(হুডিঞ কৗহ্নি)
কংকা
 |
| -বাড়তাঙ সরেন |
রতন দ এন হিলোঃ খন গেয় কংকা উতৗর আকানা। দুড়ুপ কাতেঃ এনেগেয় রাঃ এদা, আবার মিৎ ঘৗড়িচ্ তায়ম আচ আচ তেগেয় লান্দা রু্যৗড় এদা। অকা দ বাড়গে সীমৗ সেচ চালাও কাতেঃ জজ দারে গঁডারে বহঃ এ ঠুকুড়ঃ কানা। মায়াম সিডৗর সডর জরঃ কানরেহঁ উনি দ লান্দা রেগেয় তাঁহেন কানা, আরে মেন এদা, " বাং, বাং, ইঞ দ বৗঞ সেন ওচোয়ামা, অকাতেগে বৗঞ চালাও ওচোয়ামা, আম দ ইঞ ঠেন গেম তাঁহেনা ! " আরহঁ ঘানেগে রতন দ আটেৎ খনে ঞির বেরেৎ গদঃ কানা, আর কুলহী কুলহীতে কৗও মৗও আতেয় ঞির বাড়ায় কানা। অড়াঃরেন অকয় হঁ বাংকো সাপ সামড়াও দাড়েয়ায় কানা। খৗলি হান্তে নাতেয় ঞির বাড়ায় কানা, আর আউড়িগেয় বক্তাঃকানা।
ঞিদৗ দিনৗম হিলোঃ লেকাগে আকিন জুরিপৗরি, রতন আর রাঙ্কি তৗকিন দ চাতম অড়াঃ ভিতরী রেকিন গিতিচ আকান তাঁহেনা। তেহেঞ রতন আর রাঙ্কি তৗকিনাঃ বাপলা গেল মড়ে সেরমা হুয় পারম আকানা। গ -বাবা আর মিৎ সুমুং কড়া আতে মিৎ নাপায় রিলৗমালা ঘারঞ্জ। চাষবাস রেনাঃ হুড়ু চাওলেতে রাচারেনাঃ বারয়া বারয়া বাখার দ চুরুবুরু পেরেচগে তাঁহেনা সেরমাভর। মিৎ সুমুং বাবু তৗকিন দ হষ্টেলরেয় তাঁহেনা। তুরুয় কিলৗসরেয় পাড়হাঃ কানা। রতন আর রাঙ্কি তৗকিনাঃ কুকমু দ, আকিনরেন বাবু অলঃ আকিল সেঁড়া ওচো কাতেঃ মারাং মারাং হড়কিন তেয়ারেয়া। পারকমরে গিতিচ কাতেঃ অনাকো কাথাগেকিন লাপৗয় জংকান তাঁহেনা রতন আর রাঙ্কি। এন হিলৌঃ ঞিদৗ আডিগে ললকান তাঁহেনা। হয় হঁ বাংতে আডি আঁট উদগৗর কান তাঁহেনা। রাঙ্কি দ অড়াঃখন ওডোংকাতেঃ পিন্ডৗরে পাটিয়ৗ আটেৎ কাতেয় গিতিচ এনা। পিন্ডৗরে উশৗ রাতেয় জৗপিৎ কেদা রাঙ্কি।
জৗপিৎ তরা রাঙ্কি চেলে চ লেঙ্গা তিরে গের কেদে লেকায় বুজ কেদা। আচকাগে হৗসুতেয় ঞির বেরেৎ এনা। রাঙ্কি দ উশৗরাতে রতনে হহ বেরেৎ কেদেয়া। হেরিকেন আতে হান্তে নাতেকিন আরশাল কেদা। চেলে গে বাংকিন ঞেল ঞাম লেদেয়া। তবে লেঙ্গা তি থপা সেচ কয়ঃ কাতেঃকিন বুঝহৗও কেদা চেৎ চেকাও আকানা মেনতে ! রাঙ্কি দ লেঙ্গা তিরে 'কাডেজতেয় বাজাও" আকানা।
রতন দ গামছা চিরৗ কাতেঃ উশৗরাতে লেঙ্গাতি মকারে উরিচতেয় তলকেদেয়া রাঙ্কি। দিকু আতো খন মারুতি গৗডি আগুকাতেঃ বৗরুডি আতোয় সাগাড় ইদি কেদেয়া রাঙ্কি মিৎ ওঝা অড়াঃতে। ওঝা দ রাঙ্কি রাচারে গিতিচ ওচো কাতেঃ মান্তার বাঁখেড় আতে নিম ডৗরতে ঝাঝাড়ে এহপ কেদা। তালা ঞিদৗ ধৗবিচ ওঝা দ সেরেঞ সেরেঞতেয় ঝাড় কেদেয়া রাঙ্কি। মেনখান রাঙ্কি দ জুতপাত বায় বুজ লেদা। অণ্ডেখন ওডোং কাতেঃ রতন দ আমুদপুর সুররে আর মিৎ তুড়ুক জানগুরু ঠেনে ইদি কেদেয়া রাঙ্কি। অণ্ডে সেটের তরাগে জানগুরু দ চেৎ চং রেহেৎ রানে জম ওচো কেদেয়া রাঙ্কি। আর উশৗরাতে 'চামরতে"য় ঝাড় বাড়া কেদেয়া।
অনা তায়ম জানগুরু দ রতনে মেতাঃ দেয়া সিউড়ি হাসপাতালতে উশৗরাতে উদিয় লৗগিৎ। তুড়ুক জানগুরুওয়াঃ অড়াঃখন ওডোংকাতেঃ রাঙ্কি দ নাশেনাঃ এ বেঙ্গেৎ কেদা। রতন দ চেৎ চয় হুদিশ কেৎ, হাসপাতালতে বাং ইদি কাতেঃ অড়াঃতেগে রাঙ্কিয় আগু রুয়ৗড় কেদেয়া। উন দ আতোরে সিমকো রাঃ কেদা। রাঙ্কিওয়াঃ দিশৗ পয়সা আৎ এন তায়া। সেতাঃ পায়াং পোয়োং যাহাঁ অক্তে হাসপাতালকো সেটেরেনা উন দ রাঙ্কি যায়যুগ লেকায় জৗপিৎ উতৗর কেদা।
অনে এন হিলোঃ খনগে রতনে কংকা আকানা, আর ঘানে ঘানেয় রড় এদা, " বাং, বাং, রাঙ্কি ইঞ দ বাং ইঞ গচ্ আকাৎমেয়া, ইঞ দ অকাতেহঁ বাঞ চালাও ওচোয়ামা !"
.webp)
