সিঁগি মাহা রেনাঃ সাকাম ‘চেরেচ্ আড়াং’ লেখা- ১৬০

 

“আবোওয়াঃ কাথা” গে উছৗনঃডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড় গে উছানঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান- ᱥᱩᱵᱩᱫᱤᱭᱟ.ᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ, ᱱᱰᱤ,  ᱨᱟᱢᱯᱚᱫᱚ ᱠᱤᱥᱠᱩ,  ᱠᱤᱥᱠᱤᱱᱫᱷᱟ   ᱢᱩᱨᱢᱩ, সুচাঁদ হাঁসদা, সিতেন মান্ডি, সমরলাল টুডু,   সনাতন টুডু, দুর্গাচরণ মুরমু , বাড়তাং  সরেন, দুগাই টুডু।

  

১।।

ᱫᱟᱜ ᱢᱟᱲᱟᱝ

ᱥᱩᱵᱩᱫᱤᱭᱟᱹ  ᱢᱩᱨᱢᱩ

ᱨᱤᱢᱤᱞ ᱮᱥᱮᱫ ᱥᱮᱨᱢᱟ
ᱠᱚᱭᱚᱜ ᱛᱩᱞᱩᱪ ᱠᱚᱭᱚᱜᱢᱟ
ᱧᱩᱛᱟᱹᱛ ᱦᱤᱡᱩᱜ ᱫᱷᱟᱹᱨᱛᱤ  ᱿

ᱮᱛᱟᱝ ᱦᱩᱞᱩᱭ ᱦᱚᱭ
ᱜᱷᱟᱱᱮ ᱜᱷᱟᱱᱮᱭ ᱦᱚᱦᱚᱭ
ᱥᱟᱡᱟᱣ ᱠᱟᱛᱮ  ᱵᱟᱹᱨᱛᱤ ᱿

ᱥᱤᱢ ᱥᱩᱠᱨᱤ ᱢᱮᱨᱚᱢ
ᱦᱤᱡᱩᱜᱠᱚ ᱢᱟᱲᱟᱝ ᱛᱟᱭᱚᱢ
ᱰᱤᱜᱞᱟᱹ  ᱰᱤᱜᱞᱤ ᱫᱟᱜ ᱿

ᱰᱷᱟᱸᱝᱻᱚᱜ  ᱦᱟᱱᱰᱮ ᱱᱟᱰᱮ
ᱨᱤᱢᱤᱞ  ᱛᱟᱹᱠᱤᱡᱽ  ᱥᱟᱰᱮ
ᱜᱟᱹᱭ ᱢᱤᱦᱩᱸ  ᱠᱟᱜᱼᱵᱟᱜ ᱿

========== ᱛ* ᱛ ==========

২।। 

ᱢᱟᱨᱥᱟᱞ ᱵᱟᱹᱛᱤ

ᱜᱳᱯᱮᱥᱣᱚᱨ ᱢᱟᱹᱱᱰᱤ

 

ᱢᱤᱫ ᱵᱟᱨ ᱯᱮ

ᱫᱮᱞᱟ ᱦᱤᱡᱩᱜ ᱯᱮ,

ᱤᱛᱩᱱ ᱟᱥᱲᱟ ᱪᱟᱞᱟᱜ ᱟᱵᱚᱱ ᱾

 

ᱯᱩᱱ ᱢᱚᱬᱮ ᱛᱩᱨᱩᱭ

ᱟᱹᱠᱤᱞ ᱦᱟᱨᱟ ᱵᱩᱨᱩᱭ,

ᱢᱟᱨᱥᱟᱞ ᱵᱟᱹᱛᱤᱭ ᱡᱮᱨᱮᱫᱽ ᱟᱵᱚᱱ ᱾

 

ᱮᱭᱟᱭ ᱤᱨᱟᱹᱞ ᱟᱨᱮ

ᱛᱟᱲᱟᱢ ᱪᱟᱞᱟᱜ ᱵᱟᱨᱮ,

 ᱱᱟᱯᱟᱭ ᱦᱚᱨᱮ ᱩᱫᱩᱜ ᱟᱵᱚᱱ   ᱾

 

========== ᱛ* ᱛ ==========

৩।।

ᱵᱷᱟᱫᱚᱨ  ᱫᱟᱸᱥᱟᱭ

ᱨᱟᱢᱯᱚᱫᱚ ᱠᱤᱥᱠᱩ

 

