সিঁগি মাহা রেনাঃ সাকাম ‘চেরেচ্ আড়াং’ লেখা- ৪০

“আবোওয়াঃ কাথা” ওয়েব পেজ রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড়গে উছৗনঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com   ।

aaaaaaaতেহেঞা আখড়ারে যাঁহায় কো সেলেদ্‌ আকান- রিলৗমালা মুরমু, ᱥᱩᱵᱩᱫᱤᱭᱟ. ᱢᱩᱨᱢᱩ,  ᱜᱳᱯᱮᱥᱣᱚᱨ ᱢᱟ.ᱱᱰᱤ, ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ, ᱥᱨᱤᱠᱟᱱᱛᱚ ᱥᱚᱨᱮᱱ, বাড়তাঙ সরেন, কিস্কিন্ধ্যা  মুরমু , সেঁগেল মারমার, দুগাই টুডু, সনাতন টুডু, রামলাল টুডু, সুচাঁদ হাঁসদা, সাকম সরেন, তপন হেম্ব্রম, বিভূতি ভূষন সরেন, দুলৗড় বিটি ।

  

রিলৗমালা মুরুমু, ক্লাস- IV
জেলা - পুরুলিয়া

১।।

ᱠᱩᱴᱤᱥ ᱵᱟᱦᱟ

ᱥᱩᱵᱩᱫᱤᱭᱟᱹ ᱢᱩᱨᱢᱩ

        (᱑)

ᱠᱩᱴᱤᱥ ᱵᱟᱦᱟ

ᱠᱮᱱᱮ ᱠᱚᱛᱮ

ᱦᱤᱞᱟᱹᱜ ᱟᱠᱚ

ᱡᱟᱸᱦᱟ ᱞᱮᱠᱟ ᱾

       (᱒)

ᱚᱵᱚᱨ ᱦᱟᱹᱯᱤ

ᱡᱟᱸᱫᱮ ᱛᱟᱸᱫᱮ

ᱢᱮᱱᱟᱜ ᱠᱚᱣᱟ

ᱥᱮᱫᱟᱭ ᱞᱮᱠᱟ ᱿

       (᱓)
ᱠᱤᱛᱟᱹᱨ ᱠᱟᱵᱟᱨ ᱨᱚᱝ
ᱢᱚᱡᱜᱮ ᱧᱮᱞ ᱡᱚᱝ
ᱚᱠᱚᱭ ᱵᱟᱠᱚ ᱤᱫᱤ
ᱮᱠᱮᱱ ᱵᱟᱦᱟ ᱜᱤᱰᱤ ᱾

         (᱔)

ᱧᱮᱞᱚᱜ ᱟᱰᱤ ᱪᱚᱸᱦᱚᱠ

ᱵᱟᱹᱱᱩᱜ ᱵᱟᱦᱟ ᱢᱚᱸᱦᱚᱠ

ᱛᱤᱱᱟᱜ ᱪᱚᱨᱚᱠ ᱞᱚᱫᱚᱵᱽ

ᱫᱷᱤᱨᱤ ᱰᱩᱸᱝᱨᱤ ᱫᱟᱞᱚᱵᱽ ᱿

᱿᱿᱿====== ᱛ ======᱿᱿᱿

 ২।।

ᱡᱚᱛᱚᱱ

ᱜᱳᱯᱮᱥᱣᱚᱨ ᱢᱟ.ᱱᱰᱤ

 

ᱫᱟᱨᱮ ᱱᱟ.ᱲᱤ ᱡᱚᱛᱚᱱ ᱢᱮ
ᱡᱚ,ᱵᱮᱞᱮ ᱦᱟᱢᱮᱴ ᱢᱮ ᱾

 

ᱵᱤᱨ ᱵᱩᱨᱩ ᱡᱚᱛᱚᱱ ᱢᱮ
ᱥᱟᱦᱟᱱ ᱯᱟᱞᱦᱟ ᱦᱟᱢᱮᱴ ᱢᱮ ᱾
 

ᱡᱟᱦᱮᱨ ᱛᱷᱟᱱ ᱡᱚᱛᱚᱱ ᱢᱮ
ᱦᱟ.ᱲᱭᱟ.ᱨ ᱫᱷᱟ.ᱨᱛᱤ ᱦᱟᱢᱮᱴ ᱢᱮ ᱾

 

