আবোওয়াঃ ওয়েব পেজ- হলা ১১ নভেম্বর ঝাড়খন্ড বিধান সভারে আদিবাসী কোওয়াঃ সারনা ধরম বিল পাশ এনা। বাডায় আকানা বাংমা অনা বিল তালমা সরকার ঠেন হঁক ভেজা আকাদা। নোওয়া বিল পাশ রেনাঃ খবর বাডায় কাতে এটাঃ এটাঃ আদিবাসী কো তালারে রৗস্কৗ রেনাঃ ঝালাক ঞেল এন রেহঁ তামাম সানতাড় কো মুদ্রেদ অনকা রৗস্কৗ রেনাঃ ঝালাক বাং ঞেল লেনা মেন্তেগে বাডায় আকানা।
তবে বাডায়ঃ কানা জে, বিধান সভারে বিল পাশ এনা মেনতেগে সারনা ধরম কোড এ ঞাম কেদা অনকান কাথা দ বাং কানা। মেনেৎ ঝাড়খন্ড পনৎ সরকার এ ভেজা কেদা আর ভারত সরকার এ বাতাও গৎ কেদা অনকান কাথাদ বাং কানা। তালমা সরকার আডি আয়মা লেকা তুলৗযখা কাতেৎ সাঁওতে আর আর পনৎ কোওয়াঃ কাথা সামেলায় কাতে যুদি রাপাচাঃ বাং তাঁহেনা তবে আনিচ্ নোওয়া বিল পাশ কাতে ধরম কোড রেনাঃ অনুমোদন এমায়। আর আর পনৎ করে খন হাপেন নোওয়া বাবদতে চেৎ কাথা রাকাব হিজুঃ আঃ উন দিন ধৗবিচ্ সারনা ধরম কোড লৗগিৎ তাঁগি তাঁড়াঃ রেগে তাঁহেন হোয়োঃ আ।
সারনা বিল পাশ রেনাঃ খবর পাশনাও সাঁও সাঁওতে আয়মা লেকান কুকলি সানতাড় কো তালারে রাকাব্ গৎ আকানা। আয়মা হড় কো মেমেন কানা বাংমা সারনা ধরম দ মুন্ডা, হো, লাড়কা, এমান এমান আদিবাসীয়াঃ কানা। হাপেন কেরেস্তান সানতাড় কোওয়াঃ যেলেকা সানাম সাঁও বাপ্লা-বিহৗ চালাঃ আ। অনকাগে চেৎ সারনা সানতাড় কোওয়াঃ হঁ মুন্ডা, হো, লাড়কা সাঁও বাপ্লা-বিহৗ হোয়োঃআ? আর অনা কি হাপেন সানতাড় সমাজ এ বাতাও আতো ? নংকান আয়মা কুক্লি গে রাকাব্ কানা। অনাবেগর নুনদিন যাঁহায় কো সারি ধরম কো অল আগু আকাদ, সেন্সাস রে রেকর্ড হঁ মেনাঃ আকাদা, ওনকো নিৎ সারনা আকো সে বাং অনারেহঁ আডিগান হিদিচ্ মেনাঃ আকাদা মেন্তেগে বাডায়ঃ কানা।
নতে নোওয়া সারনা বিল পাশ আঁজম কাতে আসেকা রিনীচ্ পছিম বাংলা পনৎ জেনারেল সেক্রেটারী মানতান সুবোধ হাঁসদা গোমকে লৗই কেদায়- “ঝাড়খন্ড পনৎরে সারনা ধরম বিল পাশ কাতে সানতাড়াদ রৗস্কৗ রেনাঃ চেৎ হঁ বৗনু আ। চেদাসে সানতাড়াঃ অল, রড় আর ধরম সানামাঃ গে এঁডেলঃ আ নোওয়া বিলতে দ। গুরু গোমকে যাঁহায় মেন আকাদা ‘অল মেনাঃ তামা, রড় মেনাঃ তামা, ধরম মেনাঃ তামা আমহঁ মেনাম। অলেম আৎ লেরে, রড়েম আৎ লেরে, ধরমেম আৎলেরে আমহঁম আদ’। নোওয়া তুলৗজখা লেখান গেবন বুঝৗওয়া যেলেকা সানতাড়া অল অলচিকিদ সারনা ধরম রেন এটাঃ এটাঃ আদিবাসী মেনেৎ ওঁরাও, হো, মুঁডা,লাড়কা,খাড়িয়া,ভূমিজ এমানকো অকয় হঁ বাংকো বাতাও আ। বাংকো রড়া সানতাড়াঃ সানতাড়ি আড়াংতে আর সানতাড়াঃ ধরম হঁ বাংকো মানাওয়া। মেনেৎ মঁড়ে মাহা ছৗটয়ৗর,বাপলা রেনাঃ নানাহুনৗর আরি কো আর ভাঁডান রেনাঃ আরি কো আর এটাঃ আদিবাসী কদ বাংকো বাতাওয়া। মেনখান সারনাগে য়েন তাকোওয়া ধরম আর সারনা বাতাওয়ান সানতাড় বয়হা কোওয়াঃ নিরলৗ মায়াম হঁ সলম লটম রেনাঃ ডাহার তেয়ার এনা। অনাতে নোওয়া সারনা বিল পাশ কাতে সানতাড় কোওয়াঃ রৗস্কৗ রেনাঃ চেৎহঁ বৗনু আ। তবে হেঁ সারি ধরম সানতাড়দ সানতাড়াঃ অল অলচিকি,রড় মেনেৎ সানতাড়ি আর ধরম সানামাঃগে বাঞ্চাও কো দহ ইদি তাকোগেয়া। চেদাসে মিৎ জৗতি মিৎ ধরম হর এ উদুগ্ সারি ধরম”।
নতে আসেকা রিনীচ্ ভাইস্ প্রেসিডেন্ট মানতান গুরুপদ হাঁসদা গোমকে লৗইকেদায় বাংমা- “মিৎ জৗতি মিৎ ধরম হর এ উদুগ্ সারিধরম। সানতাড় দ হিন্দু,মসলিম, কেরেস্তা্ন বুদ্ধিস্ট,জৈন বাং কানাকো। সারনা লৗইতেদ মুডা,ওঁরাও,লাড়কা গেকো বুঝাঃআ,আর সারিধরম মেন লেখান খৗলি সানতাড় সুমুং গেকো বুঝাঃআ। সারি ধরম গে সানতাড়া দ ধরম কানা”।
নতে আরহঁ ভারত জাকাত মাঝি পারগানা মহল রেন পুরুলিয়া জেলা পারগানা বাবা মানতান রতন লাল হাঁসদা গোমকে লৗই কেদা বাংমা- রাজনীতিবিদ্ কোগে ধরমতে জুমিৎ কো খজ কানা। চাহি জয়পাল সিং মুন্ডা, চাহি শিবু সরেন, চাহি সালখান মুরমু- নোকো দ ইজ্মালি ধরমতে ভোট ব্যাঙ্ক কো তেয়ার এদা। রাজনীতি আর ধরম নীতি সাঁগড়াও মিৎ কাতে সাসাং শোড়ে কো তেয়ার এদা। আদ আমাঃ ধরম দ যাঁহায়েন গে”।
অনা লেকাতে কুকলি তাঁহেন কান গেয়া তামাম জাহের বঁগা সানতাড় কো সারনা ধরম কি যাঁহাতিসকো মানাও আ সে সারনাঃ কান সানতাড় কো আকোওয়াঃ ভুল বুঝৗও ঞাম কাতে সারি ধরমতে আর হঁক রুওয়ৗড় হিজুঃ আ ? যুদিকো রুওয়ৗড় হিজুঃআ এনখান উনরে ওনকো লৗগিৎ সারি ধরম দুওয়ৗর ঝিচ্ তাঁহে নাতো ?
.webp)
