(হুডিঞ কাহনি)
সরলা মৗই আঃ দুখৗলি জিয়ন
 |
| গুলন চন্দ্র মুরমু |
সরলা মৗই দ অৗডি কৗটিচ রেগে চরক চিকাঁড় জালা,আর বাবা হঁ খড়দা জালা খরচ বাঞ্চাঃ খৗতির দিশম কৗমি কড়া চৗকরি জাঁওয়ায় মেনতে,মেন সাঁওতে ইদি গস ক এমা দেয়া। বাংমা সুখতে জমায়।
সাঁও সাঁও তেগে গুজরাট এ ইদি কেদেয়া।
উনদ ফোন বাংতে সুখ দুখ খবর হঁ বাং ঞামঃ কান তাহেঁৎ।
গিদরৗ হড়্ অকাটাঃ কৗমি গে বায় গান খৗতির এপের হেডেঁচ দয় সাহাও লেৎ গেয়া।
বহঃ সিঁদুর,তিরে সাকম দ বাংএ ঞাম আকাদ্ রেহঁ বৗহু লেকাগে তাঁহে এনা।
ইনকৗ ইনকৗ তেগে বারেয়া সোনা মিরু কিন জানাম এনা। আদ আতু দিসম তেক হেজ এনা। আতু দিসমরে তাঁহে তাহেঁতে জাঁওয়ায় আঃ বে-বৗড়িচ্ সৗগৗই জপড়াও লেনতে আদ সরলা মৗইদ বায় মজ্ লেনা।
ঞু বুল হেজ কাতেৎ দিনৗম
লেকাগে দালএ জমা। কোর্ট রে বাপ্লা লেনতে,আতু ষোলোআনা কাথা কদ জাঁওয়ায় বায় বতরাঃ কান তাঁহেৎ । আচার বিচৗর ষোলো আনা কাতেঃ রেহঁ রেহাই বায় ঞাম লেদা। সরলা মৗই দ বারয়া গিদৗর হবর কাতেৎ বাবা অড়াঃতে হেজ্ এনা।
বাবা অড়াঃ রে বাবা হাঃ আবস্হা অৗডি বৗড়িচ্গেয়া,জাঁগারেনাঃ ক্যান্সার আজারগে বাং বেস্ লেন তায়া,সানাম লেকান ডাক্তার,সানাম লেকান বঁগা বুরু বাংক দুঃ দারাম লেদেতে,বঁগা বুরু চেতান
পাত্য়াও হঁ চাবা এন তায়া।
জাঁওয়ায় অড়াঃ খন্ হঁয় ছুডৗর এনা,আর নতে জানাম বাবা তায়হঁ বাং এ বেস্ রুওয়ৗড় দাড়ে আদেয়া।
বারয়া গিদরৗ আশুল হারা হুয়ুঃ তায়া অনাহঁ বাবা অড়াঃ রে। সমাজ রে কুড়ি গিদরৗ হাসা জায়গা ভাগ বাং ক ঞাম জ্বালা অড়া লৗগিদ
ঠাঁওহঁ বায় ঞাম আকাদা বাবা অড়াঃ রে। কুডৗম সেৎরে তালে সাকাম কুম্বৗ কাতেৎ গে গগ বুড়হি ঠেন আজরেন বারয়া গিদরৗ বৗগি হট কাতেৎ কোলকাতা রেন কিষাঁড় গিদরৗ বৗউলি কৗমি এ চালাও এনা সমাজ রেনাঃ বতর জ্বালা সান্তাড় অড়াঃ রেগে।
গিদরৗ বৗউলি বৗউলি তেগে নিজেরেন গিদরৗ দিসৗতে মেৎ খন্ মেৎ দাঃ পুচুজ গদঃ তায়া ,আচ্ রেন গিদরৗ চেৎ লেকা রেচং মেনাঃ কিন্। হুলৗস্ জিওয়ী রে মনে গদায় ,হায়রে চাঁদ ইঞরেন গিদরৗ বৗউলিদ বাম সুযোগ আদিঞা ? মনে জিওয়ী মডঃ মডঃ লঃ রেহঁ অকয় ঠেন এম লৗই আ? মনে রেগে গালাও চাবাঃ আ। আর সমাজ! নিৎ ধৗবিচ ইঞাঃ বহঃরে সিঁদুর বাং ঞুর লেনা! বারয়া গিদৗর উইহৗর তে সৗরদি জুওয়ৗন রেহঁ বায় সাঁঘা আকানা । আর চেৎ সমাজ? মেনখান তাড়াম