ᱦᱩᱲᱩ ᱪᱟᱥ ᱡᱚᱛᱚᱱ ᱢᱮ
ᱦᱩᱲᱩ ᱪᱟᱣᱞᱮ ᱦᱟᱢᱮᱴ ᱢᱮ ᱾

 

ᱥᱮᱨᱢᱟ ᱫᱟᱜ ᱡᱚᱛᱚᱱ ᱢᱮ
ᱦᱟᱯᱮᱱ ᱪᱟᱥ ᱦᱟᱢᱮᱴ ᱢᱮ ᱾

 

ᱫᱷᱚᱱ ᱫᱚᱣᱞᱳᱛ ᱡᱚᱛᱚᱱ ᱢᱮ
ᱦᱟᱯᱮᱱ ᱡᱚᱢᱟᱜ ᱦᱟᱢᱮᱴ ᱢᱮ ᱾

 

ᱚᱲᱟᱜ ᱫᱩᱣᱟ.ᱨ ᱡᱚᱛᱚᱱ ᱢᱮ
ᱥᱩᱞᱩᱠ ᱱᱤᱨᱟ.ᱭ ᱦᱟᱢᱮᱴ ᱢᱮ ᱾

 

᱿᱿᱿====== ᱛ ======᱿᱿᱿

৩।।

ᱴᱩᱭᱮᱝᱠᱮᱞ ᱴᱩᱭᱮᱝᱠᱮᱞ

ᱞᱤᱴᱤᱞ ᱥᱴᱟᱨ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

 

ᱴᱩᱭᱮᱝᱠᱮᱞ ᱴᱩᱭᱮᱝᱠᱮᱞ
ᱞᱤᱴᱤᱞ ᱥᱴᱟᱨ
ᱤᱱ ᱫᱟ ᱥᱠᱟᱭ ᱨᱮ ᱾
ᱫᱮᱞᱟ ᱵᱤᱴᱤᱢ ᱧᱮᱞᱮ ᱠᱷᱟᱱ
ᱵᱤᱞᱤᱫ ᱵᱟᱞᱟᱝ ᱮ
 ᱡᱩᱞᱩᱜ ᱠᱟᱱ ᱨᱮ ᱾

 

ᱥᱤᱧ ᱵᱮᱲᱟᱠᱚ ᱛᱟᱸᱦᱮᱱ ᱫᱟᱱᱟᱝ
ᱧᱤᱫᱟᱹ ᱵᱮᱲᱟᱠᱚ ᱧᱮᱞᱚᱜ ᱾
ᱟᱞᱚᱢ ᱡᱟᱹᱯᱤᱫ ᱮ ᱵᱤᱴᱤ
ᱫᱮ ᱵᱮᱨᱮᱫ ᱢᱮ ᱾
ᱴᱩᱭᱮᱝᱠᱮᱞ ᱴᱩᱭᱮᱝᱠᱮᱞ
ᱞᱤᱴᱤᱞ ᱥᱴᱟᱨᱮ
ᱨᱟᱠᱟᱵ ᱟᱠᱟᱱ ᱨᱮ ᱾

 

ᱴᱩᱭᱮᱝᱠᱮᱞ ᱴᱩᱭᱮᱝᱠᱮᱞ
ᱞᱤᱴᱤᱞ ᱥᱴᱟᱨ
ᱤᱱ ᱫᱟ ᱥᱠᱟᱭ ᱨᱮ ᱾
ᱫᱮᱞᱟ ᱵᱤᱴᱤᱢ ᱧᱮᱞᱮ ᱠᱷᱟᱱ
ᱵᱤᱞᱤᱫ ᱵᱟᱞᱟᱝ ᱮ
ᱡᱩᱞᱩᱜ ᱠᱟᱱ ᱨᱮ ᱾

 

᱿᱿᱿====== ᱛ ======᱿᱿᱿

 ৪।।

ᱥᱟᱱᱛᱟᱲᱤ ᱪᱤᱠᱤ ᱟᱲᱟᱝ(᱙)

