(হুডিঞ কৗহ্‌নি)

কারধৗনি 

বাড়তাঙ সরেন

সেতাঃ পায়াং পিয়ৗংরে গাবলাঘুটু আতোরেন ঢিবৗ পারানিক দ মাঝি ছাটকাতেয় বলয়েনা। বাদাড় মাঝি দ এনেগে বেরেৎ কাতে লাহা হিলঃ রেনাঃ গেৎ দহ ছৗনি ডাংরা কাডায় এমাকো কান তাঁহেনা। মাঝি বুঢি এনেগে  আটাঃ উটুঃ বেরেৎ কাতেঃ গুরিচ দাঃ এ লেওহায়েৎ কান তাঁহেনা রাচারে ছিটকৗও লৗগিৎ। মাঝি বুঢি দ কোঠা অড়াঃ পিণ্ডৗরে  মৗচি বিল কাতেঃ ঢিবৗ পারানিক দুড়ুপ এ মেতাঃদেয়া। বাদাড় মাঝি দ ছৗনি এম বাড়াকাতেঃ তি আরুপ সাপাকাতেঃ পারানিক সামাংরেয় দুড়ুপ এনা। চুন থামাকুর ঘাসাও ঘাসাওতে কাথায় এহপ কেদা বাদাড় মাঝি,

-- চেৎ খবর ঢিবৗ  বকঞ, সেতাঃ পায়াররে ? হান্তে নাতে কয়ঃকাতে পারানিক দ লৗলৗই এ এহপ কেদা,

-- আডি ভাবনা রেনাঃ কাথা দাদা, হলা গোটা ঞিদৗ বাংলে জৗপিৎ দাড়েয়াকাদা , আয়ুপ তরা খন বাড়গে লাতার রে চেলে চকো কারাচঃ কানা, বতরতে রাচাতে, টৗন্ডিতে হঁ বালে ওন্ডোং দাড়েয়াকাদা। আতোগে পাশেচ গুলমাল আকান !

 গুরিচ বৗলটি দহ কাতেঃ সুর ঞঃকাতেঃ মাঝি বুঢি হঁয় মেন গৎ কেদা,

-- এ টুইলৗ আপাত  ইঞ হঁত অনকা গেঞ আঁজম লেৎ ,ইঞ দঞ হুদিশ কেদা পাশেচ, সেতাকো কারাচঃ কানা। 

উশরৗতে ঢিবৗয় রড় রুয়ৗড় কেদা,

-- বাং হিলি, অনা দ সেতা কারাচ দ বাং কানা, আডি জুদৗ আর বতরগে আঁজমঃ কানা। বাদাড় মাঝি দয় মেন কেদা,

--অকর ইঞ ত চেৎ হঁ বাঞ আঁজম আকাদা। উশৗরাতে বুঢিতেৎ এ রড় রুওয়ৗড় কেদা,

--আম দ হাণ্ডি ঞুঁ বুল কাতেঃ আয়ুপ তরাম জৗপিদা, চেকাম আঁজমা,  ভূত সে বঙ্গায় উপৗলঃ কানা ! 

উন অক্তেগে জব গোডেৎ এ বলয়েনা। উনি হঁ অনা কাথাগে লৗলৗই হেচ তেদ ঞিদৗ কারাচ আঁজমতে রুওয়ৗ    ঞাম উতৗর আকাদেয়া । পে পে হ আকানা। এরাৎ ড়াঃ কাথা আঁজম কাতেঃ মাঝি দয় বুঝ কেদা, আতো দ সৗরিগে আডি 'বৗড়িচ' আকানা। গোডেৎ এ মেন কেদা, 

--আতো দ আডিগে বৗড়িচ আকানা, বৗইসী হহ কাতেঃ উশৗরাতে  'কৗমি জুত ' হুয়ুঃআ। পারানিক হঁ অনা কাথারেয় হেঁ সৗরিয়াদা।

এন হিলৗঃগে বৗইসী হহ হুয় এনা। আতোরেন আয়মা হড়গে ঞিদৗ অনা রাঃ কারাচ্ কো আঁজম আকাদা। মিৎ বার হড় দ নংকা হঁকো মেন কেদা,বাংমা আয়ুপ তরা বাড়গে লাতার লাতার চেৎচ জুলুঃ লেকাকো ঞেল আকাদা।

