিসম বাহ্রে
আয়মা দিসমরেহঁ সানতাড়ি পৗরসি সাঁওতে গুরু গোমকেয়াঃ সিরজৗও অলচিকি আর উনিয়াঃ পুঁথিকো
চেতান রিসার্চ চালাঃ কানা। অনাকো দিসম রেন হড় হঁ গুরু গোমকেয়াঃ জানাম মাহা ৫ মে গেকো
বাডায়া। অনলাইনতে গুরু গোমকেয়াঃ জানাম মাহা সার্চ লেখান ঝাক্ ঝাক্ ০৫/০৫/১৯০৫ রাকাপ্
আ। ‘সাঁওতালি সাহিত্যের ইতিহাস’ পুঁথি রেহঁ উনিয়াঃ জানাম মাহা ৫ মে ডাগ্ ডাগ্ অল
মেনাঃ আ। জাঁহা পুঁথিদ নিৎ অক্তে সানাম বিশ্ববিদ্য্যালয়রে পাড়হাও চালাঃ কানা। অনা বেগর
উন বিদৗল রেন বা্মফ্রন্ট সরকার ৫মে, ২০০৪ খন
৫মে, ২০০৫ ধৗবিচ্ মেনেৎ মিৎ সেরমা ধুরিয়ৗ গুরু গোমকেয়াঃ শায় সেরমা জানাম মাহায়
মানাও আকাদা। অনা জানাম মাহা কুমুটরে আয়মা ঞুতুমান অনলিয়ৗ, অনড়হিঁয়ৗ, সাঁওহেদিয়ৗ, সাঁওহেদ্
দরদিয়ৗ অনকাগে আসেকা লেকান সংগঠন রেন প্রতিনিধি কহঁ জপড়াও কো তাঁহেকানা। তবে চেৎ তেহেঞ
অনাকো নাগাম সানাম মিছৗঃ আ সে মেটাও চাবাঃআ ?
নঁতে নিৎ মিৎ বার হড়কো মেমেন কানা বাংমা গুরু গোমকে দ বৗইশৗখ
কুনৗমি হিলঃ এ জানাম লেনা। অনাতে উনিয়াঃ জানাম মাহাদ বৗইশৗখ কুনৗমি রেগে মানাও লেগ্
কানা। মেনখান নুনৗ সেরমা তায়ম আচ্কাগে নংকান কাথা রড় এনা নোওয়াদ আডি হাহাড়াঃ রেনাঃ
গে কানা। নোওয়া তায়ম রে চেৎ মানতার এ কৗমিয়েদা বাডায় বৗ নুঃ আনা। অকয় কদ আরহঁ বৗইশৗখ কুনৗমি বনদলতে গুরু
কুনৗমি কাথা কো মেমেন কানা। এমন চেৎ গুরু গমকে দ মিৎ বঁগা বারাক মেৎ তেকো ঞেল ঞামে
কানা। আর অনা তেগে পালেন ওনকোদ বৗইশৗখ কুনৗমি গে গুরু গোমকেয়াঃ জানাম মাহা মানাও লৗগিৎ
নাওয়া ডাহার কো তেয়ার এদা। মেনখান শাঁড়েস যুগরেহঁ তেহেঞ নংকান সাবাদ কো অকা খন হিজুঃ
কানা ? কুকলি তাঁহেন কান গেয়া। তবে চেৎ নোওয়াকো কাথা উইহৗর কাতেগে পছিম বাংলা সরকার
হঁ বৗইশৗখ কুনৗমি গে বাছাও কেদায়। আর ইনৗ হিলোঃগে পছিম বাংলা পনৎ রে বুদ্ধ পূর্ণিমা
রেনাঃ ছুটিহঁ অলরেডি মেনাঃ আ। এনখান মিৎ টুটিরে বারয়া চেঁড়ে। মা আদ রৗস্কৗতে দন কোচোড় আতে তিনাঃ জানাম মাহাম মানাওয়েদা মা মানাও মে।
মেনখান নুন দিন ধৗবিচ্
পছিম বাংলা পনৎ রে অকা হিলঃ অকা সংগঠন পাহহটা খন বৗইশৗখ কুনৗমি রে গুরু গোমকেয়াঃ জানাম
