সিঁগি মাহা রেনাঃ সাকাম ‘চেরেচ্ আড়াং’ লেখা- ১৫৯

 

“আবোওয়াঃ কাথা” গে উছৗনঃডিজিটাল ডেস্ক রে সানাম সিঁগি মাহা হিলোঃ গে গিদ্‌রৗ সাঁওহেদ্‌ বাখরা গিদৗর বৗউলি ‘চেরেচ্‌ আড়াং’ লেতাড় গে উছানঃ কানা। তায়ম দারাম নংকাগে আরহঁ সাঁগে অল ভেজায় তাবোন পে। অল ভেজায় রেনাঃ বুটৗ- Whatsapp- 8942955829 : E-mail Id:- abowagkatha@gmail.com।     

 

তেহেঞাঃ আখড়ারে যাঁহায় কো সেলেদ্‌ আকান- ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ,    ᱥᱩᱵᱩᱫᱤᱭᱟ.ᱢᱩᱨᱢᱩ, ᱜᱳᱯᱮᱥᱣᱚᱨ ᱢᱟ, ᱱᱰᱤ,   ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ, ᱨᱟᱢᱯᱚᱫᱚ ᱠᱤᱥᱠᱩ, ᱠᱤᱥᱠᱤᱱᱫᱷᱟ   ᱢᱩᱨᱢᱩ, বাড়তাং  সরেন, সুচাঁদ হাঁসদা, সনৎ কুমার হাঁসদাঃ, সিতেন মান্ডি, সমরলাল টুডু,   দুর্গাচরণ মুরমু , দুগাই টুডু।

  

১।।

ᱟ ᱭ ᱳ ᱵ ᱟ ᱵ ᱟ ᱟ ᱜ ᱫᱤᱥᱟᱹ

ᱥᱟᱨᱤ ᱫᱷᱚᱨᱚᱢ ᱦᱟᱸᱥᱫᱟ

 

ᱠᱚᱸᱦᱚᱸᱜ ᱠᱚᱯᱚᱜᱼ ᱠᱚᱸᱦᱚᱸᱜ ᱠᱚᱯᱚᱜ

              ᱦᱟᱥᱟᱭ ᱢᱟᱜᱟ ᱵᱟᱵᱟ,

ᱫᱤᱠᱤᱲ ᱫᱤᱠᱤᱲ ᱟᱭᱳᱭ ᱫᱤᱯᱤᱞ

               ᱦᱟᱥᱟᱜᱮ ᱵᱟᱝ ᱪᱟᱵᱟᱜ ᱾

 

ᱩᱢᱟᱹᱞᱟᱠᱤᱱᱻ  ᱡᱷᱟᱢᱟᱞᱟᱠᱤᱱ

                ᱟᱹᱠᱷᱤᱨ ᱦᱟᱠᱟ ᱰᱟᱠᱟ,

ᱩᱭᱦᱟᱹᱨᱟᱠᱤᱱᱼ ᱛᱮᱭᱟᱨᱟᱠᱤᱱ

              ᱪᱩᱯᱩᱫ ᱥᱩᱢᱩᱝ ᱫᱟᱠᱟ ᱾

 

ᱟᱭᱳ ᱥᱤᱠᱟᱹᱣ ᱻ  ᱵᱟᱵᱟ ᱯᱟᱲᱦᱟᱣ

                   ᱢᱚᱱᱮ ᱡᱤᱣᱤ ᱛᱚᱞᱚᱜ,

ᱦᱟᱨᱠᱮᱛ ᱥᱟᱥᱮᱛ ᱼ ᱛᱟᱞᱚᱢ ᱠᱟᱛᱮ

                   ᱥᱮᱬᱟᱭ ᱜᱤᱭᱟᱹᱧ ᱚᱞᱚᱜ ᱾

 

