আবোতেগে আবোওয়াঃ
দবন আদ্ এদা
 |
সতন কুমার সরেন
আবো নআ ধার্তীরে যাঁহা তিনৗগ্ জৗতি মেনাঃবনা সানাম জৗতিকঃয়াগ্ ভিনৗ ভিনৗ রড় মেনাঃ তাবনা ঝত কগে আপান অৗপিন রড় কাতে আক তালারে সৗগৗই সম্পর্ক ক বুঝ অচয় আ। অনকাগে আব সান্তাড় জৗতিহঁ নআ ধার্তীরে আদিম জৗতি মেন তেবন লেখা আ। আবয়াঃ হঁ অনকাগে রড় মেনাঃ তাবন আ। রড় তালাতেগে বুজৗউ আবন আবঃআ সৗগৗই সম্পর্ক আর এমান তেয়াঃ। আব সেদায় খন আবরেন হাপড়াম কক বেওহার আগু আকাদা অনকালেকাতে আব হঁবন বেওহার এদা। আবোয়াঃ সাঁওহেদ বাগান দ অৗডি নিছরৗ নিফুট গেয়া। মেনখান নেতার আব সান্তাড়ক মোদ্রে অৗডিগেবন সেচেৎ আকান রেঁহ অকা অকাসেন রেন সান্তাড় কদ কাথা কাথাতেগে বেন, বিন, সাবাদ বন বেওহার এদা। কাথা কাথাতে বাংলা,ইংরেজী,হিন্দী সাবাদ রড় মেশায় এদাবন। আবোয়াঃ সান্তাড় সাবাদ কগে রড় তালাতে বেওহারবন বৗগি এদা। আদ বৗয় বৗয়তে মি-মিৎটান সান্তাড়ী সাবাদ আবোয়াঃ সাঁওহেদ্ বাগান খন গস়়ঃ মহেঃ কানা। বেওহার ইদি লেখান গেত অনাদ আবরেন হাপেন পঁপগড়াক ক সেঁড়ায় আ। ইঞ হঁ অনকাদ বৗঞ বাড়ায় আ চেদাঃ সে নআ পরিবেশ রেগে তুঞ হারাও আকানা। যাঁহানাঃ অল অক্ত এঁটকে টঁড়ে রিঞ ঞুর লেনখান ,আবরেন গমকে ক যাঁহায় ক সাঁওহেদ ক চার্চাও আ উনকুঠেন ইঞ কুকলি দহ লেখান, উনকুঠেন খনহঁ তুরৗৎ তেলাদ বাং ঞামঃ আ। তাহলে আদ মেন রেয়াঃ চেৎ মেনাঃ আ। নেতার যাঁহায় ক মিৎ বার আবরেন ফেসবুক করে নানা হুনৗর সাতাম ইদি কাতে অনড়হেঁ ,কৗহনীক অল এদ তাবনা উনকুঠেন খনহঁ চিকৗতে নিছরা সান্তাড়ী সাবাদ চিকৗতেবন আশায় আ?
নআ কদ ভারতরেন সানাম পনত রেন সান্তাড় ক মুদ রেগে ঞেল ঞামঃ কানা।
বিশেষ কায়তে মেনগানঃআ বাংলা পনৎ বাদ লেখান আর পনৎ রেন সান্তাড় ক মুদরেগে বেন, বিন, রেয়াগ চল দ ঢের ঞেল ঞামঃ আ। আর উনকু ঞেলতে আব পছিমবাংলারেন কহঁবন ধুরৗউ আকানা। ঝত গে আবদ উনকু আঃবন পিছৗয়েদা চেদা? বেশ বৗড়িচদ বাবন তুলৗঝখায় আ? যেমন কিছু বছর মাড়াং অন্তেখন গে ছাপল মেনতে মিৎটান এনেচ সেরেঞ গুরলৗউ হেচ এনা,অনাতে এমন বন মাতাও এনা যে বাহা সহরায় বিহৗ-বাপ্লা করে তুমদৗ টামাক বৗগিকাতে সাউন্ড বক্স তে দেদার বন এনেচ্ জংকানা। আবয়ান লাকচার বন আৎ এদ্ কানা।
আবরেন নেতাররেন বৗবুতেক অৗডিগে এনেজ্ আখড়া করে তুমদৗ টামাক গগঃ ক লাজা কানা। বাপ্লা অড়াঃ এম মেন,দং লাগড়েম মেন ঝত করে গে Dj box তে সেরেঞ আঁজম কাতে ক এনেজ্ কানা আদ ঞেল ঞেলতে আতু অড়াঃ করেহঁ আস্তে আস্তে তে অনা করেনাঃ বেওহার দ আদঃ হররে। আদ আবরেন হাপেন দিন রেন পঁপগড়া কদ সেঁড়ায় আক চিকৗতে? আদ চেদাঃ আদ বাক কুলিবনা তুমদাঃ ক ঞেল লেখান,মেনগেয়াক নআদ চেৎ কানা? চিকৗয় আক নআ দ? আব যদি নিৎহঁ বাব সন্তরঃ আ তাহলে অনা দিনদ হিজুঃতে দেরী বানুঃ আ।