ᱥᱨᱤᱠᱟᱱᱛᱚ ᱥᱚᱨᱮᱱ

ᱱᱤᱛᱳᱜ ᱫᱚ ᱟᱥᱟᱲ ᱵᱚᱸᱜᱟ᱾ ᱥᱮᱨᱢᱟ ᱨᱮ ᱥᱟᱨᱟᱜᱷᱟ.ᱲᱤ ᱨᱤᱢᱤᱞ ᱡᱟᱶᱨᱟ ᱠᱚᱜᱻᱟ᱾ ᱦᱚᱭ ᱟᱛᱮ ᱫᱟᱜ ᱦᱤᱡᱩᱜ ᱟ᱾ ᱚᱠᱛᱚ -ᱚᱠᱛᱚ ᱥᱮᱸᱜᱮᱞ ᱫᱟᱜ ᱦᱚ ᱧᱩᱨᱩᱜᱻᱟ᱾ ᱥᱤᱧ ᱪᱟᱸᱫᱳ ᱫᱤᱱᱟ.ᱢ ᱵᱟᱭ ᱧᱮᱞᱚᱜ ᱻᱟ᱾ ᱥᱮᱨᱢᱟ ᱫᱟᱜ ᱛᱮ ᱱᱤᱭᱟ. ᱚᱠᱛᱚ ᱦᱟᱥᱟ ᱞᱟ.ᱵᱤᱫᱚᱜᱻᱟ᱾ ᱜᱷᱟᱥ ᱠᱚ ᱫᱟᱜ ᱧᱟᱢ ᱠᱟᱛᱮ ᱵᱟᱧᱪᱟᱶ ᱨᱩᱭᱟ.ᱲᱚᱜᱻᱟ᱾ ᱧᱩᱨᱦᱟ ᱟᱠᱟᱱ ᱫᱟᱨᱮ ᱡᱟᱝ ᱠᱚ ᱦᱚ, ᱚᱢᱚᱱᱚᱜ ᱻᱟ᱾

ᱱᱟᱣᱟ ᱫᱟᱜ ᱧᱟᱢ ᱠᱟᱛᱮ,  ᱨᱚᱠᱚᱪ ,ᱜᱚᱝᱜᱦᱟ ᱨᱚᱴᱮ , ᱠᱟᱴᱠᱚᱢ ᱟᱜ ᱟ.ᱰᱤ ᱨᱟ.ᱥᱠᱟ᱾  ᱨᱟ.ᱥᱠᱟ.ᱛᱮ ᱛᱷᱤᱨ ᱵᱟᱝ ᱠᱚ ᱛᱟᱸᱦᱮ ᱫᱟᱲᱮᱭᱟᱜ ᱻᱟ᱾ ᱜᱚᱴᱟ ᱫᱟᱲᱟᱱ ᱵᱩᱡᱷᱟ.ᱶ ᱠᱚᱭᱟ᱾ ᱦᱟᱠᱳ ᱫᱚ ᱨᱟ.ᱥᱠᱟ. ᱛᱮᱠᱚ ᱫᱚᱱ ᱵᱟᱲᱟᱭᱟ᱾ ᱯᱩᱠᱷᱨᱤ ᱨᱮ ᱛᱟᱸᱦᱮ ᱵᱟᱝ ᱵᱩᱡᱷᱟ.ᱶ ᱠᱚᱭᱟ᱾ ᱱᱤᱭᱟ. ᱚᱠᱛᱚ ᱩᱯᱤ ᱫᱚ  ᱤᱞ ᱚᱢᱚᱱ ᱟᱠᱚᱣᱟ᱾ ᱵᱩᱱᱩᱢ ᱠᱷᱚᱱ ᱩᱰᱟ.ᱶ ᱠᱟᱛᱮ ᱠᱚ ᱳᱰᱳᱠᱚᱜ ᱻᱟ᱾ ᱟᱥᱟᱲ ᱵᱚᱸᱜᱟ ᱫᱚ ᱪᱮᱲᱮ ᱠᱚᱭᱟᱜ ᱟ.ᱰᱤ ᱟᱱᱟᱴ᱾ ᱦᱚᱭᱛᱮ ᱛᱩᱠᱟ. ᱨᱟ.ᱯᱩᱫᱚᱜ ᱛᱟᱠᱚ-ᱟ᱾ ᱵᱮᱞᱮ ᱠᱚ ᱦᱚ ᱧᱩᱨᱦᱟ. ᱠᱟᱛᱮ ᱨᱟ.ᱯᱩᱫᱚᱜᱻᱟ᱾ ᱪᱮᱲᱮ ᱦᱚᱯᱚᱱ ᱠᱚ ᱟ.ᱰᱤ ᱦᱟᱞᱮ-ᱰᱟᱞᱮ᱾

(ᱛᱳᱜᱮ ᱻᱟ...)

