সিঁগি মাহা রেনাঃ সাকাম ‘চেরেচ্ আড়াং’ লেখা- ১৬১

 

“আবোওয়াঃ কাথা” গে উছৗনঃডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড় গে উছানঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান- ᱥᱩᱵᱩᱫᱤᱭᱟ.ᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ, ᱱᱰᱤ,  ᱠᱤᱥᱠᱤᱱᱫᱷᱟ   ᱢᱩᱨᱢᱩ,  ᱨᱟᱢᱯᱚᱫᱚ ᱠᱤᱥᱠᱩ, ᱯᱩᱨᱱᱚ ᱪᱚᱱᱫᱽᱨᱚ ᱠᱤᱥᱠᱩ,  বাড়তাং  সরেন, সুচাঁদ হাঁসদা, সুরেন্দ্রনাথ হেমব্রম, দুর্গাচরণ মুরমু , সিতেন মান্ডি,  সনৎ কুমার হাঁসদাঃ, দুগাই টুডু।

  

১।। 

ᱥᱮᱨᱢᱟ ᱤᱯᱤᱞ

ᱥᱩᱵᱩᱫᱤᱭᱟᱹ ᱢᱩᱨᱢᱩ

ᱥᱮᱨᱢᱟ ᱪᱟᱸᱫᱚᱭ ᱥᱤᱛᱩᱝ ᱠᱮᱫᱟ
    ᱨᱤᱢᱤᱞ  ᱪᱮᱫᱟᱜ ᱵᱟᱱᱩᱜ ?

ᱥᱮᱛᱟᱜ ᱠᱷᱚᱱᱟᱜ ᱵᱟᱰᱟᱭ ᱥᱟᱱᱟ
    ᱦᱚᱯᱚᱱ ᱵᱟᱵᱩᱭ ᱡᱷᱟᱱᱩᱜ ।

ᱚᱛ     ᱥᱮᱨᱢᱟ     ᱫᱤᱲᱢᱤ   ᱞᱮᱠᱟ
    ᱯᱷᱩᱞᱟᱹᱣ   ᱜᱮᱥᱮ   ᱦᱮᱱᱟᱜ।

ᱟᱹᱪᱩᱨ  ᱵᱤᱦᱩᱨ   ᱦᱤᱡᱩᱜ ᱥᱮᱱᱚᱜ
     ᱫᱤᱱᱟᱹᱢ  ᱫᱤᱱᱢᱟ   ᱵᱮᱱᱟᱜ ।

ᱚᱣᱟᱝ    ᱛᱟᱞᱟ   ᱤᱯᱤᱞ     ᱮᱸᱜᱮᱞ
      ᱪᱤᱠᱟᱹ ᱛᱮᱠᱚ  ᱰᱷᱟᱸᱝᱚᱜ ?

ᱥᱟᱨᱟ ᱜᱷᱟᱹᱲᱤᱪ ᱫᱷᱟᱹᱨᱛᱤ ᱛᱟᱵᱚ
      ᱪᱮᱫ   ᱛᱟᱱᱟᱜᱛᱮ  ᱚᱝᱚᱜ ?

ᱵᱟᱰᱟᱭ   ᱥᱟᱱᱟ  ᱱᱩᱱᱟᱹᱜ ᱠᱟᱛᱷᱟ
       ᱥᱮᱨᱢᱟ    ᱤᱯᱤᱞ  ᱠᱚᱣᱟᱜ ।

ᱚᱠᱚᱭ    ᱦᱟᱞᱮᱭ    ᱞᱟᱹᱭ    ᱟᱻᱢᱟ
        ᱢᱚᱡᱛᱮ   ᱠᱟᱛᱷᱟ ᱡᱚᱢᱟᱜ ।

========≈== ᱞ ᱧ =============

২।।

ᱱᱟᱜᱟᱢ

ᱜᱳᱯᱮᱥᱣᱚᱨ ᱢᱟᱹᱱᱰᱤ

  