যাঁহাগে আর এটাঃ এটাঃ পনত রেন যাঁহা ক লৗয় আ অনাগে আববন বেওহার এদা। আবোওয়াঃদ বেশ বৗড়িচ বুজ রেয়াঃ দাড়ে বৗনুঃ আ কি? যেমন লৗই বেশ, লৗই বাড়িচ ইঞ মেন এৎ খান ইকৗঞ খজ্ কানা। যেমন সারনা ধরম হঁ অন্তেখনগে আব পছিম বাংলা তেদ হেচ্ আকানা। সারনা ধরমদ আব বাব বাড়ায় এৎ তাঁহেন,উনকু গে অনারেয়াগ ইতৗদ আব পনত রেক ছুড়িয়ৗউ আকাদা। আর অনারেয়াং অরসংতে আব মুদরে তুপুদ্ তাপাম এহব আকানা। আব মুদরে সৗরি সারনা রেয়াঃ মিৎটান রেয়াড় লৗড়হৗই এহব আকানা। আরহঁ আবয়াং জানাম রড় ইদিকাতে,আবদ আপনার আয়ূ আড়াং তেদ অড়াঃ করেদ গিদৗর পিদৗর সাঁও আবওয়াগ আয়ু আড়াংতেদ বাংবন রড় এদা।
পছিম বাংলারেন কদ, বাংলাতে, উড়িষ্যারেন দ উড়িয়াতে আর ঝাড়খন্ডরেন দ হিন্দী তে আব সান্তাড় সান্তাড়হঁ অনাক আড়াংতেগে বন রড় কানা।
পৗরিশ ঞেল কাতেম কুলি লেখান আপনার গে লাজাও গেম বুঝ আ। আলে নডে টাটা বাজারদ সুর গেতালেয়া, প্রায় দিন গে রান অচঃ লে চালাঃগেয়া। সান্তাড় বুঝ কাতেম কুলিলেকখান,যাঁহানাম এম মেনলেখান যে, অনা রান দকান দ অকাসেন? উনদ তেলা হিজুঃ আ 'কেয়া বলতা হুঁ ' ইঞদ হিন্দীদ উনাঃদ বাঞ বুজৗ। লাজাও গেম বুঝ আ। আদ নঅয় নংকা আবয়া অবস্থা দ হুয় আকানা। আর বন মেন এদা আবরেন মৗই বৗবুতেকদ আয়ু আড়াংতে বাংক রড় এদা। জানাম রড় বাংক বাড়ায় আ এমান এমান। মেনখান আবগে অড়াঃ দুয়ৗর করে গিদৗর পিদৗর সাঁও বাব রড়েৎ কানা। আদ সেঁড়ায় আক চিকৗতে? সানামাঃগে আবঃ হড়াঃ গেবন আপনার এদা। আদ নিছরা দ তাঁহেন আব চিকৗতে? অনারেন দায়ীদ সানাম আব সেচেৎ আন আয়ুবাবাকগে। আডি সেচেৎ ঘাঁরজ করেগে নআ দ ঞেল ঞামঃ কানা। যে সান্তাড় কান রেঁহ বন সান্তাড় তেদ বাব রড় এদা।
মৗনমী দবন হুয়ু কানা নাওয়া আগ্ বন কুসি আগ্ আ। যাঁহানাঃ গে নাওয়া বন ঞেলা,আঁজমা, অনাগে বেওহারবন কুশিয়াঃ আ। অনকা অনকাতে এমন মিৎটান দিনরেবন চালাঃ আ যে আপনারাঃ দ সানামাঃ বন হিড়িঞ চাবায় আ,হড়াঃ গেবন হডগর বাড়ায় আ। আদ ঞেল লেঞতে আবয়াঃ উপরুম হঁবন আদ আ। দহড়া আরহঁ অনা বেন, বিন কাথা ইদি কাতে গিঞ মেন এদা। বেন বিন দ আবয়াগ্ সাঁওহেদ্ রে সৗগৗই লেকাতে বেওহারঃ আ জৗনিজ্? যেমন বেন সাবাদ বেওহার রেদ বুঝাঃ আ বার হড়,আপে সাবাদ রেদ বার হড়খন বাড়তি,বেন দ সৗগৗই রে বেওহারঃ আ, যেমন হঁনার বাঁহঞার,মামা ভৗগনা,আঝনার,বগৎ বৗহু,কিমিন এমান করে। মেনখান ঞেলঃ কানা আডিগে আথৗনথৗড়ি বেন সে আবেন মেনবন ধুরৗউ আকানা। মিৎদিন মিৎটান বাং উপরুম হড়াঃ ফোন হেচ আদিঞ তাঁহেনাঃ। মেন এদায় গমকে জহারগে চেৎ লেকা মেনাঃ বেনা। নঅয় নকাবন রড়েৎ কানা। আদ ইঞাং মেনদ ইঞ কি উনিরেন মামা কি ভৗগনা,সে এমান যাঁহা সাবাদ কদ আব সৗগৗই রে 'বেন'বন বেওহার অনাক ভিতির রে অকাটাঃ রেঁহ কিঞ পাড়াঃ আ? বৗঞ পাড়াঃ আ তাহলে আথান থাড়ী বেওহার কাতে আবয়াঃ সাঁওহেদ বন খাটয় এদা। আব ক বেওহার আঁজম তে আবরেন গিদৗর পিদৗর হঁ অনকাগে ক আজম সেঁড়ায় এদা। আর অকয় অকা লেকা রড় আয় হুয়ুঃ বাক বুঝৗউ ঞাম এদা।
আদ ঞেল ঞেলতে আব এমন মিৎটান যুগসেন পৗউড়িবন গিডি এদা যে মিৎদিন আবয়াঃ সান্তাড় মেনতে উপরুম তাঁহেনা না সে বাং মনে জিউরী কুকলি সিরজৗ কানা। অনাতে মুচেৎ রে নিয়ৗগে মেমেন বুঝৗউ ইঞ কানা সানামাঃ গে জৗনিজ্ আব তেগে আবয়াঃগ দবন আৎ এদা?
.webp)
