( “১১ জুলাই- ধৗরতি জাকাত হড় লেখা মাহা” দিসৗকাতে )
মৗনমি জানাম-বৗড় তেগে আকাল দারায় কানা
-ডাঃ সুরেন্দ্রনাথ মান্ডি
১৯৮৯ সালরে রাষ্ট্রপুঞ্জওয়াঃ ডেভেলপ্মেন্ট প্রোগ্রাম পরিষদ, হড় লেখা (Population) ইদিকাতে মিৎ গালচ্ আখড়ায় সাপ্ড়াও লেদা। অনা তায়ম সেরমারে রাষ্ট্রপুঞ্জওয়াঃ সাধারন সভায় রিহিট্ গটা লেদা যে, মৗনমি-জানাম বৗড় ইদিকাতে চেহ্গৗউ সে সচেতনতা রেনাঃ লৗগ্তি মেনাঃ আনাং। ১৯৯০ সাল রেনাঃ ১১ জুলাই হিলোঃ ধৗরতি রেনাঃ ৯০গটাং দিসম দ পোয়লো হড় লেখা মাহা (জন সংখ্যা দিবস ) কো পালাও লেদা। নাহাঃ দ ধৗরতি জাকাত রেনাঃ সানাম দিসম রেগে অনা মাহা পালাওয়ঃ কানা।
রাষ্ট্রপুঞ্জওয়াঃ ডগর লেকাতে বাডায়ঃ কানা যে – ধৗরতি জাকাত রে জাও সেরমাগে পেরাই ৮কোটি ৩০ লাখ লেকা মৗনমি কোওয়াঃ জানাম বৗড় সেলেদঃ কানা। অনাতে জানাম–বৗড় টেকাও দারাম রেনাঃ লৗগ্তিঃ কানা। আবো দিসম রেমা আরহঁ তেৎগে জানাম-বৗড় টেকাও দারাম রেনাঃ লৗগ্তি। সাগাল সাগাল মৗনমি বন সাঁগে লেনখান কাঁউডি সামাজিয়ৗ,মেনমা ‘আর্থ-সামাজিক’ সেনতে দিসম তাবো দ তায়মঃ গেয়া। বৗড়তিআ কৗমি বাং ঞামান কোওয়াঃ লেখা, আর বৗড়িচ্ সিখনৗত্ হঁ, সাঁও সাঁওতে আঁধা-পৗত্য়ৗউ হঁ।
ধৗরতি রেনাঃ গুট্ অত হাসা ভিত্রিরে সায়কাড়া বার হিঁস গে আবো ভারত দিসম রে মেনাঃ আ। মেন খান সাঁও সাঁওতেগে ধৗরতিরেন গুট হড় লেখা রেয়াঃ ১৬ হিঁসগে আবো ভারত দিসম রে তাকো গিরৗবাস। মিৎটান হিসৗব খন বাডায়ঃ কানা যে ,ভারত চিন দিসম তালম পারম কাতে হড় লেখা লেকাতে পোয়লো উতৗর ঠাঁও এ হামেটা। সাগাল সাগাল মৗনমি কোওয়াঃ নুনৗ চাপ্ দিসম রেয়াঃ কাঁউডি সামাজিয়ৗরে আয়মা লেকানাঃ এঁটকে টঁড়ে তেয়ারা, বিশেষ কৗয়তে রেঁগেচ্ আনাট রেবন পাড়া আ।
মৗনমি জানাম–বাড় টেকাও দারাম লৗগিৎ আয়মা সেরমা লাহা খন গে আবো দিসম দ লৗগিয়ৗপাড়াওরে মেনায়া। হড়ম সাঁওয়ার আর পুরিবার (ঘাঁরঞ্জ) ভালাই ডিপার্ট হঁ আয়মা লেকাতে মৗনমি জানাম–বৗড় টেকাও দারাম লৗগিৎ চেঁহ্গৗও বৗড় হাও কুরুমুটু রে মেনায়া। অনারেয়া মুড়ুৎ মেনেৎ তেয়াঃ দ- ‘সি-পুরুষ জুদিকিন হোয়ো সমাজদার, পুরিকল্পয়াকিন পুরিবার’। দিসম লাহান্তিয় লৗগিৎতে,আঁপড়ে নাপায় তাঁহেন লৗগিৎতে পুরিবার পুরিকল্পনা, মেনমা – মিৎটান,বাংখান বারয়া খন বৗড়তি গিদৗর–পিদৗর হেঁও-হবর জং আন দ বাংখান বাং তেৎগে। সানাম সরকারি সাঁওয়ার তালমা, হাসপাতালরে গিদ্রৗ জানাম টেকাও দারাম রেনাঃ আয়মা লেকানাঃ পানথা করেনাঃ পরামেস, সঁজগ্-সুবিস্তা ঞামঃআ।