ᱱᱟᱜᱟᱢ ᱯᱟᱲᱦᱟᱣ ᱢᱮ

ᱟᱜᱟᱢ ᱵᱩᱡᱷᱟᱹᱣ ᱢᱮ ᱾

 

ᱧᱩᱛᱟᱹᱛ ᱥᱟᱦᱟᱭ ᱢᱮ

ᱢᱟᱨᱥᱟᱞ ᱟᱹᱜᱩᱭ ᱢᱮ ᱾

 

ᱡᱤᱭᱚᱱ ᱠᱷᱟᱸᱰᱟᱣ ᱢᱮ

ᱱᱟᱯᱟᱭ ᱛᱟᱸᱦᱮᱱ ᱢᱮ ᱾

 

========≈== ᱞ ᱧ =============

৩।।

ᱜᱟᱛᱮ   ᱥᱟᱸᱣᱛᱮ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

  

ᱥᱟᱨᱟ ᱵᱮᱲᱟᱜᱮ ᱜᱟᱛᱮ ᱥᱟᱸᱣᱛᱮ

       ᱢᱤᱱᱟᱹᱧ  ᱥᱟᱸᱣ  ᱠᱟᱛᱮ,

ᱠᱷᱤᱞᱰᱩ ᱮᱱᱮᱪ ᱫᱩᱲᱩᱵ ᱯᱟᱱᱚᱛᱮ

            ᱫᱟᱹᱲ ᱫᱟᱸᱲᱟ ᱟᱛᱮ  ᱾

 

ᱡᱷᱩᱲ ᱜᱟᱡᱟᱲ ᱥᱮᱸᱫᱽᱨᱟ ᱜᱚᱫᱟ

            ᱟᱞᱮ ᱜᱟᱛᱮ ᱜᱟᱛᱮ,

ᱩᱞ ᱛᱤᱭᱳᱜ ᱡᱚᱡᱚ ᱛᱤᱭᱳᱜ

    ᱥᱟᱨᱟ ᱵᱮᱲᱟᱜᱮ ᱢᱤᱫᱛᱮ  ᱾

 

ᱚᱞ ᱥᱮᱸᱲᱟᱭ ᱯᱟᱲᱦᱟᱣ ᱪᱮᱫᱟ

            ᱪᱟᱞᱟᱜ ᱟᱞᱮ ᱚᱞᱚᱜ ,

ᱛᱟᱨᱟᱥᱤᱧ ᱵᱮᱨ ᱨᱩᱭᱟᱹᱲ ᱦᱤᱡᱳᱜ

     ᱚᱲᱟᱜ ᱛᱮᱜᱮᱞᱮ  ᱵᱚᱞᱚᱜ ᱾

 

ᱱᱟᱹᱭ ᱯᱩᱠᱷᱨᱤ ᱦᱟᱠᱳ ᱥᱟᱵ ᱠᱚ

      ᱥᱤᱫ ᱵᱟᱜᱟᱱ ᱵᱟᱦᱟ  ,

ᱟᱞᱮ ᱜᱮᱪᱚᱝ ᱨᱟᱜ ᱞᱟᱱᱫᱟᱭ

    ᱛᱟᱲᱟᱢ ᱛᱟᱭᱚᱢ ᱞᱟᱦᱟ  ᱾

 

ᱠᱩᱞᱦᱤ ᱰᱟᱦᱟᱨ ᱠᱷᱮᱞᱳᱰ ᱰᱟᱹᱦᱤ

      ᱨᱟᱹᱣ  ᱨᱟᱹᱣᱜᱮ  ᱡᱚᱛᱚ ,

ᱧᱤᱫᱟᱹ  ᱥᱩᱢᱩᱝ ᱟᱯᱟᱱ ᱟᱯᱤᱱ

         ᱛᱟᱸᱦᱮᱱ ᱟᱞᱮ ᱢᱚᱛᱚ   ᱾

 