ᱞᱩᱴᱩᱨ ᱠᱷᱩᱴᱩᱨᱻ  ᱥᱚᱸᱥᱟᱨ ᱛᱟᱞᱟ

                 ᱛᱷᱤᱛᱤ ᱵᱟᱝᱤᱧ ᱯᱷᱮᱸᱜᱚᱲ,

ᱱᱟᱥᱮ ᱛᱮᱜᱮ   ᱢᱚᱱᱮᱧ ᱛᱤᱨᱯᱤᱫᱽ

                      ᱮᱠᱟᱞ ᱜᱮ ᱵᱟᱹᱧ ᱪᱮᱸᱫᱚᱲ ᱾

 ==============ᱞ ᱧ=============

 ২।।

ᱦᱟᱹᱨᱭᱟᱹᱲ

 ᱥᱩᱵᱩᱫᱤᱭᱟᱹ    ᱢᱩᱨᱢᱩ

ᱵᱟᱹᱫᱽ ᱵᱟᱹᱭᱦᱟᱹᱲ ᱞᱤᱞᱤᱵᱤᱪᱷᱤ
ᱨᱚᱦᱚᱭ ᱨᱟᱠᱟᱵᱽ ᱦᱳᱲᱳᱜᱟᱹᱪᱷᱤ ।

ᱰᱟᱺᱬᱠᱟᱹ  ᱯᱩᱴᱷᱤᱠᱚ ᱪᱷᱤᱞᱵᱤᱞᱟᱹᱜ
ᱮᱛᱟᱝ  ᱦᱟᱹᱨᱭᱟᱹᱲ  ᱢᱚᱡᱜᱮᱦᱤᱞᱟᱹᱜ ।

ᱟᱲᱮᱨᱮᱢᱟ ᱜᱷᱟᱸᱥᱠᱚ  ᱟᱹᱛᱤᱧ
ᱱᱤᱡᱷᱩᱢ ᱱᱤᱪᱳᱞ ᱥᱟᱲᱟᱥᱟᱛᱤᱧ।

ᱱᱟᱺᱲᱤ ᱜᱷᱟᱸᱥᱢᱟ ᱞᱟᱸᱫᱟᱭᱞᱮᱠᱟ
ᱡᱮᱞᱮᱧ ᱡᱮᱞᱮᱧ  ᱡᱚᱠᱷᱟᱡᱚᱠᱷᱟ ।

ᱚᱛ ᱥᱮᱨᱢᱟ  ᱥᱟᱺᱜᱤᱧᱡᱚᱯᱚᱜ
ᱦᱟᱹᱨᱭᱟᱹᱲ ᱢᱩᱪᱟᱹᱫ ᱢᱮᱫᱨᱚᱯᱚᱜ ।

ᱛᱤᱱᱟᱹᱜ ᱦᱟᱹᱨᱭᱟᱹᱲ ᱛᱤᱱᱟᱹᱜᱢᱚᱡᱽ
ᱦᱟᱹᱨᱭᱟᱹᱲ  ᱵᱮᱜᱚᱨ ᱵᱟᱹᱱᱩᱜᱥᱚᱡᱽ ।

ᱦᱟᱹᱨᱭᱟᱹᱲ ᱦᱟᱹᱨᱭᱟᱹᱲ ᱫᱷᱟᱹᱨᱛᱤᱦᱟᱹᱨᱭᱟᱹᱲ
ᱢᱚᱡᱽᱜᱮ ᱧᱮᱞᱚᱜ     ᱵᱟᱹᱫᱽᱼᱵᱟᱹᱭᱦᱟᱹᱲ  ।।

==============ᱞ ᱧ=============

৩।।

ᱚᱠᱛᱚ

ᱜᱳᱯᱮᱥᱣᱚᱨ ᱢᱟᱹᱱᱰᱤ

  

ᱚᱠᱛᱚ ᱪᱟᱞᱟᱜ

ᱵᱮᱲᱟ ᱥᱟᱞᱟᱜ ᱾

 

ᱚᱠᱛᱚ ᱠᱟᱹᱢᱤ

ᱦᱩᱭᱩᱜ ᱫᱟᱹᱢᱤ ᱾

 

ᱦᱟᱯᱮᱱ ᱞᱟᱹᱜᱤᱫ

ᱟᱹᱰᱤ ᱵᱷᱟᱹᱜᱤᱜ ᱾

==============ᱞ ᱧ=============

৪।।

ᱟᱹᱠᱷᱤᱨ ᱞᱟᱹᱜᱤᱫ

ᱮᱵᱷᱮᱱ ᱠᱩᱭᱞᱤ ᱥᱚᱨᱮᱱ

  

