(হুডিঞ কৗহ্নি)
মিরুয় হমররে
-বাড়তাঙ সরেন
-বাড়তাঙ সরেন
মিরু সেতাঃ তরারে বেরেৎ কাতে রাচা জঃ গেজ গুরিচ তায়ম এনেগে পিন্ডারে পুঁথি আতে পাড়হাঃএ দুড়প আকানা। পাড়হাও আঁজম তরা মিরু আজ্ কাকি গগ দ আটেৎ রে গিতিচ্ কাতেঃগেয় মেন গদকেদা, "হেদানা মিরু, আম দ কৗমি বৗগি কাতেঃ পাড়হাঃ এম দুড়ুপ এনা। আম দ পণ্ডিতেম হুয়ুঃআ সে চেৎ ? অনা থৗরি বৗটি কো দ অকয় মাজাওআ ? চালাঃ মে, বইকো দহকাতেঃ থৗরি বৗটি পুখরীতে ইদিমে। থৗরি বৗটি মাজাও কাতেঃ দাকাম চন্দায়া। আর হেঁ, তেহেঞ খন আর ইস্কুল দ চালাঃ বাং হুয়ুঃ তামা। তেহেঞ উলদা আতোখন আম ঞেঞেলকো হিজুঃ আ"। মিরু দ চেৎ হঁ বাং রড় রুয়ৗড় কাতেঃ পুঁথিকো সামটাও কাতেঃ রাঃ মেৎহা আতে থৗরিবৗটি পুখরীতেয় ইদিকেদা।
মিরু দ আজ আয়ো আঃ কাথা লেকা অড়াঃরেনাঃ সানাম কৗমিয় কৗমিয়েদা। মিরু দ আজ্ কৗকি গগ আডিয় বতরায়া। কাথা বায় আঁজম লেখান আজ্ আয়ো দ আডিয় গাঁজনেয়া। নাসেনাঃ এ বৗড়িচ লেখান গে আডি সায়গাৎগেয় এগেরে কান তাঁহেনা। মিরু দ অকা অকা হিলঃ কোঠা চটরে দুড়ুপকাতেঃ কুসুৎ কুসুৎ এ রাঃ হমর জং আ, আর আজরেন জানাম তোওয়া দারেয় উয়হৗরেয়া।
মিরুওয়াঃ যখন মড়ে সেরমা উমের, উন অক্তে আজরেন জানাম তোওয়া দারে দয় হানাপুরী আকানা। বারপে মাহারেনাঃ বহঃ হৗসু আর রুওয়ৗ। মিরু আপাত ঝাদে দ হাণ্ডে নাণ্ডে খন রেহেৎ রানে আগু আদে তাঁহেনা। অনা রেহেৎ রানকো জম কাতেঃগে মিরু এগাঁত জবাওয়াঃ রুওয়ৗ দ আডিগে বৗড়তি লেনা। যখন ডাক্তার ঠেন ইদিরেনাঃকো গটা কেদা, উন দ মিরু এগাঁত জবাওয়াঃ সাঁহেৎ মুচৗৎ উতৗর লেনতায়া। জবা বঙ্গাতালা তায়ম মিৎ সেরমা ভিতরীরে ঝাদে দ দশার এরায় আগু লেদেয়া। আর উনখনগে মিরুওয়াঃ দুখ হারকেৎ দ আরহঁ বৗড়তি ইদিলেনা।
তিকিন লাহারেগে উলদা আতোখন মিরু ঞেঞেলকো হেচ এনা। জাঁওয়ায় বেটা দ বাংমা হরিয়ানারে চেৎ আপিসরে চয় চৗকরীয়া। বার চাঁন্দোরেনাঃ ছুটি হাতাও কাতেয় হেচ আকানা। বাপলা মুচৗৎ বাড়া কাতেঃগেয় রুওয়ৗড়া চৗকরী ঠাঁওরে। বারয়া গাতে কড়া আতে ঞেঞেলে হেচ আকানা মেরলেৎ গুঠু আতোতে। মিরু আজ কৗকি গগ দ আডিয় কুশি আকানা, চেদাঃসে বাপলারেনাঃ সানাম খরচ জাঁওয়ায় বেটায় এমঃ আ। মিরু দ রাঃ রাঃতে ওনকো সামাংরেয় সেটের এনা শৗড়ি বাঁদে কাতেঃ। মৗচিরে দুড়ুপ কাতে আয়মা কাথাকো কুলি কেদেয়া জাঁওয়ায় বাবু তাকো। মিরু দ চেৎ কাথাগে বায় রড় রুওয়ৗড়লেদা। খৗলি বার মেৎহা খন মেৎদাঃগে সারসাও ওডোকঃ কানতায়া। আচকাগে ঝাদে তাকোওয়াঃ রাচারে মিরুওয়াঃ ইস্কুলরেন হেড দিদিমুনিয় বলয়েনা বারপে গটেন দিদিমুনিয়াতে। মিরু দ ওনকো ঞেলতেয় ঞির বেরেৎ এনা। দৗড় ইদিকাতে কুনৗমী দিদিমুনি ঠেনে হৗড়ুপ এনা, আর রাঃ রাঃতেয় মেন কেদা, " দিদিমুনি ইঞ দ বৗঞ বাপলাঃ আ, ইঞ দঞ পাড়হাঃ আ ! ইঞ দ বৗঞ বাপলাঃ আ "!
কুনৗমী দিদিমুনি দ মিরু এগাঁত আপাত সেচ কয়ঃকাতেয় মেন কেদা, " আপে দ চেদাঃ নুনৗ কম উমেররে মিরুপে বাপলা কায় কানা ? দিশম রেনাঃ আইন লেকাতে কম উমেররে বাপলা দ মিৎ মারাং কৗই কানা। আর অনা ছাডা, মিরু দ অলঃপাড়হাও রেহঁ আডিয় সরেশ গেয়া। দিনকালম আরে কিলাসরেনাঃ মুচৗৎ বিডৗওরে পোয়লো ঠাঁও এ হামেট আকাদা। " মিরু এগাঁত আপাত তৗকিন দ চেৎ কিন চেকায়া , বাংকিন বুজ তিয়ঃ দাড়েয়াদা। ভাড়ুম্ভাঃ কাতেঃকিন তিঁগু থির এনা। জাঁওয়ায় বেটা তাকো দ বতরতে অম্বাঃ উখড়ুম কাতেঃ দৗড়রেনাঃ কো রিকৗ কেদা। উন অক্তেগে পুলিশকো বলয়েনা রাচারে। ওনকো দ সানামকো এরেস্ট কেৎ কওয়া। পে হড়গে রামপুরহাট থানাতেকো তল ইদিকেৎ কওয়া। উন হঁ মিরু দ দিদিমুনি হৗড়ুপ কাতেয় রাঃরাঃ কানগেয়া। কুনৗমী দিদিমুনি দ মিরুওয়াঃ বহঃ চেতানরে তি দহ কাতে, আডি দুলৗড় আতেয় মেন কেদা, "আদ আলোম বতরঃ আ মিরু, আলোম বতরঃ আ, আলে মেনাঃ লেয়া "।
দশার হিলৌঃ খবর ঞাম এনা, উলদা আতোরেন ওনকো পেয়া কড়া দ হরিয়ানা তেকো তল ইদিকেৎ কওয়া। পে-হড়গে 'তিরলৗ পাচার চক্র' সাঁও জপড়াওকো তাঁহেকানা ।
.webp)
