ভারত দিশম ফুরগৗল কাতে ৭৩ সেরমা পারম এন রেহঁ আদিবাসী কো রডচ্-কচ্লন-হারখেৎ-শাসেৎ খন পারাংগৎ বাংকো ঞাম আকাদা, নংকাগে ভারত জাকাত মাঝি পারগানা মহল পাহ্টা খন দাবী রাকাব এনা। বাডায় আকানা নিৎহঁ হিনৗ-নিয়ৗ উৎনৗও ঞুম কাতে আদিবাসীকো আকোওয়াঃ হাসা-ডিঁড্হৗ খন কো লাগা ডিগ্লৗও অচো কানা। অনাতে ওনকো আদিবাসী কদ নামাল কাছাড়, ধিরি খাদান করে কৗমি কাতেৎ কো আসুলঃ কানা। নঁতে আদিবাসী নেতা মন্ত্রী কোওয়াঃ গৗফলৗতিতে আদিবাসী সমাজ রেনাঃ সেচেৎ, সাঁওয়ার, চৗকরি আর দাঃ, হাসা, বির-বুরু খন কো ছুডৗরঃ কানা। ২০০৩ সালরে সানতাড়ি পৗরসি সংবিধান রেনাঃ অষ্টম তপশীল রে সেলেদ্ লেন রেহঁ অনকালেকা অনা পৗরসিতে অলঃপাড়হাও, যথাৎ পুরিকাঠামো আর লৗগতি নৗপিত মাচেৎ নিৎ ধৗবিচ্ বাংক বাহাল লেনা। পারগানা মহল পাহ্টা খন আরহঁ অভিযোগ রাকাপ্ আকানা বাংমা প্রশাসনিয়ৗ আঃ দুর্নীতি খৗতির নিত অ-আদিবাসী কো ভুয়ো সার্টিফিকেট উডুক কাতে আদিবাসী কোওয়াঃ সরকারী জুড়ু কো রেচ্ হাতাও এৎ তাকোওয়া।
নোওয়াকো রডচ্ কচলন বিরুধ্রে রড়দারাম আর কেটেচ্ খন আরহঁ কেটেচ্ আঁদোড় লৗগিৎ দারায় কান ১৫ ডিসেম্বর, ১৫ গটাং দাবী পুরুন লৗগিৎতে ভারত জকাত মাঝি পারগানা মহল পাহ্টা খন পুরুলিয়া জেলা ডি.এম. গণডেপুটেশন রেনাঃ কৗমিহরা কো হাতাও আকাদা। আর নওয়া গণডেপুটেশন সৗখি সভায় লৗগিৎ জেলারেন সানাম লেকান সংগঠন, সানতাড়ি পৗরসি দরদিয়ৗ, সুসৗরিয়ৗ আর সাঁওতারেন নাপায় হুদিশান হড় কো সহর সেটেরঃ লৗগিৎ আরদাশ কো দহ আকাদা পুরুলিয়া জেলা পারগানা বাবা মানতান রতনলাল হাঁসদা, জেলা গডেৎ মানতান গণপতি কিস্কু আর ভারত জাকাত জুওয়ৗন মহলরেন সভাপতি মানতান রাজেন টুডু।
১৫ গটাং দাবী কো মুদ্রে বাডায় আকানা- ১) সরকার আঃ হুকুম লেকাতে ১০% সানতাড়ি এলাকারে লগনগে সানতাড়ি পৗরসি অলচিকি তালাতে অলঃপাড়হাও চৗলু হোয়োঃমা। ২) জুনিয়র হাই, হাই আর এইচ্.এস. স্কুল করে সানতাড়ি পৗরসি সাতাম লেকাতে লগনতে চৗলু হোয়োঃমা। ৩) Govt. Integrated Model স্কুল সাঁওতে সানাম সানতাড়ি মাধ্যম স্কুল করে সাতাম ভিত্তিক মাচেৎ বাহাল কো হোয়োঃ মা। ৪) ২০০৬ সাল রেনাঃ বুরু আইন কেটেজ্ সাঁহিজ্ লৗগু কাতে বির-বুরু এলাকারে গিরৗবাস আকান আদিবাসী কোওয়াঃ দখল জমি ওনকো ঞুতুমতে পাট্টা এমঃ রেনাঃ কৗমিহরা লেতাড় দহয় হোয়োঃ মা। ৫) সানতাড় কোওয়াঃ ঞুতুমান সুতৗন টাঁডি ল-বির বৗইসি চিন্হৗ-বুটৗ কাতে রাখাদহ আর পাট্টা এম লৗগিৎ নাপায় বন্দেজ করাও হোয়োঃ মা। ৬) সানতাড় সাঁওতারেন মড়ে-মাপাজিকো পুরোহিত ভাতা বাং মেন কাতে মড়ে-মাপাজি ভাতা ঞুতুমতে নাওয়া কারতে সরকারাঃ হুকুম জৗরী করাও হোয়োঃ তায়া। ৭) ভুয়ো সার্টিফিকেট এমঃ কৗডরৗই ভাবতে বন্দ হোয়োঃ মা আর আদিবাসী ভুয়ো সার্টিফিকেট হাতাও আকাৎ কো বিরুধরে ঞেল জং লেকা শাসেৎ এম হোয়োঃ মা।
.webp)