ᱥᱟᱱᱟᱢ ᱠᱚᱠᱚ ᱞᱟᱦᱟ ᱭᱮᱱᱟ

 ᱟᱢ ᱫᱚ ᱛᱤᱥᱮᱢ ᱞᱟᱦᱟᱜ ᱾

 ᱛᱟᱭᱚᱢ ᱨᱮᱜᱮ ᱢᱮᱱᱟᱢ ᱜᱮᱭᱟ

 ᱮᱱᱦᱚᱸ ᱟᱨᱦᱚᱢ ᱨᱟᱨᱟᱜ ᱾

 ᱱᱤᱛ ᱜᱮ ᱡᱩᱫᱤᱢ ᱨᱟᱨᱟᱜ ᱠᱟᱱᱟ

 ᱦᱟᱯᱮᱱ ᱪᱮᱫ ᱮᱢ ᱪᱤᱠᱟᱹᱭ ᱾

 ᱥᱟᱱᱟᱢ ᱠᱚᱠᱚ ᱞᱟᱦᱟ ᱪᱟᱞᱟᱜ

 ᱵᱟᱝ ᱛᱟᱸᱦᱮᱱᱟ ᱩᱯᱟᱹᱭ ᱾

 ᱚᱱᱟ ᱛᱮᱜᱮᱧ ᱱᱮᱦᱚᱨ ᱟᱢᱟ

 ᱱᱤᱛ ᱫᱚ ᱟᱞᱚᱢ ᱨᱟᱨᱟᱜ ᱾

 ᱫᱤᱥᱟᱹᱭ ᱢᱮᱥᱮ ᱟᱹᱠᱷᱤᱨ ᱞᱟᱹᱜᱤᱫ

 ᱛᱚᱵᱮ ᱟᱱᱟᱢ ᱞᱟᱦᱟᱜ ᱾

==============ᱞ ᱧ=============

৫।। 

ᱡᱚᱨᱚ ᱵᱟᱲᱮ

ᱨᱟᱢᱯᱚᱫᱚ ᱠᱤᱥᱠᱩ

  

 ᱡᱷᱟᱨᱱᱟ ᱟᱲᱮ

ᱡᱚᱨᱚ  ᱵᱟᱲᱮ

ᱛᱤᱸᱜᱩ ᱢᱮᱱᱟᱜ

ᱥᱮᱫᱟᱭ ᱠᱷᱚᱱᱟᱜ ᱿

 

ᱟᱭᱩᱵ ᱛᱚᱨᱟ

ᱪᱩᱨᱟᱹᱢᱟᱨᱟ

ᱵᱤᱨ ᱪᱮᱸᱲᱮ ᱠᱚ

ᱦᱮᱡ ᱡᱟᱣᱨᱟᱜ᱿

 

 

ᱪᱮᱨᱚ ᱵᱮᱨᱚ

ᱟᱸᱡᱚᱢ ᱦᱤᱡᱩᱜ

ᱪᱚᱦᱟᱱ ᱠᱚᱟ

ᱵᱩᱨᱩ ᱥᱚᱠᱲᱟ ᱿

==============ᱞ ᱧ=============

৬।।

ᱟᱞᱮ  ᱫᱤᱥᱚᱢ

ᱠᱤᱥᱠᱤᱱᱫᱷᱟ   ᱢᱩᱨᱢᱩ

  

ᱫᱷᱤᱨᱤ ᱫᱟᱨᱮᱛᱮ ᱮᱥᱮᱫ ᱟᱠᱟᱱ

            ᱟᱞᱮ ᱫᱤᱥᱚᱢ ᱜᱚᱴᱟ

ᱦᱟᱹᱨᱤᱭᱟᱹᱲᱜᱮ ᱧᱮᱞᱚᱜ ᱦᱟᱱᱮ

ᱵᱤᱨᱵᱩᱨᱩ ᱥᱟᱱᱟᱢ ᱴᱚᱴᱷᱟ ᱾

 

ᱫᱟᱨᱮ ᱱᱟᱹᱲᱤᱛᱮ ᱮᱥᱮᱫ ᱫᱟᱱᱟᱝ

             ᱦᱚᱨ ᱰᱟᱦᱟᱨ ᱛᱟᱞᱮ

ᱫᱟᱜ ᱡᱟᱹᱯᱩᱫ ᱥᱤᱛᱩᱝ ᱮᱞᱟᱝ

             ᱦᱤᱡᱳᱜ ᱥᱮᱱᱚᱜ ᱟᱞᱮ  ᱾

 

ᱠᱷᱮᱛ ᱵᱟᱹᱫᱽᱨᱮ ᱪᱟᱥ ᱟᱵᱟᱫᱟ

       ᱜᱚᱰᱟ ᱵᱤᱴᱷᱟᱨᱮ ᱥᱟᱱᱟᱢ

ᱦᱟᱹᱨᱤᱭᱟᱹᱲ ᱜᱟᱹᱪᱷᱤ ᱞᱟᱸᱫᱟᱭ ᱞᱮᱠᱟ

              ᱦᱤᱡᱳᱜ ᱢᱮᱥᱮ ᱧᱮᱞᱟᱢ  ᱾

 