     ᱥᱮᱨᱢᱟ ᱪᱮᱛᱟᱱ

     ᱨᱟᱦᱞᱟ  ᱨᱤᱢᱤᱞ

    ᱩᱰᱟᱹᱣ  ᱵᱟᱲᱟᱭ

    ᱴᱟᱭᱟᱞ  ᱴᱟᱭᱟᱞ ᱿

 

    ᱛᱮᱦᱮ  ᱛᱮᱦᱮ

     ᱯᱳᱸᱰ ᱜᱮ ᱧᱮᱞᱚᱜ

     ᱛᱩᱞᱟᱹᱢ   ᱞᱮᱠᱟ

    ᱨᱟᱣᱟᱞ  ᱨᱟᱣᱟᱞ ᱿

 

          ᱠᱟᱥᱤ ᱜᱮᱞᱮ

     ᱫᱟᱸᱥᱟᱭ  ᱵᱷᱟᱫᱚᱨ

      ᱦᱚᱭ ᱛᱮ ᱦᱤᱞᱟᱹᱜ

      ᱞᱮᱭᱮᱨ  ᱠᱚᱫᱚᱨ ᱿

 

     ᱢᱚᱱᱮ  ᱦᱳᱭᱳᱜ

     ᱨᱟᱦᱞᱟ  ᱨᱤᱢᱤᱞ

     ᱜᱷᱟᱸᱥ  ᱪᱚᱴ ᱨᱮ

      ᱢᱮᱱᱟᱜ ᱫᱤᱯᱤᱞ ᱿

 

      ᱥᱤᱸᱜᱟᱹᱲ ᱛᱚᱨᱟ

     ᱡᱳᱞᱳᱜ  ᱟᱠᱚ

    ᱵᱟᱜᱡᱩᱱᱩ ᱠᱚ

    ᱡᱮᱢᱚᱱ ᱤᱯᱤᱞ ᱿

 

========== ᱛ* ᱛ ==========

৪।।

ᱧᱤᱫᱟᱹᱜ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

  

ᱧᱩᱦᱩᱢ ᱛᱚᱨᱟ ᱵᱟᱹᱭ ᱵᱟᱹᱭᱛᱮ

       ᱫᱷᱟᱨᱛᱤ ᱜᱚᱴᱟ ᱧᱩᱛᱟᱹᱛᱚᱜ,

ᱠᱟᱹᱢᱤ ᱠᱟᱥᱱᱤ ᱢᱟᱱᱢᱤ ᱟᱡᱚᱛᱮ

     ᱚᱲᱟᱜ ᱵᱟᱠᱷᱳᱞ  ᱵᱷᱤᱛᱟᱹᱨᱚᱜ  ᱾

 

ᱡᱤᱵᱽ ᱡᱤᱭᱟᱹᱞᱤ ᱥᱟᱱᱟᱢ ᱢᱟᱥᱮ

      ᱱᱤᱨᱞᱟᱹ ᱴᱷᱟᱸᱣᱨᱮ ᱵᱩᱨᱩᱢᱚᱜ,

ᱠᱤᱫᱳᱜ ᱫᱟᱠᱟ ᱤᱥᱤᱱ ᱵᱟᱥᱟᱝ

       ᱪᱩᱞᱦᱟᱹ ᱥᱮᱸᱜᱮᱞ ᱦᱩᱨᱩᱢᱚᱜ  ᱾

 

ᱯᱟᱹᱴᱷᱩᱭᱟᱹ ᱠᱚᱢᱟ ᱤᱛᱩᱱ ᱫᱩᱲᱩᱵ

        ᱠᱟᱢᱤᱭᱟᱹ ᱫᱩᱲᱩᱵ ᱡᱤᱨᱟᱜ ,

ᱥᱟᱹᱜᱤᱧ ᱦᱚᱲ ᱟᱥᱨᱟ ᱫᱤᱥᱟᱛᱮ

       ᱚᱲᱟᱜ ᱥᱮᱱᱜᱮᱠᱚ ᱵᱷᱤᱲᱟᱜ  ᱾

 

ᱠᱤᱫᱳᱜ ᱫᱟᱠᱟ ᱡᱚᱢᱵᱤ ᱠᱟᱛᱮ

       ᱜᱤᱛᱤᱡ ᱞᱟᱜᱤᱫ ᱪᱟᱸᱲᱚᱜ,

ᱦᱚᱨ ᱰᱟᱦᱟᱨ ᱵᱟᱹᱭ ᱵᱟᱹᱭᱛᱮ

     ᱧᱩᱛᱟᱛ ᱠᱟᱲᱟᱝ ᱱᱤᱥᱩᱱᱚᱜ  ᱾

 

