জেগেৎ AIDS মাহা দিসৗ কাতে

 জেগেৎ AIDS মাহা দিসৗ কাতে

-ডাঃ সুরেন্দ্রনাথ মান্ডি

১৯৮৮ সাল খন জাও সেরমাগে ১লা ডিসেম্বর দ ‘জেগেৎ এইড্‌স্‌ ( AIDS) মাহা’ লেকাতে মানাও গুনৗও হোয়োঃ কানা। AIDS রেনাঃ পুরৗ ঞুতুম দ Acquired Immuno Deficiency Syndrome. নোওয়া আজার হোয় অচয় রেন ভাইরাস আঃ ঞুতুম দ HIV (Human Immuno Deficiency Virus). HIV তাঁড়গম খৗতির AIDS মহামারী ইদিকাতে চেঁহগাও সে সচেতনা বাড়হাও আর জাঁহায় কো নোওয়া আজার খৗতির কো হানাপুরিয়ৗকানা, ওনকো উইহৗর-আঁজলে কো লৗগিৎতেগে নোওয়া মাহা দ বাছাও গটাওয়াকানা।

 AIDS আজার জে জন্মগত দ বাং কানা নোওয়া দ ঞুতুম খনগে বুঝগঃ কানা আর নোওয়া আজার হোয় লেনখান হড়ম রেনাঃ ‘আজার টেকাও-দারাম দাড়ে’ কমঃ আ, খৗতির হড়ম’রে আয়মা লেকানা রোগ-আজার হোয়োঃআ। 

মোটামুটি পে লেকাতে HIV দ হড়ম’তেকো বলনা- 

*ভুঁপুজৗওয়ঃতে- যাঁহায়াঃ হড়ম রেকো বলওয়াকানা ( তাঁড়গম অচওয়াকান) ওনকোসাঁও ভুঁপুজৗওয়ঃতে। 

*শিরৗ হরতে- HIV তে তাঁড়গম অচওয়াকান হড়াঃ মায়াম আপনারা হড়মোরে হাতাও লেখান বাংখান ক লাঠাওয়াকান সিরিঞ্জ, সুইতে রান বাংখান নেশা-জিনিস হড়মোরে হাতাও, এমন চেৎ অনকানাঃ সুইতে খদারেহঁ হড়মো ভিতরিকো বলনা।

* HIV জাঁহালেকাতে হড়মো মায়াম রেকো বললেনখান আকোওয়াঃ কৗমি ক এহবা, মেন দ মায়ামরে মেনাঃ শ্বেতরক্তকনিকা রেনাঃ T-Lymphocyte ক তাঁড়গমা। হড়মো মায়ামরে HIV বলন ছট্‌গে আকোওয়াঃ কৗমি দ বাংক এহব দাড়েয়াঃআ। কৗমি এহব লৗগিৎতে আরে চাঁদো খন তুরুই সেরমা হৗবিচ্‌ অক্ত লাগাও কোওয়া। HIV কোওয়াঃ কৗমি এহব লেনখানগে মৗনমি হড়মোরেনাঃ যাঁহা স্বাভাবিক রোগ আজার সে বৗইরি টেকাও দারাম-দাড়ে তাঁহেনা অনা দাড়ে আদ’ রাপুদঃআ, খৗতির আদি সাঁট যাঁহা আজারগে হোয় দারেয়াঃআ। HIV তে তাঁড়গম অচলেনখান পোয়লোতেগে নঅ নোওয়া ক লক্ষন ঞামঃআ-

* দমেতেৎগে লাঁগা আইকাআ- আয়মা দিন তায়মহঁ কারনতেৎ বাং ঞামঃআ।

* হড়মোরেনাঃ ওজন কমঃআ- নোওয়া রেনাঃ কারনহঁ বাং ঞাম লৗগিদঃআ।

* বেস্‌ কয়েক হাপ্তা ঞিদৗ সেন দমেগে উদ্‌গৗরা।

* বার পে হাপ্তা হৗবিচ্‌ রুওয়ৗ হোয়োঃআ। 

* বার পে হাপ্তা গান খনহঁ বৗড়তি দমে খোঃ হোয়োঃআ, সাঁওতে নৗডরি হাসোওয়া, যাঁহানাঃ উৎতে কষ্ট হোয়োঃআ। 

*মচা ভিতরিরে পোঁড়গে দাগঃআ।

* লাচ্‌ অডকঃআ,মেন দ- পাতলা পায়খানা হোয়োঃআ।

* লসিকাগ্রন্থি ক ফুলৗঃআ- মিৎ চাঁদো খনহঁ বৗড়তি তাঁহেনা।

*হড়ম-হারতা রে হাঁডেনাঁডে গটাগে আরাগঃআ।

অবস্য নোওয়া লক্ষন দ এইড্‌স্‌ বেগর এটাঃ আজাররেহঁ ঞেলঃআ। অনাতে জাঁহায়া নোওয়া ক লক্ষন ঞেল ঞাম লেনখানগে এইড্‌স্‌ হোয়াকানা মেনতে ধারনা দ ঠিক বাং কানা। ডাকতর কগে এইড্‌স্‌ আজার দক বৗ        ছনিত্‌ দাড়েয়াঃআ মায়াম রেনাঃ “এলাইজা” আর বাংখান “ওয়েস্টার্ন ব্লট” পরীক্ষা কাতেৎ। অনাতে ডাকতর কদ’ অনকান সন্দেহ রোগী কদ’ মহুকমা, জেলা আর বাংখান লৗটু হাসপাতাল রেনাঃ ICTC (Intergrated Counselling and Testing Center) তেকো ভেজা কোওয়া।

