ককয় অৗসুল
সারি ধরম হাঁসদা
সারি ধরম হাঁসদা
ককয় অৗসুলঃ দ গটা দুনিয়ৗ রেগে ছাড়বিড় মেনাঃআ। অকয়াঃ হড়মরে দাড়ে বৗনুঃআ। খাটাও কাতে আরজাও উপৗয় রেনাঃ খেমতা বৗনুঃআ। বাংখান হড়ম দাড়ে ঞুর লেনখান, অকয়রেন চেলে হঁ বৗনুঃ কওয়া। উনকু হড়গে ক ককয়া। কয় কাতেক অৗসুলঃআ। আরহঁ নংকা ঞেল আকানা। অকয় হড়রেন দ নে লেকান দাড়মাকাড় গিদরৗ পিদরৗ তাহেন তুলুজ হঁক কয় হচয়েৎ কওয়া। কাথাচ উনকু গিদৗর পিদৗর দ উনি হাড়াম সে বুডহি হড়াঃ দায়ভৗর বাংক গঃ এদা। হাড়াম বুডহি লেনখান বোঝা মেন্তে ক মনে জংআ। অনাতে উনকু লৗগিৎ তেদ কুডৗম খুঁদড়ি বাংখান হর ধারে রেনাঃ দারে বুটৗগে তাঁহেন ঠাঁও দ হোয়োঃকান তাকওয়া। দিসমরেন মিৎবার হড় ক দায়া আক কান রেহঁ সাঁগিঞ খনগে চুপুৎ চৗওলে এম কাতে নাসে দায়া মাদ্রা ক উদুঃ আক কানা। আর বাংখান আদম কদ বার পুয়সৗ চাপাৎ হট কাতে ক পারম চালাঃ কানা। নড়ে দ সহানুভুতি সালাঃ হারকেৎ সাসেৎ কাথা ক কুলিকুপুলি কাতে বাডায় জং লৗগিৎ চেৎ হঁ বাং তাহেন কানা। নওয়ারেনাঃ মেনেৎ দ হোয়োঃ কানা "বোঝা"সে ভৗরিয়ৗ। জাঁহায় হড় আজরেন হড় হুঁয়ৗ কাতেহঁ উনি জতন জগাও বাং কাতে সংসাররেন বোঝা মেন্তেয় মনে কেদেয়া। অনারে আরহঁ সমাজরেন হড় দ সীলমোহর ক এমাঃ কানা। খান মিৎটেন বয়সালো নাচার জিউয়ি দ নিরুপৗয়রে তিঁগুন কানা। নোওয়া রেনাঃ হঁ কারন দ মেনাঃআ। জুগ অৗরুফেরাঃ কান সাঁওতে সমাজরে মেনাঃ রিহিট গৗধয়ৗও অৗরিচৗলি জিয়ন জিউয়ি হঁ অৗরুফেরাও আকা তাঁহেনা। অনাতে লগন সমাজ সুসৗর মেনকাতে, সমাজ দ অৗরুফেরাও লেখান সমাজ তালারেনাঃ গৗহির নেয়াম নিতি কদ অৗডিসেৎ এতম তালমঃআ। বাহরে রেনাঃ বৗলটৗ অৗসতিয়ৗ উপৗংসা বেধরম নিতি ক অরসং বলনা। নংকা হোয়োঃতে খান মা- মিৎটাং রিলৗমালারে তাঁহেকান সমাজ বেবস্তা দ মৗনমি কওয়াঃ সনৎ সৗগৗই বেভার বাংতে লুচৗলামাট সেৎ অৗয়ুর চালাঃআ।
মিৎ অকতে মৗনমি কওয়াঃ সমাজ বেবস্তারে, ঘারঞ্জ জিয়ন দ জুমিৎরে তাঁহে কানা। অনা খৗতির অনা ঘারঞ্জরেন হড় দ আক তালারে সানাম লেকান গড়ো সপহৎ ক এপেম চাপাল কান তাঁহেকান। জাঁহা লেকান দুক বিপদ গে হোয়োঃ, সহলাতেগে ক তেঁগো দারামলেদা। মেন মা- রুঅৗ হাসো খন এহব কাতে জমাঃ ঞু আঃ সেঁদরা কারকা এমান