ᱚᱠᱟ ᱴᱷᱮᱱ ᱫᱚ ᱢᱮᱞᱟᱱ ᱴᱟᱱᱰᱤ

        ᱰᱤ ᱰᱩᱝᱨᱤ ᱜᱟᱰᱟ ᱰᱷᱚᱲᱟ

ᱪᱮᱲᱮ ᱪᱤᱯᱨᱩᱫᱽ ᱡᱤᱵᱽ ᱡᱤᱭᱟᱹᱞᱤ

             ᱨᱟᱹᱥᱠᱟᱹ ᱜᱮ ᱨᱟᱜ ᱨᱚᱲᱟ  ᱾

 

ᱟᱥᱟᱲ ᱥᱟᱱᱨᱮ ᱱᱟᱹᱭ ᱜᱟᱰᱟ

               ᱵᱚᱦᱚᱲ ᱵᱚᱦᱚᱲ ᱟᱛᱳᱱ

ᱪᱮᱦᱮᱞ ᱪᱮᱯᱮᱞ ᱰᱚᱭᱞᱟᱝ ᱟᱛᱮ

          ᱦᱟᱲᱟᱢ ᱜᱤᱫᱽᱨᱟᱹ ᱛᱳᱯᱳᱱ  ᱾

 

ᱥᱤᱛᱩᱝ ᱨᱮᱫ ᱥᱤᱛᱩᱝ ᱜᱮᱭᱟᱭ

            ᱨᱟᱵᱟᱝ ᱜᱮᱜᱮᱨ ᱞᱮᱠᱟ

ᱡᱟᱹᱯᱩᱫ ᱫᱤᱱ ᱫᱟᱜᱛᱮ ᱞᱚᱥᱚᱫ

            ᱦᱚᱨ ᱰᱟᱦᱟᱨᱮᱢ ᱧᱮᱞᱟ  ᱾

 

ᱦᱟᱴ ᱯᱟᱛᱟ ᱯᱚᱨᱚᱵ ᱠᱚᱢᱟ

               ᱟ ᱰ ᱤᱞᱮ ᱪᱮᱨᱮᱪ ᱯᱟᱨᱚᱢ

ᱫᱩᱠ ᱥᱤᱠᱛᱮ ᱫᱤᱱ ᱠᱚᱢᱟ

     ᱪᱟ ᱞᱟ ᱜ ᱠᱟᱱᱟ ᱞᱟ ᱦᱟ ᱛᱟ ᱭᱚᱢ  ᱾

 

==============ᱞ ᱧ=============

৭।।

জ্বালা পুরীরে

বাড়তাং সরেন

 

বাংমা কাথায় লৗই এদাকো

গড়ম বাবা তাকো,

দিকু পুশিরেন চেলে হঁ,

বাকো তাঁহেলেন তাকো ।

 

নওয়া আবো ভারত দিশম

সোনা লেকান দিশম

চাই তাঁহেকান, চাম্পা নাগার

আর হঁ খায়রী দিশম ।

 

হিহিড়ি পিপিড়িম মে-না

জানাম ঠাঁও দ কানা

অণ্ডে খন দ সাসাং বেডা

তায়ম দারাম সে-না ।

 

বীর বুরুতে সাজাও লেনা

সোনা হুড়ু গেলে এনা

আবো দিশম লুটুচ লৗগিৎ 

বৗইরীয় সেটেরেনা ।

 

আর্য পৗহিল বলকাতে

আবো দিশম হামেট কাতে

ক্ষেত হাসা আর তিরলৗ হপন

সানামগে মি-মিৎতে ।

 

দিশম তাবন রফায় লৗগিৎ

তিরলৗ ভরম বাঞ্চাও লৗগিৎ 

হুদুড় রাজায় লৗড়হৗয় লেনা

জৗতি বাঞ্চাও লৗগিৎ।

 

হুন পাঠান আর মোগল রাজ

তায়নম দ ব্রিটিশ রাজ

মি-মিৎতেকো নাশাও কেদা

আদিবাসীওয়াঃ রাজ !

 

সোনা দিশম বীর বুরুতে 

পেরেচ হুড়ু চাউলে আতে 

সানামগেকো হামেট কেদা

চালাক বুর্ধি আতে।

 

নিতং হায়রে কংকা লেকা

ককয় হা-ঘুড়িয়ৗ লেকা,

জানাম আয়ো বাবা তালা

টুয়ৗর গিদরৗ লেকা  !