ᱯᱟᱭᱨᱟ ᱛᱳᱯᱳᱱ ᱥᱤᱛᱩᱝ ᱨᱟᱵᱟᱝ

      ᱛᱟᱸᱦᱮᱱ ᱜᱮᱭᱟ ᱜᱟᱛᱮ  ,

ᱠᱷᱤᱞᱰᱩ ᱥᱩᱞᱟᱝ ᱟᱞᱮ ᱛᱟᱞᱟᱨᱮ

          ᱠᱩᱥᱤ ᱨᱟᱹᱥᱠᱟᱹ ᱟᱛᱮ  ᱾

 

ᱦᱚᱲ ᱠᱚ ᱞᱟᱹᱭ ᱮᱥᱠᱟᱨᱨᱮ

        ᱛᱟᱸᱦᱮᱱ ᱵᱟᱝ ᱵᱩᱜᱤ ,

ᱥᱟᱱᱟᱢ ᱥᱟᱞᱟᱜ ᱜᱟᱛᱮ ᱢᱤᱫᱛᱮ

    ᱡᱩᱢᱤᱫ ᱫᱟᱲᱮ ᱵᱷᱟᱜᱮᱜ ᱾

========≈== ᱞ ᱧ =============

৪।।

ᱨᱩᱣᱟᱹ ᱦᱟᱥᱩ

ᱨᱟᱢᱯᱚᱫᱚ ᱠᱤᱥᱠᱩ

  

 ᱨᱩᱣᱟᱹ  ᱡᱩᱫᱤ  ᱦᱤᱡᱩᱜ

ᱡᱚᱢ ᱦᱳᱭᱳᱜᱟ  ᱨᱟᱱ

ᱰᱟᱠᱛᱟᱨ   ᱚᱲᱟᱜ ᱪᱟᱞᱟᱣ ᱦᱳᱭᱳᱜ

ᱟᱞᱚᱢ ᱯᱟᱸᱡᱟ ᱠᱚ ᱡᱟᱱ᱿

 

ᱡᱟᱱ ᱜᱩᱨᱩ  ᱫᱚᱭ ᱮᱲᱮ ᱢᱮᱭᱟ

ᱦᱟᱱᱟ ᱱᱟᱣᱟᱭ ᱵᱚᱨᱟᱛ ᱟᱢᱟ ᱾

ᱥᱟᱯᱷᱟ ᱥᱟᱯᱷᱤ  ᱛᱟᱸᱦᱮᱱ ᱦᱳᱭᱳᱜ

ᱱᱟᱯᱟᱭ ᱡᱚᱢᱟᱜ ᱡᱚᱢ ᱦᱳᱭᱳᱜ ᱿

========≈== ᱞ ᱧ =============

৫।। 

ᱜᱤᱫᱨᱟᱹ ᱵᱟᱸᱣᱞᱤ

ᱯᱩᱨᱱᱚ ᱪᱚᱱᱫᱽᱨᱚ ᱠᱤᱥᱠᱩ

 

ᱡᱚᱡᱚ ᱰᱤ ᱨᱮ ᱡᱚᱡᱚ ᱵᱟᱱᱳᱜ

ᱩᱞ ᱰᱤ ᱨᱮ ᱩᱞ ᱵᱟᱱᱳᱜ

ᱨᱟᱢᱯᱩᱨ ᱨᱮᱱ ᱪᱟᱴᱷᱟ ᱪᱩᱱᱩ

ᱨᱟᱜ ᱮᱫᱟᱭ ᱠᱷᱩᱱᱩᱜ ᱠᱷᱩᱱᱩᱜ᱾

 

ᱵᱟᱨᱩᱜᱷᱩᱴᱩ ᱨᱮ ᱵᱟ ᱨᱩ ᱵᱟᱱᱩᱜ

ᱛᱮ ᱨᱮᱞ ᱜᱷᱩᱴᱩ ᱨᱮ ᱛᱮ ᱨᱮᱞ ᱵᱟᱱᱩᱜ

ᱰᱟᱝ ᱦᱚᱨ ᱰᱤ ᱨᱮᱱ ᱦᱟᱵᱞᱟ ᱠᱩᱱᱩ

ᱵᱟᱵᱞᱟ ᱡᱟᱱᱩᱢ ᱜᱮ ᱛᱟᱭ ᱨᱩᱱᱩᱡᱷᱩᱱᱩ᱾

 

