(হুডিঞ কৗহ্‌নি)

 লুতি

 বাড়তাঙ সরেন

 

সিতিঞ তেহেঁঞ হঁ কৗমি বায় ঞামলেদা। সেতাঃ খন ঝুড়ি আর টামনি আতে বোলপুর চৌরাস্তা মোড়রেয় দুড়ুপ আকান তাঁহেনা। মিৎবার হড় রাজ মিস্ত্রী সাঁও কৗমিকো ইদিকেৎ কওয়া। মেনখান,  সিতিঞ দ অকয় হঁ কৗমি বাকো হহ আদেয়া। গেল মিৎ টাড়াং ধৗবিচ ঞেল বাড়াকাতে সিতিঞ অড়াঃ রুয়ৗড় হিজুঃ এ গোটাকেদা। রুয়ৗড়ঃ অক্তে ডাহার আড়েরে মিৎ থক পুরৗই আড়াঃ, বারয়া গসো গসো খিড়ওয়ৗ  আর গিদরৗ লৗগিৎ পেয়াগান কাকুড়ে হাতাও কেদা। রুয়ৗড় তরা হুডিঞ বাবু গুড়ধুয় ঞির হিজুঃআ,আর মটরায় হৗত্‌ড়ৗও বাড়ায়া জমাঃ ঞাম লৗগিৎ। 

 

 সড়ক সড়কতে ঠেকা দিপিল কাতেঃ অড়াঃতেয় রুয়ৗড় কানা সিতিঞ। আচকাগেয় দিশৗ কেদা অড়াঃরে দাকা চৗওলে চাবা আকানা। সরকার খন জা উডিজ চৗওলেকো এমলেন, অনামা হেনান সেতাঃ রেয় দাকা চাবা আকাৎ। আর নতে  বাজার কৗমি হঁ বাং ঞামলেনা। কিদুপ দাকা লৗগিৎ অকারে চৗওলেয় ঞামা ! গুড়ধু আপাত হঁ হলা মাধহের খন রুয়ৗ বৗড়তি আকান তায়া। সেরমা ভর উনি দ রেঁহে রেঁহে। নিয়ৗ লকডাউন অক্তেরে আর হঁয় লাঙ্গা আকানা। ডাঁডা হৗসু ঢের আকানতায়া। সিতিঞে হুদিশলেদা, লাগাতার মড়ে তুরুয় মাহায় কৗমি লেখান, জাগে কৗউডি দহ জাওরা কাতে মারাং ডাক্টর ঠেনে উদুঃ দহড়ায়েয়া। মেনখান, লকডাউন খৗতির অনকা কৗমিগে বাং ঞাপাম কানা। মারাং বিটি  লৗগিৎ হঁ মিৎটাং পুঁথি হাতাও হুয় কঃআ ; হানে তিস খনে মেন এদা। মারাং বিটি লুতি দ নেশ মাধ্যমিক বিডৗওরেয় দুড়প আ। পাড়হাও পাড়হাওতে অড়াঃরেনাঃ সানাম কৗমি উনিগেয় ঞেল সামটাওআ। আডি কৗমিয়ান কুড়ি গিদরৗ। ইস্কুলরেন মাষ্টার হঁকো মেনা --লুতির বুদ্ধি আছে,ও ভাল রেজাল্ট করবে। নওয়াকো কাথা ভাবনা ভাবনাতে সিতিঞ যখন অড়াঃএ সেটেরেনা, উন দ সিঞ চাঁদো বহঃ চটরেয় ডিগ ডিগৗঃ কানা।

     

অড়াঃ  রাচা বলোঃ সে আউরী, হুডিঞ বাবু গুড়ধু ঞির হেচ কাতে আচ আয়োয় হৗড়ুপ কেদেয়া।  "উকুর গ চেৎ এম আগু আকাদা ইঞ লৗগিৎ?"  উশৗরৗতেয় মেন কেদা গেল সেরমারেন গুড়ধু। অড়াঃ পিণ্ডৗরে ঝুড়ি দহ তরা মটরা লাড়া কাতেঃ কাকুড়ে ওডোক কেদা সিতিঞ আর গুড়ধুয় এমাদেয়া। সাব তরা গুড়ধু মোচারেয় আদেরেৎ কান তাঁহেনা। উন অক্তেগে সিতিঞে বারন কেদেয়া। মেতাঃ দেয়ায় --বেগর আরুপ কাতেঃ বাকো জমা বেটা,দু আরুপ লাহায়মে, আদম জমা।

 

