বীরভূমরে রেঁগেচ্‌ নাচার হড় সোররে সুসার গাঁওতা

শিব শংকর সরেন, বীরভূম – জেগেত জাকাত গটাগে নিত করোনা ভাইরাস (কোবিন্দ -১৯) আঃ মিৎ জিউয়ী নাশাও বতরান আজারতে সানামগে লোকোৎ লোকোৎ অড়াঃরে। দিশমরে লক ডাউন তায়ম তায়ম তেগে রেঁগেচ্‌ নাচার হড়ঠেনদ অনারেনাঃ অরসং লগন পাড়াও গৎ আকানা। দিনাম কামি জম হড়ঠেনদ মিৎ বেড়া বাহ্‌রে বাং উডুক লেনখান লাহারে জমাঃ রেগে টান পাড়াঃআ। সানাম জায়গা রেগে যখন নংকান চিতার ঞেলঃ কানা উনরে বীরভূম জিলাহঁ বাং বাদ লেনা। বীরভূম সিউড়ি টঠারেন হড়দ আডি হালত রেক পাড়াও এনা। আয় উপায় চেৎহঁ বানুঃ আন। নংকান মুহিম অক্তরে সিঞচাঁদ আর ঞিদাচাঁদ লেকাগেকিন উপেল এনা রবিন সরেন আর ভীম মুরমু ঞুতুমান মিৎ জড় সাঁওতা সুসারিয়া। মানতান সরেন আর মুরমুদ আদিবাসী গাঁওতারেন রাসিয়াক লাইতে ছুটাও এনাকিন সুসার কামি। এহব কেদাক দুয়ার দুয়ার রেগেচ্‌ নাচার হড় লাগিত চাওলে,ডাল,আলু,সুনুম,সাবন এমান জিনিস পাতিক এম। এম এমতে তিনাঃ শায় শায় হড় এম হুয়ুঃ কানা নিত রবিন বাবু তাক ঠেন অনা রেনাঃ হিসাব বানুঃ আন। এনহঁ নিৎ ধাবিচ্‌ বাডায় আকানা সিউড়ী আর রামপুরহাট বারয়া মহুকুমা লাইতে মঁড়ে হাজার খনহঁ বাড়তি পরিবার গড়ঃ এম চাল হুয় আকানা। নিৎহঁ এম চাল কামিহরা চালাঃ কান গেয়া। ক্লাব সুৎরেৎ মানতান ভীম মূরমু লাই সদর আকদায় যে যাঁহা তি্নদিন নওয়া লক ডাউন তাঁহেনা উনদিন ধাবিচ্‌ নওয়া গাঁওতা নংকান কামি হরায় চালাও ইদিয়া। মানমি সেবা মানে দিশম সেবা মেন্তেহঁয় মনেয়া মানতান মুরমুদ। সুসার কামি চেৎ কানা নিত্‌ গটা দিশম হড়ক বাডায় ঞাম এদা। নে মাড়াং সিউড়িরেন হড়দ চেতানরেগে চাঁদ মেনায়া মেন্‌তেগেক বাডায় কান তাঁহেকানা। মেনখান নিত্‌ নংকান মুহিম অক্তরে বাডায় কেদাক বাংমা লাতাররেঁহ চাঁদ দ মেনায়া। সিউড়ি আদিবাসী গাঁওতাদ সারিগে যে মিৎটাং সুসার গাঁওতা কানায়, অনাগে আয়াঃ কামি তালাতেয় পরমান কেদা। আর নওয়া সানাম রেন লাউড়িয়াদকিন হোয়োঃকানা গাঁওতা পারসেৎ মানতান রবিন সরেন আর সুৎরেৎ মানতান ভীম মুরমু গম্‌কে তাকিন। মেনখান মানতান সরেন আর মুরমু গম্‌কে তাকিনদ নওয়া কাথাহঁকিন বাতাও সারি আকাদা যে গাঁওতারেন আর রাসিয়া কোওয়া গড় বেগর নুন মারাং কামি বাং সারি কঃআ।