ᱥᱚ ᱜᱮ ᱰᱤ ᱨᱮ ᱵᱟᱠᱳ ᱥᱚᱜᱮᱜ

ᱛᱟᱲᱟᱢ ᱦᱚᱲ ᱠᱚ ᱛᱚᱸᱜᱮᱜ

ᱵᱟᱸᱫᱷ ᱜᱟᱸᱰᱤᱭᱟᱸ ᱨᱮ ᱵᱟᱠᱳ ᱡᱚᱵᱮᱜ

ᱵᱟᱝᱠᱷᱟᱱ ᱨᱟᱠᱟᱵ ᱠᱟᱛᱮᱜ ᱠᱚ ᱠᱚᱸᱵᱮᱜ᱾

 

ᱡᱷᱟᱸᱨᱭᱟᱸᱰᱤ ᱠᱩᱴᱱᱤ ᱠᱟᱸᱠᱩ

ᱡᱩ ᱫᱤᱢ ᱥᱮᱱᱚᱜ ᱵᱟᱠᱳ ᱡᱷᱩᱠᱩᱜ

ᱢᱤᱫ ᱵᱮᱲᱟ ᱥᱮᱱᱚᱜ ᱢᱮᱥᱮ ᱞᱩ ᱠᱩ

ᱟᱞᱚᱢ ᱞᱟᱡᱟᱜ ᱦᱩ ᱠᱩ ᱯᱩ ᱠᱩ᱾

 

ᱥᱮᱛᱟᱜ ᱨᱮ ᱵᱮᱨᱮᱫᱽ  ᱠᱟᱛᱮ

ᱟᱯᱽ ᱦᱩᱛᱩᱢ ᱯᱷᱟᱨᱪᱟ ᱠᱟᱛᱮ

ᱡᱳᱜ ᱵᱮᱭᱟᱢ  ᱟᱨ ᱫᱷᱮᱭᱟᱱ  ᱞᱮᱠᱷᱟᱱ

ᱦᱚᱲᱢᱚ  ᱛᱟᱦᱮᱱ  ᱱᱟᱯᱟᱭ ᱞᱮᱠᱟ ᱿

========≈== ᱞ ᱧ =============

৬।। 

আইদৗর লৗগিৎ তাড়াম

বাড়তাং সরেন 

 

এ গো নায়ো তোওয়া দারে 

                      হানে কয়ক্ মেসে 

ডাহার তালা দুঁগুঁদ দুঁগুঁদ 

                      গোটা তেরে তেসে।

 

‌‌আয়ো বাবা তিরলৗ হপন

                 রাজ নাগার তালারে

তাড়ামাকো মুরুক আতে 

                    একাল থারে থারে।

 

অকয় তিরে আঃ আপৗড়ি 

                      অকয় তিরে কৗপি

অকয় দকো সাব আকাদা

                      অকয় হাবাঃ হৗপি ।

 

রেগড়া টামাক সাডেকানা 

                    একাল দিড়িম দিড়িম 

সাঁকওয়া সিঙ্গৗ রাঁওয়াঃ কানা 

                      উসুল দলান সৗড়িম ।

 

লাঙ্গা রেঙ্গেজ দেয়া কাতেঃ

                    তাড়াম চিরগৗল আতে 

জিৎকৗর-সেরেঞ সেরেঞাকো

                      আডি গারজাও আতে ।

 

নাগার বাজার আন্দোড়েনা 

                আইদৗর তাড়াম খৗতির 

পুলিশ কোদ বান্দুক  আতে 

                      সানামগে তিঙ্গু থির ।

            

ক্ষেত- হাসা আর দারে নৗড়ী 

                          বুরু নালা টাণ্ডি

অড়াঃ ডিণ্ডৗ বাঞ্চাও লৗগিৎ 

               উঢৗও জিৎকৗর ঝাণ্ডি ।

 

