দুলৗড়

 (হুডিঞ কৗহ্‌নি)

দুলৗড়

-বাড়তাঙ সরেন

কিসুন দ ইস্কুল খন রুয়ৗড় কাতেঃ জা উডিজ জম বাড়া কাতেঃ খেলড জার্সি আর পেন্ট হরঃকাতেঃ সাইকেল আতে খেলড টাণ্ডিতেয় সেন এনা। উনি দ বোলপুর হাই ইস্কুলরে গেল মিৎ কিলৗসরেয় পাড়হাঃ কানা। দাঃ কান, জৗপুৎ কান, উনি দ দিনৗম হিলো ইস্কুল খন রুওয়ৗড় কাতেঃ ফুটবল খেলড দয় সেনঃ গেয়া। ফুটবল খেলড খঁন হঁ উনিয়াঃ বৗড়তি রৗস্কৗ দ মেনাঃ তায়া গাতেকো সাঁও ঞেপেল ঞাপাম আর রড় লান্দা । 

কিঁসৗড় অড়াঃরেন কড়া কানায় কিসুন দ। এগাঁত আপাত, মিৎ সুমুং মিশরৗ,গড়ম হাড়াম আর গড়ম বুড়হি আতে আডি মারাং ঘারঞ্জ। কিসুন আপাত রৗস্কৗ টুডু দ চিত্তরঞ্জন রেয় তাঁহেনা। রেলওয়ে আপিসরেয় কৗমিয়া। হাপ্তারে বার দিন গান শিরিষটলা আতোতেয় হিজুঃ আ। অনাতে ঘারঞ্জরেনাঃ সানাম কৗমি কোদয় ঞেল সামটাও আ কিসুন এগাঁত রেমড়ে। কিসুন গড়ম হাড়াম দ গেল সেরমা লাহা চৗকরী খনে জিরৗও আকানা। গড়ম হাড়াম মুন্সী দ কিসুন আডিয় দুলৗড়েয়া। লৗগতি খন হঁ আডি বৗড়তিয় দুলৗড়েয়া। কিসুন যাঁহাগেয় খজঃ,অনাগেয় এমায়া। তি ঘড়ি, মোবাইল, দামান সাইকেল অকাটাঃগে বাদ দ বৗনুঃ আ। নওয়াকো লৗগিৎ কিসুন দ গড়ম হাড়াম আডিয় কুশি আয়া। অন্তে আচ্ বাবা দ অনাকো একাল বায় কুশিয়াঃতে কিসুন দ উনি খন সাঁঙ্গিঞ আর সাঁঙ্গিঞ রেগেয় তাঁহেনা। আচ আপাত দ অলঃ অৗকিল রেনাঃ কাথাগেয় মেতায়া। অনাতে কিসুন দ উনি সাঁও রড় হঁ বায় রড়া। 

গেল কিলৗস পাস তায়মগে  গড়ম হাড়াম দ মিৎটাং লেটেষ্ট মডেল রেনাঃ মোটর গৗডিয় কিরিঞ আকাদেয়া। কিসুন আপাত দয়  মানা লেদেগেয়া। মেনখান গড়মতেৎ লৗগিৎ নুনৗঃ দুলৗড় তাঁহেকান তায়া, মুন্সী হাড়াম দ বারন কাথা বাং আঁজম কাতেঃ  কিসুন অনা মোটর গৗডিয় কিরিঞ আদেয়া।            

কিসুন দ ছুটি হিলোঃ অনা মোটর গৗডি আতে গোটায় মাণ্ডরাও বাড়ায়া গাতেকো সালাঃ। গুবলীরে টাকা গাজ গাজাঃ খৗতির বিলৗতী হৗণ্ডি পৗওরৗ, চুটি, চরস সানামরেয় হেওয়া গৎ আকানা, নিয়ৗ উমের রেগে। নওয়া লৗগিৎ কিসুন আপাৎ আর গড়ম হাড়াম তৗকিন দ আডিকিন রপড় ঝগড় আকানা, চেদাঃসে গড়ম হাড়ামাঃ বৗড়তি দুলৗড় খৗতিরতেগে তেহেঞ কিসুন দ নুনৗঃ সাঁঙ্গিঞ এ লাহা আকানা।           

ফুটবল ডৗহি খন রুওয়ৗড় কাতেঃ কিসুন দ হৗকুপৗকু খৗজৗড়িয় জম কেদা। নাওয়া নাওয়া আঙরপ পেন্ট  হরঃকাতেঃ মোটর গৗডি আতেয়  অৗফির ওডোং এনা, বাংমা জজটোলা আতোরে 'লক্ষণ মুর্মু নাইট ' যাত্রা সেরেঞ হুয়ুঃকানা। 

তালা ঞিদৗ বোলপুর থানা খন কিসুন আপাতাঃ মোবাইলরে ফোন হেচ্ এনা, " হ্যালো, রৗস্কৗ মাণ্ডি বলছেন ? আপনি এক্ষুনি হাসপাতালে আসুন। আপনার ছেলে......." 

আতোরেন কড়াকো আতে রৗস্কৗ যখন বোলপুর মহকুমা হাসপাতালে সেটের এনা, উন দ কিসুন এনেগে O.T খনকো ওডোক আকাদেয়া। জজম তি আর জজম জাঙ্গারেকো  প্লাস্টার আকাৎ তায়া। বহঃ হঁকো ব্যান্ডেজ আকাৎ তায়া। ডাক্তার দ বর্ধমান ইদিয় লৗগিৎ 'রেফার' কো অল আকাদা। বতর বতর তে রৗস্কৗ দ কিসুন ঠেনে সুর এনা। বৗই বৗইতে কিসুনাঃ বহঃ এ চাপো কেদা।  কিসুন দ আচ্ বাবা সেচ এ কয়ঃ কেদা। আচ্ বাবা ঞেলতে কিসুনাঃ বার মেৎহা খন হিডির হিডির মেৎদাঃ জরয়েনা। রাঃ রাঃ তেয় হহকেদা, "বা--বা,বা--বা"।