শিবুলাল মুরমু : সান্তাড়ি মিডিয়ামতে অলঃপাড়হাও লৗগিৎ ভারত জাকাত মাঝি পারগানা মহল এহব খন নিৎ ধৗবিচ্ মিৎ লেতাড় গে আঁদোড় আগুয়েদায়। সান্তাড়ি মিডিয়ামতে বিরদৗগাড়ক চৗলুয় খৗতির আয়মা ধাও ডাহার জাগে দারাম খন এহব কাতেৎ কলেজ, বিশ্ববিদ্যালয়, এমন চেৎ ডি.এম. ঠেন ডেপুটেশন এম, ঘেরাও লেকান কৗমি হরায় করাও আগুওয়াকাদা।
নিয়ৗবার ২০২০ সালরে পোয়লো এইচ্.এস. পাশ কেৎ পৗঠুওয়ৗ কোওয়াঃ কলেজ রে ভরতি আনাট তিঁগু আকান খৗতির ৯ আগস্ট মুদ্রে যুদি সান্তাড়ি মিডিয়ামতে কলেজরে ভরতি লৗইতে সরকারি অনুমোদন বায় ঞামা এনখান ১০ আগস্ট খন লেতাড়গে ডি.এম. ঘেরাও আর ডাহার জাগে দারাম লেকান কৗমি হরায় হাতাও আকাদা মহল। তবে ভারত জাকাত মাঝি পারগানা মহলাঃ নোওয়া হুঁশিয়ৗরি তেগে পালেন ৯ আগস্ট মাড়াং গে লালগড় কলেজরে সান্তাড়ি মিডিয়ামতে ভরতি রেনাঃ সরকারি অনুমোদন ঞাম এনা মেন্তে আয়মা হড়গেক মনেয়েদা।
পারমেন ৬ আগস্ট, ঝাড়গ্রাম রেনাঃ লালগড় কলেজ রে সান্তাড়ি মিডিয়াম তে রাষ্ট্রবিঞ্জান আর ইতিহাস নোওয়া বারয়া সাতাম চেতান সরকারি অর্ডার ঞাম আকান রেহঁ বাং হৗটিঞ মেদিনীপুর ভারত জাকাত মাঝি পারগানা মহলরে অনকা কুশি-রৗস্কৗ বাং ঞেল ঞাম লেনা। অজে লেকাতে বাডায় ঞাম আকানা বাংমা নংকান বারয়া সাতাম অর্ডার এম কাতেৎ অনাকিন সাতাম চেতান রেগে পৗঠুওয়ৗকো পাড়হা লৗগিৎ বাধ্য ক হোয়োঃ কানা মেন্তেগে মহলে মনেয়েদা। বাং হৗটিঞ মেদিনীপুর জেলা জগ পারগানা বাবা মনরঞ্জন মুরমুওয়াঃ মচা খন আরহঁ বাডায় আকানা বাংমা পৗঠুওয়ৗ কোওয়াঃ কাথা লেকাতে মহলাঃ আরহঁ ভূগোল, ফিলোজফি, এডুকেশন, ফিজিকেল এডুকেশন এমান এমান সাতাম লৗইতেহঁ দাবি তাঁহে কানা। আয়মা পৗঠুওয়ৗ কগে নোওয়াক সাতাম লৗইতে পাড়হা রেনাঃ রৗস্কৗকো সদর আকাদা মেন্তে জেলা জগ পারগানা বাবা ঠেন খন গে বাডায় ঞাম আকানা। যুদি অনাক সাতাম রেনাঃ অনুমোদন বায় ঞামা এনখান পৗঠুওয়ৗ কোওয়াঃ সানা বিরুদ্রে কৗমি হোয়োঃ কানা মেন্তেগে মহলে মনেয়া। ওনকো পৗঠুওয়ৗ চেতান বাং সানা সাতাম লাদেয়াকো হোয়ো কানা মেন্তেহঁ মানতান মুরমুয় রড় আকাদা। নোওয়াকো সাতাম সে পৗঠুওয়ৗ কোওয়াঃ চাহিদা অৗওরি পুরুনঃ ধৗবিচ্ বাং হৗটিঞ মেদিনীপুর ভারত জাকাত মাঝি পারগানা মহল লাড়াওনা রেগে তাঁহেনায় মেন্তেগে সদর আকাদায়।
 |
| সেচেৎ মন্ত্রী সাঁও ঞাপাম তায়ম পারগানা বাবাক |
আরহঁ বাডায় ঞাম এনা হলা ৭ আগস্ট ভারত জাকাত মাঝি পারগানা মহল পাহ্টা খন পনৎ পারগানা বাবা বাদল কিস্কু, পনৎ জগ পারগানা বাবা বৈদ্যনাথ হাঁসদা সাঁওতে আরহঁ জেলা খন সেটের লেন পারগানা বাবাক পছিম্ বাংলা পনৎ রেন সেচেৎ মন্ত্রী মানতান পার্থ চট্টোপাধ্যায় সাঁও সান্তাড়ি মিডিয়াম কলেজ আর পৗঠুওয়ৗ কোওয়াঃ ভরতি আনাট লৗইতেক রপড় এনা। বাডায় আকানা মানতান চট্টোপাধ্যায় লালগড় কলেজ বেগর আরহঁ বাঁকুড়া জেলারে মেনাঃ পন্ডিত রঘুনাথ মুরমু কলেজ রেহঁ সান্তাড়ি মিডিয়ামতে পৗঠুওয়ৗক পাড়হাও রেনাঃ দাওক ঞামা। মানতান চট্টোপাধ্যায়দ লালগড় কলেজরে আরহঁ মিৎ-বার সাতাম বাড়হাও রেনাঃ কাথা হঁয় রড় তরা আকাদায় সাঁওতে সবং কলেজ রেহঁ সান্তাড়ি অনার্স চৗলু আ অনা কাথা হঁয় রড় তরা কেদা মেন্তে বাডায় আকনা। দারায় কান অতে মাহা কতেগে অলবেল অর্ডার অডংঅ-আ মেন্তে হঁ বাডায় আকানা। মেনখান বাং হৗটিঞ মেদিনীপুর ভারত জাকাত মাঝি পারগানা মহল পাহ্টা খন বাডায়ঃ কানা বাংমা সেচেৎ মন্ত্রী মানতান পার্থ চট্টোপাধ্যায়াঃ কাথা লেকাতে যাঁহা কাথা কয় লৗই সদর কেদা অনা রেনাঃ অলবেল অর্ডার যুদি যথাৎ অক্তরে বাং অডংঅ-আ এনখান মহলদ মাড়াংতে রড় আকাৎ লেকাগে কৗমি ইদিয়ায়। আরহঁ বাডায় এনা বাংমা সেচেৎ রেদ তিসহঁ বায় আপোষা বাং হৗটিঞ মেদিনীপুর ভারত জাকাত মাঝি পারগানা মহল।
.webp)