দরবার লৗগিৎ তাড়ামাকো 

                  রাজ ডাহার তালাতে

সেটের তেহঁ সেটেরাকো 

              রাজন গাড় ভিতৗরতে।

========≈== ᱞ ᱧ =============

৭।।

দাঁসায়  বঁগা

সুচাঁদ হাঁসদা

 

চাষ কৗমি রেনাঃ আলাও থাকাও ,

চাবাঃ তে আবনা লাঁগা ৷

ঞেঁল ঞেঁলতে সেটেরঃ আ ,

সাধের দাঁসায় বঁগা ৷

 

বৗদ বৗইহৗড় রে হুড়ু গৗছি ,

হৗলি হৗরয়ৗড় ঞেঁলঃ ৷

বৗইহৗড় ধারে গডা রেমা ,

গিদৗর বল ক খেলঃ ৷

 

গাডা মুডু খেত আড়েরে ,

কাসি দালায় দালায় ৷

লেওএর কদর গাওয়িচ লেকা ,

হিলৗঃ হয়লে হালায় ৷

 

লেগেম লেগেম গাডা রেমা ,

আতুঃ গাডা দাঃ  ৷

জিওয়ী রাড়েচ মনে ভুলৗঃ ,

সানা  কয়ঃ  কাঃ ৷

 

পুঁডগে ঞেঁলঃ কৗসি গেলে ,

গাডা আড়ে রে ৷

মাহারা কড়া গৗই ক গুপি ,

গাডা ধারে রে ৷

 

দুওয়ৗর দুওয়ৗর সেটেরঃ ক ,

দাঁসায় দাড়ান কড়া ৷

জনডরা গালাং কয় ক এমা ক ,

লৗটু কৗটিচ সেঁড়া ৷

 

নংকা কাতে পারম চালাঃ ,

সেতাঃ আয়ুপ আঁগা ৷

ঞেঁল ঞেঁলতে তিন করেচ ,

চাবাঃ দাঁসায় বঁগা  ৷

========≈== ᱞ ᱧ =============

৮।। 

ডুলুং গৗডি

সুরেন্দ্রনাথ হেমব্রম

 

ডুলুং গৗডি টিড়িঞ টিড়িঞ,

চালাঃ অৗঞ বুলুং কিরিঞ |

ইঞিঞ লাগায় ফাঁয় ফাঁয়,

গড়ম বাবা দ অৗডি বৗয় বৗয় |

 

ডুলুং গৗডি টিড়িঞ টিড়িঞ,

জিরৗউ বাং মিৎদিন বারসিঞ |

সানাম অকতো চালাঃ হৗজুঃ ডাহার গাতে,

ইঞ আর গড়ম বাবা বারহড় সাঁওতে |

 

========≈== ᱞ ᱧ =============

৯।।

টরডাং

দুর্গাচরণ মুরমু

  

ভাদর দাঁসাই জাপুদ জৗড়ি

লহদে সানাম দারে নৗড়ি।

ঝিপির ঝিপির বারপে মাহা

দাঃ তবাও জাহা তাহা।

বৗইদ বৗইহৗড় বহড় বহড়

নৗই আতোঃ আডি রগড়।

আতো দিশোম হড় দিকো

সাব কোওয়া ক হাকো।

লুলহি ডৗড়কা চড়গচ পুঠি

আড়গন আকো উটি সুটি।

কৗশি টরডাং মাৎ টরডাং

গঃ কাতে ঠেংগা ডাং।

অডাও আকো সিয়ৗড়া টরডাং

ঝৗলিঃ হাকো মটা বারুডাং।

আরহঁ জালাম মশারী গিরগিরি

হাকো কটা ঘানে হিরি।

========≈== ᱞ ᱧ =============

১০।। 

রেহেদ

সীতেন মাণ্ডি

 