 

নওয়া কাথা দুক জ্বালারে

 সদরাঞ ইঞ দ অকারে !

জানাম দিশম তালারে হায়,

ইঞ জ্বালা পুরীরে !

==========ᱞ ᱧ===========

৮।।

সান চাঁদো

সুচাঁদ হাঁসদা

 

হড় হপন দ ঢের তেত গে ,

চাষীবৗসি  হড়  ৷

সান বঁগা খেত বৗদরে ,

তাঁহেন ক কামি জহড় ৷

 

বাবা হড়দ খেত ক সিয়া ,

আর ক লাগা আড়ে ৷

আয়ো হড়ক তুত রহয়া ,

ঞেঁল জং সারে সারে ৷

 

খেত বৗদরে বুরুত বুরুত ,

কামি ক রৗসকৗ সালাঃ ৷

সেতাঃ খনাঃ সিঁগৗড় গদঃ ,

এনহঁ বাকো আলাঃ ৷

 

বৗদ বৗইহৗড়রে হড়তে পেরেচ ,

বুঝৗঃ রৗসকৗ গরব ৷

আয়ো হড়াঃ সেরেঞ দুরৗংতে ,

বুঝৗঃ যেমন পরব ৷

 

লসত অদর ঝপর বাবা হড় ,

যেমন বায়ার কাডা ৷

আয়ো হড় ক তুত রহয়া ,

বাকো সঝে ডাঁডা ৷

 

নিংকৗ কাতে সান মুচৗত তে ,

তুত রহয় ক চাবায় ৷

চাষ রেনাঃ সারেচ কৗমি ,

লেগেম লেগেম ক লাগায় ৷

===========ᱞ ᱧ===========

৯।।

সিবিল লাঁদা

 সনৎ কুমার হাঁসদাঃ

রিমিল চেতান চাঁদয় লাঁদায়
লাঁদায়াক তিনৗঃ ইপিল,
বুরু জাপাঃ ঝারনায় লাঁদায়,
ঞেলতে তিনৗঃ সিবিল!

হৗঁড়য়ৗর ঘাসরে শিশির এ লাঁদায়
ঞামতে বেড়া আহলা,
হেঁও চেতান গিদৗরে লাঁদায়,
ঞামতে জম চাহলা!

থপে থপে বাহাক লাঁদায়
লাফাং দারে ডৗররে,
লৗয় ইং পেসে অকয়াঃ লাঁদা -
সানাম খনাঃ সরেশ রে?

বাংপে বাডায়! লৗয়দিং তবে
জানাম আয়ু আঃ লাঁদা!
আডিগে সিবিল! আডিগে রমজ!
মনে জিউয়ি গে আদাঃ!!

==========ᱞ ᱧ===========

১০।।

ভাদর বঙ্গা

সীতেন মাণ্ডি

 

ভাদর বঙ্গা জৗপুদ

হাসা অড়াঃ রাপুদ।

ঘঙ্ঘা কাটকম হৗকু

বাং ক তাহেন উকু।

হেঁদে পুঁড় রিমিল

উডৗঃ পিরিল পিরিল।

ঞেলঃ কৗশি বাহা

হয়তে গৗদুচ্ দেলা।

হৗড়িয়ৗর দারে নৗড়ি

লাঁদায় ধৗরতি পুরি।

বাড়গে গাদার জঁডরা

রাপাঃ সেঙ্গেল আঁগরা।

ধুরপু কানা সিরগিটি

আড়াঃ সিদ্ হপন বিটি।

ইঁদে ছাতা কারাম

যত গে সৗগুন দারাম।

ভাদর কেটেজ্ সিতুং

সিঞ চাঁদোয় উয়ুং।

জমাঃ ঞুআঃ চাবাঃ

রেঁগেচ্ নাচার হড়াঃ।

=========ᱞ ᱧ==========

১১।।

জুগুৎ্ দাড়ে

সমরলাল টুডু

 

আমদ ইপিল্ সেরমা ইপিল্

দিনৗম্ গেচম্ জুলুঃ,

লাঁগা থাকাও জৗপিদ্ হিড়িঞ

চেদাঃ বাংএম ভুলুঃ   ।

 

হুডিঞ অড়াঃ সাঁগে বয়হা

সুলুক নিরৗই জিয়ন্,

সারা ঞিঁদৗম্ কৗমি আমদ

সেদায় রিনিজ্ পিয়ন্   ।

 

