(দশার হৗটিঞ)
বতর দ বাং, সন্তর রেবোন তাঁহেনা
 |
| ডাঃ সুরেন্দ্রনাথ মান্ডি |
করোনা ভাইরাস দ হানে চিন দিসমরে জানাম কাতে ছারাও ছারাওতে নিতোঃ গোটা ধৗরতিপুরি রেগেকো টাপাও কেদা আর লাখ লাখ মৗনমিকো তাঁড়গমেৎ কোওয়া আর জিউয়ি-বৗতি হঁ অকয় কোওয়াঃ দকো ইঁড়িজেৎ গেয়া। মেনখান অকালেকা তেকো ছারাওয়ঃ কানা করোনা ? নোওয়াদ নিরিখ,রিহিট্ সাঁহিচ্ আউরি বাডায় পুরাওয়ঃআ। তবে ঞেলঃকানা করোনাতে তাঁড়গম অচওয়াকান সে করোনা গেঃমেরিয়ৗ কঠেন খন সোর-সোপোররে তাঁহেন , বিশেষ কায়তে জাঁহায় কো সাঁও হেঁড়াঘেঁসা হোয়োঃকান, জপটেৎ-খুঃ আছিম দারায়তে (droplet) ওনকোওয়াঃ হড়ম’রে করোনা কো ছারাও দাড়েয়াঃআ। ‘ছারাঃ আকো’ বাং মেনকাতে ‘ছারাও দাড়েয়াঃআকো’ কাথাদ নোওয়া হতেচ্তে মেন হোয়োঃ কানা যে, সানাম কঠেন দ আরহঁ করোনা বাংকো বল তাঁহে (ছারাঃ) দাড়েয়াঃ কানা। নোওয়া রেয়াঃ আয়মা আয়মা অজ্ মুদ্রে মিৎ মারাং অজ্ দ হোয়োঃ কানা জে, ওনকো মৗনমি কোওয়াঃ “আজার (ভাইরাস) টেকাও দারাম দাড়ে” দ “ভাইরাস কোওয়াঃ আজার হোয় অচয় দাড়ে” খন জৗস্তি গেয়া। নিত দ আরহঁ বিঞ্জানী,ডাক্তর কো,সে WHO-এ মেনেদা যে,হয় দারায় তেহঁ করোনা ক পাসনাও দাড়েয়াঃআ (airborne)। খান, আবো মৗনমি চেৎ ব চিকৗয়া ? অকালেকাতে করোনা সে কোভিড খন সাহা রেবোন তাঁহে দাড়েয়াঃআ ? দেলা অনা কগে মিৎবার বোন গাঁডোনা।
১। অৗডি জৗড়ুড় বাংখান আপনার অড়াঃ খন বাহ্রেতে বাং গেবোন অডকঃআ।
২। অড়াঃ খন বাহ্রেতে জুদি অডকঃ গে হোয়োঃ, তাহলে মু,মচা-মাস্ক বাংরেদ – গামছা, উরমৗল, ওড়না মেনমা জাঁহান লুগ্ড়িচ্তে মু-মচা এসেৎ কাতে অডকঃ হোয়োঃআ। দাড়েয়াঃ তি রে গ্লাভ্স্ আর বহঃ জাঁহানাঃতে টাপঃ লেখান আরহঁতেৎ নাপায়ঃআ। মিৎধাও বেওহার কাতেগে ঠিক জায়গারে অনাকদ গিডি কাঃ হোয়োঃআ; বাং রেদো সাবন-দাঃ তে ভৗগি অকচ্ অৗরুব্ সাফা কাতেৎ দহ্ড়াগারতে বেওহার হোয়োঃআ।
৩। হড় গাদেল রেদো অকালেকাতেহঁ বাংবোন সোরোঃআ।
৪। অড়াঃ খন বাহ্রে অডক্ হোয় লেনখান, অড়াঃতে রুওয়ৗড় তায়ম বেওহারাঃ সানামাঃগে ‘স্যানিটাইজ্’ করাও হোয়োঃআ- সাবন দাঃতে আরুব্ লেকানাঃ দ সাবন-দাঃতে, সারেচ্আঃ কদ ‘স্যানিটাইজার সল্যুশন্’তে।
