সহরায় পরব - এনাং আর নিত্
 |
মহাদেব হাঁসদা |
সহরায় দ হড় হপনাঃ জত খনাঃ মারাং পরব কানা। হাপড়াম কো, অৗহি বৗহি নোওয়া পরব দ হাতি লেকান পরব কো মেন আকাদা। মড়ে সিঞ মড়ে ঞিদৗ, দাঃ রেঁহয় জৗপুৎ রেঁহয় সহরায় ভোর কুড়ি কড়া কুলহি রেগে কো আঁগা আয়ুবা। সহরায় পরব রে সহরায় মা হেঁগে, লাঁগড়ে, ডান্টা,গলওয়ার, মাতওয়ার, গুঁজৗর, দুরুমজাঃ সাড়পা এমান নানাহুনৗর এনেচ্ সেরেঞ হোয়োঃআ, অনাতে সহরায় দ সারভৗটু পরব কো মেতাঃ আ।
সহরায় দ চেদাঃ?
সহরায় দ তিসখনাঃ আর চেদাঃ এহপ্ আকানা, মিৎ কাথাতে লৗই দ মুসকিল গেয়া মেনখান নওয়া পরব রেয়াঃ গৗই জাগাও, গৗই চুমৗওড়া, রাচা অল, খুনটৗও এমান অক্তে রেয়াঃ সেরেঞ,বাঁখেড় আর আরিচৗলি খনাঃ বাডায়ঃআ সহরায় দ গৗই কাডা কোওয়াঃ সারহাও পরব কানা। ‘সারহাও’ কাথা খন গে সহরায় দ ঞুতুম আকানা। বাংলা তেদ সারহাও কাথা রেয়াঃ মানে দ বন্দনা সে গুণ-কীর্তন কানা। বন্দনা খন গে বাঁদনা পরব কো ঞুতুম আকাদা। কুকলি হিজুঃ আ, গৗই কাডা কোওয়াঃ সারহাও দ চেদাঃ? হড় কৗহ্নি খন বাডায়ঃ আ সহরায় অক্তে চাঁদবঁগা গৗই কাডা কো ঞেঞেলে হিজুঃআ মৗনমি চেৎ লেকা জগাও কাতে গৗই কাডা কো দহওয়াকাৎ কওয়া, অনাতে সিঞ আর ঞিদৗ গৗই কাডাকো জাগাও কওয়া, চুমৗওড়া কওয়া আর সুনুম সিঁদুর কো অজঃ আকোওয়া, একেন ইনৗদ বাং বেস্ লেকা কো জম অচ কওয়া। গড়া অড়াঃ দ দিউহে বৗতি তেকো মারসাল কাঃআ। আরহঁ আদম কদ কো মেনা ডাংরা-কাডা কওয়াঃ দাড়ে তেগে হড় বাঁদি বাঁদি ধন-দুরিব কো আরজাও এদা, বিরজাও এদা। গৗই বিতকিল হতেচ্ তেগে মিৎ সুগি সায় সুগি কো হোয়োঃ কানা, অনকোওয়াঃ দায়া তেগে তওয়া, দাহে জম্ কাতে হড়কো আনেচ্ ধানেজঃ কানা।
চাষ কৗমি পুরাও কাতে নাঁওয়া হোড়ো ইরঃতে নোকো গৗই ডাংরা কওয়াঃ গুনমানাও সে সারহাও কগে সহরায় দ কানা। সহরায় রেয়াঃ আরিচৗলি, সেরেঞ, বিনতি, বাঁখেড় রেহঁ অনারেয়াঃ সৗবুদ্ দ মেনাঃ আকাদা। একেন হড় হপন দ বাং, এটাঃ এটাঃ সমাজরেহঁ নংকা গৗই-কাডা সারহাও দ মেনাঃ আকাৎ তাকওয়া। তজ্বিজ্ কাতে ঞেল লেখান সহরায় দ কৃষিভিত্তিক সমাজ রেয়াঃ গে মিৎটান পরব কানা।
সহরায় পরব রেয়াঃ কৗমিহরা– লাহারেগে লৗই আকানা সহরায় দ মড়ে মাহা রেনাঃ পরব কানা। পৗহিল হিলোঃ উম,দসার হিলোঃ দ বঁগা , তেসার হিলোঃ দ সারদি সে খুনটৗও, পোনাঃ হিলোঃ দ খুন্টি তোৎ, আর মড়েয়াঃ হিলোঃ দ জালে।
উম হিলোঃ
উম হিলোঃ দ আয়ো হড় অড়াঃ দুওয়ৗর গেচ গুরিচ্ সাফা কাতে নাওয়ানাঃ টুকুচ্ –কাঁডা, হাটাঃ ডৗলিচ্ কো বেওহারা। জত হড় উম-নাড়কা সাফা কাতে কো জম ঞুয়ৗ। ইনৗ হিলোঃ গডেৎ দ অড়াঃ অড়াঃ মিৎ টান কাতে সিম হপন আর চুরুচ্ চৗউলে আদায় কাতে টান্ডিতেয় ইদিয়া, নায়কে বাবা দ উপৗস রে তাঁহে কাতে তোপো হেচ্ কাতে হলংতে খঁড্ বেনাওয়া। আর অনা খঁড্রে মিৎটান সিম বেলে দহ কাতে মিৎ মিৎতে সিম-এ আতিঞ কওয়া। আতোরেন সানাম হড় হেচ্ সোর কাতে বঁগা বুরু কো বাঁখেড় আকোওয়া। অনা তায়ম র-গেৎ কাতে কো সোড়ে কওয়া, নওয়াগে বঁগা সোড়ে দ। তারাসিঞ বের্ দ গুতি কড়া গৗই কো লাগা আগু কওয়া আর খঁড্ কো লেবেৎ অচ কওয়া। জাঁহায়রেন গৗই লাহাতে অনা খঁড রেয়াঃ বেলেয় লেবেদা সেয় জিয়া; উনি গৗই দকো সাবেয়া, সুনুম-সিঁদুর কো অজঃ আয়া, আর মলং রে ধাঁওয়া কো তল আয়া। উনি গৗই দ ইনৗ সেরমারেন ভাগ আন সে সরেস আন গৗই কো মেতায়া। অনাতে উনি গৗই রেন মাহরা দ ঘঁড়া কাতেৎ অড়াঃ কো আগুয়েয়া, আর গৗই কিঁষৗড় দ মাঘ বঁগা আতো হড় অনা ঞুতুম তে মিৎ টুকুচ্ হাঁডিয় এমা কোওয়া। উনরে অঁডে কো বিনতি হট কাঃআ।
(অনল তঁগে আ)
.webp)