ঝতমখন বৗড়তি (৭০% খন ৮০%) HIV দকো উচৗড় দাড়েয়াঃআ HIV তে তাঁড়গম অচওয়াকান হড়্‌ কো সাঁও ভুঁপুজৗওতে। আর নঁডেগে আবো সান্তাড় কোওয়াদ ঢের বতর, চেদাসে সানতাড় কোওয়াঃ পাতা-পরব, গায়ান এমান পরব পরবাস ঞিদৗ বেড়া হোয়োঃরে কড়াকুড়ি কোওয়াঃ ভুঁপুজৗওয়ঃ রেনাঃ আডি আয়মা দাঁও মেনাঃ আকাদা। আর আবোমা রড় আকাৎ সে পেড়া। যাঁহায় সাঁও তিসহঁ ঞেপেল-ঞাপাম-উপরুম বাং ওনকো সাঁও সোর খন আরহঁ বন সোর উতৗরঃআ। অনাতে এইড্‌স্‌ লেকান বতরান আজার খন সাঁগিঞরে তাঁহেন লৗ  গিৎতেদ- 

*চিহনৗপ বাং হড় সাঁও ভুঁপুজৗওয়ঃ দ বন্দ উতার হোয়োঃআ, বাং রেহঁ ভুঁপুজৗওয়ঃ অক্তে ‘কন্ডোম’ বেওহার হোয়োঃআ। মচা মচা ভিড়ৗও-হঁ বাং গানঃআ। 

* যাঁহান রোগ-আজাররে, বাংখান দুর্ঘটনারে যুদি এটাঃ হড়াঃ মায়াম আর বাংখান হড়মোরেনাঃ এটাঃ জিনিসকো

আপনারাঃ হড়মোরে হাতাও হোয়োঃ জৗরুড়ঃ তাহলেখান HIV বাং তাঁহেনাঃ মায়াম সে এটাঃ জিনিসকো হাতাও হোয়োঃআ।

* HIV তে তাঁড়গম অচওয়াকান হড়াঃ হড়মোরে বেওহার সিরিঞ্জ,সুই এমান যন্ত্রপৗতি একাল বেওহার বাং গানঃআ। বাং বাডায় রেদ নাপায় অকচ্‌তে শোধন তায়ম আনিচ্‌গে বেওহার গানঃআ। সাবধানতা লেকাতেদ মিৎধাও হঁ আউরি বেওহারঃ নাওয়া সিরিঞ্জ, সুই এমান যন্ত্রপৗতি গে বেওহার লেক্‌ কানা।

* HIV তে তাঁড়গম অচওয়াকান আয়োতেকো দ আলকো গিদ্‌রৗ এঁগাতঃমা। লাহাতেগে লৗই হোয়াকানা HIV হড়মোরে বলন তায়ম আরে চাঁদো খন তুরুই সেরমা হৗবিচ্‌ জৗপিৎ আবস্থারেকো তাঁহে দাড়েয়াঃআ, মেন দ জাঁহান লক্ষন হড়মোরে বাংক সিরজৗও দাড়েয়াঃআ। তাহলে চিকৗতেম বু-জৗ মিৎ হড়াঃ হড়মোরে ক বলওয়াকানা? হেঁ, মায়াম পরীক্ষা বেগর বাংসাবঃআ HIV, মেনদ এইড্‌স্‌ আজাররেনাঃ অস্তিত্ব দ। অনাতে বাং উপরুম হড় সাঁও আর যাঁহায় হড় দ আয়মা হড় সাঁও ক ভুঁপুজৗও আকানা অনকান হড় বেগর-কন্ডোম তে ভুঁপুজৗও লেনখান আর বাংখান ধর্ষন অচলেনখান মায়াম রেনাঃ এলাইজা/ওয়েস্টার্ন ব্লট পরীক্ষা অচকাতেৎ নিশ্চিতঃদ একাল লেক্‌কানা। এইড্‌স্‌ রোগী কোওয়াঃ মায়ামরে, বীর্যরে,যোনিরসরে আর পায়ুহররে যতখন বৗড়তি HIV কো তাঁহেনা। এইড্‌স্‌ রোগী ক সাঁও জপটেৎ সে মিৎ ঠেন তাঁহেন তেদ আর মিৎ হড়ঠেনদ বাংক উচৗড় দাড়েয়াঃআ। এইড্‌স্‌ আজার চিকিৎসায় আর টেকাওদারাম লৗগিৎতে কৗমিরে জওয়াওয়ানাঃ রান অডক লৗগিৎ গৗহিরৗকিলৗন কক’ কুরুমুটুয়েদা, তবে অনা ক রান দ নিৎ হৗবিচ্‌তে পরীক্ষা-নিরিক্ষা পর্যায়রেগে মেনাঃআ। অনাতে নিৎ লেকা দ- যাঁহায়াঃ এইড্‌স্‌ আজার হোয়োঃ মানেগে কেরমে কেরমেতে গুজুঃ ডাহারতে মহডাঃ।