কৗমি করে হঁ গড়ো সপহৎরে তাঁহে কানা। কাথাচ- মিৎটেন মৗনমি জিউয়িরেনাঃ উমের মৗন মাপনাও হঁ কেটেজরে তাহে কানা। জিউয়ি সাঁও- জিউয়ি তালারে গৗহির সৗগৗই তাহেকান খৗতির সমাজরেনাঃ ঘারঞ্জ জিয়ন হঁ দায়া মায়া সুতৗমতে তপল উরিজ লেনা। উমিনা অকতে দ মিৎ লেকান মানাও বাতাও সাঁওতে সমাজ নেয়াম অৗরি ছন্দ তালাতে সানাম হড় ক অৗয়ুর লেনা। কাথাচ- সংসার ঘারঞ্জগে সামাজ হারাবুরু রেনাঃ পৈল ধাপ দ কানা। মিৎটেন ঘারঞ্জরেনাঃ দায়ভৗর দ সমাজ কাঠামো লেকাতে আয়ো বাবাআঃ তারেনরে লাদে তাঁহেকানা। অনা খৗতির- আয়ো বাবা তাঁহেন ভোর দ অড়াঃ দুওয়ৗর জম ঞু খন এহব কাতে, অত হাসা জায়গারেনাঃ অৗইদৗর দ গিদরৗ কওয়াঃ তিরে দ বাং চালঃ কান তাহেৎ। ঘারঞ্জরে অকয় গিদরৗ ক অকাসেৎ খন চেৎ কক উপৗয় আগুয়েৎ খান অনারেনাঃ বিলহৗন্তি এমচাল হিসৗব জখারেন হড় দ আয়ো বাবাগে ক মানাও বাতাওলেৎ কিন তাহেকান। আর আয়ো বাবা দ ঘারঞ্জরেন গিদরৗ কওয়াঃ বোগে বৗড়িজ আনাট দিসৗ কাতে সনমেল তালাতে কিন কৗমি ইদিয়েৎ কান তাঁহেকান। জাঁহালেকান উঁড়বি উসৗদ্ সেটের লেনখান সঁগেতে রপড় গটা কাতে সালাগটাঃ কান তাঁহেকান। উমিন অকতে সমাজ বেবস্তা দ তাঁহেকানা। পিঁড়হি চেতান পিঁড়হিরে লাদে মেনাঃ সমাজ বেবস্তা। অকা দ ঘারঞ্জরেন গিদরৗ ক জৗরিলে রেহঁ হাসা জায়গা অড়াঃ দুওয়ৗর রেনাঃ অৗইদৗর দ বাংক ঞাম হাতাড় গদা। উনকিন হাড়ম বুঢি অৗসুল মুচৗৎ কাতে, তবেয়েনা উনকু গিদরৗ কওয়াঃ তি রেদ অনা হাসা জায়গা সে ধন দৗঁধি দ চালাঃআ। আরহঁ নংকা ঞেলঃআ- জাঁহায় গিদরৗ আয়ো বাবা বাং অৗসুল গজ কাতে আয়াঃ অৗইদৗর ঞাম জং লৗগিৎতে এটাঃ লেকায় কৗমিয়েৎ খান । সমাজ দ একাল বায় কুসি আয়া। উনি বিচৗরায় লৗগিৎতে সমাজ এ সাব দু়ড়ুব এয়া। সমাজ দ মেনতে হঁয় মতায়া--"আম দ নে ঘৗড়িজ আয়ো বাবা তাহেন ভোর দ চেৎ অৗইদৗরগে বাং খাটাঃ তামা। আর ঘারঞ্জরেনাঃ অংস হঁ বাম ঞামা। আমাঃ দ দাড়ে মেনাঃ তামা। জাঁহারে খাটাও কাতেম অৗসুল দাড়েয়াঃআ।" নংকাতে সমাজরেন বেড়দড় গিদরৗ ক বতর বল আকওয়া। আয়ো বাবা অৗসুল গজ হৗবিজ তাঁগিরে তাহেন হোয়োঃ তাকওয়া।