সানাম কাথা আঁজম কাতেঃ গোটায়েনা, দশার হিলোঃগে জজগুঠুরেন 'জাটা জানগুরু' আগু কাতেঃ আতোকো 'কৗমি জুত' ওচোয়া।

    দশার হিলোঃগে পে পে গটেচ চেলা আতে জাটা জানগুরুদয় সেটের এনা আডি মারাং 'তিরশুল ' আতে।  বারয়া চেলা দ আডে টলারেন কানাকিন। সানাম কাথা আঁজম কাতেঃ জাটা জানগুরু দ জেলেঞ  মাছা সাঁহেৎ কাতেয় মেন কেদা,

--হুঁ, সৗরিগে, আতো দ  আডিগে  'বৗড়িচ ' আকানা, আডি মারাং বিপদ সেটের আকানা, তেহেঞগে 'কৗমি' সাফা হুয়ুঃ আ। কৗমি  জুত লৗগিৎ জানগুরু দ সুনুম, সিঁদুর, আরাঃ গেঁদা, হাটাঃ, আরশি, নৗকিচ,তিরশুল  আর পে পে গটেচ আরাঃ সিম সাণ্ডি আতোহড় উশৗরাতে আগুয় মেতাঃ কওয়া। আর নওয়া হঁয় মেতাঃকওয়া, কৗমি জুত লৗগিৎ ২৫ হাজার টাকা লাগাঃআ। জানগুরুওয়াঃ কাথা লেকাতে আতোহড় দ সানামকো জোগাড় আগুকেদা। জানগুরু দ আডি উশৗরাতে আতোহড় আতে আতো বারহেরে মিৎ গাজাড় তালারে ধুপ ধুনৗ আতেয় বঙ্গা বুরু কেদা। জানগুরু দ বঙ্গা বুরু বাড়া কাতেঃ পে পে গটেচ সিম সাণ্ডি আর ২৫ হাজার টাকা মটরা কাতে আডি রৗস্কৗ আতেয় রুওয়ৗড় চালাও এনা। চালাঃ লাহারে আতো হড়ে মেতাঃ কওয়া, পে ঞিদৗ আতোরেন  অকয়গে অড়াঃখন আলোকো ওডকঃ মা বাড়ে। 

     জাটা জানগুরু দ শুঁডি গোদামরে সিম সাণ্ডি চাখনা সাঁও হাণ্ডি ঞুঁ ঞুঁতে আচরেন চেলায় মেতাঃকিনা,

--এয়া, লাডে আর খাডে আসল কাথা দবেন বুঝ লেদা সে বাং ? নঃঅয় আঁঘাড় বঙ্গা চাবাঃকানা, বৗইহৗড় রেনাঃ হুড়ু হঁকো ইর চাবায়েদা। সানাম গাজাড় সাফাঃকানা, রেয়াড় হঁ পাড়াঃ কানা। অনাতে গাজাড়রেন তুয়ু কোদ সিম গেডে জম  লৗগিৎ আতো তেকো হিজুঃ কানা। আর ওনকোওয়াঃ কারাচ্ আঁজমতে আতোহড় দ বতর তেকো লুয়ুৎ লুয়ুতঃ কানা। আঁজমবেন,  আবেন আয়ুপ অক্তে  গাবলাঘুটু বাড়গে লাতার অনা গাজাড় সেচরে ঠেঙ্গা আতে বার দিন বেন তাঁহেনা। আতো সেচ মিৎটেন হঁ তুয়ু আলোবেন বলো ওচো আকোওয়া। বারদিন গান লাগা লেকোখানগে আর বাংকো বলনা।

    লাডে আর খাডে দ গুরুওয়াঃ কাথা লেকাতেকিন কৗমি কেদা। আতো সেচ মিৎ টাং হঁ তুয়ু বাংকিন বলো ওচোয়াঃ কওয়া আয়ুপ অক্তে। দশার হিলোঃ গাবলাগুঠু আতোহড় দ জাটা জানগুরুওয়াঃ কৗমি কারধৗনি ঞেলতে কো হাহাড়া উতৗরেনা। ঞিদৗ অক্তে আর চেৎ রাঃ কারাচ্ হঁ বাং আঁজম লেনা। জাটা জানগুরুওয়াঃ ঞুতুম দ আর হঁ আডি উশৗ রাতে গোটা তল্লাট পাশনাও এনা।