᱿᱿᱿====== ᱛ ======᱿᱿᱿

 ৫।।  

গৗডি গিড় গিড়

বাড়তাঙ সরেন

 

রেল গৗডি লাইন চেতান
                    সড়ক চেতান বাস 
 চট সেরমা উডৗন গৗডি
                    পাঁজায় চাঁদো রাস।

 

দাঃ জাহাজ দাঃ তালারে
              সাঁই মারতে লাহাঃ
মোটর গৗডি ফটর ফট
                হুস মারতে  চালাঃ।

 

সাগাড় গৗডি তাঁহেকান
                       আতো অড়াঃরে
গিড়গিড়ৗওতে লাহাঃ আ
                         সানাম টঠারে।

 

কোলকাতা 'টেরাম' গৗডি
                  চালাঃ টিড়িং টিং
সাইকেল হঁ সুনুম বেগর
                  রেস তেয়ে টিড়িং।

 

সাদম গৗডি তিনৗঃ মজ
              দৗড় কাটাপ কাটাপ
ঞেঁঞেল লৗগিৎ রৗস্কৗতে
               হড়কো ঞির রাকাপ !

 

ডুবৗ জাহাজ দাঃ লাতার
                    দাঃ বোয়াড় লেকা
ডুবজ ডুবুজ লাহাঃকান
              বুজ আবোন চেকা ?

 

গাঙ্গা গাডা ইষ্টিমার
         লৗওকৗ ডম্বল মজ
দিশম হড়কো দাঁড়াঁনা
           হাতাও আকো খজ।

᱿᱿᱿====== ᱛ ======᱿᱿᱿

৬।।

উল হালাং

কিস্কিন্ধ্যা  মুরমু 

  

  এ বৗবু হপন বৗবু 
          চেৎ এম চিকৗয় ?
 হারেফারে কাবা কুবু !

 

হয় তায়ম দারে লাতার 
        ঞুরু যাতার কাতার 
হালাং জং বাতার   ।

 

উল কুইডি বাগওয়ানরে 
           দাঃ অৗসুড়ে উনরে 
হৗনি তরাম ঞিরৗৎরে  ।

 

হানা নওয়া দারে বুটা 
           হৗর হালাং গটা 
 সানাম  কৗটিচ মটা  ।

 

এসকারেম হেচ্ আকান 
          গগ হহ আম কান 
ঞুহুম হিজুঃ কান।

᱿᱿᱿====== ᱛ ======᱿᱿᱿

 ৭।।

বাবোন খেল্ আ

সেঁগেলমারমার

 

হুলুয় হুলুয় হয়
দেলাঙ অড়াগ্ ভৗই
গডারেদ বাবোন খেল্ আ
চল বাবু মৗই।

 

আয়োবাবা এগের আকো
দমেকো দাদাল আ
নংকান অক্ত বাহরেরে
বাবোন তাঁহেনা।

 

দাগ্ জৗড়িতে লহদ্ রেদ
রুওয়ৗ হৗসু আ
দরোসরোগ্ মু ঠুনিঃ
জহা ফুলৗঃ আ।

 

হাড়হাদ্ রান ইঞ্জেকশন
দমেঞ বতরগ্
বাবুমৗইক বাবোন খেল আ
দেলাবোন সতরঃ।

 

অড়াগ্ রেগে কৗহনী কুদুম
দেবন থুতিয়ৗ 
ছবি আঁকাও সেরেঞ দুরৗঙ
দেবন গুতিয়ৗ।

᱿᱿᱿====== ᱛ ======᱿᱿᱿

 ৮।।

সিক্‌ড়িচ্‌

দুগাই টুডু

 