কয় অৗসুল রেনাঃ হালত দয় দমাও দাড়েয়াঃআ সমাজ বেবস্তা। সমাজ বেবস্তারে হুতি ক বল লেনখান সমাজ মুধুন দ ফরাঃআ। সমাজ দ বাং তেঁগো কেটেজ দাড়েয়াঃআ। খান অৗত পাঁজারেন জজম হুতি কদ সমাজ রেনাঃ নেয় নেয়াম নিতি বাং বাতাও কাতে আকোকার কুসি সমাজ ক লাগায়া। বৗই বৗইতে সমাজরে সিরজনঃআ আসতিয়ৗ অলস কুঁড়য়ৗ লমপুটিয়ৗ বৗলটৗ বেভিচার পসরা পৗঁডিজ এড়ে সুঁড়ুজ উপৗংসা অনাচার-- হড় বরসা জিয়ন।(আজ দ তিসহঁ অর্থনৈতিক তেদ বায় কেটেজ দাড়েয়াঃআ।) অনা হড় বরসা জিয়ন খনগে অন্তর মনে জিউয়িরে তেয়ারঃআ- হিঁসৗ- সুয়ৗ- ঠেঁটা- অৗড়িস- বাটকাটাও লেকান তেঁগো দারাম। সমাজ তালারে নংকান হালত হোয় লেনখান অকয় হঁ অকয়াঃ দায়ভৗর গঃ বাং সানা কওয়া। আরহঁ সমাজ তালারে অনকা লেকান হড়াঃ লেখা বৗড়তি লেনখান সমাজ বিচৗর রেনাঃ রায় হঁ অনকাগে গৗবডুঃ সৗবডুঃরে তেঁগোনা। (হিজুঃআ। লোভ সালস।) কাথারে মেনাঃআ-, আসতিয়ৗ কুঁড়য়ৗ লমপুটিয়ৗ হড়দ তায়ম মাড়াং বাম ক উইহৗরা। উনকু ঠেন দ সেদায়াঃ হোয়লেন উপকৗর অনারেনাঃ মুরৗদগে বাং ক স্বীকৗরা। উনখানগে কাথা কাথাতে নাসে তেগে চড়াং কাথা রাকাব আ। আয়ো বাবা ক আঁজমা--"আম দ অকয় হারা দয় মেতাৎমে তাঁহেৎ। চেদাঃ গিদরৗরেগে বাম লেঁবদ গজ কৗদিঞা" এমান এমান কাথা ক। মিৎ অকতে সমাজ বেবস্তা সনমেল তাহেকানরে নংকান সিরগৗৎ রড় কাথা কদ বাং তাঁহেকানা। হুডিঞ হপড়াঃ চেতানরে ঠৗওকৗ উরুম সৗগৗই তাঁহেকান খৗতির রড় করেনাঃ অৗওহৗ বেভার বাং তাহেকানা। অকয় হড় তিরে অকা উমের ঠাঁওরে তেঁগো কাতে অকালেকান কাথায় রড়া। সমাজ নেয়াম লেকাতে অনারেনাঃ ঠৗওকৗ বুটৗ হঁ তাহেকানা। বতর তাহেকানা। সমাজাঃ হঁ লুতুর মেনাঃআ। মেঁৎ মেনাঃআ। সমাজ দ পালেন বায় কুসিয়াঃ খান অৗড়িসঃ আয় ? সমাজ অৗড়িস হচ লেখান অকয় হড়ে রড়েৎ কান উনি হড়গেয় অৗড়িস হচঃ আ।
যেলেকা নওয়া গটা হড়ম দাপাল এসেৎ লৗগিৎতে জামাপেন্ট সৗড়িরেনাঃ লৗকতি মেনাঃআ। সমাজ বেতার হঁ অনকাগে । ফুটৗ গামছাতে দ গটা হড়ম বাং দাপাল এসেদঃআ। অকা সমাজরেন হড় ক বৗড়িজ অরসংতে মনে বাং উটপুটৗও কাতে, সমাজ নেয় নেমাচার অৗরিচৗলি চেতান ধৈর্য দহ কাতে, বহঃতিরুব কাতে সমাজরে মৗন এম আকানা।