সমাজ তরাওরে বিঞ্জান মনষ্কতা
 |
| -ডাঃ সুরেন্দ্রনাথ মান্ডি |
সমাজ মৗনমি কোওয়াঃ বুগি লৗগিৎ এ কৗমিয়া, অনকাগে মিমিৎ মৗনমি কোওয়াঃ হঁ কৗমি লেক্ কানা সমাজ তরাও লৗগিৎতে। সমাজ রেনাঃ পোয়লো কৗমিগে হোয়োঃ কানা, সমাজ তালারেন মৗনমি কোওয়াঃ জমাঃ ঞুওয়ৗঃ, হরঃ বাঁদে, অড়াঃ দুওয়ৗর, রান মুরগৗন, সাঁওয়ার, লেগ্চার চারচাও আতে নিফুট তাঁহেন রেয়াঃ হরাঃ উদুঃ। মৗনমি কহঁ অৗকিল বৗতি জেরেৎ কাতে ঞুতৗত্ ডাহার কো মারসালা, নাওয়া পিড়হি কো সোপ্রৎ আকোওয়া মিৎ নাপায় ফৗরয়ৗ রিলৗমালা সমাজ দিসম , ধৗরতি।
ধৗরতিরে সিরজৗঃ কানা নানাহুনৗর নেয়াম আর অনা নেয়াম খজ্ তলাস ভেদ্রে তাঁহেন গে হোয়োঃ কানা সাঁড়েষাঃ/গৗহিরৗকিলাঃ কৗমি। মৗনমিগে নোওয়া সাঁড়েষ, মেনদ বিঞ্জান রেনাঃ কৗমিরে জপড়াও কো তাঁহেনা আর অনা কৗমি লৗগিৎগে সাঁড়েষিয়ৗ মনেয়ান মেনদ বিঞ্জান মনষ্কঃ হোয়োঃ লৗক্তি কানাঃ।
ধৗরতিরে আচ্ আচ্তে হোয়ঃকান নানাহুনৗর ঘটন ক – অনাকদ অসাম্ভেড় হাহাড়াঃ বোন মনে দাড়েয়াআ, মেনখান অনাকরেনাঃ জথাত্ অজেতেৎ পাঁজালেখান অনাহঁ ধৗরতিরেনাঃ নেয়াম ,মেনদ প্রাকৃতিক ঘটনা লেকাতেগে হোয়োঃ কানা মেনতেবোন বাডায় ঞামা। প্রাকৃতিক ঘটনা রেনাঃ রেহেৎ মৗনমি কো বাংবো পাঁজা ঞাম দাড়েয়াঃ খান অনা কদ চাঁদো বঁগাওয়াঃ লিলৗ খেলা’, মেনদ অলৌকিক মনে কাতেৎ মনে বো বধাও তাবোনা। মেনখান ধৗরতিরে জাঁহাতিনৗঃ বাডায়াঃ বাং বাডায়াঃ ঘটন ক ঘটাঃআ, অনাকদ অকাহঁ অলৌকিক দ বাং কানা, সানামাঃ গে লৌকিক। নেবেতার সাঁড়েষ অৗডিতেৎ লাহাওয়াকানা, এনতেরেহঁ সানাম ঘটন রেনাঃ অজে কদ বাং হৗত্ড়ৗও ঞামঃ কানা – নঅ নঁডেগে সাঁড়েষ সে বিঞ্জান রেয়াঃ সীমাবদ্ধতাদ।
সাঁড়েষ সে গৗহিরৗকিল মনেয়ান তেয়ারঃ দ মিৎ আনৗইকৗউ কানা, জাঁহাদ জুক্তিয়াতেৎ, গেয়ান আতেৎ চারচাও অৗনিচ্ গে আয়ত্তঃআ। সাঁড়েষ সাতাম চারচাও কাতেৎ মেন দ ডাকতার, ইঞ্জিনিয়ার, অফিসার, বিঞ্জানী এমান হোয় লেনখান সুমুং তেগে সাঁড়েষিয়ৗ মনেয়ান দ অহম হোয় কঃআ। সাঁড়েষ সে বিঞ্জান ইদিকাতে বাং চারচাও কাতে রেহঁ জুক্তি বৗদি মনে, বাডায় সানা মনে, বাডায় সানা মনে জিউয়িরে তাঁহে লেনখান গে বিঞ্জান মনষ্কঃ দ হোয়োঃ সম্ভব কানা। ধৗরতিরে হোয় হিজুঃ কান ঘটন ক তুলৗজখা কাতে সৗরিয়াঃতেৎ আয় উমৗন রেয়াঃ দাড়ে জাঁহায় কোওয়াঃ মেনাঃ আনাং, ওনকোগে গৗহিরৗকিল মনেয়ান, মেনমা বিঞ্জান মনষ্কওয়ান হড়্ দ। সমাজ তরাও রে নংকান মনেয়ান হড়াঃগে নিতোঃ লৗক্তি কানা।
ঝাড়ফুঁক,মানতার বাঁখেড়, সুনুম-সাকাম ঞেল, তুড়ি পাড়হাও এমান, নেতারাঃ সাঁড়েষ জুগ রেদো বাং সাজাঃআ। বঁগাবুরু, ধরম করম করে পাত্য়াও দ সেদায় খনগে মেনাঃআ, আর নংকানাঃ পাত্য়াওতে সমাজ নিতোঃ গৗর মুহিম রেবন ঞুর অচ ওয়াকাদা। নোওয়া ক আঁধা পৗত্য়ৗও খন দোগঃ লৗগিৎতে আয়মা অক্ত লাগাঃআ, আর আঁঝাট হঁ অৗডি আঝাট গেয়া, এনতে নোওয়া তায়ম রে ‘বেব্সা' জপড়াও মেনাঃ আ। ধরম করম মানাও আর বঁগাবুরুরে পৗত্য়ৗও দ মৗনমিক কাঁড়া কোওয়া। জুদিও নোওয়াতে কিছু হড় ক জুমিদঃ আ, মনেরে দাড়ে সান্তি ঞামঃআ, নাপায় আচার আচরন তেয়ারঃ আ- এনতেরেহঁ নোওয়াক আঁধাপৗত্য়ৗও ঠেন আঁপড়ে বাং সোপ্রোৎ কাতেৎ সমাজ তরাও লৗগিৎ তেদো বিঞ্জান মনষ্ক হোয়োঃ লেক্ কানা।
.webp)