 লেসকে বেকের বডে সেয়া
         দাঃগে কুসিঃ সিক্‌ড়িচ্‌,
সাতে লাতার টোমবা দাঃরে
         তাঁহেন ডেরা উরিচ্‌।

 

ঞিদৗ ঞুত্‌গে উনকো আদ
        আমদা গেকো দারায়,
উডৗও কাতেদ্‌ রেঁড়ে রেঁড়ে
         ফৗক্‌ড়া সাডে বাডায়।

 

পাডগা গেরতে হাসো সালাঃ
        সুড়কো আদের তাকো,
রগ্‌গে আজার গেদ হানে
        গেমের আগুয় আকো।

 

হড়কো অনে সাড়াপ্‌ গারতে
       জোরতে থায়ো দালকো,
অকা অকতে বাঞ্চাও গদঃ
      কানগে বলে দলকো।

 

রেঁগেচ্‌ জালা অকা জখান
      সহর সেটেরঃ সাঁগে
আচুর বিহুর অড়াঃ তালা
      আরহঁ আয়মা তোঁগে।

 

মৗনমি মায়াং অরকো রেদ
        তাক্‌গে পাঁজা আনকো,
নেনকা তেগে জিউয়ি গেদ
       বিতৗও বাড়া কানকো।

᱿᱿᱿====== ᱛ ======᱿᱿᱿

 ৯।।

গিদ্‌রৗ মনে

সনাতন টুডু

 

হানকু তারা রিমিল চেতান
চেঁড়ে ককো উডৗও,
অকারে তাকো অড়াঃ মাসে
দিন গেকো উডৗও।

 

আলে দলে খিলডু এনেচ্‌
জবা-রানি-মালি,
কেনে কতে রড় লানদা
বৗড়িজ মনে খালিঃ

 

আঁজম পেসে চেঁড়ে আপে
রপড় আসে বাং ,
এনেচ্‌ সেরেঞ বালে আঁজম
চেদ্‌পে চিকৗয় কান।

 

হিজুঃ পেসে আলে আতো
মিৎ দিন গান দাঁড়ান,
বুঝৗও আপে রিমিল খনা
অত্‌গে সরেশ আন।

᱿᱿᱿====== ᱛ ======᱿᱿᱿

  ১০।।

অৗঁজির বেলে

রামলাল টুডু

 

দেজঃ কানাম অৗঁজির দারে
কয়ঃ  এদাম  লাফাং  করে ।
বেলে আকান আয়মা হানে
তিয়োঃ লৗগিদ্ মাৎ ডাং নে ।
দেজঃ তুলুচ্  সন্তর  কাটা
ঞুরঃ যুদিম রৗপুদঃ ডাটা ।
কয়ঃ আকাদ্  হানক  মিরু
ঠন্টা তাকদ ঞেলতে গিরু ।
বাম তিয়োগ্ লাফাং রেয়াঃ
জম  হচক  বারয়া  পেয়া ।
অৗডি সেবেল বুলুং আতে
গেদ্ হৗটিঞ সাঁওতে গাতে ।
ফেডঃ তুলুচ আলম চাঁড়ঃ
বাং রেদম বুজুর সাড়ঃ ।।

᱿᱿᱿====== ᱛ ======᱿᱿᱿

 

১১।।

যস

সুচাঁদ  হাঁসদা

 

হয়  ভারদু  হয়  ভারদু ,
আমাঃগে ঞুঁতুম  যস ৷
পে -পে দিনেম দহ কেত্‌লে ,
আমাঃ অধিনরে বস ৷

 

আম কুসিম নাহাচর কেদা ,
আম দ আলে চেতান ৷
বিন জম তেলে তাঁহেয়েনা ,
আলে দ বৗসকৗঃ ,মাঁজান ৷

 

অড়াঃ দুওয়ৗরেম রৗপুত কেদা ,
রৗপুত কেত্‌ দারে , নৗড়ি ৷
আমাঃ হিঁসৗ সুয়ৗ তেগে ,
ঝমর দাঃ এ  জৗড়ি ৷

 