মাহা মানাও লৗগিৎ ছুটি রেনাঃ দাবী রাকাব আকানা, বাডায় বৗনুঃ আন। বরং সেরমা কে সেরমা
৫মে হিলঃ গুরু গমকেয়াঃ জানাম মাহা মানাও লৗগিৎ আয়মা সানতাড়ি সংগঠন গে ছুটি রেনাঃ দাবী
কো দহ আগুওয়াকাদা নিৎ হঁক দহয়েৎ গেয়া। নঁডে লৗই লেক কানা সিধু-কানু ৩০ জুন হুল মাহা
লৗগিৎ হঁ আদিবাসী কোওয়াঃ আয়মা দিন রেনাঃ দাবী রাকাপ্ হেচ্ আকান রেহঁ অনা দাবী নিৎ
হঁ বাং মানাও আকানা। মেনখান বীরসা মুন্ডা আঃ জানাম মাহা দ আডি লগন নেশগে সরকারি ভাবতে
ছুটি লৗই সাডে আকানা। কুকলি রাকাপ্ গে দাড়েয়াঃআ গুরু গমকেয়াঃ জানাম মাহা ইদিকাতে সানতাড়
সাঁওতারে কুমুনিয়ৗ হড় বাংকো উপেলঃ কানা তো ?
আরহঁ লৗই গানঃ আ- গুরু গমকে দ বঁগা মেৎতে ঞেল লেখান উনিয়াঃ
লাসের হাতাং দাড়ে সে উনিয়াঃ প্রতিভা আডি খাটো মেৎতে ঞেল হোয়োঃ আ। চেদাঃসে ঞেল আকানা
বাংলা সাঁওহেদ্ রেন বিশ্বকবি রবীন্দ্রনাথ ঠাকুর
তিসহঁ অনা সাঁওতারেন হড় বঁগা মেৎ তেদ বাংকো ঞেল আকাদেয়া। আর বঁগা লেকাতেহঁ বাংকো
মানাও আকাদেয়া। উনিয়াঃ আয়মা গুণ গে তাঁহেকান তায়া। আর অনা গুণ গেক মানাও তায়া আর কো
জোহার আতায়া। আদিবাসী সানতাড় জৗতি তালারেহঁ যে লাসের হাতাং হড় মেনাঃ কোওয়া গুরু গমকে
অনায় পরমান অটো আকাদা। মিৎ টাং বঁগা লেকাতেদ বাং, মিৎ টাং লাসের হাতাং মৗনমি লেকাতে।
আর অনাতেগে নিৎ গুরু গমকে দ গটা বিশ্বরেন হড় কো বাডায়ে কানা।
মুচৗৎ রে নোওয়া লৗই লেক কানা- যাঁহায় কো বৗইশাখ কুনৗমিরে গুরু
গমকেয়াঃ জানাম মাহা কো মানাও লৗ গিদঃ কানা। নোওয়াতে সাঁওতারেন আর হড় কো বাংকো হৗটিঞঃ
কানা তো ? গুরু গমকেয়াঃ জানাম মাহা সানতাড়ি
জুমিদ্ বাং রৗপুদঃ কানা তো ? কুকলি তাঁহেন কান গেয়া।
বাডায় দহ লেক কানা- নোওয়া ধৗরতিরে আয়মা হড়াঃ এমন চেৎ আয়মা মুনিষী কোওয়াঃ জানাম মাহা লৗইতে আয়মা কাথা মেনাঃ আ। মেনখান সার্টিফিকেট আর ডকুমেন্ট রে যাঁহা জানাম মাহা অল তাঁহেনা দিশম হড় দ অনা মাহা গেকো গেকো মানাও আ। এনহঁ যুদি গুরু গমকেয়াঃ জানাম মাহা লৗইতে বৗইশৗখ কুনৗমি কাথাগে ঘানে ঘানে রাকাপ্ হিজুঃআ এনখান, অনকারেদ রড়াম সে বাম রড়া ?
.webp)
.webp)