৫। নিয়াঘৗড়িচ্ দ বেল্ট,ঘড়ি,গয়নাপাতি কদ বাং হরঃ গে নাপায়া; এনতে চিঁকৗড়, লেঁজের জাঁহানা জিনিসরেগে করোনা আয়মা ঘাড়িচ্ লাঠা কো তাহেঁ দাড়েয়াঃআ। পুয়সা আর এটাঃ হড়কো সাঁও জপটেৎ খন হঁ সন্তররে তাঁহেন হোয়োঃআ।
৬। হাঁডে-নাঁডে, ফাঁকা জায়গারে খুঃ,খারাঃ বাং গানঃআ।
৭। মু-মচা- মেৎরে একাল লৗগ্তি বেগর তি ইদি বাং গানঃআ, এন্তে করোনা ভাইরাস কোওয়াঃ, মৗনমি হড়ম’রে অডক বলন হর দ অনাক কান গেয়া। তি কিন রেয়াঃ বেওহার জাঁহাতিনাঃ সম্ভব কম হোয়োঃআ। খুঃ আছিম্ অক্তে তি-তাল্খাতে বাং কাতে উরমাল বাংখান টিস্যু পেপার , বাংখান জাঁহান রুগড়িচ্তে, আর বাংখান তি-মকা ভাঁজ্তে মু-মচা এসেৎ এসেৎ হোয়োঃআ।
৮। আপনারাঃ হড়ম মনে, হরঃ-বাঁদে খন এহব কাতে বেওহারাঃ সানামাঃগে সাফাসৗফি হোয়োঃমা। ঘানে ঘানে সাবন-দাঃ আর বাংখান ‘এ্যাল কোহল বেস্ড হ্যান্ড রাব্ সল্যুশন্’তে ভৗগি অকচ্ তি কিন স্যাআনিটাইজ্ হোয়োঃমা।
৯। আধুনিক তিকিছা সাস্তর (এলোপ্যাথি) নিয়ৗম লেকাতে কোভিড রেনাঃ রান সে টিকা তেয়ার সাতোঃ তাঁগি-তাঁড়ারে বাং তাঁহে কাতে এটাঃ তিকিছা সাস্তর রেন ডাক্তর কোওয়াঃ পরামেশ লেকাতেহঁ কোভিড লৗগিৎ রান-মুরগৗন পেওহার হোয়োঃআ।
১০। হড়ম’রে আজার টেকাও-দারাম লৗগিৎতে ‘আজার টেকাও-দারাম দাড়ে’ (Immunity) বাড়হাও হোয়োঃআ, দিনৗম হিলোঃ দাড়েয়ানাঃ /পুষ্টিকর জমাঃ ঞুওয়াঃ জম ঞু কাতে, রান-মুরগৗন,ভিটামিন বেওহার কাতে,নিয়ৗম মৗফিক যোগ-প্রাণায়াম সেতাঃ আয়ুব্তাড়াম এমান এমান কাতে। নিয়ৗ অক্তে চিনি আর বুলুং কম জম গে নাপায়া। [নোওয়া ক ইদিকাতে “আবোওয়াঃ ওয়েব পেজ্ রে অড়ে-অড়পাত্ সদর হোয়াকানা।]
১১। (জুদি সম্ভব হোয়োঃ) বাজার-সাহার, উসুল দালান অড়াঃরে, আর ‘এয়ার কন্ডিশন্’ অড়াঃরে নিত্ সইদম বাং তাঁহেন গে নাপায়া।
১২। সরকারি হাসপাতাল, স্বাস্থ্যকেন্দ্র রে,আর বাংখান বে-সরকারি ল্য্যাব রে যোগাযোগ কাতে সানাম কোওয়াঃ swab(মু- আর নৗডরি ভিত্রি রেনাঃ খারঃ হাতাও মিউকাস) পুরিক্ষা অচয় হোয়োঃআ। পুরিক্ষারে করোনা ভাইরাস কো ঞাম লেনখান হড়ম’রে কোভিড রেনাঃ উপসর্গ তাঁহেন আর বাং তাঁহেন ‘কোভিড হাসপাতাল’ রেগে তিকিছা দ হোয়োঃমা।
সারেচ্ সানাম কৗমি তেনাঃদ হাসপাতাল, স্বাস্থ্যকেন্দ্র রেন কৗমিয়া কগে কো লৗই আবোনা।
.webp)