বুজ কাতে বৗড়িচ্ কৗমি

তিশ হঁ আলম রিকৗয়

বেশ হর তে তাড়াম দ

আগাম বেনাঃ নাপায়।

 

হিংসকৗ লালচ্ গরব

আল আতাম মনে

তল সৗগৗই তপাগঃ

চিকৗম তাহেন হায়রে।

 

কুল তৗরুপ বুরু রে

চেঁড়ে চিপরুৎ দারে

দাঃ তালারে হৗকু রকচ্

তাহেন ক পান্তে পান্তে।

 

সুক দুক রৗস্কৗ রমজ

হৗটিঞ হাপটিঞ কাতে

সুপুর সুপুর দু দেলা

গড় গ পড় লৗগতি কৗমিরে।

 

সৗগৗই রেনাঃ রেহেদ্ বেধাও

জানাম লাহা খন এহব

যতন জগাও হারা বুরু

দুলহারা দুলৗড় মেশা।

========≈== ᱞ ᱧ =============

১১।।

নাপায় উইহৗর

সনৎ কুমার হাঁসদাঃ

             ইংদঞ হয়ুঃ নাপায় গিদৗর-
              মৗনমি সমাজ তালা!
             বৗড়িজ কৗমি যাহানাঃ গে
               জাঁগেয়াবন দেলা।

           রেঁগেজ-অরেজ মৗনমি যত,
            মেনাঃ কোয়া যাঁহা করে!
           দেবা কোয়ৗঞ , সেবা কোয়ৗঞ,
              যতন কোয়ৗঞ অনা পরে।

         ভেপে-গেদ রেয়াঃ কারধৗনি ক -
           রৗপুদ গিয়ৗঞ ইং মত।
          হুডিঞ মারাং মিৎ সাঁওতে,
           তাঁহেনাবন আব যত।

           বে-বৗড়িজাঃ কৗমি হরা -
        যাঁহায় ক-ক সিরজৗও এদা।
       দাবাও কোয়ৗঞ, দমন কোয়ৗঞ,
       চেৎ আকোয়ৗঞ নাপায় রাদা।

        এনতে রেঁহ নাপায় উইহৗর-
        দিশম তালাঞ পাসনাও এদা।

========≈== ᱞ ᱧ =============

১২।। 

ভাগরিথ মাঝি

দুগাই টুডু

 

তালড়ি রিনিচ্‌ ভাগরিথ মাঝি

     বাবাজি তাঁহে কানা,

দুক দাঁদের খনাঃ দোঃগো লৗগিৎ

     উনিয় উপেল লেনা।

 

সান্তাল পরগনা সেটেলমেন্ট কৗমি

    বাংগেয় কুশি আদা,

উনগে আদ খেড়ওয়াড় লাড়াওনা

     আচ্‌ এ এহব কেদা।

 

ধরম পাসনাও খৗতির তেদ

   ধরম গুরু লেনে,

সান্তাড় কোওয়াঃ হারখেৎ লাগায়

   লৗড়হৗই এহপ আনে।

 

গেল ইরৗল শায় এয়ায় গেল

     পোন সাল কতে

ভাগলপুর রেয়াঃ বাওসি রেদ

    বৗইসি হহ লেতে।

 

গেল বার শায় খনহঁ জৗসতি

   হড়কো সেটের এনা,

উনদ খাজনা বাং এমঃ বাবত

     হুকুম জৗরি আনা।

 

সিম শুকরি গজ খন সাহা

    সাফা সুতরৗ মেনা,

সানাম কগে শিখৗওনা কাথা

    আঁজম আকয় অনা।

 

উনিয়াঃ কৗমি হরা ঞেলতে

    সরকার বতর এনে,

উনি সাংতে চেলা তায়হঁ

       বেবাক কো সাবলেন হানে।

 

দিলমান সাহাস দিশম তালা

     উনরে দহ লেদে,

নেতার হঁকো সানাম কোগে

  একাল উইহৗর এদে।

 

ঁঁঁঁঁ=মুচৗৎ=ঁঁঁঁঁ