ডাহাররে পৗউড়ি গিডি সাঁওতে সমাজ রেগে ঢাং অঃ কানায়,। আজরেন গিদরৗ সার সাগুন পেড়া কুশি কাতেৎ আয়াঃ মলং সিঁদুর বাংতে বাংক পেড়া লেনা। দিশম পেড়া বাবাহাঃ খজ্ক হাতাও লেদা ,মেনখান গিদরৗ রেন বাবা উন্ রে বায় সেটের লেনা । বয়হা তায় মিৎটাং গেতে দায়া মায়া উটকুজঃ রেহঁ বৗহু আঃ দুঁদরৗওতে আরহঁ চপৎ রুওয়ৗড়ঃ তায়া। পাশকা অৗশুলঃ আর গিদরৗ হাঃ অলঃ পাড়হাও চালাও লৗগিৎ কোলকাতা রে কৗমি কানা গিদরৗ বৗউলি কৗমি।
মিৎ দিন বয়হা তায় এ ফোন কেদা বাং মা জাঁওয়ায়দ আজাররে পাড়াও আকানা।
তবে হিজুঃ রেহঁয় ১৪দিন বাহরে রে তাহেঁ লাগাও এয়া।,আতু রেনাঃ রায়! লক্ ডাউন চালাঃ কানা,গৗড়ি ঘোড়া জত বন্ধ আকানা।
হিজুঃ রেনাঃ উপৗয় বৗনুঃ আ। ১০বছর বাং এ রড় আকাৎ রেহঁ আজার রে পাড়াও আকান তে গেরাং গেরাং এ রড় কেদা বাংমা নিয়ৗ ধাও তেৎ বাঞ্চাও ইঞ মে। সরলাআঃ মনে ঞুতুম লেকাগে সরল তায়া।
উনাঃ দিন খন রুতি রুতি তে ঘেঁট দহলেৎ ১২ হাজার টাকায় কুল কেদা ডাক্তার ঠেন উদুঃ লৗগিদ আচ্ রেন বয়হা ঠেন্।
আজ্ নিজে তেগে মনেরে চিন্তায়ায় ,ইঞ লৗগিৎতে বাং রেহঁ গিদৗর লৗগিৎ ইঞ বাঞ্চাও এয়া,ইঞ বাবা বাংতে তিনাঃ কষ্টঞ বুজ এদা,গিদরৗদ যেমন অনকা কষ্ট আল কিন বুজ মা । আজ্ দ বায় বূজ আকাৎ রেহঁ ইঞদ বুজ লাগাও ইঞৗ,গিদৗর আল কিন টুওয়ৗরঃমা,হড় তো বাংক বাবা হচ অৗকিনা।
সমাজ রেহঁ লায় গানঃ তিঞৗ বাং মা জাঁওয়ায়দ মেনায় গেয়া,নংকা ভাবনা ভাবনাতে জিউয়ি কেটেজ কাতেৎ হিজুঃ এ রিকৗ কেদা। তালা হর হিজুঃ তেগে জাঁওয়ায় আঃ জিউয়ি
বাতি বায় সেটের দাড়ে আৎ তায়া। মলং হরাসি সিঁদুর আর তিরে মেড়হেৎ সাকম হঁ বাংএ এম হট লেদা! অঁডে রেন মাঝি আজ রেন হপন কানতে সানাম সাফা সুৎরৗ কৗমি রাজি এন রেহঁ,সরলা মৗই আঃ সাকম সিঁদুর দ চিকৗতে মুছৗও তায়া? এম গেত বায় এমাদে তাঁহেৎ।
আর নতে সরলা মৗই আঃ জাং হঁ জাং,তরচ্ হঁ তরচ্ হঁ ত সমাজ তালারে বাং কিন এপেম আকানা ।
নংকান মুহিম অক্ত রেগে রাঃ রাঃতে মড়া পারকম চেতান খনগে মলং রে কিয়ৗ সিঁদুর,তিরে মেড়হেৎ সাকম হরঃ লৗগিৎ এ আঁঠড়ে এনা । পেড়া, পৗরবা আতু ষোলোআনা তালারে হরঃ কাতেৎ তুপু নৗই ঘাট রে বূহেল লৗগিৎ এ সাপড়াও এন্ গেয়া,তবে তেহেঞ ধৗরিচ্ মনেরে কুকলি রাকাপ্ কান্ তায়া -হাপেন দিনরে ইঞাঃ গুতি গঙ্গা কৗমি লৗগিৎ ঠাঁও ইঞ ঞাম আতো জাঁওয়ায় অড়াঃ রে ?
.webp)
