(দশার হৗটিঞ)
আঁধাপৗতিয়ৗও আর নাহাঃ জিয়ন
-সুরেন্দ্রনাথ মান্ডি
দুক্ বিপদ খন দোগঃ লৗগিৎ তে তাঁবা, সনা,এলুমিনিয়াম এমান রেনাঃ মাদ্লি,মুদৗম ,পুইসৗ,গ্রহরত্ন,ধিরি,কাঁড়া-কাঁউডি এমান হরঃ দ নাহাঃ বেস্ কিছু হড় আঁধাপৗতিয়ৗও কো মেতাঃকানা। মেনখান তিকিছা সাস্তর এ মেনেদা সনা,তাঁবা সে আরহঁ এটাঃ খনিজ ধাতুক মৗনমি হড়ম সাঁওয়ার দহ লৗগিৎতে অৗডিগে লৗগ্তিয়ানা। নোওয়া করেনাঃ জপটেৎ হড়ম-মনেরে নাপায় অরসঙঃআ। অনাতে নোওয়াক বেওহার (হরঃ) লেখানগে অনাকদ কুসংস্কার সে আঁধাপৗতিয়ৗও কানা,নোওয়া মেনদ ঠিক বাং কানা। অকয়াঃ হড়মরে নোওয়াক ধাতু রেনাঃ লৗগ্তি মেনাঃআ, অনা পরীক্ষা-নিরিক্ষা বাডায় অৗনিচ্ তায়ম গে নোওয়াকদ বেওহার লেগ্ কানা, আর নোওয়া করেনাঃ পরীক্ষা সে বাত্লাও দ ডাকতর কগে কো দাড়েয়াঃআ। নোওয়া বেগর তে বেওহার দ আঁধাপতিয়ৗও লেকাতে বেওহার গে মেন গানঃআ, আর কৗমি রেহঁ বাং লাগাঃআ। নোওয়া কদ বেওহার গানঃআ রোগ-আজার টেকাও দারাম লৗগিৎ তেগে, এটাঃ জাঁহান ফাঁড়া কাটাও, সে জাঁহানা ঞামঃ লৗগিৎতেদ বাং।
আঁধাপৗতিয়ৗও কদ আরহঁ আয়মা আয়মা মেনা আকাদা,অনাকো মুদ্রে আবো সমাজরে অৗডিগে মেনাঃআ ‘ডৗন পৗতিয়ৗও’। ডৗন রে পৗতিয়ৗও দ আঁধাপৗতিয়ৗও কানা। ডৗন,জুগিন,চুড়িন,ভূত মেনতেদ চিলিহঁ বানুঃ কোওয়া। ‘ডৗন বিরদৗ দাড়ে’ মেন তেহঁ চেৎ বৗনুঃআ।
আঁধাপৗতিয়ৗও দ হিজুঃআ জিয়ন রেনাঃ অনিশ্চয়তা বোধ, মেনদ বেগর ঠিক ঠিকৗন জিয়ন রেনাঃ মিৎ অৗনৗইকৗঊ খন। জাঁহায়া জিয়নরে নিরিখ কৗমি হরা বৗনুঃআ, রিলৗমালা তাড়াম হর্ বাং ঞেল্ ঞামঃআ, বিচৗর বিশ্লেষন রেনাঃ দাড়ে বাং তাঁহেনা,উনিয়াঃ মনেরেগে আঁধাপৗতিয়ৗও, মেনদ কুসংস্কার থামগৗড়ি আ। আর নোওয়া রেনাঃ মারাং অজেগে কানা গেয়ান-বিরদৗ ,টাকা-পয়সা আর ধন-দৌলত রেনাঃ অকুলিয়ৗন। মৗনমি নোওয়া কতে জাঁহাতিনৗঃক হাল্লাকঃআ উনৗঃগে এটাঃ হড় চেতান জিয়ন টেঁহাড় লৗগিৎ মনে তেয়ারঃ তাকোওয়া,মেনমা অলৌকিক দাড়ে ঠেন ক সোপ্রোদঃআ। আর অনা দাড়ে বশ্ সে বধাও ঞুতুম কাতে সমাজরেন আয়ুর সোতোঃক, চালাক-চুতুর হড় কদ সমাজরেয়াঃ নংকানাঃ কৗমিতেয়াঃ মেন দ সংস্কার পালাও রেয়াঃ রেওয়াজ ক সিরজৗও আকাদা, জাঁহাতে আকোওয়াঃ স্বার্থগে বৗড়তি পরহঃমা।
আবো আদিবাসী সমাজ খন কূসংস্কার সে আঁধাপৗতিয়ৗও সাহায় কৗমিদ উনৗঃ বাং আল্গাওয়া। এন্তে কাঁউডি,দুরিব তে আয়মা আয়মা কিঁষৗড় হড়, ডাক্তর, ইঞ্জিনিয়ার,অফিসার মেনমা অলঃপাড়হাও বাডায়ান হড়াঃ মনেহঁ আঁধাপৗতিয়ৗওতে পেরেচ্ আকানা; জেলেকা বেগর বাপ্লা সৗগৗই তেগে 'অৗলিঞ/আবেন' আতে মৗন সদর লেকাতে রড়-রপড়্ হঁ নাহাঃ রেনাঃ মিৎ আঁধাপৗতিয়ৗও গে কানা। এনতে নংকান কদ আবোওয়াঃ সনত্ লেগ্চার , পৗরসি রেনাঃ ধার বাংক ধারাওয়া। লেগ্চার , পৗরসি রেনাঃ খাম খুন্টি বাং বাডায় কাতেগেকো রড়-রপড়া, এটাঃ হড় ঠেন খন নংকান রড় আঁজম কাতে। নোওয়া রেয়াঃ মারাং অজেদ কানা লেগ্চার সে সান্তাড় সংস্কৃতি সেচ্তে তায়মরে তাঁহেন। অনাতে মেন গানঃআ কাঁউডি,দুরিবতে আনাট মনেরে আঁধাপৗতিয়ৗও এ সিরজৗও রেঁহ নোওয়া সুমুং গে অজে দ বাং কানা। সানাম সেচ্তে তরাও অৗনিচ্ গে মনেখন আঁধাপৗতিয়ৗও দ সাহাঃআ।
.webp)