     ᱧᱤᱫᱟᱹᱛᱤᱧᱟ ᱵᱟᱹᱭᱛᱮ ᱟᱫᱚ

ᱥᱟᱸᱜᱷᱟᱨ ᱵᱟᱲᱟᱭ ᱫᱷᱟᱨᱛᱤᱨᱮ,

ᱛᱷᱟᱠᱟᱣ ᱡᱤᱵᱽᱟ ᱡᱟᱯᱤᱫ ᱟᱫᱚ

               ᱩᱫᱩᱨ ᱟᱛᱮ ᱥᱟᱱᱛᱤᱨᱮ  ᱾

 

ᱪᱟᱱᱫᱳ ᱤᱯᱤᱞ ᱫᱟᱨᱮ ᱱᱟᱹᱲᱤ ᱱᱤᱡᱷᱩᱢ

ᱵᱟᱜᱡᱩᱱᱩ ᱵᱟᱫᱩᱲ ᱥᱟᱞᱟᱜ ᱜᱟᱛᱮᱜ,

ᱥᱟᱸᱰᱤᱭ ᱠᱩᱠᱲᱩᱭ ᱜᱷᱟᱲᱤᱪ ᱜᱷᱟᱲᱤᱪ

ᱧᱤᱫᱟᱹ ᱪᱟᱞᱟᱣ ᱯᱟᱨᱚᱢᱚᱜ ᱫᱤᱥᱟᱹᱛᱮ᱾

 

ᱟᱯᱟᱱ ᱟᱯᱤᱱ ᱚᱲᱟᱜ ᱴᱷᱟᱸᱣᱨᱮ

       ᱜᱤᱛᱤᱡ ᱠᱟᱛᱮ ᱠᱚ ᱠᱩᱠᱢᱩᱭ,

ᱯᱚᱦᱚᱨ ᱪᱟᱵᱟᱜ ᱫᱷᱟᱨᱛᱤ ᱛᱟᱞᱟᱨᱮ

ᱪᱮᱲᱮ ᱪᱤᱯᱨᱩᱫᱽ ᱥᱤᱢ ᱠᱩᱠᱲᱩᱭ  ᱾

 

ᱵᱟᱹᱭ ᱵᱟᱹᱭᱛᱮ ᱚᱠᱚᱛ ᱥᱟᱞᱟᱜ

                   ᱟᱫᱷᱤ ᱪᱟᱞᱟᱜ ᱧᱤᱫᱟᱹ  ,

ᱧᱤᱫᱟᱹ ᱟᱸᱜᱟᱜ-ᱟ ᱧᱩᱛᱟᱹᱛ ᱯᱷᱟᱨᱪᱟᱜ

ᱫᱤᱱ ᱛᱟᱭᱚᱢ ᱟᱨᱦᱚ ᱦᱤᱡᱳᱜ ᱧᱤᱫᱟᱹ  ᱾

 

========== ᱛ* ᱛ ==========

৫।। 

ভাদর  বঁগা

সুচাঁদ হাঁসদা

 

ভাদর বঁগায় জারগে জাপুত ,

মিত  এসা রডঃ রডঃ  ৷

দাঃ তেয় পেরেজ বাঁদ পুখরি ,

পেরেজ এ গাডা সডঃ ৷

 

বতর গে ঞেঁলঃ নৗই কৗসৗই ,

গাডা রে আতোঃ বান  ৷

গাডা দাঃ দ কিচিল কবদঃ , 

সাডেয়া   সান. সান   ৷

 

অড়াঃ দুওয়ৗর সিডগি বিডির ,

ছাটকা দুওয়ৗর খন লসত ৷

গৗই কাডা মিহু মেরম ,

আতিঞ বাংতে গস মসত ৷

 

রেঁগেচ হড়াঃ অড়াঃ দুওয়ৗর ,

সাতে সাড়িম ধদর পদর ৷

দাঃ জরঃ সিডৗর বাডার ,

সানামাঃ লহদঃ অদর ঝপর ৷

 

রেঁগেচ হড়াঃ দুখৗলি জিয়ন ,

লুকুত লুকুত আয়ুব আঁগা ৷

ঞেঁল ঞেঁলতে পারম চালাঃ ,

চাদর বাদর বাদর বঁগা  ৷

========== ᱛ* ᱛ ==========

৬।। 

জানাম অড়াঃ

সীতেন মাণ্ডি

আলে অড়াঃ হাসা রেনাঃ

বুসুপ তেলে দালপ

অভাব আনাট মেনাঃ রেহঁ

যত গেলে সাহপ।

 

