বীরবান্টা তিলকৗ মুরমু দিসৗতে
মহাদেব হাঁসদা
ভারত রেয়াঃ ফুরগৗল লৗড়হৗই রেন পৗহিল উতৗর হুল গৗরিয়ৗ দ কানায় তিলকৗ মুরমু। ১৭৫০ সাল রেয়াঃ ১১ ফেব্রুয়ারী ভাগলপুর জেলা রেয়াঃ সুলতানগঞ্জ থানারে মেনাঃ তিলকপুর আতোরে জানাম দ হোয় লেন তায়া। আচ্ বাবা আঃ ঞুতুম সুঁদরৗ মুরমু আর আচ্ আয়ো আঃ দ পানো মুরমু। তিলকৗ তেকো দ পোন বয়হা কো তাঁহেকানা মেনতে বাডায়ঃ আ। হারা কাতে উনিদ আতোরেন মাঝি আর আমদপুর বৗইসি এন পারগানা হঁয় হোয়লেন তাঁহেনা।
নাগাম খনাঃ বাডায়ঃআ, ১৭৭১ সালরে দ মারাং আকাল হোয় লেনা; যাঁহা দ বাংলাতে ‘ছিয়াত্তোরের মনন্তর’ কো মেতাঃ আ। হাজার হাজার হড় নওয়া মারাং আকাল রেকো গচ্ লেনা। মেনখান এনতে রেহঁ অত-হাসা রেয়াঃ খাজনা আদায় দ বাং থুকুম লেনা। বিচকম খাজনা বাং এম দাড়েয়াঃ খান দাল-তল-থৗইয়ৗ এমান নাহাচার আর কচলন দ জাওগে হোয়োঃ কান তাঁহেকানা।
বিহার ডিস্ট্রিক্ট গেজেটিয়ার্স খন বাডায়ঃআ, যাঁহায় নওয়া কয় রড়-দারাম লেখান উনি দ তি-জাঁগা তল কাতে, অনা জখান দ দারে ডৗররে ঝিলো কাতে কো দালেৎ কো তাঁহেনা। অনা বেগর, কোমড়ো, লুঠপাট এমান কৗমিরে জপড়াও লেনখান আডি কাজাক সাসেৎ কো এমাকো কান তাঁহেনা। Statistical Account of Bengal রে অল মেনাঃ আ- গৗই-কাডা কোমড়ো ঞুম কাতে গেল হড় কো পৗসিলেৎ কো তাঁহেনা।
নংকান অক্তে ভাগলপুররেন ডেপুটি কালেক্টর দয় তাঁহেকানা- অগাস্টাস ক্লীবল্যান্ড। মারাং সেচ্ উনি দ সানতাল আর পাহাড়িয়া কো সাঁও আডি মঁজ বেওহার এ এহপ্ কেদা। সেরমারে সর্দারকো দ গেল টাকা, নায়েব কোদ মড়ে টাকা আর মাঝি কোদ বার টাকা মৗন এমা কয় এহপ্ কেদা। অনা সাঁওতে মিৎটেন কাতে আঁগরপ্,বারয়া জাংগিয়ৗ আর মিৎ টেন গামছা এম কাতেয় বশ লেৎ কওয়া। কুশি কাতে ওনকো দ ‘চিলিমিলি’ সাহেব কো বাহনা লেদেয়া।
মেনখান দিন দিনতে সানতাল কো সাঁও সৗগৗই বৗড়িচ্ ইদিয়েনা। তিলকৗ মুরমু নওয়া কো হেতেল-গেজেল খন বাঞ্চাও কো লৗগিৎ মিৎটেন ‘ফৗদ’ এ তেয়ার কেদা। জমিদার আর সাহেব কোওয়াঃ কুঠি লুঠ কাতে রেঁগেচ্ হড় হৗটিঞ আকোয় এহপ্ এনা নংকা কাতে সাহেব কোওয়াঃ মারগোদ কুঠি, তিলাইয়া কুঠি,কহল গাঁও কুঠি এমান লুঠপাট কেদা; চাঁদোয়া জমিদারাঃ কো লুঠ কেদা। খান সরকারি খাতারে নোকো দ ‘ডাকাত’ মেনতে কো ছৗটয়ৗর এনা। তাক দ ১৭৮৪ সাল রেয়াঃ১০ জানুয়ারী তিলকৗ মুরমু আঃ সারতে ক্লীবল্যান্ড সাহেব দয় তুঞ গচ্ অচোয়েনা।
অনা তায়ম হুলগৗরিয়ৗ কোদ রাজমহল সাহেবগঞ্জ আর সুলতানগঞ্জ সেচ্ তিলকৗ রেন ফৗদ কো হৗটিঞ এনা। তিলকৗ মুরমু দ ইংরেজ ফৗদ ঠেন এ সাপ্ অচোয়েনা। উনি দ দাল-তল কাতে ভাগলপুর কো ইদি কেদেয়া। সাদম চুপিরে তল কাতে অঁডেনাঃ সেংডিস কম্পাউন্ডরে বেড়হায়তে কো গহড় আচুর কেদেয়া। এনতে রেহঁ বায় গচ্ লেন খান মিৎ বাড়ে দারে রেকো ফাঁসি কেদেয়া। অনা দিন দ তাঁহেকানা ১৭৮৫ সাল রেয়াঃ ১৩ জানুয়ারী। নংকা কাতে তিলকৗ মুরমু আঃ লৗড়হৗই দ চাবায়েনা।
বাডায় আকানা, নওয়া লৗড়হৗই হতেতে তিলকৗ রেন পে বয়হা আর আচ্ বৗহু বিরুধরে কোর্টরে কেস হোয় লেনা। অনা সাঁওতে ৩৮৮ হড়কো আসামী লেনা। মেনখান ওনকোওয়াঃ দ চেৎ শাসেৎ হোয় এনা বাডায় বৗনুঃআ।
অনা কাতে তেহেঞ আয়মা সেরমা পারম আকানা। আলেখা হড়াঃ জিউয়ি বদলতে ফুরগৗল ঞাম আকানা। ভাগলপুর রেয়াঃ বিশ্ববিদ্যালয় দ তিলকৗ মুরমু বিশ্ববিদ্যালয় ঞুতুমতে ছৗটিয়ৗর আকানা। এনতে রেহঁ তিলকৗ মুরমু আঃ আঁশ আর কুকমু দ নিৎহঁ বাং সৗরি আকানা। হড়াঃ অন্তররে নিৎহঁ গুরলৗউঃ কানা- তিলকৗ মুরমু জিৎকৗর! জিৎকৗর! জিৎকৗর।
.webp)
.webp)