২০১১ সাল রেনাঃ সেনসাস লেকাতে ভারত দিসম রেন মৗনমিয়াঃ লেখাদ পেরাই ১২১কোটি লেকা,জাঁহা দ ধৗরতি জাকাত রেন মৗনমি কোওয়াঃ গুট্ লেখা লেকাতে সায়কাড়া ১৬ হিঁস্। ২০০১ সাল খন ২০১১ সাল হৗবিচ্, মৗনমি বৗড় রেনাঃ হার দ সায়কাড়া ১.৭৬ হিঁস। আর নংকাগে বোন হোয় ইদি লেনখান আবো দিসম নংকানাঃ তে ধৗরতি জাকাত রেয় সরেশঃআ, জাঁহারেনাঃ হামালতেৎ গঃ হোয়োঃ তাবোনা ভারত দিসম রেন মিমিৎ মৗনমিকো। হামাল কুরুকুরু গঃ খন দ অকয় হঁ রিহৗই বাংবো ঞামা। মৗনমি জাঁহাতিনৗঃ বোন বাড়ঃআ অনকাগে বাড়ঃআ কৗমি বাং জুটৗওয়ান হড় কোওয়াঃ লেখা, বৗড়িচ্ সিখনৗৎ, মনে-জিওয়িরে আঁধাপৗতিয়ৗও এমান এমান আর ঝতম খন বতরানাঃ দ হোয়োঃ কানা- দিসম জমাঃ ঞুওয়াঃ রেনাঃ আকাল হোয়ো আ। নিতোঃ ২০২০ সাল রেগে ভারত দিসম রেন মৗনমি কোওয়াঃ লেখাদ ১৩০ কোটি পারম গৎ আকানা। উইহৗর বাড়া লেনখান বতরগে অৗইকৗআ, চেৎ হাহাংকার দিন রেবোন সেটেরঃ কানা।
মৗনমি জানাম–বাড় টেকাও দারাম লৗগিৎ তেদ মেনখান ঢের টেঁক্ঝক্ বৗনুঃ আকাদা। বাডায় লৗগ্তিঃ কানা সুমুং নোওয়া লৗগিৎতে চেৎ চিকৗয় হোয় আবোনা। আর নোওয়া করেনাঃ পরামেস সে সঁজগ্-সুবিস্তা কদ ঞামঃআ স্বাস্থ্যকেন্দ্র, মেনমা হাসপাতাল করেগে। নঅ নোওয়া ক পান্থা করেনাঃ কাথা দবোন আঁজম আকাৎ গেয়া, জেলেকা – ‘ওরাল পিল’,মেনমা আয়োকুখি ভিত্রিরে জ-জৗলি জাতে আল’ সাবঃমা রেনাঃ বড়ি, জাঁহাদ জম হোয়োঃ। অনকাগে ‘কপার টি’ ‘কন্ডোম’ রেনাঃ বেওহার। নোওয়াকদ সরকারি সাঁওয়ার তালমা সে হাসপাতাল খন বেগর গনং তেগে ঞামঃআ। নাওয়া বাপ্লাকিন সি-পুরুষ – অৗকিনরেন গিদ্রৗওয়াঃ সংসার রেনাঃ সমাজ রেনাঃ,দিসম রেনাঃ বুগি বৗড়িচ্ বিচৗর কাতে অৗকিন কুসি কিন এঁগাত্-আপাত্ দাড়েয়াঃআ, নঅয় নোওয়া অস্থায়ী পান্থা কো বেওহার কাতে। জাঁহায় সি-পুরুষ কো আর ধৗরতি পুরিরে গিদ্রৗ বাংকো আগু লৗগিদঃকানা, ওনকো দ নঅ নোওয়া স্থায়ী পান্থা রেনাঃ হঁ দাঁওকো হাতাও দাড়েয়াআ, অনা কদ হোয়োঃ কানা- আয়ো হড় কদ ‘লাইগেসন’, আর বাবা হড় কো খান ‘ভেসেক্টমি’। নোওয়া বারয়া পান্থা হাতাও সে করাও অচ লৗগিৎতে খরচ পৗতি মা বাংগে লাগাঃ, বরংচ সরকারি অনুদান হঁ ঞাম আ। নোওয়াকিন হুডিঞ অপারেশনতে হড়ম রেনাঃ জাঁহান খুতি বাং হোয়োঃআ। হড়ম দাড়ে সাঁওতে ভুঁপুজৗও দাড়ে হঁ বজৗয় তাঁহেনা।
.webp)
.webp)
