(দসার হৗটিঞ)
সহরায় পরব - এনাং আর নিত্
মহাদেব হাঁসদা
মহাদেব হাঁসদা
নংকা কাতে আদ’ গট্ টাঁডি খন অড়াঃ তেকো’ হিজুঃআ। সিঁগৗড় বেড়া তুমদাঃ টামাক আতে কড়া কদ আদ’ গৗই কো জাগাও কওয়া, কুড়ি কহঁ হাটাঃরে আদওয়া চাউলে, ধুবি ঘাস আর দিওহে বৗতি আতে কো অডকঃআ অড়াঃ অড়াঃ। গড়া গড়া গৗই কো চুমৗওড়া কোওয়া আর কো বাঁখেড়া-
(গৗই খান দ) নে সুগি, আম সুগিতে শায় সুগি, আম হেঁও লেক’ হপন লেক’, নিয়ৗ গড়া নিয়ৗ যাত্রা, পেরেচ্ কাঃ চড়াং কাঃ। আম আয়ুর আগু সোতোঃ আগু, আম গমকেম দ পায়কেম দ, নৗই পারম গাডা পারম, বালা বাড়ে সাকা বাড়ে, জজম বাড়ে ঞুঞু বাড়ে, আঁজম জং আঁতেন জং মে। চুমৗওড়া জখজ্ আদওয়া চাউলে, ধুবি ঘাস দ গৗই সেৎ কো এ-রা। আদ’ ডাংরা কো চুমৗওড়া কোওয়া, বাঁখেড়া কো ‘নে রাঁগিয়ৗ, আম আরজাওলে বিরজৗওলে কুডৗমতে সাতেতে, ডিলি বাড়ে সৗইকৗ বাড়ে বৗইসাওয়ঃ , দাঃ বাড়ে জরওয়াঃ উৎ বাড়ে অমনাঃ, রটে বাড়ে চুড়ূঃ আ, কাকড়া বাড়ে ডবঃ আঃ’। আদ কো সেরেঞা-
হাতে লেলা আদওয়া চাল// গছা লেলা পাকোল পান// চলি লেলা আমকি দেবি গায়ে চুমৗয়। একা চুমৗয় চুমৗ লোমা দুয়ৗরে চুমৗয়,// পড়ি গেলা সিরৗ বরদা// আঁখে কালো!// কাহে বরদা কানদা সে// কাহে বরদা খিজা সে, দেব রে পুতা!// রিলৗমালা রে পানি। ধীরে চালায় ধীরে চালায়// বাবু রে বরদা কায়সে ত কম্বে সে সিঁদুর।
দসার হিলোঃ দ বঁগান- বঁগায় হিলোঃ দ গৗই চুমাওড়া কুড়ি কদ সেতাঃ বেড়া রেনাঃ জঃ রাচাঃ, দাঃ সাকাম লৗগিৎ আপান আপিন অড়াঃ কো রুওয়ৗড়া আর কড়া কদ কো গাদয়া, মেতাঃ মে বাড়গে রেয়াঃ সৗরু, ঝিঁগৗ, কঁহডা, বেঁগাড়, মালহান এমান ক গ-দা। তেহেঞ গেসে বঁগা-বুরু রেয়াঃ দিন দ। সেতাঃ সেতাঃ গেচ্-গুরিচ্ সৗত লেখান জত হড়্ তোপো সাফা কাতে দারাহারা চাতম অড়াঃ রেক’ বঁগানা, আঁধান কদ গড়া রেক’ বঁগানা। জুদৗ জুদৗ পৗরিস রেন হড় সিম দ, সুকরি দ জুদৗ জুদৗ দাঁড়ে কো বঁগা কওয়া।
ঞিদৗ দ সহরায় এনেচ্ সেরেঞতে, রৗস্কৗ লাঁদাতে পারমেনগে। পুরুব নাখা খন বালে বেড়া ওনকোওয়াঃ ঞেনেল ঞেঞেলে হিজুঃ আ মুলুচ্ মুলুচ্ লাঁদাওয়াতে। মিৎ সেরমা তায়নম হপন এরা, জাঁওয়ায় গমকেত জত কো ঞাপাম দহড়া কাতেৎ বুগি জুদৗ গালমারাও কাতে নুনাঃ রৗস্কৗ কো আটকারেদা, অকা দ লৗই তেহঁ বাং লায়োঃ আ জেলেকা-
খল্ তিরিয়, হাসা তুমদাঃ// দেলাং তিরিয় কুলহি কুলহিতে//দেলাং তুমদাঃ আখাড়াতে।– নংকা কাতে ইনৗহিলঃ দ পারমেন গে।
খুনটৗও হিলোঃ- সহরায় রেয়াঃ তেসার মাহা দ খুনটৗও সে সৗরদি মাহা কো মেতাঃ আ। এনেচ্ সেরেঞ কান কদ কুলহি কুলহিতে কুলহি রেগেকো কুঞ ডৗডি আকানা। নঁতে খুনটৗও অক্তে সেটের লেনখান আতোরেন কড়া কদ মাঝি, পারানিক এমান কোওয়াঃ খুনটৗও খুনটি দ জত খন লাহাতেকো বিৎ কাতাকোওয়া। ইনৗ তায়নম, নৗনি সৗনি কদ আপান আপিন ছাটকা রে ডাংরা কাডা কো খুনটৗও কওয়া। মাঝি আর পারানিক কওয়া খুনটি বিদ্ হড় দ ওনকো ঠেন খন হঁ হাঁডি দাকা কো ঞামা। খুনটি বিৎ লা-লা ঞেলতে লাঁদা গানঃ আদম কদ সেরেঞ তেগেকো রড় গ-দা – গাডাম লালা কান দ চিলিম তলেয়া// কাডাম তলেরেদ’ শাড়িঞ বাঁদেয়া,// ডাংরাম তলে রেদ শাংখাঞ হরগা।
খুনটি তোৎ হিলোঃ- সহরায় রেয়াঃ পোনা মাহা দ খুনটি তোৎ কো মেতাঃ আ। জাঁহা খুনটি রে কাডা বাংখান ডাংরা খুন্টৗও হোয়লেন অনাদ বেবাক এনহিলোঃ তোৎ কাতে কো বায় কাঃআ। খুনটি তোৎ কড়া কদ অনা ঞুতুম অড়াঃ অড়াঃ হাঁডি কো ঞুয়ৗ, পিঠৗ কো জমা আর কুলহি কুলহিতেকো সেরেঞ ইদিয়া-
আলেদ খুন্টি তোতোৎ কো বাবা// আলেদ ভুরনি তাড়াও কো বাবা// আলেদ তাং হাঁডি, বাবা// আলেদ পিঠৗ চাখনা।
কুলহি কুলহিতে সহরায় এনেচ্ আর সেরেঞ দ এনহিলোঃ তঁগেগে তাঁহেনা।
জালে হিলোঃ- সহরায় রেয়াঃ মড়েয়াঃ মাহা দ কানা জালে। নেতার দ খুন্টি তোৎ আর জালে বানার মিৎ মাহারেগে কো মানাও এৎ কানা। অনা লেকাতে মেন লেখান সহরায় দ নেতার পোন মাহা রেয়াঃ পরব রে তিঁগুওয়াকান।
.webp)