গ বাবা বকো বয়হা

মিত তেলে তাহেন

বৗড়িচ কাথা অড়াঃ হড়

তিশ হঁ বাং লে মেমেন।

 

সহাগ দুলৗড় চেরেচ মেশা

সিবিল সৗগৗই লে জড়াও

মারাং কোওয়াঃ চাচো ডাহার

অকয় হঁ বাং লে এড়াও।

 

উনকু  উদুঃ সাহাও লাহা

আলে হঁ লে সেঁড়ায়

বাং কুলাঃ আনটাঃ রে হঁ

তিরপিত গেলে বুঝাও।

 

দুক বেড়ারে সুক লে পাঁজায়

হৗটিঞ হাপাটিঞ কাতে

হিংসকৗ লালচ লৗড়ৗই খৗপৗরি

এটেদালে মনে সিলপিঞ কাতে।

 

বাঞ খজা দলান কঠা

ভৗগি জমাঃ হর বাঁদে

সরগ লেকা সুক হেনাঃ

নোওয়া জানাম অড়াঃ রেগে।

========== ᱛ* ᱛ ==========

৭।।

পিতল্  টুকুজ্

সমরলাল টুডু

 

পিতল্   টুকুজ্   রৗসকৗয়   সদর্

ঞেঁলতে   আয়াঃ   চেহেরা,

মেনায়্   হেঁদে   হড়াং   হড়মকদ

আডি   তেৎগে   হেওয়েরা   ।

 

এসেল্   উসুল্   কেটেজ্   টুকুজ্

তহদতে   বায়   চৗটিজঃ,

লাতার্   গাঁতাক্   মৗনমি   মেনতে

হড়ঠেন্   বাংএ   লৗটিজঃ   ।

 

তাঁহেনাঞ   ইঞদ   কিঁষৗড়   কঠেন্

দামহঁ   ইঞাঃ   জৗসতি,

আপেয়াঃ   খনদ   ভেগার্    গেতিঞ

চেতান্   উতৗর্   বৗসতি   ।

 

চুঁডুঃ    তাড়াম্   টেরাতেয়্   কয়গ্

মুঢাত্   লেকা   গরব্,

হড়ক   সাঁওতে    বাংগেয়্   গাতেঃ

হাট্   পাতা   পরব্  ।

 

বায়  উইহৗর্  হড়দ  হড়গে

হেঁদে  বাংখান  এসেল্,

সানাম্  দারেগে  বুরুই  শোভায়্

তেরেল্  তারব্  হেসেল্  ।

 

পিতল্  টুকুজ্  নেতার্  যুগদ

বুনদি  দহয়েদাক বৗসকৗরে,

অনা  খনদ  হেঁদে  টুকুজ্

মেনায়্  আডি  রৗসকৗরে  ।

 

জিহল্  খানারে  তাঁহেন্  তাঁহেনতে

হিডির্  মেৎদাঃ  জরঃ,

সানতাড়্  সাঁওতারে  মেসাঃ  লৗগিৎ

মনে  তায়দ  হরবরঃ  ।

 

ইঞহঁ  আপেরেন  হড়গে  কানাঞ

আপেয়াঃ  তুকৗরেগে জানাম্,

গয়রা  পিতল্  হাসারেনাঃ  টুকুজ্

আবোদ মিৎগেয়াব  সানাম্  ।

 

ইসিন্  টুকুজ্  রৗসকৗতেয়  ছুরঃ

ঞেঁলতে পিতল্  টুকুজ্,

হটঃরে  বেধাও  পয়তা  বাবের্

ফাঁসিকাঠরে উকুজ্ বুকুজ্  ।

========== ᱛ* ᱛ ==========

৮।।

পেড়া বুডহি

সনাতন  টুডু

 

পেড়া বুডহি পেড়া বডহি

অকাতেদম  চালাঃ,

জারাল জারাল সিতুং কানা

চেদ রেদম জালাঃ ।

 

চালাঃ খানেম আলে অড়াঃ

ইদি মেয়ৗঞ নিতঃ,

সিঁগৗড় বেড়া জজ বুটৗ

আডি মজগে সৗতঃ ।

হলা  খনকিন  দুড়ুব  আকান

সাকাম বাহু জাঁওয়ায়,

তেহেঞ  দলে  বাপলা  কিনা

সিঁগৗড় অকতো দারায় ।

 

কম গেয়াকো বৗরিয়ৗৎ কমা

আলেগেলে  ঢের ,

আম লেকান বৗরিয়ৗৎ খানদো

রৗসকৗ হোয়োঃ ঢের ! ।

 