আতুয়েন কো মিঁহু মেরম ,
ডুবুজ এন তালে অড়াঃ ৷
আম সাঁও দ ইঞৗঃ আড়ি ,
তিসহঁ বাং ইঞ রড়া ৷

᱿᱿᱿====== ᱛ ======᱿᱿᱿

 ১২।।

গিদরৗ বৗউলি

সাকম সরেন 

এ কাকড়া কাকড়া 
খৗলি মিৎ আখড়া 
গগাম রেগড়া? 
দেলা তবে আখড়া। 

 

রেঁরেঁ রেঁরেঁঞ --
মা লৗইমে সেরেঞ
খাট দ বাং জেলেঞ 
আলম এড়েঞ। 

 

রেঁরেঁঞে রাহায় মঁজ্ গে 
আতে আঁজমঃ রৗস্কৗগে
জড়েন রু -রাহাতে --
পিপিড়জাং এ হিলৗঃ কদঃআতে। 

 

᱿᱿᱿====== ᱛ ======᱿᱿᱿

  ১৩।।

চেঁড়ে হপন

তপন হেম্ব্রম (গসবাহা)

 

দারে চেতান ডৗর লাফাং
আপে অড়াঃ দুয়ৗর -
হুডুর বিজলি দাঃ জৗপুদ রে
চিকৗ তেপে তাঁহেন ?

 

চেহর বেহর আপেক জত
তুকৗ পেরেচ সুলুক সৗগৗই ,
লেওয়ের কদর হয়তে লাড়াঃ
বতর বাংপে আইকৗও ?

 

ফৗকড়ৗঃ পেরেচ ডৗডু ইল
অমন লেনরে ইতুপে ,
ফেটে ফেটে তুকৗ বাহের 
উডৗও চিকৗ তেপে সেড়ায় ? 

 
আয়ুর সোতোঃ আয়ু বাবা 
মিৎ ডৗর খন আর মিৎ ডৗর তে, 
ফুড়ুৎ ফুড়ুৎ উডৗও সেঁড়া কাতে 
দিশম গোটা পে সাঁঘার ? 

 

আপনারাঃ ফৗকড়ৗঃ আপড়ে লেকা 
উডৗও আচুরঃ আপে মনকুসি, 
মানা বাচক বাঁধন ছাডা 
আডি সরেশ আপে জৗতি ।।

᱿᱿᱿====== ᱛ ======᱿᱿᱿

 ১৪।। 

রায়বার হাড়াম

বিভূতি ভূষণ সরেন 

 
শশডি আতু    রায়বার হাড়াম
          রায়বার গেতায় কৗমি, 
মান-বারহাঃ       তুং-ছয়ানী 
          আডি গেতয় দৗমি। 

 

বার্ মনে       বার্ জিউয়ি 
         অচ য়ায় জড়াও, 
যতখন বাং      মিদঃ কান 
        তাহে নায় ধুরৗও। 

 

টেঁগচ্ তিনৗঃ      ধিরিরে ঘাসাও 
        লাসেরঃ উনৗঃ গে, 
রায়বার হাড়াম      সিবিল রড়তে 
       তাহেন ছুটৗও রে। 

 

বার্ অড়াঃ      হেচ্-সেনতে 
       চৗটকি খিয়ৗও তায়া, 
বাং ডাহারাঃ    ডাহার অচয় 
      উনদ সৗগুনঃ গেয়া।। 

᱿᱿᱿====== ᱛ ======᱿᱿᱿

 ১৫।।

নাওয়া দিশৗ  

দুলৗড় বিটি

 

আলে গিদ্‌রৗ দিনলে হারাঃ
         আদ বাংলে বালেঃ
হারা বুরু কাতেৎ আলে
       লেওয়ের কদরঃ আলে।

 

দিনৗম দিনৗম কুক্‌মু য়ালে
       নাওয়া নাওয়া দিশৗ,
হাপেন দিনরে মারাং লেনরে
       বাংলে ঞুয়ৗ নিশৗ।

 

তবে য়ৗনিচ্‌ হড় লেকা
       হড়কো মেতাম হাপেন,
যাঁহাম খজা অনাম জমা
দিনগে তোওয়া তাবেন।

 

     **********

*********মুচৗৎ **********

    ***********