বারয়া সাবাদ বেওহার কাতে, অৗড়ৗ সাঁও অৗড়ৗ জুরি কাতে; তুমদাঃ রু সাও টামাক রু লেকান মিৎ নাপায় খাট মাছা গিদরৗ বৗউলীয় আড়তি আকাৎবনা, মানতান অনলিয়ৗ সুবুদিয়া মূর্মূ। পাড়হাওরে গিদরৗ ক এটাঃ লেকান রাহা ক ঞামা।
গোপেশ্বর মান্ডি এলখা আতে, মিৎ নাওয়া উইহৗর-ভাবনা রেনাঃ গিদরৗ বৗউলীয় অল আকাদা। অল খনদ আয়াঃ উইহৗর রেনাঃ গনং আডি জৗসতি।
কেটেজ উইহৗর-ভাবনা, নাপায় আড়া চিয়ৗ, আর নাপায় ছন্দ বেওহার কাতে মিৎ নাপায় অনড়হেঁ ' হপন মৗই- দারি দৗই '। অনড়হেঁ ভাবনা দাঁসায়রেনাঃ পোন্ড রিমিল লেকা সাফাও আ। মেনখান ' দারি দৗই ' দ ' দারে দৗই ' হোয় লেনখান জৗনিচ আরহঁ সরেস কঃ আ।
সাকম সরেন ইচ ' কাবরা পুসি ' আঃ আডি এটাঃ লেকান গুন মেনাঃ তায়া। সিঞ চাঁন্দো যুদিয় ঞিদৗ চাঁন্দো আঃ, এঁডেখান সারগা ঞেলতে কাবরা পুসি আঃ কোলকোলি আর হাহাল আডি যথাৎ তায়া।
গিদরৗ কওয়াঃ মনেরে কুকলি সারসাও লেকানাঃ মিৎ নাপায় অনড়হেঁ ' ককয় বুডি '। মেনখান মিৎবার জায়গা করে ছন্দ রাহা, ঞেলেঞ- হুডিঞ আকানা।
গিদরৗক হারা কাতে নাপায় মৗনমী ক হোয়োঃ মা - নংকান আশ দহ কাতে, অনলিয়ৗ দুগাই টুডু আয়াঃ অনড়হেঁ এ অল- পাসনাও আকাদা। মেনখান ছন্দ চেতান মিৎবার তহৎ-হাড়াঃ মেনাঃ আ।
সনাতন টুডু আঃ ' হৗকু হৗকু রটে ' হপনবাবু বাং এ কুশিয়াঃ রেহ, আলেদ আডি নাপায় লে কুশি কাওদা।
বিভূতিভূষণ সরেন ইচ ' সাসাং পিয়ো ' সাওহেৎ ধৗরতীরে, মিৎ নাপায় সাঁদেশ এ গেমের আগু আকাদা। নংকান সাঁদেশ পৗরসীরেনাঃ লৗগতি মেনাঃ আ।
অনল বিঁদি ইচ ' ঠুম্পু হাড়াম ' আঃ কাসা- হেড়েম লেকা গুন মেনাঃ আ। মানতান ..বিঁদি ' ছন্দতে বুল কাতে, মিৎবার জায়গারে জেলেঞ- জেলেঞ ঝাপে গিডি আকাদা।
দুলৗড় আর শাসন বানাররেনাঃ বোগে- বৗড়িচ অরসং লেকা, দুলৗড় বিটি আঃ নাওয়া ডাহারতে তাড়াম লেকান মিৎ নাপায় অনড়হেঁ ' বালেঃ আলে '।
.webp)