আমেম সাজাওঃ সাঁগাত কুড়ি

আলে সাঁগাত কড়া ,

রৗসকৗ  রমজ  আখড়া  তালা

আমদ  নাওয়া পেড়া ।

========== ᱛ* ᱛ ==========

৯।।

কৗশি গেলে

দুর্গাচরণ মুরমু

 

ভাদর দাঁসাই সিঞ চান্দো

আডি আটে সিতুং মাতো।

পুঁড় হেঁদে রিমিল  হুনাং

 আচকা সিঞ চান্দোয় দানাং।

বৗইদ বৗইহৗড় হোড়ো গৗছি

হৗড়য়ৗর ঞেল: লিলি বিছি।

খেত আড়ে মেলান গডা

বুরু ধাসনা সুটিয়ৗ গাডা।

কৗশি গেলে দালায় দালায়

হয়তে হিলৗঃ রৗস্কৗয় আলায়।

বাজার শাহার বাবু ভাইয়া

গৗডি খনকো ঞেল হাইয়া।

মনে  রাগ তাকো ঘানে

সেলফি চিতৗর লৗগিৎ হানে।

 ঝুড় দারে গাডা ঢিপি

রৗস্কৗতে উডৗও বাড়ায় লিপি।

ঝলারে চিলবিলাঃ ক হৗকু

সেরালি চেঁড়ে আকু পৗকু।

========== ᱛ* ᱛ ==========

১০।।

চাটঃ হাড়াম

বাড়তাং সরেন

 

লাচ্‌ লেধরা চাটঃ হাড়াম

    অৗডি গেচয় খাবা,

যাঁহায় ঞামা অনায় জমা

    সানাম গেচয় চাবা।

 

দাকা দকো এম লেখানে

    গোটা কারহায় চাবায়,

চেলাং পেরেচ্‌ উতুয় জমা

     যাহা গেকো এমায়।

 

কলাই আতা জঁডরা রাপাঃ

     খাডি আতেয় হৗম্বুড়,

যাঁহায় বাংএ এমায় রেদ

     বানার তি-তেয় রৗবুড়।

 

হাকো উতুম এমায় রেদ

  জাং হঁচয়ে তগজ্‌,

জিল উতুরে লাচ্‌ কাটা সাঁও

     রাসে রিবজ্‌ রবজ্‌।

 

গংঘা রকচ্‌ ঠটরো আতে

    চেৎহঁ বাচয় গিডিয়,

কাটকম ডিঁটাম কাটা সাঁওতে

     সানাম গেচয় সিপিয়।

 

দাঃ এমানে তেতাং লেখান

    কাঁডা রেগেয় জেঁবেৎ,

মঁড়ে-তুরুয় পেরেচ্‌ কাঁডা

   

মিৎ  ঘৗড়িচ্‌তেয় আঁজেৎ।

 

আলে আতো চাটঃ হাড়াম

     চেৎ এম মেতায় ভালা,

বাপলা ভাঁডান করে উনি

   নেঁওতা অৗডি জ্বালা।

========== ᱛ* ᱛ ==========

১১।।

কারু মাঝি

দুগাই টুডু

 

হাজারিবাগ উশরি নৗই ধারে

   শিরামপুর ঠাঁও হানে,

কারু মাঝি ধরম গুরু

    অনডে উপেল লেনে।

 

বঁগা থানহঁ হঁচো কাথায়

     তাঁহে কান তায়া,

বঁগা দাড়ে তেগে হড়াঃ

    হারকেৎ লাগালেৎ গেয়া।

 

মেৎতে অকয় বাকো ঞেঞেল

   ওনকো কাঁড়া কাঁড়ি,

আচ্‌গে আদয় ঞেল অচোকো

    বেঁগেৎ ফারচা সৗরি।

 

খড়দা খুড়দি কঁহ বেবাক

   বেসকো গেচোয় অনে,

দেওঘর দুমকা খনহঁ সান্তাড়

 হেচ্‌লেন ঘানে ঘানে।

 

রুপৗ মহর দ বার আনা

    এমায়রে হারে ফারে,

খেদের বেদের অলাঃ কাগজ

      এমগেয় উনদ বাড়ে।

 

কুনৗমি ঞিদৗ সাফা হড়কো

    উনগে জাওরা গদ

পাসেচ্‌ আঁদোড় গোটা এদকো

     ব্রিটিশ হুদিশ আদ।

 

উনরে সরকার জরমট কাতে

   উনিয় পাকড়াও আনা,

নোওয়া কাথা নেতার হঁথ

   আঁজম বাড়াঃ কানা।

 

======== ᱛমুচৗৎᱛ ========