অনা সমাজ বেবস্তাগে অৗড়ি দিন টিকৗও হেজ আকানা। সমাজ দ লাপেৎ জম দাকা দ বাম কানা। সানাম ক আতে গালমারাও গটা কাতে সুলুকতে সুসৗর কৗমি রানাকাব হরাগে সমাজ রেনাঃ রিকৗ দ কানা। সমাজরে তাঁহেন হোয়োঃ খান সমাজরেনাঃ অৗরিচৗলি দ পৗতয়ৗও আঃ তেগে হোয়োঃআ। অনা পৗতয়ৗও তালাতেগে সমাজরেনাঃ নেয় নেমাচার অৗরিচৗলি লৗয় লাকচার সৗগৗই বেভার এপেম চাপাল অৗন অৗরি কদ জিয়ৗড় তাঁহেনা। তবে সমাজ লৗওডিয়ৗ সে সমাজ সুসৗরিয়ৗ গৗলিম দ সমাজ অৗরিচৗলি লৗই লাগচার ইদিকাতে সৗকুব আন হড়ে হোয়োঃমা। সান্তাড় সমাজ দ অনকান হড়গেয় খজঃআ। আর অনকান হড়গেয় মৗনমানত আকাৎ কওয়া।
অৗদিবৗসি সে সান্তাড় সমাজরে অৗপিন (আত্মা) রেনাঃ পৗতয়ৗও মেনাঃআ। অনা খৗতির সমাজ খামখুন্টি দ কেটেজরে মেনাঃআ। অৗপিন দ হড়ম জিউয়ি সাঁওতে গাতেরে মেনাঃ মিৎ দাড়েয়ান অৗনৗইকৗও আওভাস কানা। হাপেন হড়ম দ গজ গুর কাতে হাসা ধুড়িরে মিলৗও লেন রেহঁ, অৗপিন দ মৗনমি ক সালাঃ মেলেগুটি কাতে তাহে আকানগেয়া। নওয়া দ অৗদিবৗসি সমাজ ধরমরে পৗতয়ৗও মেনাঃআ। অৗপিন চেতান পৗতয়ৗও খৗতির জাং বাহা দ নৗই দাঃরে বোহেল কাতে আরহঁ অড়াঃরে থাপন রুওয়ৗড়ঃআ। অনা থাপনেন অৗপিন দ বিরৗদৗলি কওয়াঃ ঘারঞ্জ তেঁগো কেটেজ তাঁহেন রেনাঃ দাড়ে ইঙ্গত কানা। গজ হড় দ হড়ম জিউয়ি আতে বৗনুগে রেহঁ দানাংরে তাহে কতেয় ঞেঞেল কানা। বৗড়িজ লেখান ইকৗ দ বায় এমঃআ। পাপ হোয়োঃআ। বোগে লেখান থুম এ এমঃআ। নওয়া অৗপিন চেতান ধরম পৗতয়ৗওগে সমাজরেন মৗনমি দয় তল দহ আকাৎ কওয়া। নডে খনগে হেজ আকানা। সমাজ তালারেন মৗনমি কওয়াঃ মনে জিউয়িরে হালা রাকাব হালা আঁড়গো লেকান মাহামৗন কৗমি ক রেনাঃ কৗরি করতব।
নেতার দ অকয়গে চেৎ এ মনে জং কান অনকাগেয় কৗমিয়েৎ কান। সমাজ দ এঁগা কৗটুব এ উদুঃ আয়কানা। জোরে মোঠেগেয় বুঝৗও এৎখান জাঁহাসেৎ বঁজড়তেহঁ বায় তায়মঃ কান তাম। কাথাচ সমাজ সামেল চেতান পৗতয়ৗও সে ভৗরয়ৗ গগঃরে মনে মকঞ লেনখান সমাজ দ অকা বায় ঞেল আকাদা অনা কগে ঞেল হোয়োঃ তায়া। উন দ হাপেন সমাজরে ককয় হড়াঃ লেখা দ বৗড়তি খন বৗড়তি ইদিঃআ।
মেনখান অৗদিবৗসি সে সান্তাড় সমাজ অনা দ বায় কুসিয়াঃআ। পাপ কানা মেন্তেয় মনেয়া। সমাজরে ককয় কান হড় দ বাং অৗড়িস আয়তে অকয়ে কয় হচয়েকানা। উনি হড়ে পাঁজা ওডোক এয়া। আর উনি হড়াঃ ভৗরয়ৗ গঃ লৗগিৎতেয় বাধ্যয়েয়া।