আমাং চেতান ভারয়া মেনাঃ

ধৗরতি রেনাং ভৗলৗই,

রেঁগেজ্ তেতাং ছুটৗও মেনাম্

সানাম হড়ক লৗলৗই   ।

 

জোলোঃ ইপিল বহঃরে দিপিল

লাফার্ লাফার্ সেরমা,

অনকা তেড়ং সিঞ মারশাল

তাড়াম্ কানায় বেরমা   ।

 

বয়হা বয়হা ইকিল্ সিকিল্

বৗনুঃ লৗড়হৗই কৗফৗরি,

ধৗরতী রিনিজ্ সিরোম্ দাঁধে

আমদ সুলুক্ বেপারি   ।

 

কৗমি রেগেতো রৗসকৗ আমাং

কৗমি রেনাং কুড়ৗই,

রেঁগেজ্ রাবাং দুক্ হারকেত্

বাড়গে লাতার্ দাড়ায়   ।

 

সেরমা চেতান বিলিৎ্ বালাত্

হুডিঞ হুডিঞ মারশাল্,

বয়হা জুগুৎ্ দুঁগুদ্ দুঁগুদ্

গোটা ধৗরতিয়ে পারশাল।

 

ধৗরতি পুরিরে নাচার্ নিধান

একলা তাঁহেন খানেম্,

জুগুৎ কাতেদ্ লাহা সেনোঃমে

তাঁহেন আমাং এনেম্।

==========ᱞ ᱧ==========

১২।। 

আলে আতো

দুর্গাচরণ মুরমু

    

আলে আতো কুয়ৗরী পারোম

সারজম বির ভিতির তালা,

গাডা ডভাঃ লসদ ডাহার

হিজুঃ সে আডি জালা।

 

সুর সুপুর দিকু আতো

ঢালাই তাকো জতো কুলহি,

বৗইসাও আকান দা: টাঙ্কি

ঞামকো ঞুদৗ দুয়ৗর কুলহি।

 

জাপুৎ দিন কুয়ৌরী নৌই

চেহেল চেপেলঃ সান বঙ্গা,

নৗই ঘাটরে ব্রীজ বাংতে

নেতারহঁ চালাঃমাৎ ঢংগা।

 

আলে আতোরে মেনাঃলে

সান্তাড় মুডৗ আদিবাসী,

বারয়া অড়াঃ বাদ কাতে

জতো গেত রেঁগেচ চাষী।

 

দাঃজৗড়ি আকাল রেদ

চালাঃ আকো রাঁচী-টাটা,

আদম কদো চেন্নাই সুরাট

জামুড়িয়া চিমনী ইটৗ ভাটা।

 

মোড়রে মেনাঃ দিকু আঃ

সুনুম বুলুং লুকড়ী দকান,

সান্তাড় মুডৗ জতো খইদৗর

দিকু ক বেনাও গৗডি মাকান।

 

সেতাঃ সিঁগৗড় দিনগে মোড়

চা দকানরে  লাগাঃ মেলা,

বাপে পৗতিয়ৗঃ কান খান

হেচ কাতে ঞেলাপে দেলা।

==========ᱞ ᱧ===========

১৩।।

মাতলা সাঁওতাল

দুগাই টুডু

 

মিৎ গেল আরে শায় পেগেল সালরে

   সেপ্টেম্বর অক্টোবর কতে,

দিনাজপুর আইন অমান্য উনরে

       এহব লেনা এতে।

মাতলা সাঁওতাল হঁচো সৗরি

        উনরে সেলেৎ লেনা,

হড়াঃ ভৗলৗই দোঃগে বাবত

   হুদিশ লেৎগেয় অ্না।

 

 হড় হপন কো হহ কাতেদ্‌

     আয়মা জাওরা আনে,

উনরে গেথ উনকো তালা

    গালচ লেদায় হানে।

 

লৗইলেৎ ভারত জানাম দিসোম

      ব্রিটিশ বৗইরি কানা,

খাজনা চৌকিদার ট্যাকস গে পৗরি

       বাংগে এমা অনা।

আঃসার কৗপি টেঁগচ্‌ আতে

   দমেল দমেল হড়কো,

সামাং দাপারাম জাঁগে দারাম

    পুলিশ সঁগে থরগে।

 

বীর বাটাওয়াঃ দিলমান কৗমি

   উনিয় দহ লেদে,

নেতার আডি সান্তাড় কোদ

    একাল উইহৗর এদে।

========== মুচৗৎ ===========