 উন অক্তেগে কুডৗম নাখা জজো দারে বুটৗখন আডি জোর গেরাং আঁজম হেচ এনা। সিতিঞ তি জাঙ্গা বেগর আরুপ কাতেঃগে উশৗরাতে অন্তেয় সেন এনা। গুড়ধু আপাত, লাড়গাওয়াঃ রুয়ৗ বৗড়তি আকান তায়া। লুতি দ আচ আপাত আড়ে পারকমরে দুড়ুপ কাতেঃ ইতিঞ সুনুম আতে বহঃ এ ইসকিরেৎ তায়া। সিতিঞ সেন সুর কাতেঃ লাড়গাওয়াঃ হড়মোয় জটেৎ  আয়কৗও কেৎ তায়া। লাড়গাওয়াঃ হড়মো দারাং দারাং ধিপৗও আকানা। আর সাঁওতে বহঃ হাসো হঁ বৗড়তি আকানা। লাড়গা সিতিঞ সেচ কয়ঃকাতেয় মেনকেদা  --এগো, লুতি এগাঁত, জাগে রান আগুয়ৗঞমে,  উনি নকুল ডাকতর ঠেন খন। আর বাংখান হিজুঃ মেতায়মে! আডি বাং জুত ইঞ বুজ এদা ! সিতিঞ দ বহঃ ডুবুঃ কাতেঃ উশৗরাতে অড়াঃ ভিতরীয় বলয়েনা। 

       অড়াঃ ভিতরী বলো কাতেঃ সিতিঞ দ টিন বাক্সায় ঝিজকেদা। গোটা হৗতড়ৗও বাড়াকাতেয় সেঁদরা কেদা। মঠে বার গেল মড়ে টাকায় ঞাম কেদা। অনাতে দ চেৎ হুয়ুঃ আ ! সিতিঞ দ বাং বিলম কাতেঃ হপনা মাঝহি তাকোঠেনে সেন এনা মিৎ শায় গান টাকা পাঞ্চাতে আগুয় লৗগিৎ।  হপনা মাঝহি দ নওয়া লকডাউন ভিতরীরে মিৎ গেল টাকা হঁ এমঃ বায় রেবেন লেনা। সিতিঞ দ আডি হায় হৗপুঃ কাতেয় রুয়ৗড় হেচ এনা। 

                 

অড়াঃ রুয়ৗড়  কাতেঃ সিতিঞ দ পিণ্ডৗরেনাঃ ভিত রে টেণ্ডার কাতেয় দুড়ুপ থির এনা। চেৎ এ চেকায়া বায় বুজ তিয়ৌঃ দাড়েয়াঃকানা। সিতিঞাঃ বার মেৎ খন সিডির সিডির মেৎদাঃ জর ফেডঃকানা। হান্তে লাড়গাওয়াঃ গেরাং আর হঁ ঢের ইদিঃকানা। সিতিঞ কড়াম রে আকবাকে আটকার কেদা। দুলৗড় দুপুলৗড়তে বাপলা। নিত হঁ আকিনাঃ দুলৗড় বাহা নাশে হঁ বাং মসৎ আকানা। লাড়গাওয়াঃ কাথা হুদিশ কাতেঃ সিতিঞ আচ হঁ কড়াম হৗসুয়ে লেকায় আটকার কেদা। মেনখান, চেৎ এ চেকায়া..! অকয় ঠেনে সেনঃআ ! গোটা ধুঁতগেয় ঞেলেদা সিতিঞ !

 

আচকাগে বার মেৎ বেঙ্গেৎ কাতেঃ ঞেল কেদেয়ায় লুতি, আচ সামাংরেয় তিঙ্গু আকানা। আডি যতনতে সিতিঞাঃ বার জোহারেনাঃ মেৎদাঃ এ জৎ কাতায় কানা। জৎ সাফাকাতেঃ আচ আয়োয় মেতায় কানা -- আলোম রা-গা, গ, মেৎদাঃ আলোম জরয়া। নঃয়য়, নওয়া মড়ে শায় টাকা, নওয়া দহ কাঃমে , আর ডাকতর ঠেন সেনঃমে...।  উনৗ টাকা ঞেল কাতেঃ সিতিঞে হাহাড়া এনা ! আডি রৗগি আতেয় কুলি কেদেয়া---অকারেম ঞাম কেদা নুনৗঃ টাকা ? অকয়াঃ এম কুমড়ু কেদা সে চেৎ? 

 

"বাং গ, বাং, ইঞ দ অকয়াঃ হঁ বৗঞ কুমড়ু আগু আকাদা। হানে দিনকালম ইস্কুল খন যাঁহা টাকালে ঞামলেৎ, আমেম মেতাঃদিঞ তাহেঁ নাওয়া চুড়িদার হাতাও লৗগিৎ। চুড়িদার বাং হাতাও কাতেঃ অনাগেঞ যতন দহ আকাৎ তাঁহেনা", লুতিয়ে মেন রুয়ৗড় কেদা বৗই বৗইতে। সিতিঞ দ আডি আডি হাহাড়া কাতেঃ লুতি সেচ এ কয়ঃ রাকাপ কেদা। রাঃ রাঃতে লুতিয় হৗড়ুপ কেদেয়া। আডি দুলৗড় আতে সিতিঞে মেনকেদা -ইঞরেন বিটিতিঞ, ইঞরেন সোনাতিঞ...! লুতিওয়াঃ বার মেৎরে হঁ  মেৎদাঃ সারসাও এনা।