সান্তাড় সমাজ বেবস্তা দ তাত্বিক দর্সন চেতানরে তেঁগো কাতে তেয়ার রাকাব আকানা। অঁডেনাঃ সামাজিক গড়হন কৗরি দ সেরমা কড়াম লেকা। সানাম উমেররেন হড়গে অঁডে দক সাহবআ। উমের কৗমি হরা রেনাঃ হৗটিঞ হঁ অৗডি ঠিকল। পোনয়া হরাতে অনাদ হৗটিঞ মেনাঃআ। উমের হরা লেকাতে অকয়হঁ অকয়াঃ কৗমি হরারে তি দ বাং ক ঘালাওআ। জেলেকা- 1) বৗলকৗ উমের :- (তরুন বয়স)--নওয়া উমের দ সিখনৗত হাতাও জং রেনাঃ উমের। 2) জুয়ৗন উমের :- জুওয়ৗন উমের দ সামাজিক সিখনৗৎ হাতাও রেনাঃ পৈল ধাপ কানা। অনা সাঁওতে সমাজরেনাঃ অৗডি গটেন, অৗডি সেৎ সেঁড়া তেনাঃ উমের কানা । মেন মা- সমাজ রেনাঃ লৗই লাকচার, অৗরিচৗলি, বঁগাবুরু দেবাসেবা, নেয় নেমাচার, সংসার জিবনরে ভৗরয়ৗ অৗঁগিভার গঃ রেনাঃ প্রেক্টিকেলি দক্ষতা আরজাও জং সাঁওতে সমাজ সেচেৎ রেনাঃ রড় আড়াং সেঁড়াতেনাঃ উমের কানা। অৗথৗওড়ি নেসা পৗনি খন সাহারে তাহেনরেনাঃ উমের কানা। আয়াঃ তায়মরে জাঁহা উমের ক মেনাঃআ। উনকু সঠিক হরতে অৗয়ুর ক রেনাঃ দায় ভার মেনাঃআ। 3) বয়সালো উমের :- নওয়া উমের রেদ লৗই লাকচার কৗমি ক রেনাঃ ছৗড় মেনাঃআ। সমাজ রেনাঃ বিচৗর আচার খন এহব কাতে সমাজরেনাঃ ঝত লেকান কৗমিরেগেয় হহ সোরোঃআ। জুওয়ৗন কক ঞেল সেঁড়ায়া। 4) পুরুধুল উমের :- নওয়া উমের দ পরখ উমের। জাহান কৗমিরে হুড়ৗঃ আল হোয়োঃমা। উনকুআঃ সৗইবলাও সে জপটেৎ এম কাতেয়েনা কৗমি দ সারসৗগুনঃআ সে বঁগা বুরু কওয়াঃ থুম দাড়ে দ ঞামঃআ। জেলেকা- মৗডলৗ চাপাল, বঁগা বুরু দেবাসেবা সে বিহৗ বাপ্লা এমান কৗমিকরে ঞেল গড়োরে তাঁহেন--এমান এমান। নওয়া উমের কদ মিৎ মিৎতে লেবেৎ সেটের লেনএনা।গালমারাওরে দুড়ুব বেরেৎ রেনাঃ দাও এ ঞামা। সমাজ রেনাঃ অনুসাসন তালাতেগে জুগ জুগ ধুরিয়ৗ নোআ সমাজ বেবস্তা দ চালাও হেজ আকানা। এনাংরে লৗই আকানা । সান্তাড় সমাজরেন হড় দ অভিঞ্জতা রেনাঃ মৗন ক বাতাওআ। হড় দ তিনৗঃগে উমের লেকাতেয় পাকটঃআ। উনাঃগে উনি চেতান সমাজরেন মৗনমি দক নির্ভরঃআ। উমের সাঁওতে তাল মিলৗও বাং কাতে কাথা ক রড় লেনখান অনা দ অৗথৗড়িয়াঃগে কানা মেন্তে সমাজরেন হড় দক মনেয়া। "সোর সোর ক সোরঃপে বাং সোর কদ সাহা কঃপে"। নওয়া হঁ জেমন কাথা দ সৗরিয়া -- তুরুই গেল খন জৗসতি উমেরান পুরুধুল হড় দ আয়মা আষাড় আঁঘাড় সে পুরকিতি রেনাঃ হৗল হালত ক ঞেল পারম আকাদা। অকা লেকান ডামারম হয় রিমিলরে অকা লেকান হয় ঝাপটা হেজ দাড়েয়াঃআ। সে অকালেকান চেটের আরেল ঞুরু দাড়েয়াঃআ। পুরকিতিয়াঃ পরিস্হিতিরে পাড়াও কাতে তিরে ভুমিকম্প হোয় দাড়েয়াঃআ। অভিঞ্জতা তালাতে অনারেনাঃ আওভাস দ পুরুধুল কগে ক এম দাড়েয়াঃআ। আর সতররে তাঁহেন লৗগিতে আকোরেন প-পঁগড়া ক মেন দাড়েয়া কওয়া। মেনখান নিতঃ দ মেনগঃআ- সমাজরেন কম উমেরান হড়াঃ তিরে সমাজ অনুসাসন চালাও লেনখান পুরুধুল উমের রেনাঃ হালত চেৎ হোয়ঃআ? অনাহঁ ভাবনা রেনাঃ কাথা দ কানা। হাপেন পুরুধুল উমের দ লৗগতি বাংতে বার্গিলঃআ পালেন ? নঃঅয় নুন মারাং টামডাওরে মেনাঃসমাজরেন মৗনমি কওয়াঃ জিয়ন উমের জখা হিসৗব দ কমঃ কান পালেন। কাথাচ মঁড়ে গেল সেরমা উমের ধৗবিজ বাঞ্চাও তাঁহেন রেনাঃ হিসৗব জখা দহ কাতে বৗকি দিন দ লৗতি বাংতে পুরুধুল উমের দ বাং অৗসুলঃআ পালেন ?
সান্তাড় সমাজ দ এটাঃ সমাজরেনাঃ লাহান্তি ঞেল কাতে মনে জিউয়ি দ অৗডি লগন উটপুটৗঃ কানা। সমাজ কাঠামো বাং তেয়ার কতেগে উনকু লাগা বুঝৗও আকাৎ বনা। কাথাচ জল- জমি- জঙ্গল- তাহেন ঠাঁও--জম ঞু হরঃবাঁদে আর্থিক সমস্যা রেনাঃ আনাট ক লৗগিৎ লাহাতে লাড়াওনা বাং অৗগু কাতে সমাজ ভিতিরেন ২০% হড় লৗগিৎতে লাড়াওনা বন লাহা আকাদা। চেদাঃ সে বাং পৈলতে ভাবাও হোয়োঃ আ। নওয়া সমাজ বেবস্তারে ৮০% হড়দ অকা অবস্হান চেতানরে মেনাঃআ। পুরকিতিয়াঃ বেডহায়রে তাঁহেকাতে কৗওডি নিতি কাঠামো দ তিঁগুরে মেনাঃআ। কৗওডি নিতি কেটেজ লৗগিৎতে খান অৗডি ধর্য্য সয্য সাহাও হোয়োঃআ। পুরিস্হিতি রেনাঃ বেড়হায়রে তেঁগো কাতে মিৎটেন মাইলস্টোন রেনাঃ সাল বছর লৗগিৎতে তাঁগি তাঁড়াঃরে তাহেন হোয়োঃআ। অনাতে সান্তাড় সমাজ দ এনাং খনে লৗই অৗগু আকাদা। আম দ বার এরাঃমে। পে এরাঃমে। প্রোডাকসন দ রিলৗমালা জতন জগাওরে দহয় মে। বাংখান আধাদিনরে সমাজ ছিতিবিতিঃআ। পরিস্হিতি রেনাঃ বডে দাঃতে হিঁসৗ সুয়ৗ ঠঁটা লুচৗলামাট বোরকেঃআ। অকয়হঁ অকয় চেতান দয়া মাদ্রা গড়ো সপহৎ বাং তাঁহেনা। রৗপুদঃআ সৗগৗই। সৗগৗই রৗপুৎ লেনখান সমাজরে কয় অৗসুল হড়াঃ লেখা জৗসতি খন জৗসতি ইদিঃআ। সমাজ অকা বায় ঞেল আকাদা অনা ঞেল হোয়োঃ তায়া।
.webp)
